សកម្មជនគណបក្សសង្គ្រោះជាតិ និងពលករនៅក្រៅប្រទេស នៅថ្ងៃអាទិត្យនេះ បាននាំតវ៉ាទាមទារឲ្យតុលាការក្រុងភ្នំពេញដោះលែង លោក រ៉ុង ឈុន ជាបន្ទាន់ និងឥតលក្ខខណ្ឌ។ ពួកគេបានប្រមូលផ្តុំគ្នា និងសរសេរសារលើក្រដាសសឲ្យដោះលែង លោក រ៉ុង ឈុន ហើយចាត់ទុកការចាប់ខ្លួនប្រធានសហជីពរូបនេះ គឺជារឿងនយោបាយ។
សកម្មជនបក្សប្រឆាំង និងពលករចំណាកស្រុក ជួបជុំគ្នាជាច្រើនកន្លែងផ្សេងៗគ្នា ទាមទារឲ្យតុលាការក្រុងភ្នំពេញ ដោះលែង និងទម្លាក់បទចោទប្រកាន់លើលោក រ៉ុង ឈុន ដែលជាសមាជិកក្រុមប្រឹក្សាឃ្លាំមើលកម្ពុជា និងជាប្រធានសហភាពសហជីពកម្ពុជា ដោយចាត់ទុកថា ការចាប់ខ្លួននេះជារឿងអយុត្តិធម៌។
ក្រុមការងារ និងជាក្រុមទ្រទ្រង់គណបក្សសង្គ្រោះជាតិ ប្រចាំរាជធានីភ្នំពេញ លោក ទុំ ប៊ុនថន ដែលបានចូលរួមក្នុងយុទ្ធនាការនៅទីក្រុងបាងកក បានឲ្យអាស៊ីសេរីដឹងថា ការចាប់ខ្លួនលោក រ៉ុង ឈុន នេះ គឺជាការគំរាមកំហែងដល់អ្នកស្នេហាជាតិទាំងឡាយណា ដែលហ៊ានការពារប្រយោជន៍ជាតិ។ លោកបន្តថា លោក រ៉ុង ឈុន មិនមែនជាអ្នកញុះញង់បង្កឲ្យចលាចលទេ តែលោកជាអ្នកការពារទឹកដី ការពារព្រំដែនមិនឲ្យបាត់បង់៖ «បើសិនជារបបទីក្រុងភ្នំពេញ គឺជារបបដែលមានចេតនា ឧត្តមគតិជាតិដែរនោះ មិនត្រឹមតែមិនចាប់លោកគ្រូ រ៉ុង ឈុន ទេ គឺត្រូវចូលរួមទៅមើលព្រំដែនទាំងអស់គ្នា លើកទឹកចិត្តគាត់ ដើម្បីឲ្យគាត់មានទឹកចិត្តក្នុងការការពារបូរណភាពទឹកដីនៃប្រទេសកម្ពុជា»។
ពលករធ្វើការនៅប្រទេសថៃលោកស្រី ដាំ ស្រីធាន យល់ឃើញថា របបក្រុងភ្នំពេញតែងតែចាត់វិធានការទៅលើបុគ្គលណាដែលហ៊ានបង្ហាញរឿងព្រំដែន កម្ពុជា-វៀតណាម ដល់សាធារណជនឲ្យបានដឹង មិនត្រឹមតែលោក រ៉ុង ឈុន នោះទេ សូម្បីតែតំណាងរាស្ត្រគណបក្សសង្គ្រោះជាតិ លោក អ៊ុំ សំអាន ក៏ជាប់គុកដោយសារនិយាយរឿងព្រំដែនដូច្នេះដែរ។ លោកស្រីបន្តថា ការចាប់ខ្លួនលោក រ៉ុង ឈុន ដែលជាអ្នកការពារសិទ្ធដល់ពលករ ការពារប្រយោជន៍គ្រូបង្រៀន និងការពារទឹកដីនោះ គឺជារឿងមួយដ៏ខុសឆ្គងបំផុត៖ «វាជារឿងមួយដែលយើងសោកស្ដាយមែនទែន ដែលអាជ្ញាធរស្រុកខ្មែរយើង ក៏ដូចជាថ្នាក់ដឹកនាំ គាត់នៅតែមានគំនិតចង់បំផ្លាញអ្នកចេះដឹង ក៏ដូចជាហ៊ានលះបង់ទាំងកម្លាំងចិត្ត កម្លាំងកាយ ដើម្បីទឹកដី មាតុភូមិរបស់ខ្លួន»។
លោក រ៉ុង ឈុន ត្រូវបានសមត្ថកិច្ចសម្រុកចូលចាប់ខ្លួន នៅយប់ថ្ងៃទី៣១ កក្កដា ហើយបច្ចុប្បន្នត្រូវបានបញ្ជូនទៅឃុំខ្លួននៅពន្ធនាគារព្រៃស ដោយចោទថា បានប្រព្រឹត្តិបទល្មើសជាក់ស្ដែង ដោយញុះញង់ ឲ្យមានភាពវឹកវរដល់សន្តិសុខសង្គម ពាក់ព័ន្ធនឹងបញ្ហាព្រំដែនកម្ពុជា វៀតណាម។
មុនពេលឃាត់ខ្លួន លោក រ៉ុង ឈុន បានចុះទៅកាន់ព្រំដែនកម្ពុជា វៀតណាម នៅចំណុចភូមិត្រពាំងផ្លុង ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ ហើយបានចេញសេចក្ដីថ្លែងការណ៍ ពីលទ្ធផលស្រាវជ្រាវ កាលពីថ្ងៃទី២១ កក្កដា។ នៅថ្ងៃទី ៣១ កក្កដា គណៈកម្មាធិការចម្រុះកិច្ចការព្រំដែន ចោទថា លោក រ៉ុង ឈុន ញុះញង់ពីការបោះបង្គោលព្រំដែនថ្មីរវាង កម្ពុជា វៀតណាម ចូលមកដីកម្ពុជា ប្រហែលប្រាំរយ (៥០០)ម៉ែត្រ។
ពលករខ្មែរធ្វើការនៅប្រទេសកូរ៉េខាងត្បូងមួយរូបទៀត លោក ម៉ាត់ វណ្ណនី បានលើកឡើងថា លោកបានបំផុសស្មារតី ដល់ពលករ និងកម្មករដទៃទៀត តាមរយៈការបង្ហាញសារដោយផ្ទាល់ និងតាមរយៈការផ្សព្វផ្សាយផ្សេងៗ ឲ្យចូលរួមទាមទារដោះលែងលោក រ៉ុង ឈុន និងទាមទារឲ្យរដ្ឋាភិបាលអនុវត្តតាមគោលការណ៍ ៥ចំណុចរបស់សហភាពអឺរ៉ុប ដើម្បីឲ្យក្នុងប្រទេសកម្ពុជាមានលទ្ធិប្រជាធិបតេយ្យពេញលេញ និងការគោរពសិទ្ធិមនុស្សពិតប្រាកដ។ ការតវ៉ានេះ លោកនឹងអនុវត្តទៅតាមការអនុញ្ញាតរបស់ច្បាប់នៃប្រទេសកូរ៉េ៖ «យើងនឹងមានគ្រោងមួយទៀត សំខាន់ដែរគឺយើងរង់ចាំការឆ្លើយតបពីអាជ្ញាធរ បើសិនជាអាជ្ញាធរកូរ៉េគេអនុញ្ញាត ពួកយើងនៅទីនេះ គឺយើងនឹងធ្វើបាតុកម្មនៅមុខទូតប្រទេសកម្ពុជាប្រចាំនៅសាធារណរដ្ឋកូរ៉េនេះ។ ដោយសារតែឥឡូវហ្នឹងកូវីដ អ៊ីចឹងយើងរង់ចាំស្ងាត់បន្តិច ហើយយើងទុកឱកាសហ្នឹង ដើម្បីឲ្យតុលាការអាយ៉ង គាត់ពិចារណាដោះលែងលោក រ៉ុង ឈុន បើមិនដូច្នេះទេពួកយើងនឹងធ្វើហើយ»។
សមាជិកប្រតិបត្តិគណបក្សសង្គ្រោះជាតិស្រុកព្រៃនប់ កញ្ញា សៅ ឧសភា ដែលកំពុងភៀសខ្លួននៅក្រៅប្រទេសដែរបញ្ជាក់ថា ការចាប់ខ្លួនលោក រ៉ុង ឈុន ក្រោមរបបលោក ហ៊ុន សែន កញ្ញាមើលឃើញនូវចំណុចពីរ ទី១ ពាក់ព័ន្ធនឹងបញ្ហាបូរណភាពទឹកដី ដែលលោក រ៉ុង ឈុន បានស្រាវជ្រាវផ្ទាល់ឃើញថា ភាគីខាងប្រទេសវៀតណាម បានរំលោភចូលទឹកដីកម្ពុជាចំនួន ៥០០ម៉ែត្រ។ ការរកឃើញនេះ បានធ្វើឲ្យប៉ះពាល់ដល់វៀតណាម ដែលអាចធ្វើឱ្យលោក ហ៊ុន សែន ខឹងទើបធ្វើឲ្យចាប់ខ្លួនលោក រ៉ុង ឈុន ។ ចំណុចទី២ កញ្ញាមើលឃើញថា ប្រព័ន្ធអនុគ្រោះពន្ធ EBA នៅកម្ពុជា នឹងត្រូវកាត់ផ្ដាច់ក្នុងពេលឆាប់ៗ ខាងមុខនេះ ដូច្នេះលោកនាយករដ្ឋមន្ត្រី ហ៊ុន សែន ខ្លាចក្រុមកម្មករមានការប្រមូលផ្តុំទ្រង់ទ្រាយធំតាមរយៈលោក រ៉ុង ឈុន ក្នុងការដាក់សម្ពាធឲ្យរដ្ឋាភិបាលចរចាជាមួយសហគមន៍អឺរ៉ុបទាមទារនូវប្រព័ន្ធអនុគ្រោះពន្ធ EBA ត្រលប់មកវិញ៖ «ការចាប់ខ្លួនលោកគ្រូ រ៉ុង ឈុន គឺជារឿងមួយដែលអយុត្តិធម៌ ពីព្រោះអី អ្វីដែលលោកគ្រូបានធ្វើកន្លងមក គឺសុទ្ធសឹងតែជាច្បាប់របស់ពលរដ្ឋដែលក្នុងនាមលោកគ្រូជាពលរដ្ឋម្នាក់ អ៊ីចឹងលោកគ្រូត្រូវតែឈឺឆ្អាលទៅនឹងបញ្ហាសង្គមជាតិ ក៏ដូចជាបញ្ហាព្រំដែនអីជាដើម។ អ្វីដែលរដ្ឋាភិបាលគាត់បានលើកឡើងនេះ វាគ្រាន់តែជាលេសមួយសម្រាប់ចោទទៅលោកគ្រូ រ៉ុង ឈុន ទេ ពីព្រោះអី បើយើងក្រឡេកទៅមើលច្បាប់នៃរដ្ឋធម្មនុញ្ញវិញ គឺបានចែងហើយ មាត្រា៣៥ ដែលចែងថា ពលរដ្ឋមានសិទ្ធក្នុងការធ្វើនយោបាយក៏ដូចជាមានសិទ្ធឈឺឆ្អាល ទៅនឹងបញ្ហាសង្គមជាតិដែលកើតមានឡើងនៅក្នុងប្រទេស ទឹកដីកំណើតរបស់ខ្លួន»។
សកម្មជន និងពលករចំណាកស្រុក នឹងបន្តការតវ៉ា ផ្សព្វផ្សាយទៅតាមបណ្ដាញសង្គម ស្ថានទូតនានាបន្ថែមទៀត ដើម្បីឲ្យដោះលែងលោក រ៉ុង ឈុន ហើយពួកគេគ្រោងនឹងសុំសិទ្ធធ្វើបាតុកម្មនៅមុខស្ថានទូតខ្មែរប្រចាំនៅក្នុងប្រទេសនានាផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។