គ្រួសារ​មន្ត្រី​និង​សកម្មជន​បក្ស​ប្រឆាំង​គ្រោង​ជួបជុំគ្នា​នៅ​មុខ​តុលាការ​ភ្នំពេញ​ទាមទារ​ទម្លាក់​បទ​ចោទ​សាច់ញាតិ​ខ្លួន

ដោយ ខែ សុណង
2020-06-25
អ៊ីម៉ែល
មតិ
Share
បោះពុម្ព
សាលាដំបូង​រាជធានី​ភ្នំពេញ។ រូប​ថត​ថ្ងៃ​ទី​២៧ ខែ​មេសា ឆ្នាំ​២០១៦។
សាលាដំបូង​រាជធានី​ភ្នំពេញ។ រូប​ថត​ថ្ងៃ​ទី​២៧ ខែ​មេសា ឆ្នាំ​២០១៦។
RFA

ក្រុម​គ្រួសារ​មន្ត្រី​គណបក្ស​សង្គ្រោះ​ជាតិ និង​សកម្មជន​គណបក្ស​នេះ នៅ​ថ្ងៃ​សុក្រ ទី​២៦ មិថុនា គ្រោង​ទៅ​ទាមទារ​ឱ្យ​តុលាការ​របប​ក្រុងភ្នំពេញ ដោះលែង​សាច់ញាតិ​និង​គ្រួសារ​របស់​ពួកគេ​សាជាថ្មី​ម្តង​ទៀត។ ក្រុម​គ្រួសារ​សាច់ញាតិ​អ្នក​ជាប់ឃុំ​យល់ថា ការ​ចាប់ខ្លួន​មន្ត្រី​បក្ស​ប្រឆាំង​ជា​រឿង​នយោបាយ។

គ្រួសារ​មន្ត្រី និង​សកម្មជន​គណបក្សប្រឆាំង ជាង​១០​គ្រួសារ​គ្រោង​ជួបជុំគ្នា​លើក​បដា​នៅមុខ​តុលាការ​រាជធានី​ភ្នំពេញ ទាមទារ​ឱ្យ​តុលាការ​ទម្លាក់​ចោលការ​ចោទប្រកាន់​គ្រួសារ​សាច់ញាតិ​របស់​ពួកគេ។

កូនប្រុស​សកម្មជន​បក្ស​ប្រឆាំង​លោក ស៊ន់ ធន់ គឺ​លោក ធន់ ធានី ថ្លែងប្រាប់​អាស៊ីសេរី​នៅ​យប់​ថ្ងៃទី​២៤ មិថុនា ថា ពួកគាត់​នឹង​ជួបជុំគ្នា​នៅ​ថ្ងៃ​សុក្រ ទី​២៦ មិថុនា នៅ​សាលាដំបូង​រាជធានី​ភ្នំពេញ ទាមទារ​ឱ្យ​តុលាការ​នេះ​ពិចារណា​ឡើងវិញ ក្នុង​សំណុំរឿង​នីមួយៗ​ដែល​កំពុង​រង​ភាព​អយុត្តិធម៌​។ លោក​ថា លរដ្ឋ​មាន​ក្ដី​ព្រួយបារម្ភ​ពី​ការរារាំង​នានា ប៉ុន្តែ​ពួកគាត់​និង​គ្រួសារ​សកម្មជន​ដទៃ​ទៀត​ប្ដេជ្ញា​ថា នឹង​នៅតែ​ប្រើ​សិទ្ធិ​ជួបជុំ​សម្ដែង​មតិ​ពី​ទុក្ខ​កង្វល់​នេះ៖ «ជាពិសេស​សូម​ឱ្យ​តុលាការ​ឯករាជ្យ ឱ្យ​តុលាការ​ផ្ដល់​យុត្តិធម៌​ឱ្យ​ក្រុម​គ្រួសារ​ដែល​ជាប់​ទាំងអស់​ហ្នឹង និង​ពន្លឿន​សវនាការ ព្រោះ​ដោយសារ​ការ​ចាប់​ឃុំ​នេះ គឺ​អយុត្តិធម៌ តុលាការ​មិន​ឯករាជ្យ​ធ្វើតាម​បញ្ជា​រដ្ឋាភិបាល​។ មួយទៀត​អ្នក​ជាប់ទោស ដូច​ប៉ា​ខ្ញុំ​គាត់​ចាស់​ហើយ​មិន​អាច​នៅ​ក្នុង​ពន្ធនាគារ​យូរ​គាត់​មាន​បញ្ហា​សុខភាព​ផង»

ចាប់ពី​ដើម​ឆ្នាំ​២០២០​មក របប​ក្រុងភ្នំពេញ បាន​ចាប់ខ្លួន​មន្ត្រី​បក្ស​ប្រឆាំង​សរុប​ចំនួន ១៦​នាក់ ក្នុង​នោះ មាន​៤​នាក់ ជា​សមាជិក​សមាគម​គ្រូបង្រៀន​កម្ពុជា​ឯករាជ្យ​។ តែ​អាជ្ញាធរ បាន​ដោះលែង​សមាជិក​បក្ស​ប្រឆាំង​ម្នាក់​វិញ គឺ លោក ហិន ឆាន នៅ​ខេត្ត​ស្វាយរៀង ដោយសារ​លោក​មាន​ជំងឺ​ធ្ងន់ធ្ងរ ក្នុង​ពេល​ចាប់ខ្លួន​ទាំង​បង្ខំ។

ជុំវិញ​គម្រោង​គ្រួសារ​មន្ត្រី​និង​សកម្មជន​គណបក្សប្រឆាំង​ជួបជុំគ្នា​នេះ អ្នកស្រី មូរ សុខហួរ អនុប្រធាន​គណបក្ស​ស​ង្គ្រោះ​ជាតិ ថ្លែង​ថា គឺជា​សិទ្ធិ​សេរីភាព​នៃ​ក្រុម​គ្រួសារ​របស់​សកម្មជន និង​មន្ត្រី​បក្ស​ប្រឆាំង​ទាំងនោះ ដោយ​គ្មាន​ការ​បង្គាប់​បញ្ជា​ពី​ថ្នាក់ដឹកនាំ​គណបក្ស​នោះ​ទេ ព្រោះតែ​ការឈឺចាប់​ដោយ​អំពើ​អយុត្តិធម៌៖ «អ្នកណា​ក៏ដោយ​ចាប់ចង​ដោយ​អត់​មាន​ហេតុផល​អត់​មាន​ដីកា​ដោយ​ភាព​សាហាវ យើង​ដឹង​ហើយ​ពេល​នគរបាល​ប៉ូលិស​មក​ព័ទ្ធ​ផ្ទះ​យើង​ម្ដងៗ​តើ​យើង​ភ័យ​ទេ នៅ​មុខ​កុមារ​មុខ​គ្រួសារ​របស់​យើង តើ​យើង​តក់ស្លុត​យ៉ាងណា​យើង​ឈឺចាប់​យ៉ាងណា ការ​ចាប់ចង​អ្នកណា​ក៏ដោយ​ក្នុង​ភាព​អយុត្តិធម៌​របៀប​នេះ​គឺ​ឈឺចាប់​។ ដូច្នេះ​ការ​ចេញ​ទៅ​បង្ហាញ​នៅ​ការ​ចេញទៅ​បញ្ចេញ​មតិ​ឱ្យ​មានការ​ដោះលែង​គឺជា​ឆន្ទៈ​របស់​បុគ្គល​ម្នាក់ៗ»

ទាក់ទង​បញ្ហា​នេះ អ្នកនាំពាក្យ​សមាគម​ការពារ​សិទ្ធិមនុស្ស​អាដហុក លោក ស៊ឹង សែនករុណា ថ្លែង​ថា សមាគម​នឹង​បន្ត​ឃ្លាំមើល​ប្រជាពលរដ្ឋ​ចំពោះ​គម្រោង​ជួបជុំគ្នា​នេះ​។ មន្ត្រី​សិទ្ធិមនុស្ស​ដដែល​បាន​ចាត់​ទុក​រឿង​ចាប់ខ្លួន​មន្ត្រី​បក្ស​ប្រឆាំង ដាក់​ពន្ធនាគារ​ជា​បន្តបន្ទាប់​នេះ ថា ជា​រឿង​នយោបាយ មិនមែន​អនុវត្ត​ច្បាប់​ឡើយ។

ប៉ុន្តែ អ្នកនាំពាក្យ​ក្រសួងយុត្តិធម៌ លោក ជិន ម៉ាលីន ធ្លាប់​ប្រាប់​អាស៊ីសេរី​ថា រឿងក្ដី​ក្ដាំ​នេះ​ជា​នីតិវិធី​របស់​តុលាការ​ដោយ​ពុំ​មាន​ក្រុម ឬ​ស្ថាប័ន​ណា​អាច​បង្គាប់បញ្ជា ឬ​ដាក់​សម្ពាធ​ទៅ​លើ​តុលាការ​បាន​ឡើយ។

ចំណែក​អ្នកវិភាគ​នយោបាយ​វិញ​ថា មន្ត្រី​បក្ស​ប្រឆាំង​ដែល​ត្រូវ​បាន​រង​ការ​គំរាមកំហែង តាម​ឃ្លាំមើល និង​ចាប់ខ្លួន​នេះ គឺ​ច្រើនតែ​ជា​មុខសញ្ញា ដែល​កើត​លើ​អ្នក​សកម្មៗ​នៅ​តាម​មូលដ្ឋាន។

កាល​ពី​ថ្ងៃ​ទី១៩ មិថុនា ប្រពន្ធ​និង​កូន​សកម្មជន​គណបក្ស​សង្គ្រោះ​ជាតិ​ដែល​កំពុង​ជាប់ឃុំ​នៅ​ពន្ធនាគារ​ព្រៃ​ស​ប្រមាណ ២០​នាក់ បាន​ប្រមូល​ផ្តុំ​គ្នា តវ៉ា​នៅមុខ​សាលាដំបូង​រាជធានី​ភ្នំពេញ​ម្ដង​ហើយ ទាមទារ​ឱ្យ​តុលាការ​ដោះលែង​អ្នក​ទោស​នយោបាយ​ជាង ១០​នាក់​ឱ្យ​មាន​សេរីភាព​ឡើងវិញ​និង​ដោយ​ឥត​លក្ខខណ្ឌ។ ប៉ុន្តែ ពុំ​មាន​មន្ត្រី​តុលាការ​ណា​ម្នាក់​ចេញទៅ​ជួប​ក្រុម​អ្នក​តវ៉ា​នោះ​ទេ។

រីឯ​ការ​តវ៉ា​ដែល​គ្រោង​នឹង​ធ្វើ​នៅ​ថ្ងៃ​ទី​២៦ មិថុនា ពួកគាត់​អះអាង​ថា ក្រៅពី​ឈរ​ស្រែក​ទាមទារ​ឱ្យ​តុលាការ​ដោះលែង ពួកគេ​ក៏​នឹង​លើក​បដា​សរសេរ​ពាក្យ​ថា Bring my father back home​ឬ​មានន័យថា ឱ្យ​ឪពុក​ខ្ញុំ​បាន​ទៅផ្ទះ​វិញ ហើយ​ពួកគាត់​ក៏​នឹង​នាំគ្នា​បន្ត​ដំណើរ​ទៅ​ដាក់​ញត្តិ​នៅ​ស្ថានទូត​អាមេរិក ដើម្បី​សុំ​ឱ្យ​ជួយ​អន្តរាគមន៍​ជុំវិញ​រឿង​នេះ​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល