មន្ត្រី​បក្ស​ប្រឆាំង៖ មិន​មាន​វត្តមាន​មន្ត្រី​បក្ស​កាន់​អំណាច​ចូល​រួម​ពិធី​បុណ្យ​៧​ថ្ងៃ​សព​លោក ប៉ែន សុវណ្ណ

ដោយ អ៊ូ បាណុង
2016-11-04
Share
ងួន ញ៉ិល ៨៥៥ ២០១៦ អនុ​ប្រធាន​ទី​២ រដ្ឋ​សភា លោក ងួន ញ៉ិល (រូប​មុខ) ចូលរួម​គោរព​វិញ្ញាណក្ខន្ធ​សព​លោក ប៉ែន សុវណ្ណ កាល​ពី​ថ្ងៃ​ទី​៣ ខែ​វិច្ឆិកា ឆ្នាំ​២០១៦ នា​វត្ត​ថាន់ រាជធានី​ភ្នំពេញ។
RFA/Morm Moniroth

 

គិត​មក​ដល់​ថ្ងៃ​ទី​៤ ខែ​វិច្ឆិកា ឆ្នាំ​២០១៦ ពិធី​បុណ្យ​សព​លោក ប៉ែន សុវណ្ណ បាន​ឈាន​ដល់​ថ្ងៃ​ទី​៧ ហើយ។ សម្រាប់​ថ្ងៃ​បុណ្យ​ខួប​គម្រប់ ៧​ថ្ងៃ​នេះ ក៏​មាន​ឥស្សរជន និង​សាធារណជន​អញ្ជើញ​ចូលរួម​គោរព​វិញ្ញាណក្ខន្ធ​ជា​ហូរហែ​ដែរ។ តាម​ការ​បញ្ជាក់​ពី​អនុ​ប្រធាន​គណៈកម្មការ​រៀបចំ​បុណ្យ​សព​លោក ប៉ែន សុវណ្ណ ថា ភាគច្រើន​នៃ​អ្នក​ដែល​មក​ចូលរួម​បុណ្យ​សព​គឺ​ជា​សកម្មជន​បក្ស​សង្គ្រោះ​ជាតិ។

អនុ​ប្រធាន​គណៈកម្មការ​រៀបចំ​បុណ្យ​សព លោក ប៉ែន សុវណ្ណ និង​ជា​តំណាងរាស្ត្រ​គណបក្ស​សង្គ្រោះ​ជាតិ លោក ឡុង រី បាន​អោយ​អាស៊ីសេរី ដឹង​តាម​ទូរស័ព្ទ​ថា រយៈពេល ៣​ថ្ងៃ តាំង​ពី​សព​លោក ប៉ែន សុវណ្ណ ដង្ហែ​ពី​ស្រុក​កំណើត​ក្នុង​ទី​រួម​ខេត្ត​តាកែវ មក​តម្កល់​ដើម្បី​ធ្វើ​បុណ្យ​នៅ​វត្ត​នួនមណីរាម ហៅ​វត្ត​ថាន់ រាជធានី​ភ្នំពេញ គឺ​មាន​អ្នក​មុខ​អ្នក​ការ​មក​គោរព​វិញ្ញាណក្ខន្ធ​ជា​ហូរហែ ប៉ុន្តែ​នៅ​ថ្ងៃ​ទី​៤ វិច្ឆិកា នេះ គឺ​មានតែ​ឥស្សរជន សកម្មជន​បក្ស​ប្រឆាំង និង​សង្គម​ស៊ីវិល​ប៉ុណ្ណោះ ដែល​មក​ចូលរួម​គោរព​វិញ្ញាណក្ខន្ធ គឺ​មិន​មាន​ភាគី ឬ​អ្នក​គាំទ្រ​ខាង​គណបក្ស​កាន់​អំណាច​នោះ​ទេ៖ «ការ​អញ្ជើញ​ចូលរួម​នេះ ដូច​ខ្ញុំ​បាន​ជម្រាប​អ៊ីចឹង​ថា ស្ថាប័ន​ភាគ​ច្រើន​ជា​រចនាសម្ព័ន្ធ​ស្ថាប័ន​ដទៃ​ទៀត ខ្ញុំ​មិន​ឃើញ​ជា​ដុំកំភួន​ទេ»

តំណាង​មក​ពី​មូលនិធិ កែម ឡី លោក ហង្ស វិទូ ដែល​មក​គោរព​វិញ្ញាណក្ខន្ធ​សព​លោក ប៉ែន សុវណ្ណ នៅ​ថ្ងៃ​ទី​៤ វិច្ឆិកា បាន​អោយ​ដឹង​ថា នេះ​ជា​លើក​ទី​៣​ហើយ ដែល​លោក​បាន​គោរព​វិញ្ញាណក្ខន្ធ​សព​លោក ប៉ែន សុវណ្ណ។ សម្រាប់​លោក​ផ្ទាល់ ការ​មក​គោរព​វិញ្ញាណក្ខន្ធ​នេះ គឺ​មក​ដើម្បី​បង្ហាញ​ការ​គោរព​ដឹងគុណ​ដល់​ឥស្សរជន​រូប​នេះ​ដែល​បាន​ប្រើ​ពេល​វេលា​ស្ទើរ​តែ​មួយ​ជីវិត​គាត់​ក្នុង​នយោបាយ​កម្ពុជា។ មិន​តែ​ប៉ុណ្ណោះ លោក ហង្ស វិទូ ក៏​បាន​សម្ដែង​ការ​ងឿង​ឆ្ងល់​នឹង​អវត្តមាន​របស់​ភាគី​អ្នក​នយោបាយ ឬ​អ្នក​គាំទ្រ​គណបក្ស​កាន់​អំណាច ដែល​មិន​បាន​មក​ចូលរួម​ពិធីបុណ្យ និង​មាន​អ្នក​មក​ហើយ ប៉ុន្តែ​មិន​ហ៊ាន​បង្ហាញ​វត្តមាន​ជា​ផ្លូវការ៖ «បាទ! ក្រុម​របស់​ខ្ញុំ ខ្ញុំ​មាន​ទស្សនៈ​មួយ​ថា គាត់​ជា​មនុស្ស​របស់​ជាតិ ហើយ​ធ្លាប់​ជា​អតីត​នាយករដ្ឋមន្ត្រី​នៅ​ក្នុង​សម័យ​រដ្ឋ​កម្ពុជា​ទៀត អ៊ីចឹង​ហេតុ​អី​បាន​ជា​យើង​មិន​ទៅ​គោរព​គាត់ បែរ​ជា​មក​នាំ​គ្នា​រើសអើង​ទៅ​វិញ? នេះ​ជា​រឿង​ដែល​ចម្លែក​មែនទែន»

អ្នក​នាំ​ពាក្យ​នៃ​គណបក្ស​ប្រជាជន​កម្ពុជា លោក សុខ ឥសាន បាន​អោយ​ដឹង​ថា ការ​ចូលរួម​បុណ្យ​សព គឺ​ជា​សមានចិត្ត​របស់​បុគ្គល​ម្នាក់ៗ។ អ្នកនាំពាក្យ​រូប​នេះ​ក៏​បាន​បញ្ជាក់​ដែរ​ថា អនុប្រធាន​ទី​២ រដ្ឋ​សភា លោក ងួន ញ៉ិល និង​តំណាងរាស្ត្រ​មួយ​ចំនួន​ដែល​មក​ពី​គណបក្ស​ប្រជាជន​កម្ពុជា បាន​ចូលរួម​គោរព​វិញ្ញាណក្ខន្ធ​សព​លោក ប៉ែន សុវណ្ណ កាល​ពី​ថ្ងៃ​ទី​៣ ខែ​វិច្ឆិកា រួច​មក​ហើយ។ ដូច្នេះ​នេះ​ក៏​អាច​បញ្ជាក់​ថា ខាង​គណបក្ស​កាន់​អំណាច​បាន​ចូលរួម​ដែរ។

គណៈកម្មការ​បុណ្យ​សព​លោក ប៉ែន សុវណ្ណ បាន​ចេញ​សេចក្ដី​ប្រកាស​ព័ត៌មាន​នៅ​រសៀល​ថ្ងៃ​ទី​៤ វិច្ឆិកា ថា នៅ​ម៉ោង ៩​ព្រឹក ថ្ងៃ​ទី​៥ ខែ​វិច្ឆិកា នឹង​មាន​ពិធី​បង្សុកូល រាប់បាត្រ​ប្រគេន​ព្រះសង្ឃ​ចំនួន ៨០​អង្គ នៅ​វត្ត​ថាន់។

​គណៈកម្មការ​បុណ្យ​គ្រោង​នឹង​ដង្ហែ​សព​លោក ប៉ែន សុវណ្ណ ទៅ​បូជា​នៅ​វត្ត​ឫស្សីសាញ់ សង្កាត់​ព្រៃស ខណ្ឌ​ដង្កោ នៅ​ព្រឹក​ថ្ងៃ​ទី​៦ ខែ​វិច្ឆិកា ក្រោយ​ពី​មាន​ចម្រូងចម្រាស​ពី​ទីតាំង​បូជា​សព​លោក ប៉ែន សុវណ្ណ រវាង​គណៈកម្មការ​រៀបចំ​បុណ្យ​សព និង​អាជ្ញាធរ​សាលា​រាជធានី​ភ្នំពេញ។

លោក ប៉ែន សុវណ្ណ បាន​ទទួល​មរណភាព​កាល​ពី​ថ្ងៃ​ទី​២៩ ខែ​តុលា ដោយ​រោគាពាធ ក្នុង​ជន្មាយុ ៨០​ឆ្នាំ នា​គេហដ្ឋាន​របស់​លោក​នៅ​ភូមិ​ស្នោ សង្កាត់​រកាក្នុង ក្រុង​ដូនកែវ ខេត្ត​តាកែវ។ លោក​ជា​អតីត​នាយករដ្ឋមន្ត្រី​ក្នុង​របប​សាធារណរដ្ឋ​ប្រជាមានិត​កម្ពុជា ចាប់​ពី​ឆ្នាំ​១៩៧៩ ដល់​ឆ្នាំ​១៩៨១។ មុន​ទទួល​មរណភាព​នេះ លោក​គឺ​ជា​តំណាងរាស្ត្រ​គណបក្ស​សង្គ្រោះ​ជាតិ មណ្ឌល​កំពង់ស្ពឺ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល