តើ​សេរីភាព​សម្ដែង​មតិ​របស់​ពលរដ្ឋ​ខ្មែរ និង​ថៃ ខុស​ឆ្ងាយ​គ្នា​កម្រិត​ណា?

ដោយ វ៉ែន សុមេធ
2020-10-04
អ៊ីម៉ែល
មតិ
Share
បោះពុម្ព
លោក​នាយក​រដ្ឋមន្ត្រី ហ៊ុន សែន (ស្ដាំ) និង​លោក​នាយក​រដ្ឋមន្ត្រី​ថៃ បា្រយុទ្ធ ចាន់អូចា (Prayut Chan-O-cha) ធ្វើ​សន្និសីទ​កាសែត​រួម​គ្នា​នៅ​រាជធានី​ភ្នំពេញ ថ្ងៃ​ទី​៧ ខែ​កញ្ញា ឆ្នាំ​២០១៧។ Photo courtesy of Hun Sen's Facebook Page
លោក​នាយក​រដ្ឋមន្ត្រី ហ៊ុន សែន (ស្ដាំ) និង​លោក​នាយក​រដ្ឋមន្ត្រី​ថៃ បា្រយុទ្ធ ចាន់អូចា (Prayut Chan-O-cha) ធ្វើ​សន្និសីទ​កាសែត​រួម​គ្នា​នៅ​រាជធានី​ភ្នំពេញ ថ្ងៃ​ទី​៧ ខែ​កញ្ញា ឆ្នាំ​២០១៧។ Photo courtesy of Hun Sen's Facebook Page
Photo courtesy of Hun Sen's Facebook Page

អាជ្ញាធរ​កម្ពុជា និង​ថៃ​ដែល​ជា​ប្រទេស​មាន​ព្រំដែន​ជាប់​គ្នា​នោះ នៅ​អំឡុង​មាន​វិបត្តិ​ជំងឺ​កូវីដ​១៩​នេះ ប្រជាពលរដ្ឋ​ប្រទេស​ទាំងពីរ​តែងតែ​នាំគ្នា​ធ្វើ​បាតុកម្ម​ប្រឆាំង​នឹង​រដ្ឋាភិបាល​រៀងៗ​ខ្លួន​។ កន្លង​ទៅ វិធានការ​ទប់ស្កាត់​ពលរដ្ឋ​ចូលរួម​សម្ដែង​មតិ​របស់​អាជ្ញាធរ​កម្ពុជា និង​ថៃ មាន​ភាព​ខុស​គ្នា​ដាច់​ស្រឡះ ដែល​ថៃ​បើក​ឱ្យ​ពលរដ្ឋ​របស់​ខ្លួន​អាច​ប្រមូល​ផ្ដុំ​គ្នា​សម្ដែង​មតិ​បាន​យ៉ាង​ទូលំទូលាយ ចំណែក​អាជ្ញាធរ​ខ្មែរ​វិញ​បាន​បង្ក្រាប​ដោយ​ហិង្សា និង​ចាប់​ពលរដ្ឋ​ជាច្រើន​នាក់​ដាក់​ពន្ធនាគារ​ទៀត​ផង​។ តើ​ចំណាត់ការ​របស់​អាជ្ញាធរ​នៃ​ប្រទេស​ទាំងពីរ​ទៅលើ​ការ​ចេញ​តវ៉ា​របស់​ពលរដ្ឋ​ខុសគ្នា​បែប​ណា​ខ្លះ?

ចាប់​តាំង​ពី​មានការ​រាតត្បាត​ជំងឺ​កូវីដ​១៩​មក ប្រជាធិបតេយ្យ​នៅ​កម្ពុជា​បាន​ធ្លាក់​ចុះ​យ៉ាង​ខ្លាំង រហូតដល់​ប្រជាពលរដ្ឋ​មិន​អាច​ចូលរួម​សម្ដែង​មតិ​បាន​ឡើយ​។ កន្លងទៅ​ជារឿយៗ ក្រុម​យុវជន និង​ប្រជាពលរដ្ឋ​តែង​ធ្វើ​សកម្ម ប្រមូលផ្ដុំ​គ្នា​តវ៉ា​ស្វែងរក​យុត្តិធម៌​សង្គម​យ៉ាង​ផុលផុស​។ ប៉ុន្តែ​សកម្មភាព​ទាំងនោះ​ត្រូវ​បាន​អាជ្ញាធរ​រារាំង​ជាប្រចាំ​។ សូម្បីតែ​ការ​ជិះ​កង់​របស់​ក្រុម​យុវជន​មួយ​ក្រុម​តូច​ដើម្បី​ផ្សព្វផ្សាយ​ឱ្យ​មាន​វិធានការ​ការពារ​កោះកុង​ក្រៅ​ក៏​ត្រូវ​អាជ្ញាធរ​ហាមឃាត់​ដែរ​។ អាជ្ញាធរ​ក៏បាន​រារាំង​ក្រុម​យុវជន ប្រជាពលរដ្ឋ និង​ព្រះសង្ឃ មិន​ឱ្យ​ចូលរួម​សម្ដែង​មតិ ទាមទារ​ឱ្យ​មាន​យុត្តិធម៌​សង្គម​ជាច្រើនលើក​ច្រើន​សា ជាពិសេស​ក្រោយ​ពេល​ដែល​អាជ្ញាធរ​ចាប់ ប្រធាន​សហព័ន្ធ​សហជីព​កម្ពុជា លោក រ៉ុង ឈុន ដាក់​ពន្ធនាគារ​ព្រៃ​ស កាលពី​ចុងខែ​កក្កដា​មក គឺ​កង​សន្តិសុខ​ខណ្ឌ​៧​មករា​តែងតែ​បង្ក្រាប​ដោយ​ហិង្សា​លើ​ក្រុម​យុវជន​ខ្មែរ​ថាវរៈ និង​ប្រជាពលរដ្ឋ ដែល​ពួកគេ​បាន​ចូលរួម​តស៊ូ​មតិ​ទាមទារ​ឱ្យ​តុលាការ​ដោះលែង លោក រ៉ុង ឈុន បណ្ដាល​ឱ្យ​ប្រជាពលរដ្ឋ​ជាច្រើន​នាក់​រង​របួស ក្នុង​នោះ​មាន​ស្ត្រី​ចំនួន​២​នាក់ របួសធ្ងន់​ជាងគេ ដោយសារ​កង​សន្តិសុខ​ចាប់​អូស​ដាក់​ឡាន​និង ចាប់​ក្រវាត់​នៅ​លើ​ថ្នល់​។ អាជ្ញាធរ​បាន​ចាត់​ទុក​ការ​បង្ក្រាប​នេះ ថា ជា​ការ​អនុវត្ត​ច្បាប់ ដើម្បី​រក្សា​សណ្ដាប់​សង្គម។

កាល​ពី​ថ្ងៃ​ទី​១៨ សីហា លោកនាយករដ្ឋមន្ត្រី ហ៊ុន សែន បាន​ប្រកាស​ថា ការ​ចាប់​លោក រ៉ុង ឈុន ពាក់ព័ន្ធ​នឹង​បញ្ហា​ព្រំដែន ហើយ​លោក​ក៏​ព្រមាន​ដល់​ប្រជាពលរដ្ឋ​ទាំងឡាយ​ណា​ដែល​ហ៊ាន​និយាយ​ពាក់ព័ន្ធ​បញ្ហា​ព្រំដែន​នឹង​ត្រូវ​ចាប់ខ្លួន​ដាក់​ពន្ធនាគារ​ទាំងអស់​ដោយ​មិន​លើកលែង​នោះ​ឡើយ៖ «ឥឡូវ​មាន​ប៉ុន្មាន​ចេញ​មក​ទៀត សុំ​ផ្ញើ​សារ ចេញ​មក​ប៉ុន្មាន​ចាប់​ប៉ុណ្ណឹង រឿង​ទល់ដែន អត់​មាន​ឱ្យ​រញ៉េរញ៉ៃ​ទេ។ កុំ​ថា​រដ្ឋាភិបាល​លោក ហ៊ុន សែន ផ្ដាច់ការ នេះ​មិនមែន​ជា​ការ​តស៊ូ​មតិ​ទេ អ្នកខ្លះ​ចេញ​មក​ថា នេះ​ជា​ការ​តស៊ូ​មតិ អត់​ជា​ការ​តស៊ូ​មតិ​ទេ នេះ​ជា​រឿង​ផ្លូវច្បាប់​សុទ្ធសាធ ព្រោះ​នេះ​មិនមែន​ជា​រឿង​ដែល​ត្រូវ​ធ្វើ​ប្រជាមតិ​ដែល​ត្រូវ​ថា​នោះ​ទេ»

ការ​ព្រមាន​របស់​លោក​ហ៊ុន សែន នេះ ធ្វើ​ឱ្យ​ប្រជាពលរដ្ឋ​ភាគច្រើន​ភ័យខ្លាច និង​មិន​ហ៊ាន​ចូលរួម​​សម្ដែង​មតិ ដែល​ជា​សិទ្ធិ​សេរីភាព​ជា​មូលដ្ឋាន​របស់​ពលរដ្ឋ​ធានា​ដោយ​រដ្ឋធម្មនុញ្ញ​ក៏ដោយ។

ចាប់​តាំង​លោក ហ៊ុន សែន បាន​ប្រកាស​រហូត​មក​ដល់​ថ្ងៃ​ទី​៤ តុលា មាន​សកម្មជន​នយោបាយ ព្រះសង្ឃ អ្នក​ចំរៀង​រេប និង​សកម្មជន​សង្គម​ជិត​២០​នាក់​ហើយ ត្រូវ​បាន​អាជ្ញាធរ​ខ្មែរ​ចាប់ខ្លួន​ដាក់​ពន្ធនាគារ​ព្រៃ​ស។ តុលាការ​បាន​ចោទប្រកាន់​អ្នក​ទាំងនោះ ពី​បទ​ញុះញង់​ឲ្យ​ប្រព្រឹត្ត​បទឧក្រិដ្ឋ​ជាអាទិ៍ ញុះញង់​បង្ក​ឱ្យ​មាន​ភាព​វឹកវរ​នៅ​ក្នុង​សង្គម។

ផ្ទុយ​ពី​ការ​ចោទប្រកាន់​នេះ អង្គការ​សង្គម​ស៊ីវិល​ជាតិ និង​អន្តរជាតិ ជាច្រើន​ស្ថាប័ន បាន​ថ្កោលទោស​ចំពោះ​ការ​ចាប់​ខ្លួន​នេះ​ថា ជា​រឿង​នយោបាយ និង​ជា​ការ​រឹតត្បិត​សិទ្ធិ​សេរីភាព​ធ្ងន់ធ្ងរ​របស់​ប្រជាពលរដ្ឋ​ទាំង​បំពាន​រដ្ឋធម្មនុញ្ញ។

ងាក​មក​មើល​ប្រទេស​ថៃ​វិញ ខុសគ្នា​ដាច់​ស្រឡះ​ពី​កម្ពុជា។ គិត​ចាប់​តាំង​ពី​ខែ​សីហា មក ប្រជាពលរដ្ឋ​ថៃ សិស្ស​វិទ្យាល័យ និង​និស្សិត​មហា​វិទ្យា​ថៃ​រាប់​ម៉ឺន​នាក់​បាន​ប្រមូល​ផ្ដុំគ្នា​ធ្វើបាតុកម្ម​តវ៉ា​ប្រឆាំង​នឹង​រដ្ឋាភិបាល​ថៃ​ជា​បន្តបន្ទាប់ ។ កាលពី​ចុងខែ​កញ្ញា ក្រុម​និស្សិត និង​ពលរដ្ឋ​ថៃ​ប្រមាណ​២​ម៉ឺន​នាក់​បាន​ធ្វើ​បាតុកម្ម​នៅ​កណ្ដាល​ទីក្រុង​បាងកក ទាមទារ​ឱ្យ​នាយករដ្ឋមន្ត្រី​ថៃ​លោក ប្រាយុទ្ធ ចាន់អូចា Prayuth Chan o Cha) ចុះ​ចេញពី​តំណែង និង​ទាមទារ​ឱ្យ​រដ្ឋាភិបាល​ថៃ​កែប្រែ​រដ្ឋធម្មនុញ្ញ​ថ្មី ដែល​ត្រូវ​បាន​រដ្ឋាភិបាល​របរ​យោធា​ថៃ​របស់​ឧត្ដមសេនីយ៍ ប្រាយុទ្ធ ចាន់អូចា ធ្វើ​វិសោធន៍​កម្ម​កាលពី​ឆ្នាំ​២០១៧ ប្រាស​ចាក​ពី​គន្លង​ប្រជាធិបតេយ្យ។

កន្លង​ទៅ​តុលាការ​ថៃ​ធ្លាប់​បាន​កោះហៅ​មេដឹកនាំ​ក្រុម​បាតុករ​ជាង ៣០​នាក់​ចូល​បំភ្លឺ​តុលាការ​ដូច​នៅ​កម្ពុជា​ដែរ ក៏ប៉ុន្តែ​រហូតមកដល់​ថ្ងៃ​ទី៤ តុលា ពុំ​មាន​បាតុករ​ថៃ​ណា​ម្នាក់​ត្រូវ​បាន​អាជ្ញាធរ​ថៃ​ចាប់ខ្លួន​ដាក់​ពន្ធនាគារ​នៅឡើយ។

ជាង​នេះ​ទៅ​ទៀត​កាលពី​ថ្ងៃ​១៧ កញ្ញា នាយករដ្ឋមន្ត្រី​ថៃ លោក ប្រាយុទ្ធ ចាន់អូចា Prayuth Chan o Cha) ថែម​ទាំង​ប្រកាស​មិន​ឱ្យ​ប៉ូលិស​បង្ក្រាប​ក្រុម​បាតុករ​នោះ​ទេ ប្រសិនបើ​ពួកគេ​ចូលរួម​សម្ដែង​មតិ​ដោយ​សន្តិវិធី ដែល​ស្របតាម​ច្បាប់​របស់​ប្រទេស​ថៃ​នោះ។ លោក​បញ្ជា​ឱ្យ​ប៉ូលិស​ការពារ​ក្រុម​បាតុករ​ថៃ ធ្វើ​យ៉ាងណា​ដើម្បី​សម្រួល​ឱ្យ​ពួកគេ​បាន​ចូលរួម​សម្ដែង​មតិ​ឱ្យ​បាន​ពេញលេញ៖ «សូម​ឱ្យ​អាជ្ញា​ធរមាន​សមត្ថកិច្ច​អនុវត្ត​លើ​ក្រុម​អ្នកធ្វើ​បាតុកម្ម​ដោយ​ក្ដី​អនុគ្រោះ ព្រោះ​ខ្ញុំ​ជឿជាក់​ថា ប្រជាពលរដ្ឋ​ដែល​ចូលរួម​តវ៉ា នឹង​ចេះ​ប្រុងប្រយ័ត្ន និង​ស្ថិត​នៅ​ក្នុង​រង្វង់​ច្បាប់​។ តែ​ខ្ញុំ​ក៏​ផ្ដាំផ្ញើ​ទៅដល់​ក្រុម​អ្នក​តវ៉ា​សុំ​ឱ្យ​គិតដល់​ប្រជាពលរដ្ឋ​ថៃ​ដូចគ្នា​ឱ្យ​បាន​ច្រើន ព្រោះ​ពលរដ្ឋ​យើង​រាប់​លាន​នាក់​ផ្សេងទៀត អាច​នឹង​រង​ផល​ប៉ះពាល់​ឆ្លង​ជំងឺ​កូវីដ​១៩ ដោយសារតែ​ភាព​ប្រថុយប្រថាន​របស់​បងប្អូន ដែល​អាច​ធ្វើ​ឱ្យ​ប្រទេស​យើង​អាច​ចេញ​បម្រាម​គោចរ​ជា​ថ្មី​ទៀត»

រដ្ឋាភិបាល​ថៃ​បាន​បញ្ជូន​មន្ត្រី​ប៉ូលិស​ដែល​មាន​វិជ្ជាជីវៈ​រាប់​ពាន់​នាក់ ការពារ​ដល់​ក្រុម​បាតុករ ដោយ​ពុំ​មាន​ការ​ប្រើ​ហិង្សា​លើ​ក្រុម​អ្នក​តវ៉ា​នោះ​ទេ។ ត្រង់​ចំណុច​នេះ​គឺ​ខុសគ្នា​ពី​កម្ពុជា​ដែល​បាន​ប្រើ​កង សន្តិសុខ ដែល​មិនបាន​អប់រំ​ត្រឹមត្រូវ និង​គ្មាន​វិជ្ជាជីវៈ​មក​បង្ក្រាប​ក្រុម​បាតុករ​ម្ដង​ហើយ​ម្ដងទៀត ជាពិសេស​គឺ​ប្រើ​ហិង្សា​លើ​ក្រុម​ស្ត្រី ដែល​ជា​ប្រពន្ធ​របស់​សកម្មជន​គណបក្ស​សង្គ្រោះ​ជាតិ ដោយសារតែ​ពួកគេ​តវ៉ា​ទាមទារ​ឱ្យ​ដោះលែង​ប្តី​របស់​ពួកគេ ដែល​ពួកគេ​យល់ថា ត្រូវ​បាន​ចាប់ខ្លួន​ដោយ​អយុត្តិធម៌​នោះ។

ទាក់ទង​នឹង​បញ្ហា​នេះ អ្នក​វិភាព​នយោបាយ លោក បណ្ឌិត ឡៅ ម៉ុងហៃ ប្រាប់​អាស៊ីសេរី​ថា និស្សិត​ថៃ​ធ្វើបាតុកម្ម​ប្រឆាំង​រដ្ឋាភិបាល​របស់​គេ​បាន មិនមែន​ដោយសារ​ពួកគេ​សកម្ម និង​ក្លាហាន​ជាង​និស្សិត​ខ្មែរ​នោះ​ទេ ប៉ុន្តែ​ដោយសារ​ថៃ​មាន​វប្បធម៌​នយោបាយ​មួយ​ដែល​នៅ​មាន​លំហ​ខ្លះ​សម្រាប់​ឲ្យ​ប្រជាពលរដ្ឋ​របស់​គេ​ចូលរួម​សកម្ម ក្នុង​ជីវភាព​នយោបាយ​របស់​ប្រទេស​គេ​បាន​តាមរយ​:​ការ​បញ្ចេញមតិ​ជា​សាធារណ:

លោក​បន្ថែម​ទៀត​ថា ថ្នាក់ដឹកនាំ និង​ពលរដ្ឋ​ថៃ បាន​ដើរ​តាម​គន្លង​ធម៌​ព្រះពុទ្ធ​ច្រើន មានចិត្ត​ធម៌​ច្រើន អត់ឱន​និង​បើកទូលាយ​ច្រើន ព្រមទាំង​មាន​សមត្ថភាព​និង​ការ​ទុកចិត្ត​លើ​ខ្លួនឯង ជាពិសេស​អាជ្ញាធរ​ថៃ​ស្រឡាញ់​ប្រជាពលរដ្ឋ​របស់​គេ៖ «ការ​អប់រំ​របស់​គេ​ហ្នឹង​គឺ នៅ​សកល​វិទ្យាល័យ ធម្មសាត(Thamasat) បាវចនា​នៅ​ក្នុង​សកល​វិទ្យាល័យ​គេ​ដាក់​យើង​រៀន​ស្រលាញ់​ប្រជាពលរដ្ឋ គឺ​ការអប់រំ​របស់​គេ​ហ្នឹង គេ​ឱ្យ​ស្រលាញ់​ប្រជាពលរដ្ឋ ដូចគ្នា​ទាំងអស់​អីចឹង​។ ដូច្នេះ​រឿង​ហ្នឹង​វា​មាន​ឥទ្ធិពល​លើ​វប្បធម៌​នយោបាយ​របស់​គេ ហើយក៏​គេ​បើកចំហ​បើកទូលាយ ហើយ​មានការ​អត់ឱន​ឱ្យ​គ្នា​ច្រើន។ ដូច្នេះ​មាន​លំហ​សម្រាប់​ឱ្យ​យុវជន និស្សិត ឬ​ប្រជាពលរដ្ឋ​ថៃ​ហ្នឹង​បាន​ចូលរួម​សកម្ម​នៅ​ក្នុង​ជីវភាព​នយោបាយ​របស់​ប្រទេស»

ចំណែក​នៅ​កម្ពុជា​វិញ​លោក បណ្ឌិត ឡៅម៉ុង កត់​សំគាល់​ថា បច្ចុប្បន្ន​វប្បធម៌​នយោបាយ​ខ្មែរ ឈានដល់​កម្រិត​មិន​ឲ្យ​ប្រើប្រាស់​សេរីភាព​ខាង​ការ​បញ្ចេញ​មតិ សូម្បីតែ​នៅ​ទីលាន​ប្រជាធិបតេយ្យ​ដែល​ច្បាប់​បាន​កំណត់​ថា ជាទី​កន្លែង​សាធារណ​:​សម្រាប់​ឲ្យ​ប្រជាពលរដ្ឋ​ជួបជុំគ្នា​បញ្ចេញមតិ​ក៏ដោយ​។ លោក​ហៅ​សកម្មភាព​របស់​អាជ្ញាធរ​ខ្មែរ​នេះ ថា ជា​ការ​ក្ដិចត្រួយ​មិន​ឱ្យ​លូតលាស់​ទៅ​មុខ ពោលគឺ​អាជ្ញាធរ​មិន​ចង់​ឱ្យ​យុវជន​ខ្មែរ​មាន​ចំណេះដឹង​ផ្នែក​ប្រជាធិបតេយ្យ​រីក​ចំរើន​ទៅមុខ ដើម្បី​ពួកគេ​ងាយស្រួល​រក្សា​អំណាច​គ្រប់គ្រង​ប្រទេស​បាន​យូរ​អង្វែង​។ ទោះជា​យ៉ាងណា លោក​មិន​គាំទ្រ​ចំពោះ​ការគ្រប់គ្រង​បែបនេះ​នោះ​ឡើយ ពីព្រោះ​លោក​ថា ជា​របរ​គ្រប់គ្រង​បែប​ផ្ដាច់ការ ដែល​ធ្វើ​ឱ្យ​ប្រជាពលរដ្ឋ​ជួប​តែ​ការឈឺចាប់ ហើយ​ប្រទេស​នឹង​មិន​អាច​អភិវឌ្ឍន៍​ជឿនលឿន​បាន​ឡើយ៖ «គឺ​បាន​បង្កើត​ទុក្ខវេទនា​របស់​ប្រជាពលរដ្ឋ​តែ​ប៉ុណ្ណឹង យើង​ឃើញស្រាប់​ហើយ​នៅ​ក្នុង​ប្រវត្តិសាស្ត្រ​របស់​យើង ឬមួយ​ឈាន​ទៅ​ដល់​ការ​ខ្ទេចខ្ទាំ​ប្រទេស​ថែម​ទៅទៀត។ វា​មាន​សង្គ្រាម​ជាពិសេស​សង្គ្រាម​នៅ​ក្នុង​ស្រុក​ហ្នឹង រួច​ដល់​មាន​សង្គ្រាម​ក្នុង​ដណ្ដើម​អំណាច​ដណ្ដើម​អី​គ្នា ហើយ​អំណាច​ទៅ​គាបសង្កត់​គេ ដល់​អីចឹង​ទៅ​មានការ​តវ៉ា​ត​អី​ទៅ គឺ​តវ៉ា​ដោយ​អហិង្សា​និង​តវ៉ា​ដោយ​ហិង្សា យើង​ជួបប្រទះ​ហើយ​តើ»

លោក​បន្ថែម​ថា ដើម្បី​ដោះស្រាយ​បញ្ហា​នេះ លោក​ស្នើ​ដោយ​ទទូច​ដល់​អាជ្ញាធរ​ខ្មែរ​ទាំងអស់ គួរតែ​ដឹកនាំ​ប្រទេស​ដោយ​ដើរ​គន្លង​ព្រះពុទ្ធ​នាសនា​ឱ្យ​បាន​ខ្ជាប់ខ្ជួន និង​ត្រូវ​បណ្ដុះ​កូន​របស់​ពួកគេ​ឱ្យ​យល់ដឹង​ពី​ពុទ្ធសាសនា តាំងពី​តូច​មុន​ពេល​ដែល​ពួកគេ​ចូលកាន់​តំណែង​ការងារ​រដ្ឋ ជាពិសេស​គួរតែ​ប្រកាន់ខ្ជាប់​នូវ​ព្រហ្ម​វិហារធម៌​៤​យ៉ាង​របស់​ព្រះពុទ្ធ គឺ មេត្តា ករុណា មុទិតា និង​ឧបេក្ខា ដែល​មានន័យថា សេចក្ដី​ស្រឡាញ់ សេចក្ដី​អាណិត មាន​ការ​​ត្រេកអរ​នៅ​ពេល​ដែល​ដទៃ​បាន​សេចក្ដី​សុខ និង​ការ​តម្កល់ចិត្ត​ឱ្យ​នៅ​កណ្ដាល​ដោយ​មិន​លំអៀង​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

Both men took the power from backdoor=coup d'etat bloodshed=kick two men out

These two bogeymen weren't much different at all,both gotten power from the backdoor"coup d'eta bloodshed"and two men who opposed the freedom of speech,democracy,freedom of expression,freedom to chosen who u like to represent your voices,and good leadership.This men has no one above them with everything control in their own hands.Told u guys time to make a change these two men as soon as possible,if this two men still in there is nothing to be better for pple at all"like Prayuth like HSen,like Hsen like Prayuth=evildoers supporting".

Oct 04, 2020 02:10 PM

គេហទំព័រ​ទាំងមូល