តុលាការកំពូលសម្រេចបញ្ជូនសំណុំរឿងកូនប្រុសសកម្មជនគណបក្សប្រឆាំង គឺក្មេងប្រុស កាក់ សុវណ្ណច្ឆ័យ ទៅសាលាឧទ្ធរណ៍កាត់ក្ដីឡើងវិញ ដោយទទួលយកតែផ្នែកខ្លះនៃដីកាសម្រេចរបស់សាលាឧទ្ធរណ៍។ មន្ត្រីអង្គការសង្គមស៊ីវិលយល់ឃើញថា សាលាឧទ្ធរណ៍គួរដំណើរការសវនាការសំណុំរឿងក្មេងប្រុស កាក់ សុវណ្ណច្ឆ័យ ឡើងវិញឱ្យបានឆាប់ និងត្រូវលើកលែងទោសបទចោទប្រកាន់មកលើកុមាររូបនេះ ដើម្បីបញ្ចៀសការរំលោភសិទ្ធិធ្ងន់ធ្ងរទៅលើកុមារ។
សេចក្ដីសម្រេចរបស់តុលាការកំពូល ថ្ងៃទី១២ ខែតុលានេះ បានបញ្ជូនសំណុំរឿង កុមារ កាក់ សុវណ្ណច្ឆ័យ ឱ្យសាលាឧទ្ធរណ៍កាត់ក្ដីឡើងវិញ ដោយតុលាការកំពូលទទួលយកអង្គហេតុរបស់ដីកាសម្រេចនៃសាលាឧទ្ធរណ៍ ក៏ប៉ុន្តែបដិសេធចំពោះការផ្ដន្ទាទោស និងការដាក់លក្ខខ័ណ្ឌ៦ចំណុច ទៅលើកុមារ កាក់ សុវណ្ណច្ឆ័យ។
កុមារ កាក់ សុវណ្ណច្ឆ័យ មានអាយុ១៧ឆ្នាំ គឺជាកូនប្រុសរបស់លោក កាក់ កុម្ភា ដែលជាសកម្មជនគណបក្សសង្គ្រោះជាតិ កំពុងជាប់ឃុំនៅពន្ធនាគារព្រៃសពីបទរួមគំនិតក្បត់។ កម្លាំងសមត្ថកិច្ចបានឃាត់ក្មេងប្រុសរូបនេះ កាលពីថ្ងៃទី២៥ ខែឧសភា ឆ្នាំ២០២១ ដោយចោទថា កុមាររូបនេះបានជេរប្រមាថមេដឹកនាំរដ្ឋាភិបាលក្នុងក្រុមបណ្ដាញសង្គមតេឡេក្រាម (Telegram)។ ។ បន្ទាប់ពីបានជាប់ឃុំនៅពន្ធនាគារព្រៃស ម២ អស់រយៈពេល៤ខែ ១៥ថ្ងៃមក កុមារ កាក់ សុវណ្ណច្ឆ័យ ត្រូវបានតុលាការដោះលែងឱ្យមានសេរីភាពវិញកាលពីថ្ងៃទី១០ ខែវិច្ឆិកា ឆ្នាំ២០២១។
ជុំវិញរឿងនេះ ម្ដាយរបស់កុមារ កាក់ សុវណ្ណច្ឆ័យ គឺលោកស្រី ព្រុំ ចន្ថា យល់ឃើញថា ការដែលតុលាការ កាត់ទោសដាក់ពន្ធនាគារលើកូនប្រុសរបស់គាត់កន្លងមក គឺជាការគំរាមកំហែង បំបាក់ស្មារតីដល់កូនប្រុសរបស់គាត់ និងគ្រួសាររបស់លោកស្រី ដែលតែងតែបន្តការតស៊ូដើម្បីលើកកម្ពស់លទ្ធិប្រជាធិបតេយ្យ តាមរយៈការចូលរួមនយោបាយជាមួយគណបក្សប្រឆាំង។ លោកស្រីថា សាលាឧទ្ធរណ៍គួរលើកលែងការផ្ដន្ទាទោសលើកូនប្រុសរបស់លោកស្រី ព្រោះកូនរបស់លោកស្រីស្ថិតនៅក្នុងវ័យកុមារ ហើយលោកស្រីថា ការផ្ដន្ទាទោសរបស់តុលាការដំបូងកន្លងមកនេះ ធ្វើឱ្យប៉ះពាល់ ធ្ងន់ធ្ងរដល់អនាគតកូនរបស់លោកស្រី៖ «ទីមួយប៉ះពាល់ដល់ការរៀនសូត្រ ទីពីរការរើសអើង ទីបីពេលដែលគាត់ធ្វើការទៅ គាត់នឹងមានវិប្បដិសារីថា គាត់នៅជាប់អីអ៊ីចឹងទៅ អាហ្នឹងជាទោសមួយធ្ងន់ធ្ងរមែនទែន។ អ៊ីចឹងគាត់ត្រឹមតែជាក្មេងអនីតិជន ហើយគាត់មានជំងឺអ៊ីចឹងទៀត (ជំងឺខ្សោយបញ្ញា Autism) សូមឱ្យទម្លាក់រាល់ការចោទ ឬក៏ឱ្យគ្រួសារគ្រប់គ្រងអប់រំគាត់ទៅ ចង់និយាយអញ្ចឹង ខ្ញុំសុំប៉ុណ្ណឹង ហើយទម្លាក់ការចោទទៅព្រោះគាត់នៅក្មេងណាស់។
មេធាវីការពារក្ដីឱ្យកុមារ កាក់ សុវណ្ណច្ឆ័យ គឺលោក សំ សុគង់ យល់ឃើញថា ដីកាសម្រេចផ្ដន្ទាទោសកុមារ កាក់ សុវណ្ណច្ឆ័យ ពីតុលាការជាបន្តបន្ទាប់កន្លងទៅ បានប៉ះពាល់យ៉ាងខ្លាំងលើសិទ្ធិរបស់កុមារ។ លោកបន្ថែមថា ផ្អែកតាមច្បាប់ក្រមព្រហ្មទណ្ឌ អនុសញ្ញាស្ដីពីសិទ្ធិរបស់កុមារ និងច្បាប់ស្ដីពីយុត្តិធម៌កុមារ បានចែងតម្រូវឱ្យចៅក្រមត្រូវគិតពិចារណាឱ្យបានខ្ពស់ និងបញ្ចៀសការផ្ដន្ទាទោសទៅលើកុមារ ដោយត្រូវប្ដូរពីការដាក់ទោសជាប់ពន្ធនាគារ ទៅជាការស្ដារនីតិសម្បទា ឬអប់រំជំនួសវិញ។ លោក សំ សុគង់ ក៏សំណូមពរដល់តុលាការលើកលែងការចោទប្រកាន់លើ កុមារ កាក់ សុវណ្ណច្ឆ័យ ដើម្បីលើកកម្ពស់ការគោរពសិទ្ធិកុមារ ដូចអ្វីដែលរដ្ឋាភិបាលបានចុះសច្ចាប័នលើអនុសញ្ញាស្ដីពីសិទ្ធិកុមារជាមួយអង្គការសហប្រជាជាតិកន្លងមក៖ « ខ្ញុំសុំឱ្យអាជ្ញាធរ ក៏ដូចជាតុលាការ រាជរដ្ឋាភិបាលក៏ដោយ ទាក់ទងនឹងសំណុំរឿងរបស់កុមារហ្នឹង គួរតែពិចារណាឱ្យបានដិតដល់ ហើយជាពិសេសគឺគិតពីផលប្រយោជន៍របស់កុមារ ដូចមានចែងក្នុងអនុសញ្ញាស្ដីពីសិទ្ធិកុមារ ក៏ដូចជាសិទ្ធិផ្សេងៗ ពាក់ព័ន្ធនឹងសិទ្ធិកុមារហ្នឹង »។
ជុំវិញរឿងនេះដែរ នាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត យល់ឃើញថា ការបង្វិលសំណុំរឿងនេះទៅឱ្យសាលាឧទ្ធរណ៍កាត់ក្ដីឡើងវិញ គឺដោយសារតុលាការកំពូលមានមន្ទិលសង្ស័យទៅលើចំណុចមួយចំនួននៃអង្គច្បាប់។ លោក អំ សំអាត ក៏សំណូមពរសាលាឧទ្ធរណ៍គួរបើកសវនករសំណុំរឿង កុមារ កាក់ សុវណ្ណច្ឆ័យ ឡើងវិញឱ្យបានឆាប់ និងត្រូវលើកលែងបទចោទប្រកាន់មកលើកុមាររូបនេះ ដើម្បីបញ្ចៀសការរំលោភសិទ្ធិធ្ងន់ធ្ងរទៅលើកុមារ៖ « ព្រោះយើងមើលទៅ ទីមួយផលប្រយោជន៍របស់កុមារ ទីពីរកុមារហ្នឹងគាត់មានជំងឺជាប់ប្រចាំកាយហៅថា អូទីហ្សឹមហ្នឹង (Autism) ហើយទីបី បើយើងមើលទៅលើកិច្ចសន្ទនាដែលយកមកធ្វើភស្តុតាងហ្នឹង ជាការសន្ទនាតាមរបៀប ការបញ្ចេញមតិតាមរយៈឯកជនទេ »។
កាលពីថ្ងៃទី១ វិច្ឆិកា ចៅក្រមនៃសាលាដំបូងរាជធានីភ្នំពេញ លោក អ៊ួង វុទ្ធា បានសម្រេចផ្ដន្ទាទោស កុមារ កាក់ សុវណ្ណច្ឆ័យ ដាក់ពន្ធនាគារចំនួន៨ខែ ក្នុងបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និងជេរប្រមាថថ្នាក់ដឹកនាំរដ្ឋាភិបាល។ ប៉ុន្តែចៅក្រមបានកាត់តម្រឹមទោសពន្ធនាគារឲ្យអនុវត្តត្រឹម៤ខែកន្លះ ហើយព្យួរទោសនៅសល់ និងបន្ថែមលក្ខខណ្ឌស្ថិតក្រោមការតាមដានរបស់តុលាការរយៈពេល២ឆ្នាំ។
ក្រៅពីធ្លាប់ជាប់ពន្ធនាគារ កុមាររូបនេះក៏ធ្លាប់ត្រូវបានជនមិនស្គាល់មុខ២នាក់ យកដុំឥដ្ឋគប់ចំក្បាលរបួសរហូតដល់ដែរ ២០ថ្នេរ កាលពីចុងខែមេសា ឆ្នាំ២០២១ ហើយមកដល់ពេលនេះសមត្ថកិច្ចមិនទាន់ចាប់បានជនដៃដល់ណាម្នាក់យកមកផ្ដន្ទាទោសនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។