ពលរដ្ឋ​ខ្មែរ​នៅ​កូរ៉េខាងត្បូង​ធ្វើបាតុកម្ម​ទាមទារ​ឱ្យ​មាន​ដំណោះស្រាយ​នយោបាយ​នៅ​កម្ពុជា

ដោយ ទីន ហ្សាការីយ៉ា
2019.10.20
Korea អ្នកគាំទ្រគណបក្សសង្គ្រោះជាតិ ដែលតវ៉ា​នៅទីក្រុងសេអ៊ូល ប្រទេសកូរ៉េខាងត្បូង នៅថ្ងៃទី ២០ ខែ តុលា ឆ្នាំ ២០១៩។
រូប​ថតពីហ្វេសប៊ុក​របស់អ្នកគាំទ្រគណបក្សសង្រ្គោះជាតិ​

ថ្ងៃនេះ​បាតុករ​ខ្មែរ​នៅ​ប្រទេស​កូរ៉េខាងត្បូង​ដែល​មាន​រួមមាន​៖ ក្រុម​ពលករ​ខ្មែរ​មកពី​បណ្ដា​ប្រទេស​ផ្សេងៗ និង​តំណាងរាស្ត្រ​គណបក្ស​សង្គ្រោះ​ជាតិ​បាន​ជួបជុំគ្នា​សម្ដែង​មតិ ដើរ​ហែ​ក្បួន និង​ស្រែក​ទាមទារ​ឱ្យ​សហគមន៍​អន្តរជាតិ អន្តរាគមន៍​ករណី​វិបត្តិ​នយោបាយ​នៅ​កម្ពុជា​។ ក្រុម​បាតុករ​ស្នើ​ទៅ​អន្តរជាតិ ធ្វើជា​សាក្សី​នៃ​ការ​វិល​ចូល​ស្រុក​របស់​ប្រធាន​ស្តីទី​គណបក្ស​សង្គ្រោះ​ជាតិ លោក សម រង្ស៊ី។

សម្រែក​ទាមទារ​ឱ្យ​លោក ហ៊ុន សែន ចុះ​ចេញពី​តំណែង ទាមទារ​ស្ដារ​ប្រជាធិបតេយ្យ និង​សិទ្ធិមនុស្ស បាន​លាន់ឮ​ពេញ​ផ្លូវ​ក្នុង​ទីក្រុង​សេអ៊ូល ប្រទេស​កូរ៉េខាងត្បូង ជា​កន្លែង​ដែល​ក្រុម​បាតុករ​ដើរ​ហែ​ក្បួន​ធ្វើបាតុកម្ម​។ ក្រុម​បាតុករ​បាន​នាំគ្នា​ទៅ​ដាក់​ញតិ្ត​នៅ​វិមាន​ប្រធានាធិបតី​នៃ​ប្រទេស​កូរ៉េខាងត្បូង និង​នៅ​ស្ថានទូត​ខ្មែរ​ប្រចាំ​ប្រទេស​នេះ។

អ្នកនាំពាក្យ​នៃ​ចលនា​ប្រជាធិបតេយ្យ​សង្គ្រោះ​ជាតិ នៅ​ប្រទេស​កូរ៉េខាងត្បូង​លោក ម៉ាត់ វណ្ណនី ឱ្យ​អាស៊ីសេរី​ដឹង​ថា បាតុកម្ម​នេះ​មាន​បាតុករ​ចូលរួម​ប្រមាណ ៣០០០​នាក់ ដែល​ចំនួន នេះ​គឺ​ដូច​ទៅនឹង​ការ​រំពឹង​ទុក​។ លោក​ថា បាតុកម្ម​នេះ​ទទួល​បាន​ជោគជ័យ​ដោយ​ក្រុម​បាតុករ​បាន​ដាក់​ញត្តិ និង​បញ្ជូន​សារ​របស់​ខ្លួន​ទៅ​ស្ថានទូត​ខ្មែរ​ប្រចាំ​ប្រទេស​កូរ៉េខាងត្បូង​ថា ខ្មែរ​នៅ​ក្រៅ​ស្រុក​មិន​ទទួលស្គាល់​រដ្ឋាភិបាល​ដែល​ដឹកនាំ​ដោយ​លោក ហ៊ុន សែន សព្វថ្ងៃ​នេះ​ទេ៖ «យើង​ដឹង​ហើយ​ថា របប​លោក ហ៊ុន សែន ជាពិសេស​ស្ថានទូត​ខ្មែរ​នៅ​កូរ៉េ​ខ្មែរ នៅ​ទីក្រុង​សេអ៊ូល គឺ​បម្រើ​ឱ្យ​បក្ស​បុគ្គល បម្រើ​ឱ្យ​គណបក្ស​ប្រជាជន​ទេ គឺ​មិន​បម្រើ​ប្រជារាស្ត្រ​ទូទៅ​មិនដែល​បម្រើ​ប្រជាពលរដ្ឋ​ខ្មែរ​នៅ​ប្រទេស​កូរ៉េ​ទេ អ្វី​ដែល​យើង​ចង់​បានជា​គោលដៅ​សំខាន់​គឺ​ចង់​បង្ហាញ​ឆន្ទៈ​យើង​ជា​ពលករ​ទោះបី​មាន​ការ​គំរាមកំហែង​ប៉ុន្តែ​យើង​អត់​ខ្លាច​យើង​នៅតែ​ស្រែក​នៅមុខ​ស្ថានទូត​ប្រាប់​ទៅ​ស្ថានទូត​ថា ពួក​យើង​ចង់បាន​សំខាន់​បំផុត​គឺ​លទ្ធិប្រជាធិបតេយ្យ សិទ្ធិ​សេរីភាព ហើយ​និង​យុត្តិធម៌​សង្គម​នៅ​កម្ពុជា»

លោក ម៉ាត់ វណ្ណនី ឱ្យ​ដឹង​ទៀត​ថា ក្រុម​បាតុករ​បាន​ក៏​បាន​ផ្ញើ​ញត្តិ​របស់​ពួកគេ​ទៅ​បណ្ដា​ស្ថានទូត​នៃ​ប្រទេស​ជា​ហត្ថលេខី​កិច្ចព្រមព្រៀង​សន្តិភាព​ក្រុង​ប៉ារីស ២៣ តុលា តាម​អ៊ីម៉ែល​ដែរ​ដើម្បី​ជំរុញ​ទៅ​ប្រទេស​ទាំងនោះ​អន្តរាគមន៍ វិបត្តិ​នយោបាយ​នៅ​កម្ពុជា។

បាតុករ​ម្នាក់​ជា​និស្សិត​ទៅ​រៀន​នៅ​ប្រទេស​កូរ៉េខាងត្បូង លោក សាន និវឌ្ឍន៍ ឱ្យ​អាស៊ីសេរី​ដឹង​ថា ការចូលរួម​របស់​លោក​ពេលនេះ​ព្រោះ​ចង់​ឃើញ​ប្រទេស​កម្ពុជា​មានការ​ផ្លាស់ប្ដូរ​ជា​វិជ្ជមាន។ លោក​ថា ទោះ​ការចូលរួម​ថ្ងៃនេះ​អាច​ធ្វើ​ឱ្យ​លោក​ពិបាក​រក​ការងារ​ធ្វើ​វិល​ទៅ​ប្រទេស​កម្ពុជា​វិញ​ក៏ដោយ ក៏​លោក​មិន​ខ្លាច​ដែរ​។ លោក​យល់ថា បើ​ចង់​ឱ្យ​សហគមន៍​អន្តរជាតិ​ជួយ​អន្តរាគមន៍​លុះត្រាតែ​ពលរដ្ឋ​ខ្មែរ​ហ៊ាន​លះបង់​ងើប​ឡើង​ឱ្យ​គេ​ឃើញ​សិន៖ «ការពិត​យើង​ទាមទារ​ចង់​ឱ្យ​សហគមន៍​ជាតិ និង​អន្តរជាតិ​គាត់​បាន​ដឹង​គាត់​ជួយ ប៉ុន្តែ​ទន្ទឹម​ហ្នឹង​យើង​ត្រូវ​ងើបឈរ​ដែរ​បាន​ពួកគាត់​បាន​ជួយ​យើង​បាន​ហើយ​យើង​ជឿ​ថា នឹង​បាន​ផល​ជា​វិជ្ជមាន»

ខ្លឹមសារ​នៃ​ការ​ធ្វើ​បាតុកម្ម​នេះ​គឺ​ក្នុង​គោលបំណង​ទាមទារ​ឱ្យ​មាន​ការ​ស្ដារ​លទ្ធិប្រជាធិបតេយ្យ និង​ការ​គោរព​សិទ្ធិមនុស្ស​នៅ​ប្រទេស​កម្ពុជា​ឡើង​វិញ។ ចំណុច​សំខាន់​មួយទៀត​នោះ​គឺ​ដើម្បី​ផ្សព្វផ្សាយ​និង​បញ្ជាក់​ជំហរ​នៃ​ការ​វិល​ចូល​ស្រុក​របស់​ប្រធាន​ស្ដីទី​គណបក្ស​សង្គ្រោះ​ជាតិ​លោក សម រង្ស៊ី នៅ​ថ្ងៃ​ទី​០៩ ខែ​វិច្ឆិកា​ខាងមុខ​។ ក្រៅ​តែ​ពី​ការ​ទាមទារ​ក្រុម​បាតុករ​បាន​នាំ​គ្នា​ច្រៀង ចម្រៀង​រៀបរាប់​ពី​បញ្ហា​ដែល​កំពុង​កើតឡើង​នៅ​កម្ពុជា​នា​ពេល​សព្វថ្ងៃ​ផង​ដែរ។

មន្ត្រី​គណបក្ស​សង្គ្រោះ​ជាតិ​នៅ​ប្រទេស​អូស្ត្រាលី លោក ម៉ែន វណ្ណា លើកឡើង​ថា លោក ហ៊ុន សែន ដឹកនាំ​ប្រទេស​ជាង​ជិត​៤០​មកនេះ​មានតែ​ការរំលោភ​សិទ្ធិមនុស្ស និង​ធ្វើ​ឱ្យ​ជាតិ​អន់​ខ្សោយ ។ លោក ម៉ែន វណ្ណា ស្នើ​ទៅ​ពលរដ្ឋ​នៅ​ប្រទេសក្រៅ​ទាំងអស់​ចូលរួម​ជាមួយ​លោក សម រង្ស៊ី ដើម្បី​ជួយ​សង្គ្រោះ​ប្រទេស​កម្ពុជា៖ «សាមសិប​ឆ្នាំ​ជាង​ហ្នឹង គឺ​យើង​គ្មាន​សិទ្ធិ​ទេ អ្នកដឹកនាំ​យើង​គឺ​ដើរ​ទៅ​អំណាច​ផ្ដាច់ការ​គ្រួសារ​និយម បក្សពួកនិយម ដូច្នេះ​ថ្ងៃនេះ​យើង​ទាំងអស់​គ្នា​គឺ​ទាមទារ​ឱ្យ​ដក​របប​នេះ​ចេញ​យើង​អត់​ត្រូវការ​របប​នេះ​មាន​នៅ​ស្រុក​យើង​ទេ»

ក្រុម​មន្ត្រី​របប​ក្រុងភ្នំពេញ​ធ្លាប់​លើកឡើង​ថា បាតុកម្ម​របស់​ពលរដ្ឋ​ខ្មែរ​នៅ​ក្រៅ​ប្រទេស​នេះ នឹង​មិន​មាន​ឥទ្ធិពល​អ្វី​លើ​រដ្ឋាភិបាល​កម្ពុជា​ឡើយ ហើយ​ទង្វើ​នេះ​ត្រូវ​បាន​របប​ក្រុងភ្នំពេញ​ចាត់ទុកថា ជា​រឿង​ខុសច្បាប់​ទៀត​ផង។

ទោះជា​យ៉ាងណា ក្រុម​បាតុករ​នៅ​ប្រទេស​កូរ៉េខាងត្បូង​ជំរុញ​ដល់​ពលរដ្ឋ​ខ្មែរ​នៅ​ប្រទេស​ផ្សេងទៀត​នាំគ្នា​ធ្វើបាតុកម្ម​តាម​ប្រទេស​របស់​ពួកគេ​រស់នៅ ដើម្បី​ជា​សារ​ប្រាប់​ដល់​សហគមន៍​អន្តរជាតិ​ឱ្យ​ជួយ​អន្តរាគមន៍​បញ្ចប់​វិបត្តិ​នយោបាយ និង​ធ្វើជា​សាក្សី​នៃ​ការ​វិល​ចូល​ស្រុក​វិញ​របស់​លោក សម រង្ស៊ី នៅ​ថ្ងៃ​ទី​០៩ ខែ​វិច្ឆិកា ខាង​មុខ​នេះ៕

សូម​ស្ដាប់​បទសម្ភាសន៍​បន្ថែម​ជាមួយ​លោក ពេជ្រ ពណ្ណរាយ ជុំវិញ​ការ​ធ្វើ​បាតុកម្ម​នេះ ដូច​តទៅ

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
នយោបាយ
សង្គម​ស៊ីវិល​រំពឹង​ថា​ ឯកអគ្គរដ្ឋទូត​អាមេរិក​ប្រចាំ​កម្ពុជា​ថ្មី​នឹង​បន្ត​ចូល​រួម​លើក​ស្ទួយ​ប្រជាធិបតេយ្យ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។