គណៈនយោបាយសេរីនិយមអន្តជាតិចំនួន ១២ នៃ ចលនាសេរីនិយមអន្តរជាតិ ឬ Liberal International ថ្លែងការណ៍គាំទ្រដំណើរមាតុភូមិនិវត្តន៍របស់លោក សម រង្ស៊ី។
នៅក្នុង សេចក្តីថ្លែងការណ៍ ក្នុងទម្រង់ជាលិខិតចំហ កាលពីថ្ងៃទី១៦ ខែតុលា បណ្តាញពិភពលោកនៃគណបក្សសេរីនិយមទាំងនេះ បញ្ជាក់ថា ក្នុងនាមជាអ្នកសេរីនិយម និងជាអ្នកគាំទ្រប្រជាធិបតេយ្យ ពួកគាត់អំពាវនាវឲ្យលោក ហ៊ុន សែន ដែលពួកគាត់ហៅថា ជាមេដឹកនាំផ្តាច់ការ ចុះចេញពីតំណែង និងធ្វើយ៉ាងណាសម្រួលឲ្យលោក សម រង្ស៊ី និងអ្នកគាំទ្រគណបក្សសង្គ្រោះជាតិដទៃទៀត អាចធ្វើដំណើរវិលត្រឡប់ទៅប្រទេសកម្ពុជាវិញដោយសុវត្ថិភាព។
ជាងនេះទៀត បណ្តុំគណបក្សនយោបាយអន្តរជាតិទាំង១២ នេះ ស្នើរបបលោក ហ៊ុន សែន ឱ្យគោរពឆន្ទៈរបស់ពលរដ្ឋខ្មែរ ដែលចង់បានប្រជាធិបតេយ្យ។
ជាមួយគ្នានេះដែរ ចលនាសេរីនិយមអន្តរជាតិនេះ បានបញ្ជាក់ជំហរថា ខ្លួននឹងជួយរកមេធាវីអន្តរជាតិ ដើម្បីប្តឹងករណីលោក ហ៊ុន សែន និងមន្រ្តីរបបនេះ គំរាមកំហែងអាយុជីវិតលោក សម រង្ស៊ី ទៅតុលាការព្រហ្មទណ្ឌអន្តរជាតិ (ICC)។
លោក ហ៊ុន សែន ធ្លាប់គំរាមថា នឹងកម្ទេចលោក សម រង្ស៊ី នៅព្រំដែន ដោយប្រើកាំភ្លើងទំនើប ដើម្បីបង្ក្រាប កុំឲ្យលោក សម រង្ស៊ី វិលចូលស្រុកវិញ។ មន្រ្តីជាន់ខ្ពស់ផ្នែកការពារជាតិ លោក ទៀ បាញ់ ក៏បានគំរាមកម្ទេចក្រុមប្រឆាំង និងពលរដ្ឋស៊ីវិលឯទៀត ដែលអមដំណើរលោក សម រង្ស៊ី នោះដែរ។
ស្ថាប័នគណបក្សនយោបាយអន្តរជាតិដដែលនេះ ចាត់ទុកការប្រមាថអាយុជីវិតលោក សម រង្ស៊ី និងអ្នកគាំទ្របក្សប្រឆាំងថា ជារឿងមិនអាចទទួលយកបានជាដាច់ខាត។
គណបក្សនយោបាយទាំងនេះប្តេជ្ញាថា នឹងកៀរគតំណាងរាស្រ្ត និងរដ្ឋាភិបាលប្រទេសសេរីនៅជុំវិញពិភពលោក ដើម្បីដាក់សម្ពាធនយោបាយលើរបបលោក ហ៊ុន សែន ឲ្យស្តារសិទ្ធិមនុស្ស និងប្រជាធិបតេយ្យឡើងវិញ។
បន្ថែមលើនេះ ក្រុមគណបក្សនយោបាយអន្តរជាតិទាំងនេះ ជួយតស៊ូមតិ និងកៀរគររកការគាំទ្រពីមហាជន ដើម្បីគាំទ្រដំណើរវិលត្រឡប់ទៅកម្ពុជាវិញរបស់លោក សម រង្ស៊ី ដោយបង្កើតជាយុទ្ធនាការមួយតាមបណ្តាញអ៊ិនធើណិត ដាក់ឈ្មោះថា ខ្ញុំគាំទ្រលោក សម រង្ស៊ី ឬ I Stand With Sam Rainsy។
អាស៊ីសេរីមិនទាន់អាចសុំការឆ្លើយតបបញ្ហានេះ ពីមន្រ្តីនាំពាក្យរបបក្រុងភ្នំពេញ លោក ផៃ ស៊ីផាន បាននៅឡើយទេ នៅពេលនេះ។
គណបក្សនយោបាយសេរីនិយមទាំង ១២នោះ មានមកពីប្រទេសអង់គ្លេស អាល្លឺម៉ង់ ស្វ៊ីស និង ហុល្លង់ជាដើម។
ចលនាសេរីនិយមអន្តរជាតិ ឬ Liberal International ជាសហព័ន្ធពិភពលោកនៃគណបក្សនយោបាយសេរីនិយម និង ប្រជាធិបតេយ្យ ដែលមានមូលដ្ឋាននៅទីក្រុងឡុង ប្រទេសអង់គ្លេស និងមានសមាជិក ១០៦ប្រទេស គិតត្រឹមខែធ្នូ ឆ្នាំ២០១៨៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។