គ.ជ.ប.​ពន្យារ​ពេល​ចុះ​ឈ្មោះ​និង​ពិនិត្យ​បញ្ជី​ឈ្មោះ​បោះ​ឆ្នោត​៣​ថ្ងៃ

គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប.) បាន​ប្រើ​រយៈ​ពេល ៤៥​ថ្ងៃ គឺ​ចាប់​តាំង​ពី​ថ្ងៃ​ទី​១ កញ្ញា ដល់​ថ្ងៃ​១៥ តុលា ឆ្នាំ​២០១១ សម្រាប់​ដំណើរ​ការ​ចុះ​ឈ្មោះ និង​ពិនិត្យ​បញ្ជី​ឈ្មោះ​បោះ​ឆ្នោត​ដើម្បី​បោះឆ្នោត​ជ្រើសរើស​ក្រុម​ប្រឹក្សា​ឃុំ​សង្កាត់​ឆ្នាំ​២០១២។
ដោយ ខែ សុណង
2011.10.14
Share on WhatsApp
Share on WhatsApp

ដំណើរ​ការ​ចុះ​ឈ្មោះ និង​ពិនិត្យ​បញ្ជី​ឈ្មោះ​នេះ កំពុង​មាន​ភាព​រអាក់រអួល​ដោយសារ​គ្រោះ​ទឹក​ជំនន់​នៅ​ស្ទើរ​ទូទាំង​ប្រទេស​កម្ពុជា និង​មាន​ភាព​អសកម្ម​មួយ​ចំនួន​ពី​មន្ត្រី​ឃុំ​សង្កាត់ មិន​អាច​ឲ្យ​ពលរដ្ឋ​ទៅ​ចុះ​ឈ្មោះ​ថ្មី និង​ទៅ​ពិនិត្យ​ឈ្មោះ​បាន​ឡើយ។

គណៈកម្មាធិការ​ជាតិ​រៀបចំ​ការ​បោះឆ្នោត បាន​សម្រេច​ពន្យារ​ពេល ៣​ថ្ងៃ​បន្ថែម​ទៀត ដើម្បី​ផ្ដល់​ឱកាស​ឲ្យ​ពលរដ្ឋ​នៅ​តាម​បណ្ដា​ខេត្ត​មួយ​ចំនួន ដែល​កំពុង​រងគ្រោះ​ដោយ​ទឹក​ជំនន់​ទន្លេ​មេគង្គ ទន្លេ​បាសាក់ និង​ជំនន់​ទឹក​ភ្លៀង បាន​ទៅ​ចុះ​ឈ្មោះ និង​ពិនិត្យ​បញ្ជី​ឈ្មោះ​បោះ​ឆ្នោត។

សមាជិក គ.ជ.ប. លោក ឯម សូផាត បាន​ថ្លែង​នៅ​ក្នុង​កិច្ច​ជំនួប​រវាង​មន្ត្រី​គណបក្ស​នយោបាយ និង​សង្គម​ស៊ីវិល នៅ​ទីស្នាក់ការ គ.ជ.ប. ថ្ងៃ​ទី​១៤ តុលា ថា ឃុំ​សង្កាត់​ចំនួន ៣៦៧ នៅ​ក្នុង​ខេត្ត​ចំនួន ១៦ នឹង​បន្ត​ពិនិត្យ​ឈ្មោះ និង​ចុះ​ឈ្មោះ​បោះ​ឆ្នោត​ពី​ថ្ងៃ​ទី​១៥ តុលា រហូត​ដល់​ថ្ងៃ​ទី​១៨ តុលា ឆ្នាំ​២០១១។

លោក​ថា ក្នុង​ការ​ពិនិត្យ​បញ្ជី​ឈ្មោះ​នេះ​គឺ​មាន​តំណាង​គណបក្ស​នយោបាយ​ចំនួន​៦ គឺ​ស្មើ ៩.៣៨២​នាក់ នឹង​ចូល​ខ្លួន​សង្កេតការណ៍ អ្នក​សង្កេតការណ៍​ជាតិ​ចំនួន ១.៣២៣​នាក់ មក​ពី ៨​អង្គការ អ្នក​សង្កេតការណ៍​អន្តរជាតិ​ចំនួន ២៣​នាក់។

ប៉ុន្តែ​មន្ត្រី​បក្ស​ជំទាស់​មួយ​ចំនួន​មិន​បាន​សាទរ​ទេ​ចំពោះ​វិធានការ​របស់ គ.ជ.ប. បន្ថែម​ពេល​វេលា​ចុះ​ឈ្មោះ និង​ពិនិត្យ​បញ្ជី​ឈ្មោះ​បោះ​ឆ្នោត​សម្រាប់​ពលរដ្ឋ​ដែល​រស់​នៅ​តំបន់​លិចលង់​ដោយ​ជំនន់​ទឹក​ភ្លៀង ទឹក​ទន្លេ​មេគង្គ និង​ទឹក​ទន្លេ​បាសាក់​នេះ។

មន្ត្រី​គណបក្ស សម រង្ស៊ី លោក ហ៊ីង យឿន បាន​ចោទ​ជា​សំណួរ​ទៅ​មន្ត្រី គ.ជ.ប. ដើម្បី​សុំ​បំភ្លឺ​ចំពោះ​ការ​ពន្យារ​ពេល ៣​ថ្ងៃ​បន្ថែម​នេះ ហើយ​ថា ពេល​វេលា​នេះ​អាច​នឹង​អសារបង់​ដោយសារ​ស្ថានភាព​ទឹក​ជំនន់​ហាក់​មិន​ទាន់​អាច​ផ្ដល់​លទ្ធភាព​ឲ្យ​អ្នក​រងគ្រោះ​ទៅ​ចុះ​ឈ្មោះ និង​ពិនិត្យ​បញ្ជី​ឈ្មោះ​បោះឆ្នោត​បាន​ទេ។

ចំណែក​មន្ត្រី​គណបក្ស​សិទ្ធិ​មនុស្ស លោក អ៊ុក ស៊ុយ បាន​ស្នើ​សុំ​ឲ្យ គ.ជ.ប. បើក​ការ​ស៊ើបអង្កេត​ចំពោះ​មន្ត្រី​ឃុំ​សង្កាត់​មួយ​ចំនួន​ថា បាន​ធ្វើការ​មិន​គោរព​តាម​នីតិវិធី​របស់ គ.ជ.ប.។

សមាជិក គ.ជ.ប. លោក ឯម សូផាត បាន​ឲ្យ​ដឹង​ទៀត​ថា នៅ​ក្នុង​ដំណាក់កាល​ពិនិត្យ​ឈ្មោះ និង​ចុះ​ឈ្មោះ​បោះ​ឆ្នោត​នេះ ពុំ​មាន​ករណី​ស្មៀន​ឃុំ​បដិសេធ​ការ​សុំ​ចុះ​ឈ្មោះ​របស់​ប្រជាពលរដ្ឋ​ទេ។ លោក​ថា គ.ជ.ប. បាន​ទទួល​បណ្ដឹង​ចំនួន ៨​ករណី ប៉ុន្តែ​មាន​បណ្ដឹង​ទាក់ទង​នឹង​មន្ត្រី​ចុះ​ឈ្មោះ គឺ​ស្មៀន​ចំនួន ៥​បណ្ដឹង ដែល​បាន​ប្ដឹង​នៅ​ថ្នាក់​ក្រុមប្រឹក្សា​ឃុំ​សង្កាត់ ហើយ​បណ្ដឹង​នេះ​បាន​ដោះស្រាយ​រួច​រាល់​ហើយ។

គ.ជ.ប. បាន​ប្រកាស​លទ្ធផល​បណ្ដោះ​អាសន្ន​នៃ​ការ​ពិនិត្យ​បញ្ជី​ឈ្មោះ និង​ចុះ​ឈ្មោះ​បោះឆ្នោត​ថា គិត​ចាប់​ពី​ថ្ងៃ​ទី​១ កញ្ញា ដល់​ថ្ងៃ​ទី​១៣ តុលា នៅ​ទូទាំង​ខេត្ត​រាជធានី មាន​ពលរដ្ឋ​អាយុ ១៨​ឆ្នាំ​ឡើង ដែល​បាន​ចុះ​ឈ្មោះ​បោះឆ្នោត​ថ្មី​មាន​ជាង ៨១​ម៉ឺន​នាក់ ហើយ​ថា ពលរដ្ឋ​ដែល​មាន​អាយុ ១៨​ឆ្នាំ​ឡើង​មាន​សិទ្ធិ​បោះ​ឆ្នោត​ទូទាំង​ប្រទេស​ក្នុង​ឆ្នាំ​២០១១​នេះ មាន​ជាង ៨​លាន​៨​សែន​នាក់ គឺ​កើន​ច្រើន​ជាង​ឆ្នាំ​២០១០ កន្លង​ទៅ​ដែល​មាន​តែ ៨​លាន​៥​សែន​នាក់៕

រឿង​ដែល​គេ​អាន​​ច្រើន​បំផុត
ព័ត៌មាន​ថ្មីៗ
រឿង​មន្ត្រី​ក្រសួង​កសិកម្ម​ពាក់ព័ន្ធ​ការ​ជួញដូរ​ស្វា​ក្ដាម​ដោយ​ខុស​ច្បាប់ ទូត​កម្ពុជា​ធ្វើ​អន្តរាគមន៍​សុំ​ឱ្យ​នៅ​ក្រៅ​ឃុំ​បណ្ដោះអាសន្ន
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

មតិយោបល់៖

Anonymous
Oct 15, 2011 05:22 AM

Just three days that is not enough cause in the list have only the Youn Vietkong 99.99%.That I told you before my friend our people know how to develop our country by our own hand so We have emergency now.Any one could help the Khmer people please?? to call 911 ask for UNTAC helpinn us??
The budget We will pay back step by step after We will win the election.