តុលាការកំពូល នឹងប្រកាសសាលដីកា បណ្ដឹងសុំនៅក្រៅឃុំបណ្ដោះអាសន្ន របស់គ្រូបង្រៀន និងជាសមាជិកក្រុមប្រឹក្សាខេត្តជាប់ឆ្នោត ២នាក់ របស់គណបក្សសង្គ្រោះជាតិ គឺលោក ពៀត ម៉ាប់ និង លោក ស៊ុន ធន់ នៅថ្ងៃច័ន្ទសប្ដាហ៍ក្រោយ បន្ទាប់ពីបើកសវនាការលើបណ្ដឹងសុំនៅក្រៅឃុំ នៅព្រឹកថ្ងៃទី២៨ ខែកញ្ញា។ សាច់ញាតិជំរុញតុលាការកំពូល ឱ្យដោះលែងមន្ត្រីបក្សប្រឆាំងទាំងពីរនាក់ ដោយឥតលក្ខខណ្ឌ។
មេធាវីការពារក្ដី ឲ្យសមាជិកគណបក្សសង្គ្រោះជាតិ ទាំងពីរនាក់ គឺលោកមេធាវី ឡោ ជុនធី មិនទាន់សន្និដ្ឋានបានថា តុលាការកំពូល នឹងសម្រេចបែបណាទេ តែលោកមេធាវីសង្កេតឃើញថា អង្គហេតុនៃសំណុំរឿងក្ដីនេះ កន្លងយូរទៅច្រើនឆ្នាំហើយ មិនគួរតុលាការលើកយកមកចោទប្រកាន់ និងឃុំខ្លួន កូនក្ដីទាំង ២ទៀតនោះទេ។
លោកមេធាវីខកចិត្ត ចំពោះការបាត់បង់ឱកាសរបស់កូនក្ដី សម្រាប់តទល់ក្នុងសវនាការមុនអង្គសេចក្ដីនៅតុលាការកំពូល នៅព្រឹកថ្ងៃទី២៨ កញ្ញា ដោយសារមន្ត្រីខាងពន្ធនាគារប្រាប់តុលាការថា មិនបានទទួលបញ្ជីឈ្មោះ ឲ្យដឹកជនជាប់ឃុំទាំងពីរ មកតុលាការកំពូល។ ទោះយ៉ាងណា លោក យល់ថា កូនក្ដី ទាំងពីរ គួរទទួលបានការដោះលែង នៅថ្ងៃទី៥ តុលាខាងមុខ៖ « អ៊ីចឹង មើលឃើញថា វាមិនសមហេតុសមផលដែរ សំណុំរឿងវាយូរមកហើយ។ ដល់ឥឡូវហ្នឹង ២០២០ បានមានបញ្ហាកូវីដ បានដល់រឿងកូនក្ដីយើង ហើយចាប់ពួកគាត់មក អ៊ីចឹងណា។ អាហ្នឹង វាអត់សម ហើយពួកគាត់ ( កូនក្ដី ) មានដែលទៅណា មកណា គាត់ជាគ្រូបង្រៀន នៅតែផ្ទះហ្នឹង ហើយអត់ដែលរត់គេចទៅណាទៀត។ អ៊ីចឹង វាពិបាកដែរ ហេតុផលដែលយកមកវាមិនសូវសម សំណុំរឿងយូរហើយ ពាក់ព័ន្ធនឹងគូកនអ៊ីចឹងណា វាដូចជាមិនសូវសមទេ»។
ចៅក្រមសាលាដំបូងរាជធានីភ្នំពេញ បានចេញដីកាបង្គាប់ឲ្យនគរបាលមូលដ្ឋាន នៅខេត្តសៀមរាប និងខេត្តកំពង់ធំ ចុះចាប់លោក ពៀត ម៉ាប់ នៅចុងខែឧសភា និងចាប់លោក ស៊ុន ធន់ នៅដើមខែមិថុនា ដើម្បីបញ្ជូនមកតុលាការក្រុងភ្នំពេញចោទប្រកាន់ពីបទញុះញង់ឲ្យយោធិនមិនស្ដាប់បញ្ជា និងចូលរួមគំនិតក្បត់ជាតិ ពាក់ព័ន្ធនឹងគម្រោងមាតុភូមិនិវត្តន៍លើកទី១ របស់ប្រធានស្ដីទីបក្សប្រឆាំងលោក សម រង្ស៊ី កាលពីឆ្នាំ២០១៩។
លោក ពៀត ម៉ាប់ គឺជាសមាជិកក្រុមប្រឹក្សាជាប់ឆ្នោត នៅខេត្តសៀមរាប ហើយលោកត្រូវបានគណៈកម្មាធិការជាតិរៀបចំការបោះឆ្នោត (គ.ជ.ប) ដកហូតអាសនៈក្រុមប្រឹក្សាខេត្ត ដោយសារមិនព្រមចុះចូលជាមួយគណបក្សកាន់អំណាច នៅចុងឆ្នាំ២០១៧។ នៅដើមឆ្នាំ២០១៨ រដ្ឋមន្ត្រីក្រសួងអប់រំ បានលុបឈ្មោះ លោកចេញពីក្របខណ្ឌក្រសួងទៀត ដោយចោទថា លោកអវត្តមានដោយគ្មានការសុំអនុញ្ញាតច្បាប់ត្រឹមត្រូវ។
ចំណែក លោក ស៊ុន ធន់ គឺជាសមាជិកក្រុមប្រឹក្សាជាប់ឆ្នោតខេត្តកំពង់ធំ។ នៅខែមិថុនា ឆ្នាំ២០១៩ លោក ស៊ុន ធន់ ត្រូវ ជនមិនស្គាល់មុខ ៤នាក់ បោកបញ្ឆោតឲ្យឡើងឡាន ហើយដឹកយកទៅកន្លែងស្ងាត់ ព្រួយវាយម្ដងហើយ ដោយសារលោកធ្វើសកម្មភាពកៀរគរសកម្មជនបក្សប្រឆាំង នៅមូលដ្ឋាននាំគ្នាហូបនំបញ្ចុក និងត្រៀមទទួលលោក សម រង្ស៊ី ធ្វើមាតុភូមិនិវត្តន៍។
កូនប្រុសរបស់លោក ស៊ុន ធន់ គឺលោក ធន់ ធានី ខកចិត្ត ដែលមិនបានឃើញឪពុក ក្នុងសវនាការនៅព្រឹកថ្ងៃទី២៨ ខែកញ្ញា ដោយសារភាពធ្វេសប្រហែលរបស់មន្ត្រីពន្ធនាគារ។ តែយ៉ាងណា លោក ធន់ ធានី រំពឹងថា តុលាការកំពូល នឹងដោះលែងឪពុករបស់លោក ឲ្យមានសេរីភាព នៅថ្ងៃទី៥ តុលា ខាងមុខ៖ « ខាងគ្រួសារយើងខ្ញុំ នៅតែទទូចឲ្យមានការដោះលែងប៉ារបស់ខ្ញុំ និងសកម្មជនផ្សេងទៀត ដោយមិនមានលក្ខខណ្ឌ ហើយកុំចេះតែចោទប្រកាន់ខុសសាច់រឿងអ៊ីចឹងទៅ»។
នាយករង ទទួលបន្ទុកផ្នែកសិទ្ធិមនុស្ស នៃអង្គការលីកាដូ លោក អំ សំអាត សោកស្ដាយ ចំពោះ អវត្តមាន របស់ លោក ពៀត ម៉ាប់ និងលោក ស៊ុន ធន់ ក្នុងតុលាការកំពូល ព្រោះជនជាប់ចោទទាំង២ មានសិទ្ធិ ក្នុងការតទល់ក្ដី និងការពារខ្លួន ក្នុងសវនាការ។ អ្នកឃ្លាំមើលសិទ្ធិមនុស្សរូបនេះ ក៏ជំរុញឲ្យតុលាការកំពូល ដោះលែង មន្ត្រីបក្សប្រឆាំងទាំងពីរនាក់នេះដែរ៖ « ប៉ុន្តែទោះយ៉ាងណា យើងឃើញថា សវនាការនេះ បានបន្តរួចទៅហើយ។ អ៊ីចឹង មានតែមួយទេ សង្ឃឹមថា ហេតុផលអ្នកទាំងពីរ តាមរយៈមេធាវីហ្នឹង តុលាការអនុញ្ញាតឲ្យអ្នកទាំងពីរហ្នឹង នៅក្រៅឃុំបណ្ដោះអាសន្នបាន ដោយសារមានហេតុផលគ្រប់គ្រាន់ ក្នុងការនៅក្រៅឃុំបណ្ដោះអាសន្ន ហើយទី២ ដោយសារតែវ័យ ហើយនិងជីវភាពរស់នៅរបស់គ្រួសាររបស់គាត់»។
របបក្រុងភ្នំពេញ បង្កើនការចាប់ខ្លួនមន្ត្រី និងសកម្មជនបក្សប្រឆាំងឡើងវិញ នៅឆ្នាំ២០២០ ពីបទញុះញង់ ចូលរួមគំនិតក្បត់ជាតិ និងផ្សព្វផ្សាយព័ត៌មានមិនពិត ពាក់ព័ន្ធនឹងជំងឺកូវីដ១៩ (Covid--19) ក្រោយបានដោះលែងជាទ្រង់ទ្រាយធំម្ដង កាលពីចុងឆ្នាំ២០១៩។
មកដល់ពេលនេះ តុលាការបានឃុំខ្លួន សកម្មជននយោបាយប្រឆាំងទាំងនោះ ជាង២០នាក់ហើយ។ ជាមួយគ្នានេះ តុលាការក៏ចាប់ផ្ដើមកាត់ក្ដីសកម្មជនបក្សប្រឆាំង ដែលបានដោះលែង កាលឆ្នាំ២០១៩ ឲ្យមានទោសជាប់ពន្ធនាគារឡើងវិញ ជាបន្តបន្ទាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។