នគរបាល​ថៃ​អះអាង​ថា ជន​សង្ស័យ ៥នាក់​ពាក់ព័ន្ធ​នឹង​ការ​សម្លាប់​ជនជាតិ​តៃវ៉ាន់​ម្នាក់ រត់​គេច​មក​កម្ពុជា

2024.02.27
នគរបាល​ថៃ​អះអាង​ថា ជន​សង្ស័យ ៥នាក់​ពាក់ព័ន្ធ​នឹង​ការ​សម្លាប់​ជនជាតិ​តៃវ៉ាន់​ម្នាក់ រត់​គេច​មក​កម្ពុជា (រូបឯកសារតំណាង) ច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ កាល​ពី​ថ្ងៃ​ទី២១ ខែមេសា ឆ្នាំ២០១៩។
រូបពីពលរដ្ឋ

កាសែតបាងកកប៉ុស្តិ៍ (Bangkok Post) របស់​ថៃ នៅ​ថ្ងៃ​ទី២៦ ខែកុម្ភៈ ឱ្យ​ដឹង​ថា ក្រុម​ជន​សង្ស័យ​ជនជាតិ​ជាតិ​បុរស​តៃវ៉ាន់ ៤នាក់ និង​ស្ត្រី​ថៃ​ម្នាក់ បាន​រត់​គេច​មក​ប្រទេស​កម្ពុជា ក្រោយ​មាន​ករណី​សម្លាប់​បុរស ដែល​ជា​ជនជាតិ​តៃវ៉ាន់​ឈ្មោះ ស៊ីមូ ជៀង (Shih Mou Chiang) នៅ​ក្នុង​ប្រទេស​ថៃ។

សាកសព​លោក ស៊ីមូ ជៀង ដែល​ពោរពេញ​ដោយ​ស្នាម​សាក់ ត្រូវ​បាន​គេ​រក​ឃើញ​មាន​ស្លាក​ស្នាម​គេ​បាញ់​សម្លាប់ នៅ​ក្នុង​តូប​លក់​អាហារ ដែល​គ្មាន​មនុស្ស នៅ​ក្បែរ​វាល​យន្តហោះ​អន្តរជាតិ​សុវណ្ណភូមិ កាល​ពី​ថ្ងៃ​ទី២៥ ខែកម្ភៈ។

ប្រធាន​អន្តោប្រវេសន៍​ថៃ ខេត្តស្រះកែវ ប្រាប់​កាសែត​បាងកក​ប៉ុស្តិ៍ នៅ​ថ្ងៃ​ទី២៦ ខែកម្ភៈ ថា កាមេរ៉ា​សុវត្ថិភាព​បាន​បង្ហាញ​អំពី​ក្រុម​ជន​សង្ស័យ​ទាំង​នោះ ដែល​មក​ដល់​ខេត្តស្រះកែវ​តាម​ឡាន​ក្រុង​ប្រហែល​ម៉ោង ៤ រសៀល ថ្ងៃ​ទី២៥ ខែកម្ភៈ។ ជន​សង្ស័យ​ទាំង ៥នាក់ បាន​បង្ហាញ​លិខិត​ឆ្លងដែន​ដល់​មន្ត្រី​អន្តោប្រវេសន៍ និង​បាន​ឆ្លងដែន​ចូល​មក​ក្រុងប៉ោយប៉ែត ខេត្តបន្ទាយមានជ័យ នៅ​ថ្ងៃ​ទី២៥ ខែកម្ភៈ ហើយ​ចូល​ទៅ​កាស៊ីណូ វេលា​ម៉ោង ៧កន្លះ​យប់ និង​ជួល​រថយន្ត​តាក់ស៊ី​ចេញ​ទៅ​ភ្នំពេញ នៅ​ម៉ោង ៩យប់​ថ្ងៃ​ដដែល​នោះ។ នៅ​ពេល​ឆ្លងដែន​ចូល​កម្ពុជា ប៉ូលិស​អន្តោប្រវេសន៍​ថៃ មិន​បាន​ឃាត់​ខ្លួន​ពួក​គេ​បាន​ទេ ដោយសារ​មិន​មាន​ដីកា​ឱ្យ​ឃាត់​ខ្លួន​នៅ​ឡើយ។

វិទ្យុ​អាស៊ី​សេរី​មិន​អាច​សុំ​ការ​ឆ្លើយតប​រឿង​នេះ​ស្នងការ​នគរបាល​ខេត្តបន្ទាយមានជ័យ លោក សិទ្ធិ ឡោះ បាន​ទេ នៅ​ថ្ងៃ​ទី២៦ ខែកុម្ភៈ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។