ឯកអគ្គរដ្ឋទូតអាមេរិកប្រចាំកម្ពុជាទទូចឱ្យស៊ើបអង្កេតពេញលេញ ក្នុងសំណុំរឿងឃាតកម្ម បណ្ឌិត កែម ឡី

ដោយ ខែ សុណង
2021.07.10

ឯកអគ្គរដ្ឋទូតអាមេរិកប្រចាំកម្ពុជាទទូចឱ្យស៊ើបអង្កេតពេញលេញ ក្នុងសំណុំរឿងឃាតកម្ម បណ្ឌិត កែម ឡី

ពលរដ្ឋចូលរួមពិធីបុណ្យលោកបណ្ឌិត កែម ឡី កាលពីថ្ងៃទី១១ ខែកក្កដា ឆ្នាំ២០១៦។

RFA

ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក បាទ្រីក ម័រហ្វី (Patrick Murphy) ទទូចឲ្យអាជ្ញាធរខ្មែរ ធ្វើការស៊ើបអង្កេតឲ្យបានពេញលេញ ក្នុងសំណុំរឿងឃាតកម្មលើបណ្ឌិត កែម ឡី។

ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក បាទ្រីក ម័រហ្វី សរសេរលើទំព័រធ្វីតធ័រ (Twitter) របស់លោកនៅក្នុងឱកាសខួប ៥ឆ្នាំ នៃមរណភាពបណ្ឌិត កែម ឡី នៅថ្ងៃទី១០ កក្កដា ដោយចាត់ទុកអំពើឃាតកម្មនេះ ថាបានធ្វើឡើងដោយ សាហាវព្រៃផ្សៃ។

លោក ប៉ាទ្រីក ម័រហ្វី ថ្លែងសាររំលែកទុក្ខជាមួយក្រុមគ្រួសារលោកបណ្ឌិត និងប្រជាជនខ្មែរដែលផ្ដល់តម្លៃដល់ភាពស្មោះត្រង់ សុច្ចរិត និងស្នេហាជាតិរបស់លោកបណ្ឌិត កែម ឡី។

Five years ago today, courageous & respected analyst & physician Dr. Kem Ley was gunned down in cold blood. Our condolences remain with Kem’s family & all Cambodians who valued his integrity & patriotism. We implore authorities to conduct a full investigation of his killing. pic.twitter.com/FDgySOUtpm
— Ambassador W. Patrick Murphy (@USAmbCambodia) July 10, 2021

ក្នុងខួប ៥ឆ្នាំនៃមរណភាពបណ្ឌិត កែម ឡី នៅថ្ងៃទី១០ កក្កដា ម្សិលមិញនេះ ស្ថានទូតអាមេរិកប្រចាំកម្ពុជា បានបង្ហោះសារនៅលើហ៊្វេសប៊ុក ស្ថានទូត ហៅករណីនេះ ជាការបាញ់សម្លាប់ដ៏អគតិលើលោកបណ្ឌិត កែម ឡី ដែលជាអ្នកលះបង់យ៉ាងមោះមុត ដើម្បីលទ្ធិប្រជាធិបតេយ្យ ក្នុងប្រទេសកម្ពុជា។

ស្ថានទូតសរសេរថា ជាថ្មីម្តងទៀត យើងសូមសម្រែងនូវអារម្មណ៍សោកសង្រេង និងរំលែកមរណទុក្ខចំពោះក្រុមគ្រួសារ ហើយសូមចងចាំនូវសុចរិតភាព ឯករាជ្យភាព និងសុទិដ្ឋិនិយមរបស់លោក។ ស្ថានទូត អំពាវនាវជាថ្មីម្តងទៀត ដល់រដ្ឋាភិបាលកម្ពុជាឱ្យធ្វើការស៊ើបអង្កេតដោយមិនលម្អៀង និងប្រកបដោយតម្លាភាព ចំពោះឃាតកម្មលើរូបលោក ដើម្បីស្វែងរកយុត្តិធម៌ចំពោះលោកបណ្ឌិត កែម ឡី និងក្រុមគ្រួសារ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទពេញនិយម

RFA