ដំណើរការចុះឈ្មោះ និងពិនិត្យបញ្ជីឈ្មោះនេះ កំពុងមានភាពរអាក់រអួលដោយសារគ្រោះទឹកជំនន់នៅស្ទើរទូទាំងប្រទេសកម្ពុជា និងមានភាពអសកម្មមួយចំនួនពីមន្ត្រីឃុំសង្កាត់ មិនអាចឲ្យពលរដ្ឋទៅចុះឈ្មោះថ្មី និងទៅពិនិត្យឈ្មោះបានឡើយ។
គណៈកម្មាធិការជាតិរៀបចំការបោះឆ្នោត បានសម្រេចពន្យារពេល ៣ថ្ងៃបន្ថែមទៀត ដើម្បីផ្ដល់ឱកាសឲ្យពលរដ្ឋនៅតាមបណ្ដាខេត្តមួយចំនួន ដែលកំពុងរងគ្រោះដោយទឹកជំនន់ទន្លេមេគង្គ ទន្លេបាសាក់ និងជំនន់ទឹកភ្លៀង បានទៅចុះឈ្មោះ និងពិនិត្យបញ្ជីឈ្មោះបោះឆ្នោត។
សមាជិក គ.ជ.ប. លោក ឯម សូផាត បានថ្លែងនៅក្នុងកិច្ចជំនួបរវាងមន្ត្រីគណបក្សនយោបាយ និងសង្គមស៊ីវិល នៅទីស្នាក់ការ គ.ជ.ប. ថ្ងៃទី១៤ តុលា ថា ឃុំសង្កាត់ចំនួន ៣៦៧ នៅក្នុងខេត្តចំនួន ១៦ នឹងបន្តពិនិត្យឈ្មោះ និងចុះឈ្មោះបោះឆ្នោតពីថ្ងៃទី១៥ តុលា រហូតដល់ថ្ងៃទី១៨ តុលា ឆ្នាំ២០១១។
លោកថា ក្នុងការពិនិត្យបញ្ជីឈ្មោះនេះគឺមានតំណាងគណបក្សនយោបាយចំនួន៦ គឺស្មើ ៩.៣៨២នាក់ នឹងចូលខ្លួនសង្កេតការណ៍ អ្នកសង្កេតការណ៍ជាតិចំនួន ១.៣២៣នាក់ មកពី ៨អង្គការ អ្នកសង្កេតការណ៍អន្តរជាតិចំនួន ២៣នាក់។
ប៉ុន្តែមន្ត្រីបក្សជំទាស់មួយចំនួនមិនបានសាទរទេចំពោះវិធានការរបស់ គ.ជ.ប. បន្ថែមពេលវេលាចុះឈ្មោះ និងពិនិត្យបញ្ជីឈ្មោះបោះឆ្នោតសម្រាប់ពលរដ្ឋដែលរស់នៅតំបន់លិចលង់ដោយជំនន់ទឹកភ្លៀង ទឹកទន្លេមេគង្គ និងទឹកទន្លេបាសាក់នេះ។
មន្ត្រីគណបក្ស សម រង្ស៊ី លោក ហ៊ីង យឿន បានចោទជាសំណួរទៅមន្ត្រី គ.ជ.ប. ដើម្បីសុំបំភ្លឺចំពោះការពន្យារពេល ៣ថ្ងៃបន្ថែមនេះ ហើយថា ពេលវេលានេះអាចនឹងអសារបង់ដោយសារស្ថានភាពទឹកជំនន់ហាក់មិនទាន់អាចផ្ដល់លទ្ធភាពឲ្យអ្នករងគ្រោះទៅចុះឈ្មោះ និងពិនិត្យបញ្ជីឈ្មោះបោះឆ្នោតបានទេ។
ចំណែកមន្ត្រីគណបក្សសិទ្ធិមនុស្ស លោក អ៊ុក ស៊ុយ បានស្នើសុំឲ្យ គ.ជ.ប. បើកការស៊ើបអង្កេតចំពោះមន្ត្រីឃុំសង្កាត់មួយចំនួនថា បានធ្វើការមិនគោរពតាមនីតិវិធីរបស់ គ.ជ.ប.។
សមាជិក គ.ជ.ប. លោក ឯម សូផាត បានឲ្យដឹងទៀតថា នៅក្នុងដំណាក់កាលពិនិត្យឈ្មោះ និងចុះឈ្មោះបោះឆ្នោតនេះ ពុំមានករណីស្មៀនឃុំបដិសេធការសុំចុះឈ្មោះរបស់ប្រជាពលរដ្ឋទេ។ លោកថា គ.ជ.ប. បានទទួលបណ្ដឹងចំនួន ៨ករណី ប៉ុន្តែមានបណ្ដឹងទាក់ទងនឹងមន្ត្រីចុះឈ្មោះ គឺស្មៀនចំនួន ៥បណ្ដឹង ដែលបានប្ដឹងនៅថ្នាក់ក្រុមប្រឹក្សាឃុំសង្កាត់ ហើយបណ្ដឹងនេះបានដោះស្រាយរួចរាល់ហើយ។
គ.ជ.ប. បានប្រកាសលទ្ធផលបណ្ដោះអាសន្ននៃការពិនិត្យបញ្ជីឈ្មោះ និងចុះឈ្មោះបោះឆ្នោតថា គិតចាប់ពីថ្ងៃទី១ កញ្ញា ដល់ថ្ងៃទី១៣ តុលា នៅទូទាំងខេត្តរាជធានី មានពលរដ្ឋអាយុ ១៨ឆ្នាំឡើង ដែលបានចុះឈ្មោះបោះឆ្នោតថ្មីមានជាង ៨១ម៉ឺននាក់ ហើយថា ពលរដ្ឋដែលមានអាយុ ១៨ឆ្នាំឡើងមានសិទ្ធិបោះឆ្នោតទូទាំងប្រទេសក្នុងឆ្នាំ២០១១នេះ មានជាង ៨លាន៨សែននាក់ គឺកើនច្រើនជាងឆ្នាំ២០១០ កន្លងទៅដែលមានតែ ៨លាន៥សែននាក់៕