យុវជន​ថា លោក ហ៊ុន សែន ប្រើ​កិត្តិនាម​សម្ដេចឪ​ដើម្បី​ប្រជាប្រិយភាព​ជុំវិញ​រឿង EBA

ដោយ មួង ណារ៉េត
2019-03-30
អ៊ីម៉ែល
មតិ
Share
បោះពុម្ព
កញ្ញា លី ស្រីស្រស់ ប្រធាន​ក្រុម​អ្នក​វិភាគ​វ័យ​ក្មេង
កញ្ញា លី ស្រីស្រស់ ប្រធាន​ក្រុម​អ្នក​វិភាគ​វ័យ​ក្មេង
ហ្វេសប៊ុក Sreysors Ly

យុវជន​មួយ​ចំនួន​យល់ថា មេដឹកនាំ​របប​ក្រុងភ្នំពេញ​លោក ហ៊ុន សែន កំពុង​យក​ព្រះ​កិតិ្តនាម​ព្រះបរមរតនកោដ្ឋ មក​ទាក់ទាញ​ការ​គាំទ្រ​របប​លោក ករណី​វិបត្តិ EBA។ លោក ហ៊ុន សែន កាលពី​ថ្ងៃ​ទី​២៩ មីនា បាន​អះអាង​ថា លោក​កំពុង​ដើរ​តាម​គំរូ​របស់​ព្រះ​បរមរតនកោដ្ឋ ដែល​ឱ្យ​តម្លៃ​លើ​ឯករាជ្យ និង​អធិបតេយ្យ​ជាតិ​ជាធំ។ យុវជន​មើល​ឃើញ​ថា អតីត​ព្រះមហាក្សត្រ​ជា​និមិត្តរូប​នៃ​ឯករាជ្យ និង​អធិបតេយ្យភាព​ជាតិ​ពិតប្រាកដ ក៏ប៉ុន្តែ​អ្វី​ដែល​លោក ហ៊ុន សែន កំពុង​ធ្វើ​នេះ​វិញ គឺ​ដើម្បី​តែ​អំណាច​របស់​លោក​ច្រើន​ជាង។

អគ្គលេខាធិការ​សហព័ន្ធ​និស្សិត​បញ្ញវន្ត​កម្ពុជា លោក គៀន ពន្លក យល់ឃើញ​ថា លោក ហ៊ុន សែន លើក​យក​វីរភាព​របស់​អតីត​ព្រះមហាក្សត្រ​នេះ គឺ​ដើម្បី​ទាក់ទាញ​ចំណាប់អារម្មណ៍ និង​ប្រជាប្រិយភាព​នយោបាយ ប៉ុណ្ណោះ​។ លោក​ជឿជាក់​ថា លោក ហ៊ុន សែន ឱ្យ​តម្លៃ​លើ​ការ​រក្សា​អំណាច​ផ្ទាល់ខ្លួន និង​ក្រុម​គ្រួសារ​របស់​លោក​ច្រើនជាង​ការ​គិតគូរ​អំពី​ផលប្រយោជន៍​ជាតិ​ពិតប្រាកដ ហេតុ​ដូច្នេះ​ហើយ​ទើប​បានជា​លោក​មិន​បន្ទន់​ជំហរ​រឿង​ការ​ព្យួរ​ប្រព័ន្ធ​អនុគ្រោះ​ពន្ធ EBA នេះ បើ​ទោះ​បី​ជា​លោក​ដឹង​ពី​ផលវិបាក​នៃ​រឿង​នេះ​ក៏ដោយ។

យុវជន​រូប​នេះ ថ្លែង​ទៀត​ថា សហភាព​អឺរ៉ុប​មិនមែន​មក​បង្គាប់បញ្ជា​ឱ្យ​រដ្ឋាភិបាល​កម្ពុជា​ធ្វើ​អ្វី​ទៅតាម​ការ​ចង់បាន​របស់​គេ​នោះ​ទេ ប៉ុន្តែ​ការ​ទាមទារ​របស់​សហ​ភាព​អឺរ៉ុប គឺ​ដើម្បី​ជួយ​ស្រោចស្រង់​ស្ថានការណ៍​សិទ្ធិមនុស្ស និង​ប្រជាធិបតេយ្យ ដែល​ត្រូវ​បាន​របប​លោក ហ៊ុន សែន បាន​វាយ​បំផ្លាញ​ចោល កាល​ពី​ពេល​កន្លងទៅ៖ «EU គ្រាន់តែ​ចង់​ជួយ​កម្ពុជា​ទេ មិន​មាន​បំណង​អ្វី​ផ្សេង ឬក៏​ចង់​គ្រប់គ្រង​ប្រទេស​កម្ពុជា​នោះ​ទេ​។ ការ​ផ្ដល់​អនុសាសន៍​របស់ EU នេះ ប្រសិនបើ EU មិន​គិតគូរ​ដល់​ផលប្រយោជន៍​របស់​ប្រជាជន​កម្ពុជា​ទេ EU ផ្ដាច់​ប្រព័ន្ធ​អនុគ្រោះ​ពន្ធ​នេះ​ជា​ហូរ​មក​ហើយ មិនមែន​ទុក​លទ្ធភាព​ឱ្យ​រដ្ឋាភិបាល​កែប្រែ​នូវ​កំហុស​របស់​ខ្លួន​ទាំង​ប៉ុន្មាន ដែល​រដ្ឋាភិបាល​បាន​សម្លាប់​ប្រជាធិបតេយ្យ​នៅ​ក្នុង​ប្រទេស​កម្ពុជា»

មេដឹកនាំ​របប​ក្រុងភ្នំពេញ លោក ហ៊ុន សែន បាន​ថ្លែង​ក្នុង​វេទិកា​រាជរដ្ឋាភិបាល និង​វិស័យ​ឯកជន កាលពី​ថ្ងៃ​ទី​២៩ មីនា ថា លោក​មិន​ខ្វាយខ្វល់​រឿង​សហភាព​អឺរ៉ុប​ដក​ប្រព័ន្ធ​អនុគ្រោះ​ពន្ធ EBA នោះ​ឡើយ ព្រោះ​វិធានការ​ទាំងឡាយ​ដែល​របប​របស់​លោក​ដាក់​ចេញ ដូចជា កាត់​បន្ថយ​ថ្លៃ​ដឹកជញ្ជូន និង​ការ​ចំណាយ​ក្រៅផ្លូវការ​ផ្សេងទៀត នឹង​អាច​ចំណេញ​បាន​ជាង ៤០០ លាន​ដុល្លារ​អាមេរិក។ លោក​ប្រើ​ពាក្យ​ដដែលៗ​ថា លោក​មិន​អាច​យក​អធិបតេយ្យភាព​ទៅ​ប្ដូរ​នឹង​ជំនួយ ឬ​ប្រព័ន្ធ​អនុគ្រោះ​ពន្ធ​នេះ​ឡើយ ហើយ​ជន​ណា​ក៏ដោយ​ដែល​សុខចិត្ត​ធ្វើតាម​សហភាព​អឺរ៉ុប ដើម្បី​ជា​ថ្នូរ​នឹង​ការ​ទទួល​បាន​ប្រព័ន្ធ​អនុគ្រោះ​ពន្ធ​នោះ មិន​សក្ដិសម​ធ្វើជា​មេដឹកនាំ​កម្ពុជា​ឡើយ​។ បុរស​ខ្លាំង​ខាង​ប្រើ​អំពើ​ហិង្សា​រូប​នេះ អះអាង​ទៀត​ថា ជំហរ​ដាច់ខាត​របស់​លោក​នេះ គឺជា​ការ​យក​គំរូ​តាម​អតីត​ព្រះមហាក្សត្រ ព្រះបាទ នរោត្តម សីហនុ៖ «បើ​អ្នក​ណាមួយ​តាំង​ខ្លួន​ឱន​ក្បាល លិឍ​ជើង​គេ ដើម្បី​ទទួល​បាន​នូវ​ភាព​អនុគ្រោះ មិន​ចាំ​បាច់​ធ្វើ​មេដឹកនាំ​កម្ពុជា​នោះ​ទេ​។ គ្មាន​ចរិត​ជាតិនិយម​ចង្អៀតចង្អល់​នោះ​ទេ តែ​កម្ពុជា​មាន​ចរិត​ជាតិនិយម​មួយ នៅត្រង់​ការ​រក្សា​នូវ​ឯករាជ្យ និង​អធិបតេយ្យ ហើយ​រឿង​នេះ​សម្ដេច​ព្រះ​នរោត្តម សីហនុ ព្រះបិតា​ជាតិ​របស់​យើង កាលពី​ជំនាន់​មុន សុខចិត្ត​ឱ្យ​គេ​កាត់​ជំនួយ។ រហូតដល់​ព្រះអង្គ​សុំ​ឱ្យ​គេ​ផ្ដាច់​ជំនួយ​បរទេស តែ​ព្រះអង្គ​មិន​លូន​ទៅ​ឱប​ជើង​របស់​អ្នកណា​ទេ។ យើង​ត្រូវ​រៀន​សូត្រ​ទៅតាម​ព្រះបិតា​ជាតិ សម្ដេច​ព្រះ នរោត្តម សីហនុ ព្រះ​បរមរតនកោដ្ឋ ដែល​បាន​បង្រៀន​យើង​តាំង​ពី​ដើម​មក»

ទោះជា​លោក ហ៊ុន សែន អះអាង​ថា កម្ពុជា​ចំណេញ​យ៉ាងហោចណាស់​ជាង ៤០០ លាន​ដុល្លារ បន្ទាប់ពី​កាត់បន្ថយ​ការ​ចំណាយ​ផ្សេងៗ​រួចហើយ​ពិតមែន ក៏​កម្ពុជា​នៅតែ​ត្រូវ​ខាតបង់​ថវិកា​ជាង ២០០ លាន​ដុល្លារ​បន្ថែម​ទៀត​ដដែល ព្រោះ​បើ​អត់ EBA កម្ពុជា ត្រូវ​បង់ពន្ធ​ជាង ៦០០ លាន​ដុល្លារ សម្រាប់​ការ​នាំ​ទំនិញ​ទៅ​លក់​នៅ​លើ​ទីផ្សារ​អឺរ៉ុប។

ប្រធាន​ក្រុម​អ្នកវិភាគ​វ័យក្មេង កញ្ញា លី ស្រីស្រស់ យល់ឃើញ​ថា សារ​របស់​លោក ហ៊ុន សែន នេះ គឺ​ដើម្បី​ទាក់ទាញ​ការចាប់អារម្មណ៍​ពី​សាធារណជន​ថា លោក​មាន​គោលនយោបាយ​ដឹកនាំ​ប្រទេស​ដូចគ្នា​ទៅ​នឹង​ព្រះ​បរមរតនកោដ្ឋ។ ក៏ប៉ុន្តែ​កញ្ញា​ថា បរិបទ និង​ស្ថានការណ៍​ជាតិ​កាល​ពី​មុន និង​ពេល​បច្ចុប្បន្ន មិន​ដូចគ្នា​នោះ​ទេ។ កញ្ញា​បន្ត​ថា ហានិភ័យ​នៃ​ការ​ព្យួរ​ប្រព័ន្ធ​អនុគ្រោះ​ពន្ធ EBA នេះ ផ្តើម​ចេញ​មកពី​ការរំលោភ​សិទ្ធិមនុស្ស និង​បំផ្លាញ​ប្រជាធិបតេយ្យ ដូច្នេះ​ការ​ទាមទារ​របស់​សហភាព​អឺរ៉ុប​ឱ្យ​កម្ពុជា​គោរព​ច្បាប់​ជាតិ និង​អន្តជាតិ​ដែល​ខ្លួន​បាន​ទទួល​យក​នោះ គឺជា​រឿង​ត្រឹមត្រូវ មិន​ពាក់ព័ន្ធ​នឹង​រឿង​អធិបតេយ្យ​ជាតិ​នោះ​ទេ។

អ្នកវិភាគ​វ័យក្មេង​រូប​នេះ រំពឹង​ថា មេដឹកនាំ​របប​ក្រុងភ្នំពេញ​នឹង​ដោះស្រាយ​បញ្ហា EBA នេះ ដោយ​ឈរ​លើ​ផលប្រយោជន៍​ជាតិ​ជាធំ មិនមែន​រឿង​អំណាច​របស់​ខ្លួន​ជាធំ​នោះ​ឡើយ ព្រោះ​បើ​ប្រព័ន្ធ​អនុគ្រោះ​ពន្ធ EBA ត្រូវ​បាន​ព្យួរ ឬ​កាត់ផ្ដាច់​មែន​នោះ ប្រជាពលរដ្ឋ​ខ្មែរ​រាប់​លាន​នាក់​នឹង​រង​ផល​ប៉ះពាល់​ដោយសារ​បញ្ហា​នេះ៖ «អាច​ថា​គាត់​ជា​បុគ្គល​ដែល​ចង់​រក្សា​អំណាច​ខ្លួនឯង ហើយ​យក​រឿង​ទាំងអស់​នេះ​ទៅ​លាយឡំ​ជាមួយ​នឹង​អធិបតេយ្យភាព ចំពោះ​ខ្ញុំ​វា​ហាក់​ដូចជា ប្រាស​ឆ្ងាយ វា​មិន​មាន​ត​ភ្ជាប់​គ្នា​ទេ​។ មួយទៀត​ទាក់ទិន​នឹង​ឥទ្ធិពល សហភាព​អឺរ៉ុប​គេ​មិន​បង្ខំ​នោះ​ទេ។ បើ​យើង​មិន​ធ្វើ នោះ​នីតិវិធី​នឹង​ដើរ​តាម​អ្វី​ដែល​គេ​បាន​ប្រកាស​ប្រាប់​យើង​កាលពី​ប៉ុន្មាន​ខែ​មុន​ហើយ ហើយ​អ្នក​ដែល​រងគ្រោះ ខ្ញុំ​គិត​ថា ប្រជាពលរដ្ឋ​ខ្មែរ​ភាគច្រើន គឺជា​អ្នករងគ្រោះ»

សហភាព​អឺរ៉ុប​បាន​ប្រកាស​ពី​ដំណើរការ​ពិចារណា​ព្យួរ​ប្រព័ន្ធ​អនុគ្រោះ EBA នេះ កាលពី​ថ្ងៃទី ១១ កុម្ភៈ​កន្លងទៅ បន្ទាប់ពី​ពិនិត្យ​ឃើញ​ថា របប​ក្រុងភ្នំពេញ​មិនបាន​ធ្វើ​ឱ្យ​ប្រសើរ​ឡើង​នូវ​ស្ថានភាព​សិទ្ធិមនុស្ស និង​ប្រជាធិបតេយ្យ​នៅឡើយ​។ ដំណើរការ​នេះ មាន​រយៈពេល​សរុប​ទាំងអស់​១៨​ខែ គិត​ចាប់ពី​ថ្ងៃទី១២ កុម្ភៈ តទៅ ហើយ​ចែកចេញជា​បី​ដំណាក់កាល​។ សហភាព​អឺរ៉ុប​បាន​ទុក​ពេល​ឱ្យ​របប​ក្រុងភ្នំពេញ​ចំនួន​៦​ខែ គឺ​ពី​ខែ កុម្ភៈ ដល់​ខែ កក្កដា ដើម្បី​ស្ដារ​ស្ថានការណ៍​នយោបាយ និង​សិទ្ធិមនុស្ស បើ​ពុំ​ដូច្នេះ​ទេ ក្នុង​រយៈពេល​៦​ខែ បន្ទាប់​ទៀត គឺ​ពី​ខែ សីហា ឆ្នាំនេះ ដល់​ខែ មករា ឆ្នាំ ២០២០ សហភាព​អឺរ៉ុប​នឹង​ចាប់ផ្ដើម​ដំណាក់កាល​ធ្វើការ​សម្រេចចិត្ត ថា​តើ​ត្រូវ​រក្សា ឬ​ព្យួរ​ប្រព័ន្ធ​អនុគ្រោះ​ពន្ធ EBA ពី​កម្ពុជា​។ បើ​នៅ​ខែ មករា ឆ្នាំ​២០២០​នោះ សហភាព​អឺរ៉ុប សម្រេច​ព្យួរ​ការ​អនុគ្រោះ​ពន្ធ​នេះ​មែន នោះ​សហភាព​អឺរ៉ុប នឹង​ទុក​ពេល​ឱ្យ​កម្ពុជា​៦​ខែ​ទៀត ដើម្បី​ត្រៀមខ្លួន មុននឹង​ការ​ព្យួរ​ប្រព័ន្ធ​អនុគ្រោះ​ពន្ធ​នោះ ចូល​ជា​ធរមាន ក្នុង​អំឡុង​ពាក់​កណ្ដាល​ឆ្នាំ២០២០។

ថ្វីត្បិតតែ​លោក ហ៊ុន សែន និង​មន្ត្រី​ជំនិតៗ​អះអាង​ពេញៗ​មាត់​ថា ពួកគេ​មិន​ខ្វល់​ពី​ការ​ព្យួរ​ប្រព័ន្ធ​អនុគ្រោះ​ពន្ធ EBA មែន ក៏​របប​នេះ​នៅតែ​ព្យាយាម​ចរចា​ទាំង​ផ្លូវការ និង​ក្រៅផ្លូវការ​ជាមួយ​សហភាព​អឺរ៉ុប ដើម្បី​ឱ្យ​ប្រព័ន្ធ​អនុគ្រោះ​ពន្ធ​នេះ​ត្រូវ​បន្ត​ទៅ​មុខ​ទៀត​។ សំខាន់​ជាង​នេះ​ទៅ​ទៀត តំណាង​វិស័យ​ឯកជន និង​សហជីព​ស្និទ្ធ​នឹង​របប​ក្រុងភ្នំពេញ បាន​ផ្ញើ​លិខិត​ជា​បន្តបន្ទាប់​ទៅ​សហភាព​អឺរ៉ុប ដើម្បី​ពន្យល់​ផលវិបាក​ដែល​កើត​មាន​ឡើង ប្រសិនបើ EBA ត្រូវ​បាន​កាត់ផ្ដាច់។ ពួកគេ​ទទួល​ស្គាល់​ថា ការ​ដកហូត​ប្រព័ន្ធ​អនុគ្រោះ​ពន្ធ EBA នឹង​ប៉ះពាល់​ធ្ងន់ធ្ងរ​បំផុត​ដល់​វិស័យ​ការងារ និង​ការនាំចេញ​របស់​កម្ពុជា។ ពួកគេ​បាន​អំពាវនាវ​ដល់​គណៈកម្មការ​អឺរ៉ុប និង​បណ្ដា​រដ្ឋ​សមាជិក​អឺរ៉ុប​ទាំងអស់ កុំ​ឱ្យ​ដកហូត​ប្រព័ន្ធ​អនុគ្រោះ​ពន្ធ​នេះ និង​ស្នើ​ឱ្យ​សហភាព​អឺរ៉ុប​បន្ត​គាំទ្រ​ដល់​ការ​អភិវឌ្ឍ​របស់​កម្ពុជា​តទៅ​មុខ​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល