មន្ត្រីបក្សប្រឆាំងលើកឡើងថា លោក ហ៊ុន ម៉ាណែត រងភាពអាម៉ាស់ នៅពេលមិនអាចជួបពិភាក្សាទ្វេភាគីផ្លូវការណាមួយ ជាមួយបណ្ដាមេដឹកនាំប្រទេសសេរីធំៗ នៅក្នុងកិច្ចប្រជុំកំពូលអាស៊ាននៅប្រទេសឥណ្ឌូណេស៊ី។ ចំណែកអ្នកវិភាគយល់ឃើញថា ក្រុមប្រទេសលោកខាងលិចបង្ហាញឲ្យឃើញថា ពួកគេមិនទទួលស្គាល់ការបោះឆ្នោតកាលពីថ្ងៃទី២៣ កក្កដាកន្លងទៅនេះ។
មន្ត្រីបក្សប្រឆាំងមើលឃើញថា វត្តមានរបស់លោកនាយករដ្ឋមន្ត្រី ហ៊ុន ម៉ាណែត នៅក្នុងកិច្ចប្រជុំកំពូលអាស៊ានដែលកំពុងប្រារព្ធឡើងនៅក្នុងទីក្រុងហ្សាកាតា (Jakarta) ប្រទេសឥណ្ឌូណេស៊ី (Indonesia) ហាក់មិនបានជួយលើកកម្ពស់មុខមាត់កម្ពុជានៅលើឆាកអន្តរជាតិឡើយ។
អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន ប្រាប់អាស៊ីសេរី នៅថ្ងៃទី៧ កញ្ញាថា វាជាភាពអាម៉ាស់មួយរបស់លោក ហ៊ុន សែន ដែលមិនអាចជួបពិភាក្សាទ្វេភាគីជាមួយមេដឹកនាំប្រទេសប្រជាធិបតេយ្យធំៗ ដូចជាសហរដ្ឋអាមេរិក កាណាដា និងអូស្ត្រាលីជាដើម។ លោកបន្តថា ការណ៍មិនជួបមេដឹកនាំប្រទេសសំខាន់ៗ ទាំងនោះ ដូច្នេះ លោក ហ៊ុន ម៉ាណែត មិនបានស្វែងរកផលចំណេញអ្វីឡើយសម្រាប់កម្ពុជា។
លោក អ៊ុំ សំអាន៖ «នៅពេលអត់បានជួបប្រទេសលោកសេរីជាទ្វេភាគីអ៊ីចឹង ដូច្នេះអត់បានផលចំណេញអីមកកម្ពុជាទេ។ បើគាត់បានជួបជាមួយមេដឹកនាំលោកខាងលិច ប្រាកដជាមានផលប្រយោជន៍សម្រាប់កម្ពុជា ដូចជា អាចទាក់ទាញអ្នកវិនិយោគទុន ពីលោកខាងលិចមកវិនិយោគនៅកម្ពុជា បានទទួលជំនួយ បានទទួលកម្ចីសម្រាប់កម្ពុជាផងដែរ។ ក៏ប៉ុន្តែអត់បានជួបទ្វេភាគីអ៊ីចឹង អត់បានផលប្រយោជន៍អីទាំងអស់ ដូចការទៅចូលរួមប្រជុំអាស៊ាន ដូចទៅដើរលេង អត់ប្រយោជន៍»។
ការលើកឡើងពីមន្ត្រីបក្សប្រឆាំងនេះ ស្របពេលនៅថ្ងៃទី៦ និងថ្ងៃទី៧ កញ្ញា អាស៊ានបើកកិច្ចប្រជុំកំពូលមួយចំនួន ដើម្បីពង្រឹងកិច្ចសហប្រតិបត្តិការជាមួយបណ្ដាមេដឹកនាំប្រទេសជាដៃគូផ្លូវការរបស់ខ្លួន ដូចជាកិច្ចប្រជុំកំពូលរវាងអាស៊ានជាមួយឥណ្ឌា ជប៉ុន កាណាដា កូរ៉េខាងត្បូង អូស្ត្រាលី សហរដ្ឋអាមេរិក និងចិន ស្ដីពីបញ្ហាសន្តិសុខស្បៀង ភាពជាដៃគូយុទ្ធសាស្ត្រទូលំទូលាយ កិច្ចសហប្រតិបត្តិការដែនសមុទ្រ និងការពង្រឹងគោលការណ៍តំបន់ឥណ្ឌូ-ប៉ាស៊ីហ្វិកជាដើម។
អំឡុងពេលចូលរួមកិច្ចប្រជុំទាំងនោះ លោក ហ៊ុន ម៉ាណែត បានជួបពិភាក្សាទ្វេភាគីជាមួយបណ្ដាមេដឹកនាំចំនួន ដូចជានាយករដ្ឋមន្ត្រីចិន នាយករដ្ឋមន្ត្រីវៀតណាម ប្រធានាធិបតីកូរ៉េខាងត្បូង នាយករដ្ឋមន្ត្រីជប៉ុន រួមទាំងមេដឹកនាំអាស៊ាន ប៉ុន្តែលោក មិនបានជួបពិភាក្សាទ្វេភាគីជាមួយមេដឹកនាំអាមេរិក អូស្ត្រាលី និងកាណាដាឡើយ។ ទោះជាយ៉ាងណាក៏ដោយ លោក ហ៊ុន ម៉ាណែត បានឆ្លៀតពេលចូលរួមពិធីជប់លៀង និងនៅអំឡុងកិច្ចប្រជុំកំពូលអាស៊ាន បានទៅជជែកស្វាគមន៍ដោយខ្លីជាមួយអនុប្រធានាធិបតីសហរដ្ឋអាមេរិកលោកស្រី ខាម៉ាឡា ហារីស (Kamala Harris) និងនាយករដ្ឋមន្ត្រីអូស្ត្រាលីលោក អាន់តូនី អាល់បានីស៊ី (Anthony Albanese)។
មន្ត្រីបក្សប្រឆាំងលោក អ៊ុំ សំអាន លើកឡើងថា ការជួបជជែកចាប់ដៃគ្នាដោយចៃដន្យនោះ មិនមានន័យថា បណ្ដាមេដឹកនាំប្រទេសប្រជាធិបតេយ្យ ទទួលស្គាល់លោក ហ៊ុន ម៉ាណែត ជានាយករដ្ឋមន្ត្រីស្របច្បាប់របស់កម្ពុជានោះទេ។
ជុំវិញបញ្ហានេះ វិទ្យុអាស៊ីសេរី មិនអាចសុំការបកស្រាយពីប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា បានទេ នៅថ្ងៃទី៧កញ្ញា។ ប៉ុន្តែលោក ប៉ែន បូណា បង្ហោះសារលើហ្វេសប៊ុកថា អំឡុងពេលចូលរួមកិច្ចប្រជុំនានានៅទីក្រុងហ្សាកាតា លោក ហ៊ុន ម៉ាណែត បានឡើងថ្លែងសុន្ទរកថា១២លើក និងចូលរួមជំនួបទ្វេភាគីចំនួន១៣លើក។
លោក ប៉ែន បូណា សរសើរលោក ហ៊ុន ម៉ាណែត ថា ជាមេដឹកនាំបន្តវេនប្រកបដោយសមត្ថភាព និងភាពប៉ិនប្រសប់ និងជាតារាថ្មីរបស់កម្ពុជា ដែលរះយ៉ាងចិញ្ចែងចិញ្ចាចលើឆាកអាស៊ាន និងកំពុងឆក់យកបេះដូងពលរដ្ឋខ្មែរ។
ជុំវិញរឿងនេះ អ្នកវិភាគនយោបាយលោក គឹម សុខ លើកឡើងថា ក្រុមប្រទេសលោកសេរី នៅតែរក្សាគោលជំហរថ្កោលទោស និងត្រៀមដាក់ទណ្ឌកម្មបន្ថែម ប្រសិនរដ្ឋាភិបាលលោក ហ៊ុន ម៉ាណែត មិនបង្ហាញសញ្ញាវិលទៅស្ដារលទ្ធិប្រជាធិបតេយ្យ និងគោរពសិទ្ធិមនុស្សឡើងវិញ។
លោក គឹម សុខ៖«តើ ហ៊ុន ម៉ាណែត ចិញ្ចែងចិញ្ចាចរឿងអី បើប្រទេសមហាអំណាចប្រជាធិបតេយ្យនានា មិនព្រមជួបទ្វេភាគីនិយាយរឿងការងារផងហ្នឹង នេះជាឥរិយាបថការទូតច្បាស់ណាស់ថា បច្ចឹមលោកចាត់ទុករដ្ឋាភិបាលលោក ហ៊ុន ម៉ាណែត ខុសច្បាប់ គឺកើតមកខុសខ្លឹមសាររដ្ឋធម្មនុញ្ញ នៃប្រទេសកម្ពុជា ហើយជាសារការទូត គ្មានភាពស្រពិចស្រពិលទេ គឺបស្ចិមលោក នៅតែរក្សាជំហរថ្កោលទោស ដាក់ទណ្ឌកម្ម»។
លោក គឹម សុខ បន្តថា ថ្វីត្បិតមេដឹកនាំប្រទេសមួយចំនួន ដូចជាឥណ្ឌូណេស៊ី ម៉ាឡេស៊ី សិង្ហបុរី និងហ្វីលីពីនជាដើម បានជួបពិភាក្សាទ្វេភាគីជាមួយលោក ហ៊ុន ម៉ាណែត ប៉ុន្តែក្រុមមេដឹកនាំប្រទេសទាំងនោះ ហាក់បញ្ជូនសញ្ញាបែបចំអកច្រើនជាងទៅលោក ហ៊ុន ម៉ាណែត ដោយសារបណ្ដាមេដឹកនាំទាំងនោះ ផ្ដោតសំខាន់តែលើកិច្ចសហប្រតិបត្តិការ បង្ក្រាបឧក្រិដ្ឋកម្មឆ្លងដែន និងការជួញដូរមនុស្ស។ ការលើកឡើងរបស់លោក គឹម សុខ នេះ បន្ទាប់ពីរបាយការណ៍អង្គការសហប្រជាជាតិកាលពីពេលថ្មីៗ នេះបង្ហាញថា មានមនុស្ស ១០ម៉ឺននាក់ ត្រូវបានគេជួញដូរឆ្លងកាត់ទឹកដីកម្ពុជា។
អ្នកវិភាគរូបនេះបន្ថែមថា រីឯជំនួបទ្វេភាគីរវាងលោក ហ៊ុន ម៉ាណែត ជាមួយមេដឹកនាំវៀតណាម ឡាវ និងចិនជាដើម គ្រាន់តែជំនួបប្រពៃណីដើម្បីរឹតចំណងរវាងគណបក្សប្រជាជនជាមួយគណបក្សកុម្មុយនិស្តនៃបណ្ដាប្រទេសទាំងនោះប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។