តុលាការ​ខេត្ត​ស្វាយរៀង ឃុំ​ខ្លួន​អធិការ​រង​ក្រុង​បាវិត​ករណី​បាញ់​ស្ត្រី​ម្នាក់​ស្លាប់

ដោយ អាស៊ីសេរី
2019-12-23
អ៊ីម៉ែល
មតិ
Share
បោះពុម្ព
លោក កែវ ចិត្រា អធិការ​រង​នៃ​នគរបាល​ក្រុង​បាវិត ខេត្ត​ស្វាយរៀង។
លោក កែវ ចិត្រា អធិការ​រង​នៃ​នគរបាល​ក្រុង​បាវិត ខេត្ត​ស្វាយរៀង។
រូប៖ ហ្វេសប៊ុក

សាលា​ដំបូង​ខេត្ត​ស្វាយរៀង សម្រេច​ឃុំ​ខ្លួន​អធិការ​រង​នគរបាល​ក្រុង​បាវិត ករណី​បាញ់​ស្ត្រី​ម្ចាស់​ហាង​ផឹក​ស៊ី​មួយ​កន្លែង បណ្ដាល​ឲ្យ​ស្លាប់​ក្រោយ​ពេល​បញ្ជូន​ទៅ​សង្គ្រោះ​នៅ​ប្រទេស​វៀតណាម កាល​ពី​យប់​ថ្ងៃ​ទី២០ ខែ​ធ្នូ។ សង្គម​ស៊ីវិល​ជំរុញ​ឲ្យ​តុលាការ ផ្ដន្ទាទោស​ជន​ដៃ​ដល់​ឲ្យ​មាន ប្រសិទ្ធភាព ដើម្បី​ផ្ដល់​យុត្តិធម៌​ដល់​ជន​រងគ្រោះ និង​លុប​បំបាត់​អំពើ​បាញ់​បោះ​ដោយ​សេរី​នេះ។

ចៅក្រម​ស៊ើបសួរ​នៃ​សាលា​ដំបូង​ខេត្ត​ស្វាយរៀង លោក ឈុន ដាវី សម្រេច​ចេញ​ដីកា​ឃុំ​ខ្លួន អធិការ​រង​នគរបាល​ក្រុង​បាវិត លោក កែវ ចិត្រា អាយុ២៩ បណ្ដោះអាសន្ន​ក្នុង​ពន្ធនាគារ​ខេត្ត​ស្វាយរៀង ក្រោម​បទ​ចោទ​ប្រកាន់​ចំនួន​ពីរ គឺ​បទ​ឃាតកម្ម និង​បទ​កាន់កាប់​អាវុធ​ដោយ​គ្មាន​ការ​អនុញ្ញាត។

អធិការ​រង​នគរបាល​ក្រុង​បាវិត លោក កែវ ចិត្រា គឺ​ជា​កូន​ប្រុស​បង្កើត​របស់​អធិការ​នគរបាល​ក្រុង បាវិត លោក កែង គង់។ កាលពីយប់ថ្ងៃទី២០ ខែធ្នូ ជន​ជាប់​ចោទ​រូប​នេះ បាន​ដក​កាំភ្លើង​ខ្លី​បាញ់ ចំ​ក្បាល​ស្ត្រី​ម្ចាស់​ភោជនីយដ្ឋាន​យីហោ "តន្ត្រី​សំណាង​ដាណេ" ក្នុង​ពេល​ចូល​ទៅ​ផឹក​ស៊ី​ក្នុង​ភោជនីយដ្ឋាន​របស់​ជន​រង​គ្រោះ។ ជន​រងគ្រោះ​ឈ្មោះ សឿន ស្រីណេ ភេទ​ស្រី អាយុ៣៨ឆ្នាំ បាន​ស្លាប់ ពេល បញ្ជូន​ទៅ​សង្គ្រោះ​នៅ​ប្រទេស​វៀតណាម។

របាយការណ៍​របស់​នាយ​ប៉ុស្តិ៍​នគរបាល​សង្កាត់​បាវិត លោក ម៉ៅ ភិនភិរម្យ ឲ្យ​ដឹង​ថា មូលហេតុ ដែល​លោក កែវ ចិត្រា បាញ់​ស្ត្រី​រង​គ្រោះ គឺ​ដោយសារ​ផឹក​ស្រា​ស្រវឹង។ ក្រោយ​បង្ក​សកម្មភាព​រួច ជន​សង្ស័យ បាន​ចូល​ទៅ​សារភាព​នៅ​ការិយាល័យ​ព្រហ្មទណ្ឌ​កម្រិត​ធ្ងន់ នៃ​ស្នងការដ្ឋាន​នគរបាល ខេត្ត​ស្វាយរៀង។ ចំណែក​សាក្សី បាន​ប្រាប់​កាសែត​ក្នុង​ស្រុក​ថា មូលហេតុ​ដែល​ជន​ដៃ​ដល់​ដក​កាំ ភ្លើង​បាញ់ ដោយសារ​ខឹង​ស្ត្រី​ម្ចាស់​ហាង យក​មី​ស្រុះ​មក​យឺត​ពេក។

មន្ត្រី​សម្របសម្រួល​អង្គការ​លីកាដូ​ប្រចាំ​ខេត្ត​ស្វាយរៀង (Licadho) លោក នុត បូពិណ្ណារ័ត្ន មាន​ប្រសាសន៍​ថា ការ​សម្រេច​ចោទ​ប្រកាន់​របស់​តុលាការ​នៅ​ពេល​នេះ​ ជា​សញ្ញា​វិជ្ជមាន​នៃ​ពន្លឺ​យុត្តិធម៌​ដល់​សាច់ញាតិ​ជន​រង​គ្រោះ ប៉ុន្តែ​លោក ជំរុញ​ឲ្យ​ការ​ផ្ដន្ទាទោស​នោះ​មាន​ប្រសិទ្ធភាព ពោល​​គឺ​កុំ​ធ្វើ​ឡើង​តែ​មួយ​ភ្លែត ហើយ​ស្ងាត់ៗ ជន​ជាប់​ចោទ មាន​សេរីភាព​វិញ៖ «ករណី​នេះ​កូន​ជា​អធិការ​រង ហើយ​ឪពុក​ជា​អធិការ។ បើ​និយាយ​តាម​ច្បាប់ គឺ​ធ្វើ​ឲ្យ​មាន​ទំនាស់​ផល​ប្រយោជន៍ ហើយ​កូន​អាង​ឪពុក​ធ្វើ​អី​ក៏​ដោយ​ក៏​មិន​ខ្លាច ហើយ ជា​កម្លាំង​មាន​អាវុធ​ថែម​ទៀត អាច​ឈាន​ដល់​ការ​បាញ់​បោះ​ដោយ​មិន​គិត​គ្រោះថ្នាក់​ដល់​អ្នក​ដទៃ។ ទោះ​យ៉ាង​ណា​ក៏​ដោយ យើង ក៏​ស្នើសុំ​ឲ្យ​រឹត​បន្តឹង​ការ​គ្រប់គ្រង​អាវុធ ហើយ​ត្រូវ​អនុវត្ត​ច្បាប់ ឲ្យ​បាន​តឹងរ៉ឹង និង​ផ្ដន្ទាទោស​ឲ្យ​បាន​ច្បាស់លាស់​តាម​ច្បាប់។ បើ​ធ្វើ​ដូច្នេះ​បាន ខ្ញុំ​គិត​ថា បទ​ល្មើស​នេះ​វា​អាច​ថយ​ចុះ»

ការ​បាញ់​បោះ​ដោយ​សេរី​នេះ បាន​កើត​ឡើង​ជា​ញឹកញាប់ ហើយ​អ្នក​ប្រព្រឹត្ត​ភាគ​ច្រើន ​ជា​មន្ត្រី​កង​កម្លាំង​ប្រដាប់​អាវុធ ជា​មន្ត្រី​ថ្នាក់​ធំ ឬ​ជា​កូន​ចៅ​មន្ត្រី​ទាំង​នោះ សូម្បី​តែ​ក្រុម​ក្មួយៗ របស់​លោក​នាយក​រដ្ឋមន្ត្រី ហ៊ុន សែន ផ្ទាល់ ក៏​ធ្លាប់​ពាក់ព័ន្ធ​នឹង​អំពើ​បាញ់​បោះ​សេរី និង​ពាក់ព័ន្ធ​ជាមួយ​គ្រឿងញៀន​ដែរ។

មន្ត្រី​សង្គម​ស៊ីវិល អះអាង​ថា ការ​ដែល​មិន​អាច​ទប់ស្កាត់​ករណី​បាញ់​បោះ​នេះ​ប្រកប​ដោយ​ប្រសិទ្ធ ភាព​ខ្ពស់​នោះ ដោយ​សារ​តែ​បញ្ហា​និទណ្ឌភាព និង​ប្រព័ន្ធ​រដ្ឋបាល​នៅ​អន់​ខ្សោយ។

មាត្រា ១៩៩ នៃ​ច្បាប់​ព្រហ្មទណ្ឌ​ចែង​ថា អំពើ​សម្លាប់​មនុស្ស​ដោយ​ចេតនា ដោយ​ប្រើ​អាវុធ ឬ​មិន​ប្រើ​អាវុធ ដោយ​គ្មាន​ស្ថាន​ទម្ងន់​ណា​មួយ​ដូច​បាន​កំណត់​ក្នុង​មាត្រា ២០០ ដល់​មាត្រា ២០៥ គឺ​ជា​ឃាត​កម្ម។ ជន​ប្រព្រឹត្ត​បទល្មើស​ ត្រូវ​ផ្ដន្ទាទោស​ដាក់​ពន្ធនាគារ​ពី ១០ឆ្នាំ​ដល់ ១៥ឆ្នាំ។ ចំណែក​ការ​កាន់​កាប់​អាវុធ​ដោយ​គ្មាន​ច្បាប់​អនុញ្ញាត ត្រូវ​ផ្ដន្ទាទោស​ពី ៦ខែ​ទៅ ៣ឆ្នាំ និង​ពិន័យ​ជា​ប្រាក់​ពី ១លាន​រៀល​ទៅ ៦លាន​រៀល៕

ព័ត៌មាន (0)
Share
គេហទំព័រ​ទាំងមូល