ព្រឹទ្ធសភាអនុម័តច្បាប់បោះឆ្នោតចំនួន៤ដែលរងការរិះគន់ដ៏ចម្រូងចម្រាស
2017.10.19
លោក ម៉ម ប៊ុននាង សមាជិកព្រឹទ្ធសភាគណបក្សប្រជាជនកម្ពុជា និងជាអ្នកនាំពាក្យព្រឹទ្ធសភា ថ្លែងក្រោយកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា នាវិមានព្រឹទ្ធសភា នៅថ្ងៃទី៣១ ខែសីហា ឆ្នាំ២០១៦។
RFA
ព្រឹទ្ធសភា សម្រេចអនុម័តច្បាប់ចំនួន ៤ ដ៏ប្រញាប់ដែលទាក់ទិននឹងការបោះឆ្នោត ក្រោយពីរដ្ឋសភាដែលសុទ្ធសឹងតែជាសមាជិកបក្សកាន់អំណាច បោះឆ្នោតគាំទ្រ មិនដល់មួយផ្សែងធូបផង។ ច្បាប់ទាំងនេះ ដែលត្រូវរងការរិះគន់ថា ធ្វើតាមបំណងរបស់លោក ហ៊ុន សែន គឺជាផ្នែកមួយ ដែលអាចជួយជំរុញឲ្យតុលាការកំពូល ឈានទៅរំលាយបក្សប្រឆាំង ចេញពីឆាកនយោបាយ ហើយអាសនៈ ទាំង ៥៥អាសនៈ របស់បក្សសង្គ្រោះជាតិនៅក្នុងរដ្ឋសភា និងត្រូវហែកចែកគ្នាស៊ី ទៅតាមលំដាប់។
ច្បាប់ទាំង ៤ទាំងនេះ ដែលគណៈកម្មាធិការអចិន្ត្រៃយ៍ នៃរដ្ឋសភាស្នើឲ្យកែមាត្រាមួយចំនួន ក្នុងបំណងបើកផ្លូវឲ្យតុលាការកំពូល រំលាយបក្សប្រឆាំង គឺនៅរង់ចាំតែការសម្រេចចុងក្រោយមួយវគ្គទៀត ពីក្រុមប្រឹក្សាធម្មនុញ្ញប៉ុណ្ណោះ ច្បាប់នេះអាចនឹងអនុវត្តទៅដោយពុំមានឧបសគ្គអ្វីឡើយ ដូចការរិះគន់ថា ធ្វើទៅតាមការចង់បានរបស់លោកនាយករដ្ឋមន្ត្រី ហ៊ុន សែន។
សេចក្ដីប្រកាសព័ត៌មាន របស់ព្រឹទ្ធសភា នៅថ្ងៃទី១៩ ខែ តុលា ឲ្យដឹងថា ច្បាប់ទាំងបួន រួមមានច្បាប់ស្ដីពីការបោះឆ្នោតជ្រើសតាំងតំណាងរាស្ត្រជាដើម ត្រូវបានសមាជិកព្រឹទ្ធសភាពិនិត្យ និងអនុម័តរួចហើយ។
បើទោះជាបែបណា សេចក្ដីសម្រេចទាំងនេះ ត្រូវរងការរិះគន់ពីអ្នកឃ្លាំមើល ពីការវិវត្តន៍ស្ថានការណ៍នយោបាយថា ជាសេណារីយ៉ូ ដែលបក្សកាន់អំណាច កំពុងរៀបចំនេះនឹងធ្វើឲ្យកម្ពុជា ត្រូវធ្លាក់ក្នុងស្ថានភាពវិបត្តិនយោបាយកាន់តែធ្ងន់ធ្ងរ។
អតីតឧត្ដមក្រុមប្រឹក្សាព្រះមហាក្សត្រលោក សឺន ស៊ូប៊ែរ យល់ឃើញថា ច្បាប់ដែលបានតាក់តែង និងធ្វើវិសោធនកម្មសាចុះសាឡើង ក្នុងគោលបំណងដើម្បីសម្លាប់ដៃគូ នយោបាយ គឺជាច្បាប់ដែលមានលក្ខណៈអាក្រក់បំផុត។ លោកបន្តថា គេហាក់មិនរំពឹងសោះថា ច្បាប់ដែលត្រូវឆ្លងក្រុមប្រឹក្សាធម្មនុញ្ញ ចុងក្រោយទៀតនេះ អាចនឹងមានការពិនិត្យដោយល្អិតល្អន់ណាស់ ព្រោះសមាជិកភាគច្រើន នៅក្នុងអង្គការកំពូលផ្នែកច្បាប់មួយនេះ គឺសុទ្ធសឹងតែត្រូវជាមួយបក្សកាន់អំណាច។
ស្របពេលច្បាប់ដែលធ្វើវិសោធនកម្ម ក្នុងទិសដៅរំលាយបក្សប្រឆាំង ហើយអាសនៈ ដែលបានពីការរំលាយបក្សប្រឆាំងនេះ នឹងត្រូវចែកគ្នានោះ ដោយឡែក សហភាពអន្តរសភា ហៅកាត់ថា IPU ដែលតំណាងឲ្យ ១៧៣ប្រទេស នៅលើពិភពលោក បានចោទសួរជាច្រើនសំណួរ ទៅសមាជិកតំណាងរដ្ឋាភិបាល ដែលចូលរួមប្រជុំកំពូល នៅពេលនេះ។ ស្ថាប័នអន្តរជាតិមួយនេះ ក៏ប្ដេជ្ញាដែរថា និងកត់ត្រារាល់ខ្លឹមសារ ហើយសន្យានឹងតាមដានដោយយកចិត្តទុក ជុំវិញស្ថានការណ៍នេះបន្តទៀត មុននឹងធ្វើសេចក្ដីចិត្តបន្ថែម។
លោកបណ្ឌិត ឡៅ ម៉ុងហៃ អ្នកវិភាគនយោបាយ បានហៅច្បាប់ដែលតាក់តែង និងធ្វើវិសោធនកម្មដោយឯកបក្ស របស់បក្សកាន់អំណាចនេះថា មិនមានតម្លៃគតិយុត្តិនោះឡើយ។ លោកបន្តថា ច្បាប់ដែលធ្វើឡើងមានកំហុស ហើយព្យាយាមឲ្យព្រះមហាក្សត្រ ឡាយព្រះហត្ថលេខា គឺមានន័យស្មើនិងកុហកព្រះមហាក្សត្រ។ ជាងនេះទៀត លោកបណ្ឌិត ឡៅ ម៉ុងហៃ អះអាងថា លោកនឹងមិនស្ងៀមឡើយ ក្នុងស្ថានភាពចំពោះមុខកាន់តែអាក្រក់ទៅៗបែបនេះ។ លោកបន្តថា ដើម្បីអាចទប់ស្កាត់សភាពការណ៍នេះបាន លុះត្រាទូលថ្វាយព្រះមហាក្សត្រ សូមឲ្យព្រះអង្គកុំឡាយព្រះហត្ថលេខាលើច្បាប់ ដែលលោក ឡៅ ម៉ុងហៃ យល់ឃើញថា ជាច្បាប់ដែលមិនបម្រើឲ្យប្រយោជន៍សាធារណៈ។
ក្នុងពេលស្ថានការណ៍នយោបាយ កាន់តែតានតឹងឡើងៗ គេសង្កេតឃើញថា ក្រុមកងយោធាចំណុះគ្រប់អង្គភាពឯណេះវិញ ក៏កំពុងប្រកាសជំហរគាំទ្រ និងប្រឆាំងដាច់ខាតដែរ រាល់ការប៉ុនប៉ង ធ្វើរឿងអាក្រក់ដាក់លោក ហ៊ុន សែន។ អ្នកវិភាគនយោបាយ មើលឃើញថា ច្បាប់ដែលបានអនុម័តហើយនេះ គេហាក់មានសង្ឃឹមតិចណាស់ ក្នុងការទប់ស្កាត់។ ច្បាប់ដែលតាក់តែងឡើង គឺសុទ្ធសឹងតែជាមនុស្សរបស់បក្សកាន់អំណាច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ