តុលាការ​ខេត្ត​សៀមរាប​កាត់ទោស​ជន​ពិការ​ម្នាក់​ឲ្យ​ជាប់​ពន្ធនាគារ​ ១៨​ខែ រឿង​រិះគន់​របប​ក្រុង​ភ្នំពេញ

ដោយ មួង ណារ៉េត
2019-10-31
អ៊ីម៉ែល
មតិ
Share
បោះពុម្ព
លោក ភុន យុទ្ធ វ័យ​ ៣៦​ឆ្នាំ ដែល​​ពិការ​ជើង​ពី​កំណើត ត្រូវ​បាន​​សាលា​ដំបូង​ខេត្ត​សៀមរាប កាត់​ទោស​ឲ្យ​ជាប់​ពន្ធនាគារ ១​ឆ្នាំ​កន្លះ ក្នុង​សំណុំ​រឿង​ញុះញង់​ឲ្យ​មាន​ការ​រើសអើង និង​ជេរ​ប្រមាទ​សាធារណៈ តាមហ្វេសប៊ុក។
លោក ភុន យុទ្ធ វ័យ​ ៣៦​ឆ្នាំ ដែល​​ពិការ​ជើង​ពី​កំណើត ត្រូវ​បាន​​សាលា​ដំបូង​ខេត្ត​សៀមរាប កាត់​ទោស​ឲ្យ​ជាប់​ពន្ធនាគារ ១​ឆ្នាំ​កន្លះ ក្នុង​សំណុំ​រឿង​ញុះញង់​ឲ្យ​មាន​ការ​រើសអើង និង​ជេរ​ប្រមាទ​សាធារណៈ តាមហ្វេសប៊ុក។
រូប៖ ពលរដ្ឋ​ផ្ដល់​ឱ្យ

សាលា​ដំបូង​ខេត្ត​សៀមរាប​សម្រេច​ផ្ដន្ទាទោស​ជន​ពិការ​ម្នាក់ ឈ្មោះ ភុន យុទ្ធ ឲ្យ​ជាប់​ពន្ធនាគារ​ ១៨​ខែ​ រឿង​និយាយ​រិះគន់​មេដឹកនាំ​របប​ក្រុង​ភ្នំពេញ​ តាម​បណ្ដាញ​សង្គម​ហ្វេសប៊ុក។ ភរិយា​លោក ភុន យុទ្ធ អំពាវនាវ​ដល់​អង្គការ​សង្គម​ស៊ីវិល​ជួយ​ផ្ដល់​មេធាវី​ផ្នែក​ច្បាប់ ដើម្បី​ឲ្យ​ប្ដី​គាត់​បាន​នៅ​ក្រៅ​ឃុំ។

ប្រធាន​ចៅ​ក្រម​ជំនុំជម្រះ​នៃ​សាលា​ដំបូង​ខេត្ត​សៀមរាប លោក ស៊ិន សុវណ្ណារ័ត្ន កាត់​ទោស ជន​ពិការ​ជើង​ពី​កំណើត ឈ្មោះ ភុន យុទ្ធ វ័យ​ ៣៦​ឆ្នាំ ឲ្យ​ជាប់​ពន្ធនាគារ ១​ឆ្នាំ​កន្លះ ក្នុង​សំណុំ​រឿង​ញុះញង់​ឲ្យ​មាន​ការ​រើសអើង និង​ជេរ​ប្រមាទ​សាធារណៈ។

កាល​ពី​ថ្ងៃ​ទី​១៨ ខែ​កក្កដា នគរបាល​ខេត្ត​សៀមរាប​ បាន​ចាប់​ខ្លួន​ លោក ភុន យុទ្ធ នៅ​ផ្ទះ​ជួល​មួយ​កន្លែង​ក្បែរ​វត្ត​កេសា​រ៉ារ៉ាម ក្រោយ​ពេល​លោក​ប្រើ​គណនេយ្យ​ហ្វេសប៊ុក​ឈ្មោះ "​ខ្ញុំ​ចង់​បាន​នាយករដ្ឋមន្ត្រី​ថ្មី" និយាយ​រិះគន់​ចំណុច​អវិជ្ជមាន​នៃ​របប​ដឹកនាំ​សព្វ​ថ្ងៃ និង​ទាមទារ​ឲ្យ​លោក​ ហ៊ុន សែន ចុះ​ចេញ​ពី​តំណែង។

ក្នុង​អំឡុង​ពេល​ជាប់​ឃុំឃាំង លោក ភុន យុទ្ធ ដែល​ជា​ជន​ពិការ​ស្វិត​ជើង​ពី​កំណើត ធ្លាប់​បាន​សរសេរ​សំបុត្រ ​ស្នើ​សុំ​លោក​នាយករដ្ឋមន្ត្រី ហ៊ុន សែន​ ឱ្យ​ជួយ​ធ្វើ​អន្តរាគមន៍​ឱ្យ​លោក​បាន​វិល​ទៅ​ជួប​ជុំ​ប្រពន្ធ​កូន​វិញ បន្ទាប់​ពី​លោក​បាន​ដឹង​កំហុស។

លោកស្រី មុំ វិត ដែល​មិន​ចេះ​អក្សរ ​និង​ជា​ជន​ពិការ​ជើង​ផង មាន​អារម្មណ៍​រន្ធត់​នៅ​ពេល​ស្ដាប់​ការ​ប្រកាស​សាលក្រម​នៅ​ព្រឹក​ថ្ងៃ​ទី​៣១ តុលា ដែល​តម្រូវ​ឲ្យ​ប្ដី​ជាប់​ឃុំ​ជាច្រើន​ខែ​ទៀត។ លោកស្រី យល់​ថា តុលាការ​គួរ​អនុគ្រោះ​ដល់​ប្ដី​គាត់ ​ដែល​ជា​ជន​ពិការ​ ព្រោះថា ​សូម្បី​តែ​គាត់​រស់​នៅ​ខាង​ក្រៅ ​ក៏​មាន​ការ​លំបាក​ណាស់​ទៅ​ហើយ។ លោកស្រី​ថា មិន​អាច​ទទួល​យក​បាន​ទេ ចំពោះ​ការ​សម្រេច​របស់​តុលាការ​ខេត្ត​សៀមរាប​នេះ៖ «និយាយ​រួម​ទៅ​ខ្ញុំ​ មាន​អារម្មណ៍​ក្ដុក​ក្ដួល​ ដែល​តុលាការ​ឲ្យ​គាត់​ជាប់​១​ឆ្នាំ​អ៊ីចឹង។ គាត់​ខុស​បន្តិច​បន្តួច​ឲ្យ​គាត់​ជាប់​ដល់​១​ឆ្នាំ។ ខ្ញុំ​ចង់​ឲ្យ​គាត់​ចេញ​មក​ជួប​ជុំ​ប្រពន្ធ​កូន​វិញ។ សុំ​ឲ្យ​គាត់​នៅ​ក្រៅ សុំ​ត្រឹម​តែ​ប៉ុណ្ណឹង​ទេ»

អ្នកនាំពាក្យ​សមាគម ​អាដហុក លោក ស៊ឹង សែន​ករុណា សំដែង​ការ​សោក​ស្ដាយ​ដែល​សាលា​ដំបូង​មិន​បាន​ទម្លាក់​ចោល​បទ​ប្រឆាំង​លោក ភុន យុទ្ធ ដែល​ជា​ជន​ពិការ បែរជា​ផ្ដន្ទាទោស​គាត់​ឲ្យ​ជាប់​បន្ថែម​ទៀត​នេះ។ លោក​សង្កេត​ឃើញ​ថា រាល់​អ្នក​ហ៊ាន​ចេញ​មុខ​​រិះគន់​អំពី​ភាព​អសកម្ម​របស់​រដ្ឋាភិបាល​តាម​ហ្វេសប៊ុក អ្នក​ទាំង​នោះ​តែង​តែរង​ការ​ចោទ​ប្រកាន់ ​និង​ចាប់​ខ្លួន​ជានិច្ច ដោយ​ជាប់​ចោទ​ពី​បទ​ញុះញង់​ និង​ជេរ​ប្រមាទ​ជា​សាធារណៈ។ មន្ត្រី​ផ្នែក​សិទ្ធិ​មនុស្ស​រូបនេះ​ យល់​ថា ថ្នាក់​ដឹក​នាំ​ប្រទេស គឺ​ជា​បុគ្គល​សាធារណៈ​ ដែល​គួរ​ណាស់​តែ​បើក​ចិត្ត​ឲ្យ​ទូលាយ ទទួល​យក​ការរិះគន់​ពី​គ្រប់​និន្នាការ​ទាំង​អស់​ ដោយ​មិន​គួរ​ចាត់​វិធាន​ការ​ផ្លូវ​ច្បាប់​ចំពោះ​ពលរដ្ឋ​ ដែល​ហ៊ាន​ចេញ​មុខ​រិះគន់​បញ្ហា​សង្គម​នោះ​ឡើយ៖ «ចំណុច​នេះ​គឺជា​ចំណុច​អាទិភាព​ដែល​ចៅក្រម​ គួរ​តែ​ពិចារណា​ការ​ដាក់​ទោស​ទណ្ឌ​ទៅ​លើ​គាត់។ គួរ​ណាស់​តែ​​ឲ្យ​គាត់​បាន​នៅ​ក្រៅ​ឃុំ ឬ​ក៏​ដោះលែង​គាត់​ឲ្យ​បាន​ជួប​ជុំ​ប្រពន្ធ​ ដើម្បី​ប្រកប​របរ​ចិញ្ចឹម​ជីវិត ព្រោះ​គ្រួសារ​គាត់​ក៏​ពឹង​ផ្អែក​លើក​គាត់​មួយ​ផ្នែក​ដែរ។ យើង​ចង់​ឃើញ​ឲ្យ​មាន​ការ​ដោះលែង ប៉ុន្តែ​យើង​មានការ​សោកស្ដាយ​ដែល​តុលាការ​សម្រេច​ដាក់​ទោស​គាត់​ជាង​១​ឆ្នាំ​ហ្នឹង»

លោកស្រី មុំ វិត បញ្ជាក់​ថា លោកស្រី​នឹង​ពិភាក្សា​ជាមួយ​មេធាវី​ខាង​សមាគម​ អាដហុក ដើម្បី​រៀប​ចំ​ឯកសារ​ដាក់​ទៅ​សាលា​ឧទ្ធរណ៍ ដើម្បី​ប្ដឹង​ទាស់​សាលក្រម​របស់​សាលា​ដំបូង​ខេត្ត​សៀមរាប។ ក្រៅ​ពី​នេះ លោកស្រី​ស្នើ​សុំ​ដល់​សង្គម​ស៊ីវិល​ឱ្យ​ជួយ​ធ្វើ​អន្តរាគមន៍​ទៅ​រដ្ឋាភិបាល​ និង​ស្ថាប័ន​តុលាការ ជួយ​លោក ភុន យុទ្ធ ឲ្យ​បាន​នៅ​ក្រៅ​ជួបជុំ​គ្រួសារ និង​ប្រកប​របរ​ចិញ្ចឹម​ជីវិត​វិញ។

ក្នុង​អំឡុង​ពេល​លោក ភុន យុទ្ធ​ ជាប់​ក្នុង​ពន្ធនាគារ​ជាង ​៣ខែ​មក​នេះ លោកស្រី មុំ វិត ឲ្យ​ដឹង​ថា គ្រួសារ​គាត់​ជួប​ប្រទះ​បញ្ហា​ជីវភាព​ប្រចាំ​ថ្ងៃ ដោយ​ជំពាក់​ប្រាក់​អ្នក​ជិត​ខាង ហើយ​កូនស្រី​អាយុ​ ៥ឆ្នាំ​ក៏​កំពុង​មាន​ជំងឺ។

ភរិយា​ជន​ពិការ​រូប​នេះ​ អំពាវនាវ​ដល់​សប្បុរសជន​ទាំង​ក្នុង​ និង​ក្រៅ​ប្រទេស​ឱ្យ​ជួយ​ឧបត្ថម្ភ​គ្រួសារ​គាត់ ដោយសារ​តែ​លោកស្រី​មិន​អាច​រក​ចំណូល​ ដែល​បាន​ពី​ការ​ដើរ​លក់​វត្ថុ​អនុស្សាវរីយ៍​ដូច​ពី​មុន​ទៀត​ទេ៕

ព័ត៌មាន (0)
Share
គេហទំព័រ​ទាំងមូល