សង្គមស៊ីវិល ព្រួយបារម្ភពីការចាប់ខ្លួនព្រះសង្ឃវត្តស្ទឹងមានជ័យ ពីរអង្គបន្ថែមទៀត ខណៈសមត្ថកិច្ចបានចាប់ខ្លួន និងផ្សឹកព្រះតេជព្រះគុណ សឺន ហាយ។
ការចាប់ខ្លួននេះ សង្គមស៊ីវិលចាត់ទុកថាជាអំពើយង់ឃ្នង ហើយសមត្ថកិច្ចក៏គ្មានអំណាចណាទៅចាប់ព្រះសង្ឃយកទៅឃុំឃាំងបានទេ ល្គឹកណាមិនមានការផ្សឹកត្រឹមត្រូវពីមន្ត្រីសង្ឃតាមធម៌វិន័យក្នុងព្រះពុទ្ធសាសនា។
លោក ចាន់ សុវ៉េត អនុប្រធានផ្នែកអង្កេតនៃសមាគមអាដហុក (Adhoc) បានឲ្យដឹងថា ការចាប់ខ្លួនព្រះសង្ឃពីរអង្គនេះ ជារឿងនយោបាយសុទ្ធសាធ ព្រោះព្រះតេជព្រះគុណ ថាច់ សាន និងព្រះតេជព្រះគុណ ឃិត វណ្ណៈ គង់នៅកុដិលេខ៤៤ ក្នុងវត្តស្ទឹងមានជ័យ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ជាមួយព្រះតេជព្រះគុណ សឺន ហាយ ដែលជារឿយៗ ព្រះសង្ឃទាំងនោះបានចូលរួមបាតុកម្មនៅមុខស្ថានទូតវៀតណាម ប្រចាំកម្ពុជា និងដុតទង់ជាតិវៀតណាម ក្នុងពេលកន្លងទៅ។
លោក ចាន់ សុវ៉េត ចាត់ទុកថា ការចាប់ខ្លួននេះអាចជាការបំបាក់ស្មារតីព្រះសង្ឃដែលតវ៉ានឹងពលរដ្ឋជួបភាពអយុត្តិធម៌ ដូចជានៅព្រឹកថ្ងៃទី១២ វិច្ឆិកា ព្រះសង្ឃពីរអង្គនោះគ្រាន់តែទៅចូលរួមធ្វើការតវ៉ាជាមួយពលរដ្ឋមានជម្លោះដី ដែលស្នាក់នៅវត្តសាមគ្គីរង្សី តែបែរជាត្រូវសមត្ថកិច្ចចាប់ខ្លួន និងចោទថាបានយកដំបងចងជាមួយទង់ជាតិ ដើម្បីប្រើហិង្សាជាមួយសមត្ថកិច្ចទៅវិញ៖ «អ៊ីចឹងស្នើសុំដោយទទូចតែម្ដង ថាព្រះសង្ឃមិនគប្បីឲ្យមានការចាប់ខ្លួន ឬចោទប្រកាន់អ្វីទេ សុំឲ្យមានការដោះលែងត្រឡប់មកវិញ វារឿងមួយដើម្បីឲ្យប្រជាពលរដ្ឋស្ងប់ចិត្ត ព្រោះឥឡូវប្រជាពលរដ្ឋកំពុងពិនិត្យមើលស្ថានភាពនេះ មានការភ័យខ្លាចព្រួយបារម្ភ ព្រោះការចាប់ខ្លួនកន្លងផុតថ្មីៗនេះ មួយរយៈពេលនេះឃើញមានការចាប់ព្រះសង្ឃ សហគមន៍ សមាជិកគណបក្សនយោបាយ អ៊ីចឹងថាតើស្ថានភាពនេះជាភាពស្ងប់ស្ងាត់ទេ ឬជាការបញ្ឆេះកំហឹងដល់ពលរដ្ឋកាន់តែក្ដៅក្រហាយ ឬក៏យ៉ាងម៉េច?»។
វិទ្យុអាស៊ីសេរី មិនអាចទំនាក់ទំនងអ្នកនាំពាក្យអគ្គស្នងការនគរបាលជាតិ លោក គៀត ច័ន្ទថារិទ្ធ ដើម្បីឆ្លើយបំភ្លឺពីករណីនេះបានទេ នៅល្ងាចថ្ងៃទី១២ វិច្ឆិកា បន្ទាប់ពីសមត្ថកិច្ចបានចាប់ខ្លួនព្រះសង្ឃទាំងពីរអង្គនោះទៅសាកសួរនៅការិយាល័យធម្មការខណ្ឌមានជ័យ ហើយបញ្ជូនទៅឃុំឃាំងនៅស្នងការរាជធានីភ្នំពេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។