អាជ្ញាធរបញ្ជូនខ្លួនសកម្មជនបក្សប្រឆាំង ៤នាក់ ទៅឃុំនៅពន្ធនាគារពីបទ«ញុះញង់»
2020.12.29
សកម្មជនបក្សសង្គ្រោះជាតិ លោកស្រី សាន ស្រីនាត (ឆ្វេង) លោក លាប សុខផេង (កណ្តាល) និង លោក អ៊ុំ យ៉េត (ស្តាំ)។
អាជ្ញាធររបបក្រុងភ្នំពេញបានបញ្ជូនសកម្មជនគណបក្សសង្គ្រោះជាតិ ៤នាក់ យកទៅឃុំ ក្រោយសមត្ថកិច្ចចាប់ខ្លួនពួកគេកាលពីថ្ងៃទី២៨ ធ្នូ។ មន្ត្រីសង្គមស៊ីវិល ចាត់ទុកការចាប់ខ្លួននេះ ថា ជាការធ្វើទុក្ខបុកម្នេញផ្នែកនយោបាយ។
សកម្មជនគណបក្សសង្គ្រោះជាតិដែលចាប់ខ្លួននោះ រួមមានប្រធានប្រតិបត្តិគណបក្សប្រឆាំងក្រុងសួង ខេត្តត្បូងឃ្មុំ លោក អ៊ុំ យ៉េត មេឃុំមេមត់ជាប់ឆ្នោតរបស់គណបក្សនេះស្រុកមេមត់ លោក លាប សុខផេង លោកស្រី ហុង អាន និង លោកស្រី សាន ស្រីនាត ជាសកម្មនារីគណបក្សប្រឆាំងរាជធានីភ្នំពេញ ត្រូវបានចាប់ខ្លួននៅថ្ងៃទី២៨ ធ្នូ។
កូនស្រីរបស់មន្ត្រីបក្សប្រឆាំងក្រុងសួង លោកស្រី យ៉ែម វណ្ណណែត ប្រាប់ អាស៊ីសេរី នៅរសៀលថ្ងៃទី២៩ ធ្នូ ថា ការចាប់ខ្លួននេះជារឿងអយុត្តិធម៌ធ្វើបាបប្រជាពលរដ្ឋស្លូតត្រង់ ពីព្រោះលោកស្រីថាឪពុករបស់លោកស្រីមិនបានប្រព្រឹត្តិខុសច្បាប់អ្វីឡើយ។ បន្ថែមពីនេះ លោកស្រីថា ប៉ូលិសចាប់ឪពុករបស់លោកស្រីទាំងកម្រោលដោយមិនមានដីកាពីតុលាការឡើយ៖ «ឪពុកខ្ញុំជារៀងរាល់ថ្ងៃសីល គឺគាត់ទៅសមាទានសីល អីចឹងយាយៗនៅក្នុងភូមិគេដឹងទាំងអស់ហ្នឹង ថាប៉ាខ្ញុំបានចូលសមាទានសីល។ ហើយចេញពីសាលាសុំសីល គឺគាត់ទៅចម្ការ គាត់អត់ដែលរញ៉េរញ៉ៃអីទេ ល្បែងស៊ីសងអីគាត់អត់ចេះលេងទេ។ ការចាប់ខ្លួនហ្នឹងភ្លាមៗបញ្ជូនគាត់ទៅតុលាការ សួរនាំគាត់ប្រហែលមួយម៉ោងបញ្ជូនគាត់ដាក់ពន្ធនាគារអីចឹងច្បាប់ដាក់ទោសហ្នឹងទោសអីគេដល់ថ្នាក់ត្រូវបញ្ជូនគាត់ទៅភ្លាម គ្រួសារទៅជួបមុខមិនទាន់ផងហ្នឹង»។
លោកស្រីឱ្យដឹងថា ប៉ូលិសបានបញ្ជូនឪពុករបស់លោកស្រីទៅឃុំខ្លួននៅពន្ធនាគារខេត្តត្បូងឃ្មុំ កាលពីយប់ថ្ងៃទី២៨ ធ្នូ។ លោកស្រី យ៉ែម វណ្ណណែត ប្រាប់ថា អាជ្ញាធរហាមឃាត់មិនទាន់ឱ្យសាច់ញាតិចូលសួរសុខជនជាប់ឃុំចំនួន១៤ថ្ងៃ ក្រោយពេលចាប់ខ្លួន។
ទាក់ទងនឹងបញ្ហានេះ អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ប្រាប់ អាស៊ីសេរី ថា ការចាប់ខ្លួនសកម្មជនបក្សប្រឆាំងទាំង៤នាក់នេះ ធ្វើឡើងតាមដីការបស់តុលាការ។លោកបញ្ជាក់ថា តុលាការបានចោទប្រកាន់អ្នកទាំង៤ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ ក៏ប៉ុន្តែលោកបញ្ជាក់ថាពួកគេប្រព្រឹត្តកំហុសពាក់ព័ន្ធរឿងអ្វីនោះទេ៖ «កំពុងស្ថិតក្នុងនីតិវិធី បើអត់មានដីកាចាប់យ៉ាងម៉េចបាន អស់លោកម៉េចសុខចិត្ត។ គ្រប់ករណីពាក់ព័ន្ធការចាប់ខាងក្រុមហ្នឹងគឺគាត់ដើរចោទប្រកាន់គេថាចាប់អត់មានដីកាតែរហូតហ្នឹង។ បើអត់ដីកាធ្វើម៉េចចាប់បាន យ៉ាងហោចណាស់ក៏មានព្រះរាជអាជ្ញាអមទៅដែរគេមិនដែលធ្វើការអត់មាននីតិវិធីអីចឹង»។
លោកបន្ថែមថា ក្នុងចំណោម៤នាក់នោះមាន២នាក់ គឺលោក អ៊ុំ យ៉េត និង លោក លាប សុខផេង បានបញ្ជូនទៅឃុំខ្លួននៅពន្ធនាគារត្រពាំងផ្លុង ខេត្តត្បូងឃ្មុំ និង២នាក់ទៀត គឺលោកស្រី ហុង អាន និង លោកស្រី សាន ស្រីនាត បញ្ជូនទៅសាកសួរនៅសាលាដំបូងរាជធានីភ្នំពេញនៅរសៀលថ្ងៃទី២៩ ធ្នូ។
អាស៊ីសេរី មិនអាចទាក់ទងអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ ដើម្បីសុំអត្ថាធិប្បាយបន្ថែមជុំវិញបញ្ហានេះបានទេនៅថ្ងៃទី២៩ ធ្នូ ដោយទូរស័ព្ទចូលពុំមានអ្នកទទួល។
កូនប្រុសសកម្មជនគណបក្សប្រឆាំងនៅរាជធានីភ្នំពេញ លោកស្រី សាន ស្រីនាត គឺ លោក តាង ហេង ថ្លែងថា ម្ដាយរបស់លោកមិនបានប្រព្រឹត្តខុសច្បាប់ដូចការចោទប្រកាន់របស់តុលាការឡើយ។លោកទាមទារឱ្យតុលាការប៉ូលិសដោះលែងម្ដាយរបស់គាត់ឱ្យមានសេរីភាពឡើងវិញ។
ការចាប់ខ្លួននេះ ធ្វើឡើងប្រមាណ១សប្ដាហ៍នៅមុនថ្ងៃកំណត់ថ្នាក់ដឹកនាំគណបក្សសង្គ្រោះជាតិដាក់គម្រោងវិលចូលស្រុកជាលើកទី២នៅថ្ងៃទី៤ មករាខាងមុខ ដើម្បីចូលខ្លួនដំណើរការក្ដីតាមការកោះហៅរបស់តុលាការរបបក្រុងភ្នំពេញ។
ប្រធានផ្នែកសិទ្ធិមនុស្សនៃសមាគមការពារសិទ្ធិមនុស្សអាដហុក (Adhoc) លោក នី សុខា យល់ថា ការចាប់ខ្លួននេះជាការបំភិតបំភ័យផ្នែកនយោបាយធ្វើឱ្យសកម្មជនគណបក្សប្រឆាំងភ័យខ្លាច ច្រើនជាងការអនុវត្តច្បាប់៖ «ហើយក៏មិនមែនជាដំណោះស្រាយនយោបាយដែលល្អដែរ ខ្ញុំគិតថា វាគ្រាន់តែជាការធ្វើនយោបាយកាន់តែបន្តតានតឹងឡើង ហើយធ្វើឱ្យប្រជាពលរដ្ឋកាន់តែរស់នៅក្នុងស្ថានភាពមួយភ័យខ្លាចទៅ នៅក្នុងសង្គមរបស់យើងតែ ប៉ុណ្ណឹង។អត់មានអីក្នុងការអនុវត្តសង្គមមួយដែលប្រកាន់គោលការណ៍ប្រជាធិបតេយ្យ គោរពសិទ្ធិមនុស្ស និងប្រកាន់នីតិរដ្ឋហ្នឹងទេ»។
ចាប់តាំងពីដើមឆ្នាំ២០២០មកដល់ថ្ងៃទី២៩ ធ្នូ អាជ្ញាធររបបក្រុងភ្នំពេញចាប់ខ្លួនសកម្មជននយោបាយ សកម្មជនបរិស្ថាន ព្រះសង្ឃខ្មែរថាវរៈ និងក្រុមយុវជនប្រមាណ៥០នាក់ហើយ ដាក់ពន្ធនាគារ។ តុលាការបានចោទប្រកាន់ពួកគេពីបទជេរប្រមាថថ្នាក់ដឹកនាំរដ្ឋាភិបាល បទរួមគំនិតក្បត់ និងញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គមជាដើម។ ក្រុមសង្គមស៊ីវិលជាតិ និងអន្តរជាតិជាច្រើនស្ថាប័ន រួមទាំងអង្គការសហប្រជាជាតិទទួលបន្ទុកផ្នែកសិទ្ធិមនុស្សផង បានចេញសេចក្ដីថ្លែងការណ៍ជាបន្តបន្ទាប់ ដោយស្នើឲ្យអាជ្ញាធរដោះលែងអ្នកជាប់ឃុំទាំងនោះឱ្យមានសេរីភាពវិញ។ ស្ថាប័នទាំងនោះ យល់ថា ក្ដីក្ដាំប្រឆាំងនឹងពួកគេនេះ ធ្វើឡើងក្រោមហេតុផលនយោបាយ មិនមែនជាការអនុវត្តច្បាប់ដោយត្រឹមត្រូវនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ
អត្ថបទពេញនិយម
នយោបាយ
- អង្គការសិទ្ធិមនុស្សថ្កោលទោសរដ្ឋាភិបាលម៉ាឡេស៊ីបញ្ជូនពលករខ្មែរម្នាក់ ឱ្យអាជ្ញាធរកម្ពុជា ដោយសារតែរិះគន់លោក ហ៊ុន សែន
- ការបន្តតែងតាំងកូនៗរបស់មន្ត្រីជាន់ខ្ពស់ក្នុងស្ថាប័នរដ្ឋ «ជានយោបាយសន្តតិវង្ស និងការបែងចែកវណ្ណៈ»
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា
- ក្រុមមេដឹកនាំអាស៊ានផ្ដោតលើការស្វែងរកដំណោះស្រាយភូមា និងបញ្ហាជម្លោះសមុទ្រចិនខាងត្បូង