លោក ជ័យ ឡាយ មានវ័យ៧៥ឆ្នាំ ជាអ្នកភូមិ២០ ក្នុងតំបន់បឹងកក់ មានប្រសាសន៍ថា អាជ្ញាធរបានយល់ព្រមដោះលែងលោក បន្ទាប់ពីលោកយល់ព្រមចុះហត្ថលេខាលើកិច្ចសន្យាមួយច្បាប់ នៅចំពោះមុខសមត្ថកិច្ច។ លោក ជ័យ ឡាយ បន្តថា នោះគឺជាការសន្យាឈប់បន្តសកម្មភាពប្រមូលស្នាមមេដៃគាំទ្រប្រធានសមាគមអ្នកប្រជាធិបតេយ្យ លោក ម៉ម សូណង់ដូ៖ «ចាប់ខ្ញុំម៉ោង៥ ទល់គ្នាម៉ោង៨កន្លះ គេអោយមកផ្ទះវិញ។ អត់ធ្វើបានអីខ្ញុំដែរ អត់អីទេ គេគ្រាន់តែអោយខ្ញុំធ្វើកិច្ចសន្យាជាមួយគេថា កុំអោយជួយផ្ដិតមេដៃតទៅទៀត។ គេថា លោក ម៉ម សូណង់ដូ ធ្វើអបគមន៍ទេ»។
លោក ជ័យ ឡាយ ត្រូវសមត្ថកិច្ចខណ្ឌដូនពេញចាប់ខ្លួន នៅតំបន់បឹងកក់ កាលថ្ងៃព្រហស្បតិ៍ ទី២៦ ខែកក្កដា និងត្រូវនាំទៅសាកសួរនៅអធិការដ្ឋាននគរបាលខណ្ឌនេះ។ លោក ជ័យ ឡាយ អះអាងថា នៅគ្រាដែលលោកត្រូវចាប់ខ្លួននោះ លោកបានប្រមូលបានជាង២០០ស្នាមមេដៃពលរដ្ឋរួចហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។