លោក ជា ស៊ីម ទទួលមរណភាព
2015.06.08
លោក ជា ស៊ីម ប្រធានគណបក្សប្រជាជនកម្ពុជា និងជាប្រធានព្រឹទ្ធសភាកម្ពុជា។
Photo: distributed with Mr. Say Chhum's authorization
ប្រធានគណបក្សប្រជាជនកម្ពុជា លោក ជា ស៊ីម និងជាប្រធានព្រឹទ្ធសភា បានទទួលមរណភាពកាលពីវេលាម៉ោងប្រមាណ ៣ និង ៤៥នាទីរសៀល ថ្ងៃទី៨ ខែមិថុនា។ មន្ត្រីគណបក្សប្រជាជនកម្ពុជា ចាត់ទុកការបាត់បង់រូប លោក ជា ស៊ីម នៅពេលនេះ ថាជាការបាត់បង់ឥស្សរជនមួយរូបដ៏សំខាន់របស់ប្រទេសជាតិ។ រីឯមន្ត្រីបក្សប្រឆាំងវិញ សម្ដែងការសោកស្ដាយ និងចូលរួមមរណទុក្ខជាមួយក្រុមគ្រួសាររបស់ លោក ជា ស៊ីម។
លោក ជា ស៊ីម ដែលបាត់មុខជាសាធារណៈពីកម្មវិធីធំៗរបស់គណបក្សប្រជាជនកម្ពុជា អស់រយៈពេលជាយូរមកហើយដោយជំងឺនោះ ឥឡូវនេះលោកបានទទួលមរណភាព។
ប្រធានកងអង្គរក្សរបស់លោក គឺលោក យឹម លាង ឲ្យដឹងនៅថ្ងៃទី៨ មិថុនា ថា លោក ជា ស៊ីម បានទទួលមរណភាពដោយជរាពាធនៅគេហដ្ឋានរបស់លោកក្នុងខណ្ឌចម្ការមន រាជធានីភ្នំពេញ។ លោក យឹម លាង មិនទាន់អាចផ្តល់ព័ត៌មានលម្អិតបន្ថែមជុំវិញមរណភាពរបស់ លោក ជា ស៊ីម បានទេនៅពេលនេះ ព្រោះលោកជាប់រវល់។
ចំណែកអ្នកនាំពាក្យគណបក្សប្រជាជនកម្ពុជា លោក ឈឹម ផលវរុណ មានប្រសាសន៍ថា នៅពេលនេះសមាជិកសមាជិកា និងមន្ត្រីរបស់គណបក្សប្រជាជនកម្ពុជា ទាំងអស់ កំពុងចូលរួមកាន់មរណទុក្ខជាមួយក្រុមគ្រួសារសព លោក ជា ស៊ីម។ បើទោះជាអ្នកនាំពាក្យរូបនេះ មិនទាន់អាចផ្តល់ព័ត៌មានជុំវិញការរៀបចំពិធីបុណ្យរបស់ លោក ជា ស៊ីម ក្តី ប៉ុន្តែលោកថា លោក ជា ស៊ីម មិនត្រឹមតែជាមេដឹកនាំកំពូលរបស់គណបក្សប្រជាជនកម្ពុជា នោះទេ តែលោកគឺជាថ្នាក់ដឹកនាំរដ្ឋកំពូលរបស់កម្ពុជា មួយរូប ដូច្នេះរដ្ឋប្រាកដជាមានកម្មវិធីសម្រាប់លោកជាពិសេស៖ «ក្នុងរយៈពេលមួយម៉ោងស្លន់ស្លោម្នាក់ៗ ត្រូវទទួលភាពស្លុតចិត្តស្លុតអារម្មណ៍ ចឹងហើយព្រោះនេះការកាន់ទុក្ខ ហើយត្រូវការជជែកទី១ មួយឯកជនក្រុមគ្រួសារ ទី២ កិច្ចការបក្ស និងរដ្ឋ ត្រូវជជែកអំពីពិធីផ្លូវការ ពីព្រោះសម្ដេច ជា ស៊ីម លោកទទួលមរណភាពក្នុងតួនាទីលោកជាប្រធានព្រឹទ្ធសភា»។
លោក ឈឹម ផលវរុណ ក៏បញ្ជាក់ដែរថា ក្នុងពេលនេះគណបក្សមិនទាន់បានគិតគូរពីរឿងការងារបន្ទាប់ពីការបាត់បង់ លោក ជា ស៊ីម នៅឡើយទេ ព្រោះមន្ត្រីគណបក្សទាំងអស់កំពុងកាន់ទុក្ខសព។
ទាក់ទងនឹងការរៀបចំពិធីបុណ្យសពឲ្យ លោក ជា ស៊ីម អ្នកនាំពាក្យសាលារាជធានីភ្នំពេញ ឲ្យដឹងថា ដោយសារ លោក ជា ស៊ីម ជាឥស្សរជនជាន់ខ្ពស់របស់ប្រទេស ដូច្នេះបុណ្យសពរបស់លោក គឺគណៈកម្មាធិការរៀបចំបុណ្យជាតិ និងអន្តរជាតិជាអ្នករៀបចំ។ លោកថា បើទោះជាសាលារាជធានីភ្នំពេញមានតួនាទីសហការរៀបចំជាមួយគណៈកម្មាធិការរៀបចំបុណ្យជាតិ និងអន្តរជាតិក៏ដោយ ក៏ប៉ុន្តែរហូតមកទល់ពេលនេះ សាលារាជធានីភ្នំពេញ មិនទាន់ដឹងពីកម្មវិធីបុណ្យនៅឡើយ។ ប៉ុន្តែលោកថា បើតាមការណែនាំ សាលារាជធានីភ្នំពេញត្រូវរៀបចំជាមេរុនៅសួនច្បារមុខវត្តបទុមវតី៖ «រៀបចំជាមេរុនៅមុខវត្តបទុមវតី ហើយរៀបចំជាវេទិកានានា ដើម្បីពិធីបូជាសព ប៉ុន្តែយើងខ្ញុំអត់ទាន់ដឹងនៅថ្ងៃណាទេ»។
លោក ជា ស៊ីម ដែលមានតួនាទីជាប្រធានគណបក្សប្រជាជនកម្ពុជា ផង ជាប្រធានព្រឹទ្ធសភា និងប្រមុខរដ្ឋស្តីទីផង បានបាត់មុខពីសាធារណៈអស់មួយរយៈពេល ដែលគេដឹងថា ការបាត់មុខនេះ ដោយសារលោកមានជំងឺ។ លើសពីនេះ លោកក៏បានប្រគល់ការងារជាប្រធានព្រឹទ្ធសភារបស់លោក ទៅឲ្យអនុប្រធានទី១ ព្រឹទ្ធសភា លោក សាយ ឈុំ មើលការខុសត្រូវនៅពេលដែលលោកកំពុងមានជំងឺ។
លោក ជា ស៊ីម ដែលមានវ័យ ៨៣ឆ្នាំក្នុងពេលមរណភាព គឺជាអតីតមន្ត្រីខ្មែរក្រហម ដែលបានរត់ភៀសខ្លួនទៅកាន់ប្រទេសវៀតណាម។ លោកបានចូលកម្ពុជា វិញនៅបន្ទាប់ពីកងទ័ពរណសិរ្សរំដោះជាតិកម្ពុជា គាំទ្រដោយកងទ័ពវៀតណាម បានទទួលជ័យជម្នះលើកងទ័ពខ្មែរក្រហមនៅថ្ងៃទី៧ ខែមករា ឆ្នាំ១៩៧៩។ លោកបានក្លាយជាប្រធានគណបក្សប្រជាជនកម្ពុជា ចាប់តាំងពីឆ្នាំ១៩៩១ មក។
នៅមុនពេលលោកទទួលមរណភាព លោក ជា ស៊ីម ក៏ធ្លាប់ត្រូវបានក្រុមគ្រួសារបញ្ជូនទៅសម្រាកព្យាបាលមួយរយៈពេលនៅមន្ទីរពេទ្យក្នុងប្រទេសវៀតណាម ផងដែរ។
ចំពោះការបាត់បង់ជីវិតរបស់ លោក ជា ស៊ីម នៅពេលនេះ ត្រូវបានគណបក្សសង្គ្រោះជាតិ សម្ដែងការសោកស្ដាយ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍នៅក្រោយមរណភាពរបស់ លោក ជា ស៊ីម ថា គណបក្សសង្គ្រោះជាតិ សម្ដែងការចូលរួមមរណទុក្ខជាមួយក្រុមគ្រួសារសព លោក ជា ស៊ីម។ លោកមានប្រសាសន៍ថា ការបាត់បង់ លោក ជា ស៊ីម គឺជាការបាត់បង់ឥស្សរជននយោបាយមួយរូប ដែលបានបម្រើប្រទេសជាតិអស់ស្ទើរពេញមួយជីវិតរបស់លោក៖ «ជារឿងធម្មតាមនុស្សយើងកើតចាស់ឈឺស្លាប់ យើងមានការសោកស្ដាយមនុស្សគ្រប់ៗរូបគេចមិនផុតទេ ដូច្នេះយើងយល់ឃើញថា គាត់បានលាចាកលោកទៅហើយ ហើយកិច្ចការដែលនៅសេសសល់ទាំងប៉ុន្មានហ្នឹង គឺជាកិច្ចការរបស់អ្នកនៅជំនាន់ក្រោយ ដែលត្រូវតែបន្តវេនធ្វើការងារពីឥស្សរជននយោបាយពីគ្រប់គណបក្សទាំងអស់»។
ចំណែកអ្នកវិភាគនយោបាយឯករាជ្យ លោកបណ្ឌិត សុខ ទូច វិញកត់សម្គាល់ថា មរណភាពរបស់ លោក ជា ស៊ីម នៅពេលនេះ គឺជាការបាត់បង់អ្នកនយោបាយម្នាក់ដ៏មានភាពចាស់ទុំបំផុតនៅក្នុងការដោះស្រាយនៅពេលមានបញ្ហានយោបាយឡើងកម្ដៅខ្លាំង៖ «គាត់ជាអ្នកនយោបាយមួយដែលមិនសូវបានបន្សល់ស្នាដៃអាក្រក់អ្វីនៅក្នុងដំណើរនៃនយោបាយរបស់លោកទេ អ្វីដែលយើងសោកស្ដាយ គឺយើងបាត់បង់នូវវីរជនរបស់កម្ពុជា ដែលលោកបានធ្វើច្រើនសម្រាប់ប្រជាជន ប្រទេសជាតិរបស់យើង ក៏ដូចជាសម្រាប់មនុស្សទៅថ្ងៃអនាគតរៀនសូត្រនូវគំរូវីរភាពរបស់លោក»។
លោកថា ក្នុងនាមជាស្ថាបនិករណសិរ្សរំដោះជាតិម្នាក់ និងជាថ្នាក់ដឹកនាំគណបក្សប្រជាជនកម្ពុជា លោក ជា ស៊ីម គឺជាអ្នកនយោបាយសម្របសម្រួលនៅក្នុងគណបក្ស ហើយក៏ជាអ្នកមានភាពចាស់ទុំនៅក្នុងការដោះស្រាយទំនាស់ផ្ទៃក្នុង បក្ស និងសម្រួលចរន្តឲ្យមានការឯកភាពក្នុងបក្សផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- អង្គការអន្តរជាតិថា រដ្ឋាភិបាលបានបរាជ័យ ចំពោះការធានារបស់ខ្លួនលើកកម្ពស់សិទ្ធិមនុស្ស
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា
- កាស៊ីណូលោក លី យ៉ុងផាត់ រងការចោទប្រកាន់ថា បង្ខាំងមនុស្សឱ្យធ្វើការឆបោកតាមអនឡាញ
អត្ថបទពេញនិយម
នយោបាយ
- ពលរដ្ឋខ្មែរនៅអូស្ត្រាលីធ្វើបាតុកម្មទាមទារឱ្យរដ្ឋាភិបាលកម្ពុជាដកគម្រោង CLV ទាំងស្រុង
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ
- អង្គការសិទ្ធិមនុស្សថ្កោលទោសរដ្ឋាភិបាលម៉ាឡេស៊ីបញ្ជូនពលករខ្មែរម្នាក់ ឱ្យអាជ្ញាធរកម្ពុជា ដោយសារតែរិះគន់លោក ហ៊ុន សែន