តុលាការ​កំពូល​នឹង​ជម្រះក្តី​សកម្មជន​សិទ្ធិ​ការងារ​លោក រ៉ាត់ រត្នមុនី នៅ​ថ្ងៃទី១ កក្កដា

ដោយ ទីន ហ្សាការីយ៉ា
2020-06-15
អ៊ីម៉ែល
មតិ
Share
បោះពុម្ព
អ្នកស្រី ឡុង គីមហ៊ាង ភរិយាលោក រ៉ាត់ រត្នមុនី តវ៉ា​ជា​លើក​ទី៦ នៅ​មុខ​ទូត​រុស្ស៊ី​ កាល​ពី​ថ្ងៃ​ទី២០ ខែ​កុម្ភៈ ឆ្នាំ២០១៩ ដើម្បី​រក​អន្តរាគមន៍​ឲ្យ​ជួយ​ដោះ​លែង​ប្ដី​អ្នកស្រី។
អ្នកស្រី ឡុង គីមហ៊ាង ភរិយាលោក រ៉ាត់ រត្នមុនី តវ៉ា​ជា​លើក​ទី៦ នៅ​មុខ​ទូត​រុស្ស៊ី​ កាល​ពី​ថ្ងៃ​ទី២០ ខែ​កុម្ភៈ ឆ្នាំ២០១៩ ដើម្បី​រក​អន្តរាគមន៍​ឲ្យ​ជួយ​ដោះ​លែង​ប្ដី​អ្នកស្រី។
រូបថត៖ ហ្វេសប៊ុក​អ្នកស្រី ឡុង គីមហ៊ាង

តុលាការ​កំពូល​នឹង​លើកយក​រឿងក្តី​ព្រហ្មទណ្ឌ​ប្រឆាំងនឹង​សកម្មជន​សិទ្ធិ​ការងារ លោក រ៉ាត់ រត្នមុនី ទៅ​ជំនុំជម្រះ​នៅ​ថ្ងៃទី១ ខែ​កក្កដា ខាងមុខ​។ មន្ត្រី​សិទ្ធិមនុស្ស​រំពឹងថា តុលាការ​ជាន់ខ្ពស់​មួយ​នេះ​នឹង​ផ្តល់​យុត្តិធម៌​ដល់​លោក រ៉ាត់ រត្នមុនី វិញ ព្រោះ​លោក​មិន​មាន​កំហុស​អ្វី​ឡើយ។

សហ​មេធាវី​ការពារ​ក្តី​ឱ្យ​លោក រ៉ាត់ រត្នមុនី គឺ​លោក ឡោ ជុនធី ឱ្យ​អាស៊ីសេរី​ដឹង​នៅ​ថ្ងៃទី​១៥ មិថុនា​ថា តុលាការ​កំពូល​បាន​ជូនដំណឹង​អំពី​កាលបរិច្ឆេទ​នៃ​សវនាការ​នៅពេល​ថ្មីៗ​នេះ ហើយ​ពួកលោក និង​កូនក្តី​នឹងចូលរួម​ក្នុងការ​ជំនុំជម្រះ​តាម​កាលកំណត់។

មេធាវី ឡោ ជុនធី បញ្ជាក់​ថា កូនក្តី​របស់លោក​ត្រឹម​ជា​អ្នកបកប្រែ និង​ជា​អ្នកសម្របសម្រួល​ការផលិត​ខ្សែភាពយន្ត​ឯកសារ “​ម្តាយ​ខ្ញុំ លក់​ខ្ញុំ​” ឱ្យ​សារព័ត៌មាន RT (Russia Today) មិន​បាន​ប្រព្រឹត្ត​បទល្មើស​ញុះញង់​នោះ​ឡើយ​។ ជាមួយគ្នានេះ លោក​ថា គាត់​ក៏​គ្មាន​ចេតនា​ធ្វើឱ្យ​អាប់ឱន​កិត្តិយស​ស្ត្រី​ខ្មែរ ដូច​ការចោទប្រកាន់រ​បស់​អាជ្ញាធរ​ដែរ​។ មេធាវី​រូបនេះ​បញ្ជាក់ថា តាំងពី​ដំណាក់កាល​ដំបូង​មក តុលាការ​មិនបាន​កោះហៅ​តំណាង​ទូរទស្សន៍ RT ឱ្យមក​ឆ្លើយបំភ្លឺ​នោះឡើយ ពោលគឺ​តុលាការ​ដាក់បន្ទុក​តែ​ទៅលើ​កូនក្តី​របស់លោក​តែ​ម្នាក់​ប៉ុណ្ណោះ«អ្វីដែល​ធ្វើ គឺជា Video News (​វីដេអូ​ព័ត៌មាន​) អ៊ីចឹង Video News កាលណា​សម្ភាស​បាន​ព័ត៌មាន​អ្វី ដាក់​ព័ត៌មាន​ហ្នឹង​ទៅ​។ ចំណុច​ហ្នឹង​ដែល​គាត់​ថា គាត់​អត់​មាន​ចេតនា​ថា វា​ប៉ះពាល់​ដល់​សេចក្តីថ្លៃថ្នូរ​របស់​ស្ត្រី​ទេ ហើយ​ខាង RT គេ​លើក​ឡើងមក​ថា លោក រត្ន​មុនី ហ្នឹង គ្រាន់តែ​ជួយ​ដល់​ខាងគេ​ទេ​។ គេ​មិន​ដាក់បន្ទុក​លើ រត្ន​មុនី ទេ»។

អាជ្ញាធរ​ថៃ​បាន​ចាប់ខ្លួន​លោក រ៉ាត់ រត្នមុនី បញ្ជូន​មកឱ្យ​អាជ្ញាធរ​កម្ពុជា កាលពី​ចុង​ឆ្នាំ​២០១៨ នៅពេល​លោក និង​គ្រួសារ​កំពុង​ព្យាយាម​សុំ​ទិដ្ឋាការ​ទៅ​ប្រទេស​ហូឡង់ (Netherland) ដើម្បី​គេចចេញ​ពី​ការ​ធ្វើទុក្ខបុកម្នេញ​។ អាជ្ញាធរ​ខ្មែរ​បាន​ចោទ​លោក​ថា បានផ្តល់​លុយ​ឱ្យ​ប្រភព ដើម្បី​និយាយ​ប្រឌិត​សាច់រឿង នៅក្នុង​ភាពយន្ត​ឯកសារ “​ម្តាយ​ខ្ញុំ លក់​ខ្ញុំ​” ប៉ុន្តែ​តួអង្គ​ម្នាក់​ធ្លាប់​អះអាង​ប្រាប់​អាស៊ីសេរី​ថា អ្វីដែល​នាង​និយាយ​គឺជា​រឿង​ពិត​ផ្ទាល់ខ្លួន មិនមាន​ការផ្តល់​លុយកាក់​ឱ្យ​និយាយ​កុហក​នោះ​ឡើយ

ទោះជា​យ៉ាងណា តុលាការក្រុង​ភ្នំពេញ​បាន​កាត់ទោស​លោក រ៉ាត់ រត្នមុនី ឱ្យ​ជាប់ពន្ធនាគារ​២ ឆ្នាំ ពីបទ “​ញុះញង់​ឱ្យមាន​ការរើសអើង​” ហើយ​តម្រូវឱ្យ​លោក​បង់​សំណង​ដល់​ដើមបណ្តឹង​ដែលជា​តួអង្គ​ម្តាយកូន​នៅក្នុង​ភាពយន្ត​ឯកសារ​នោះ ចំនួន​ជិត ២​ម៉ឺន​ដុល្លារ​អាមេរិក​។ សាលាឧទ្ធរណ៍​ភ្នំពេញ​បាន​តម្កល់​សេចក្តីសម្រេច​នេះ​ទុកជាបានការ​ដដែល ទោះជា​សវនាការ​ធ្វើឡើង​ដោយ​គ្មាន​ការចូលរួម​ពី​ភាគី​ដើមបណ្តឹង​យ៉ាង​ណាក្តី

នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ (LICADHO) លោក អំ សំអាត យល់ថា តុលាការ​កំពូល​ហាក់​យឺតយ៉ាវ​ក្នុងការ​ជម្រះក្តី​នេះ ព្រោះ​មេធាវី​បាន​ប្តឹង​សាទុក្ខ​តាំងពី​ខែធ្នូ ឆ្នាំ​២០១៩ ស្របពេល​លោក រ៉ាត់ រត្នមុនី បាន​ជាប់ឃុំ​លើសពី​ពាក់កណ្តាល​នៃ​ទោស​ទៅហើយ​។ ទោះជា​យ៉ាងណា អ្នកការពារ​សិទ្ធិមនុស្ស​រូបនេះ​រំពឹងថា តុលាការ​កំពូល​នឹង​ផ្តល់​យុត្តិធម៌​ដល់​លោក រ៉ាត់ រត្នមុនី ព្រោះ​ករណីនេះ​រង​ការ​រិះគន់ថា ជាការ​បង្ក្រាប​លើ​សេរីភាព​សារព័ត៌មាន និង​ការ​បញ្ចេញ​មតិ៖ «ទាក់​ទៅនឹង​សវនាការ​ថ្ងៃ​០១ នៅ​តុលាការ​កំពូល​នេះ យើង​ជា​សង្គម​ស៊ីវិល សង្ឃឹមថា តុលាការ​កំពូល​នឹង​ផ្តល់​យុត្តិធម៌​ដល់​លោក រ៉ាត់ រត្នមុនី និង​ទម្លាក់ចោល​បទចោទប្រកាន់​សម្រាប់​លោក ហើយ​ដោះលែង​លោក​ឱ្យ​មាន​សេរីភាព​ឡើង​វិញ»។

គិត​ត្រឹម​ពាក់កណ្តាល​ខែមិថុនា ប្រធាន​សហព័ន្ធ​សហជីព​កម្មករសំណង់​កម្ពុជា (CCTUF) លោក រ៉ាត់ រត្នមុនី បាន​ជាប់ឃុំ​ក្នុង​ពន្ធនាគារ​ព្រៃ​ស អស់​រយៈពេល​ជាង​១ ឆ្នាំកន្លះ​មកហើយ ហើយ​ទោស​ជាប់​ពន្ធនាគារ​របស់លោក​នឹងត្រូវ​បញ្ចប់​នៅ​អំឡុង​ខែធ្នូ ខាង​មុខ

ក្រុម​អង្គការ​សង្គម​ស៊ីវិល​ជាតិ និង​អន្តរជាតិ រួមទាំង​ស្ថានទូត​អាមេរិក​ប្រចាំ​នៅ​កម្ពុជា​ផង បាន​វាយ​តម្លៃថា ការដាក់ទោស​លោក រ៉ាត់ រត្នមុនី កាន់តែ​ធ្វើឱ្យ​សហគមន៍ជាតិ និង​អន្តរជាតិ បាត់​ទំនុកចិត្ត​លើ​ប្រព័ន្ធ​យុត្តិធម៌​នៅ​កម្ពុជា ដោយសារតែ​សកម្មជន​សិទ្ធិ​ការងារ​រូបនេះ​មិន​ទទួល​បាន​សវនាការ​ជំនុំជម្រះ​ប្រកបដោយ​យុត្តិធម៌​ឡើយ​។ ពួកគេ​ស្នើ​ស្នើ​យ៉ាងទទូច​ដល់​អាជ្ញាធរ​កម្ពុជា ទម្លាក់​ចោល​បទ​ចោទប្រកាន់ និង​ដោះលែង​សកម្មជន​សិទ្ធិ​ការងារ​រូបនេះ​វិញ​ដោយ​ឥត​លក្ខខណ្ឌ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល