មន្ត្រីជំនិត និងសាច់ញាតិលោក ហ៊ុន សែន ៨នាក់ មានឈ្មោះក្នុងបញ្ជីដែលត្រូវដកហូតសញ្ជាតិស៊ីប
2019.11.30
លោក នេត សាវឿន (ឆ្វេង) អគ្គស្នងការនគរបាលជាតិ និងលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ
រូប៖ ហ្វេសប៊ុកលោក នេត សាវឿន និងក្រសួងសេដ្ឋកិច្ច និងហិរញ្ញវត្ថុ
មន្ត្រីជំនិត និងសាច់ញាតិលោក ហ៊ុន សែន ជាច្រើននាក់ មានឈ្មោះក្នុងបញ្ជីដែលត្រូវដកហូតសញ្ជាតិស៊ីប ឬសាយព្រឹស (Cyprus)។ អ្នកឃ្លាំមើលសង្គមថា រដ្ឋាភិបាលកម្ពុជាត្រូវតែស៊ើបអង្កេតរឿងនេះ ហើយបកស្រាយឱ្យសាធារណជនអស់ចម្ងល់។
សារព័ត៌មានឈានមុខរបស់ប្រទេសស៊ីប (Cyprus) ឈ្មោះ ដេលី ប៉ូលីទីស (Daily Politis) ចេញផ្សាយកាលពីថ្ងៃពុធទី២៧ វិច្ឆិកាថា មនុស្សជំនិត និងសាច់ញាតិលោក ហ៊ុន សែន ចំនួន ៨នាក់ មានឈ្មោះក្នុងចំណោមមនុស្ស ២៦នាក់ ដែលរដ្ឋាភិបាលប្រទេសស៊ីប ត្រូវលុបចោលលិខិតឆ្លងដែន និងដកហូតសញ្ជាតិស៊ីប។
មនុស្សទាំង៨ នាក់នោះ រូមមាន រដ្ឋមន្ត្រីក្រសួងសេដ្ឋកិច្ច លោក អូន ព័ន្ធមុនីរត្ន និងភរិយា អ្នកស្រី អ៊ឹម ផល្លិកា ក្មួយស្រីលោក ហ៊ុន សែន អ្នកស្រី ហ៊ុន គីមឡេង និងស្វាមី ដែលជាមេប៉ូលិសកម្ពុជា គឺលោក នេត សាវឿន ព្រមទាំកូនស្រីពីរនាក់របស់ពួកគេ ហើយនិងអ្នកស្រី ជឹង សុភាព ហៅយាយ ភូ និងស្វាមីគឺលោក ឡាវ ម៉េងឃីន ដែលជាសមាជិកព្រឹទ្ធសភាគណបក្សប្រជាជនកម្ពុជា និងជាម្ចាស់ក្រុមហ៊ុន ស៊ូកាគូ (Shukaku Inc.)ដែលច្បាមយកដីពលរដ្ឋតំបន់បឹងកក់។
មន្ត្រីជំនិត និងសាច់ញាតិរបស់លោក ហ៊ុន សែន ទាំង ៨នាក់នេះ ទទួលបានសញ្ជាតិ និងលិខិតឆ្លងដែនប្រទេសស៊ីប ចាប់ពីឆ្នាំ២០១៦ មក ពោលគឺនៅពេលដែលគណបក្សកាន់អំណាចកំពុងរៀបចំផែនការសម្ងាត់រម្លាយគណបក្សសង្គ្រោះជាតិ នៅមុនការបោះឆ្នោតមកដល់។ របាយការណ៍ស៊ើបអង្កេតរបស់ទីភ្នាក់ងារសារព័ត៌មាន រ៉យទ័រ (Reuters) ឱ្យដឹងថា បុគ្គលទាំងនេះ អាចចំណាយទឹកប្រាក់យ៉ាងហោចណាស់ចាប់ពី ២លានអឺរ៉ូឡើងទៅក្នុងម្នាក់ៗ ដើម្បីទទួលបានសញ្ជាតិប្រទេសស៊ីបនេះ។
អាស៊ីសេរីសេរីមិនអាចទាក់ទងសុំការបំភ្លឺរឿងនេះពីមន្ត្រី និងសាច់ញាតិលោក ហ៊ុន សែន ដែលមានឈ្មោះក្នុងបញ្ជីដែលត្រូវដកហូតសញ្ជាតិស៊ីបនេះបានទេ នៅថ្ងៃទី៣០ វិច្ឆិកា។ ចំណែកអ្នកនាំពាក្យរបបក្រុងភ្នំពេញ លោក ផៃ ស៊ីផាន និងអ្នកនាំពាក្យបក្សកាន់អំណាច លោក សុខ ឥសាន វិញ ក៏មិនអាចទាក់ទងបានដូចគ្នា ដោយពួកលោកមិនលើកទូរស័ព្ទ។
អ្នកវិភាគនយោបាយដែលហ៊ានរិះគន់លោក ហ៊ុន សែន ឥតសំចៃមាត់ គឺលោក គឹម សុខ ថ្លែងថា ករណីក្រុមមន្រ្តី និងសាច់ញាតិរបស់លោក ហ៊ុន សែន ប្រើលុយរាប់លានដុល្លារទិញសញ្ជាតិបរទេសនេះ សបញ្ជាក់ឱ្យឃើញថា ក្រុមមន្ត្រីគ្រាក់ៗ និងមនុស្សជំនិតរបស់លោក ហ៊ុន សែន មានទ្រព្យសម្បត្តិមហាសាល ដែលកើតចេញពីអំពើពុករលួយ ហើយកំពុងព្យាយាមរកកន្លែងមានសុវត្ថិភាពរស់នៅសម្រាប់ថ្ងៃអនាគត ពេលលោក ហ៊ុន សែន អស់ពីអំណាច។ លោកជឿថា លោក ហ៊ុន សែន អាចដឹងច្បាស់ពីរឿងនេះ ប៉ុន្តែលោកធ្វើមិនដឹងមិនឮ ព្រោះក្រុមមនុស្សទាំងនោះជាអ្នកជួយជ្រោងអំណាចផ្ដាច់ការរបស់លោក៖ «ហេតុអ្វីបានជាលោក ហ៊ុន សែន មិនចាត់ការ? ពីព្រោះអំពើពុករលួយនេះ ជាបណ្ដាញប្រមូលយកផលសម្រាប់ក្រុមគ្រួសារលោក ហ៊ុន សែន និងមនុស្សជិតស្និទ្ធរបស់គាត់។ បើស៊ើបអង្កេតឱ្យបានត្រឹមត្រូវ គឺលោក ហ៊ុន សែន ខ្លួនឯងហ្នឹង ក៏ជាអ្នកដែលត្រូវជាប់ពាក់ព័ន្ធដែរ។ ចំណុចទីពីរ អំពើពុករលួយហ្នឹងហើយដែលធ្វើឱ្យមនុស្សទាំងអស់នោះជាប់ខ្នោះ ត្រូវតែការពារគាត់។ បើអ្នកទាំងអស់នោះ មិនការពារគាត់ ពួកអ្នកទាំងនោះនឹងត្រូវបានចោទប្រកាន់ បញ្ជូនទៅពន្ធនាគារ រឹបអូសយកទ្រព្យសម្បត្តិ»។
រដ្ឋាភិបាលប្រទេសស៊ីប បានចាប់ផ្ដើមស៊ើបអង្កេតដើម្បីលុបចោលលិខិតឆ្លងដែន និងដកសញ្ជាតិស៊ីបពីជនបរទេសសរុប ២៦នាក់ ក្រោយផ្ទុះរឿងរ៉ាវអាស្រូវថា រដ្ឋាភិបាលប្រទេសនេះ បានលក់សញ្ជាតិ និងលិខិតឆ្លងដែនឱ្យជនបរទេសសរុបជិត ២ពាន់នាក់ (១.៨៦៤សញ្ជាតិ) ក្នុងនោះមនុស្សមួយចំនួន គឺជាជនពុករលួយដែលកេងប្រវ័ញ្ច ឬលួចលុយជាតិ ហើយអ្នកខ្លះទៀតមានជាប់ពាក់ព័ន្ធនឹងការលាងលុយកខ្វក់។
ប្រធានអង្គការសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ ថ្លែងថា ច្បាប់កម្ពុជាមិនបានហាមឃាត់ពលរដ្ឋមិនឱ្យមានសញ្ជាតិបរទេសនោះទេ ក៏ប៉ុន្តែករណីនេះមានបញ្ហានៅត្រង់ថា តើមន្ត្រីកម្ពុជាបានលុយរាប់លានដុល្លារមកពីណាដើម្បីទៅទិញសញ្ជាតិបរទេស។ លោកថា រដ្ឋាភិបាលគួរតែបើកការស៊ើបអង្កេតរឿងនេះ ព្រោះករណីនេះអាចមានជាប់ពាក់ព័ន្ធនឹងអំពើពុករលួយទ្រង់ទ្រាយធំ៖ «ការដែលមានទ្រព្យសម្បត្តិច្រើន ហើយយកទៅទិញសញ្ជាតិ រួមទាំងការវិនិយោគនៅក្រៅប្រទេសដោយមន្ត្រីជាន់ខ្ពស់រដ្ឋាភិបាលដែលមានអំណាចហ្នឹង បើនៅប្រទេសគេដែលមានអង្គភាពប្រឆាំងអំពើពុករលួយដែលធ្វើការងារឯករាជ្យពិតប្រាកដហ្នឹង ម៉្លេះសមនឹងមានការស៊ើបអង្កេតហើយ នៅពេលដែលមានការរាយការណ៍ពីចំនួនទ្រព្យសម្បត្តិដ៏ច្រើនបែបនេះ»។
ប្រទេសស៊ីបជារដ្ឋសមាជិកសហភាពអឺរ៉ុប ដែលអនុវត្តការលក់សញ្ជាតិដល់ជនបរទេស ក្រោមរូបភាពជាការបណ្ដាក់ទុនវិនិយោគនៅក្នុងប្រទេសរបស់ខ្លួន។ ការផ្ដល់លិខិតឆ្លងដែនក្រោមរូបភាពនៃការវិនិយោគ ឬហៅថា «Golden Passports» អាចអនុញ្ញាតឱ្យអ្នកកាន់លិខិតឆ្លងដែននេះ ទទួលបានសញ្ជាតិអឺរ៉ុប។ ទោះជាយ៉ាងណា សហភាពអឺរ៉ុបធ្លាប់ព្រមានប្រទេសស៊ីបថា ក្រុមឧក្រិដ្ឋជនអាចប្រើវិធីទទួលបានលិខិតឆ្លងដែនបែបនេះ ធ្វើជាឈ្នាន់ដើម្បីជ្រៀតចូលទៅក្នុងទឹកដីអឺរ៉ុប និងបង្កឱ្យមានហានិភ័យនៃអំពើលាងលុយកខ្វក់ អំពើពុករលួយ និងការគេចពន្ធជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- សមត្ថកិច្ចចាប់ខ្លួន លោក ហោ សុខុន អតីតព្រះចៅអធិការវត្តច្បារអំពៅ និងមនុស្ស ៣ទៀត
អត្ថបទពេញនិយម
នយោបាយ
- គណបក្សកម្លាំងជាតិបោះឆ្នោតជ្រើសតាំងលោក ជា មុនី ធ្វើជាប្រធានបក្ស
- អ្នកឃ្លាំមើលថា កម្ពុជាខាតបង់ផលប្រយោជន៍ធំធេង ក្រោយពេលស៊ុយអែតបិទស្ថានទូតនៅក្រុងភ្នំពេញ
- អ្នកឃ្លាំមើលថា លោក ហ៊ុន សែន និងលោក ហ៊ុន ម៉ាណែត អសមត្ថភាពក្នុងការដោះស្រាយបញ្ហា ទើបប្រកាសធ្វើច្បាប់ចោទអ្នករិះគន់ថា ជាក្រុមភេរវកម្ម
- ហេតុអ្វីបានជាលោក ហ៊ុន សែន មិនហ៊ានក្អកជាមួយវៀតណាមក្នុងរឿង CLV?
- មន្ត្រីបក្សប្រឆាំង និងសង្គមស៊ីវិល រិះគន់រដ្ឋមន្ត្រីក្រសួងមហាផ្ទៃ ដែលណែនាំនគរបាលឲ្យបន្តបង្ក្រាបអ្នកប្រឆាំង