តុលាការ​របប​​ភ្នំពេញ​ផ្ដន្ទាទោស​លោក សម រង្ស៊ី មួយ​ករណី​ទៀត​ជាមួយ​មន្ត្រី​បក្ស​ប្រឆាំង ៣​នាក់

ដោយ សុ ជីវី
2019-10-19
អ៊ីម៉ែល
មតិ
Share
បោះពុម្ព
លោក ហូរ វ៉ាន់ (ឆ្វេង) លោក សម រង្ស៊ី ប្រធាន​ស្ដីទី​គណបក្ស​សង្គ្រោះ​ជាតិ លោក កាក់ កុម្ភារ និង​លោក​ គង់ ម៉ាស់ (ស្ដាំ​ទីមួយ)។
លោក ហូរ វ៉ាន់ (ឆ្វេង) លោក សម រង្ស៊ី ប្រធាន​ស្ដីទី​គណបក្ស​សង្គ្រោះ​ជាតិ លោក កាក់ កុម្ភារ និង​លោក​ គង់ ម៉ាស់ (ស្ដាំ​ទីមួយ)។
រូបពី៖ ហ្វេសប៊ុករូបពី៖ ហ្វេសប៊ុក

តុលាការ​របប​ក្រុងភ្នំពេញ សម្រេច​ផ្ដន្ទាទោស​លោក សម រង្ស៊ី ក្នុង​សំណុំរឿង​ថ្មី​មួយទៀត ជាមួយ​មន្ត្រី​បក្ស​ប្រឆាំង ៣​នាក់ នៅ​ថ្ងៃ​ទី​១៨ ខែ​តុលា ពាក់ព័ន្ធ​នឹង​ករណី​បង្ហោះ​សារ​ប្រមាថ​លោក ហ៊ុន សែន និង​ញុះញង់​ឱ្យ​ប្រព្រឹត្ត​បទឧក្រិដ្ឋ​ជាអាទិ៍។ មេធាវី​ការពារ​ក្ដី និង​អ្នកវិភាគ​នយោបាយ ចាត់​ទុក​សេចក្ដី​សម្រេច​របស់​តុលាការ​នេះ​ថា ជា​រឿង​នយោបាយ មិន​ផ្អែកលើ​មូលដ្ឋាន​ច្បាប់ និង​ភស្តុតាង។

ចៅក្រម​ជំនុំជម្រះ​សាលាដំបូង​រាជធានី​ភ្នំពេញ លោក ពេជ្រ វិជ្ជាធរ ប្រកាស​សាលក្រម​ផ្ដន្ទាទោស ប្រធាន​ស្ដីទី​គណបក្ស​សង្គ្រោះជាតិ លោក សម រង្ស៊ី តំណាងរាស្ត្រ​បក្ស​ប្រឆាំង លោក ហូ វ៉ាន់ និង​សមាជិក​ប្រតិបត្តិ​រាជធានី​ភ្នំពេញ នៃ​គណបក្ស​សង្គ្រោះ​ជាតិ លោក កាក់ កុម្ភារ ឱ្យ​ជាប់ពន្ធនាគារ ម្នាក់ៗ ១​ឆ្នាំ ៨​ខែ ពី​បទ​ផ្ដើម​គំនិត​ក្នុង​អំពើ​ប្រមាថ និង​ញុះញង់​ឱ្យ​ប្រព្រឹត្ត​បទឧក្រិដ្ឋ​ជាអាទិ៍​។ ចំណែក​សកម្មជន​គណ​បក្ស​សង្គ្រោះ​ជាតិ​ប្រចាំ​ខេត្ត​ស្វាយរៀង លោក គង់ ម៉ាស់ ត្រូវ​បាន​តុលាការ​ផ្ដន្ទាទោស​ឱ្យ​ជាប់ពន្ធនាគារ ១​ឆ្នាំ ៦​ខែ ពី​បទ​ប្រមាថ និង​ញុះញង់​ឱ្យ​ប្រព្រឹត្ត​បទឧក្រិដ្ឋ​ជាអាទិ៍​តាម​បញ្ជា​របស់​លោក សម រង្ស៊ី និង​លោក ហូរ វ៉ាន់។

ក្នុង​សំណុំ​រឿង​នេះ មានតែ​លោក គង់ ម៉ាស់ ម្នាក់​ប៉ុណ្ណោះ ដែល​សមត្ថកិច្ច​ចាប់​ឃុំខ្លួន​ក្នុង​ពន្ធនាគារ ហើយ​បាន​បង្ហាញ​វត្តមាន​ក្នុង​តុលាការ​ជាមួយ​មេធាវី ចំណែក​លោក សម រង្ស៊ី លោក ហូរ វ៉ាន់ និង​លោក កាក់ កុម្ភារ កំពុង​រស់នៅ​និរទេស​ខ្លួន​នៅ​ក្រៅ​ប្រទេស ហើយ​មិនបាន​ពឹង​មេធាវី​នោះ​ទេ។ ក្នុង​ពេល​ប្រកាស​សាលក្រម​នេះ តុលាការ​ក៏​បង្គាប់​ឱ្យ​សមត្ថកិច្ច​តាម​ចាប់ខ្លួន​លោក សម រង្ស៊ី លោក ហូវ៉ាន់ និង​លោក កាក់ កុម្ភារ ផង​ដែរ។

មេធាវី​ការពារ​ក្តី​ឱ្យ​លោក គង់ ម៉ាស់ គឺ​លោក សំ សុគង់ ប្រាប់​អាស៊ីសេរី​ថា លោក​មិន​អាច​ទទួលយក​បានទេ ព្រោះ​សាលក្រម​នេះ​មិនបាន​ផ្ដល់​យុត្តិធម៌​ពេញលេញ​សម្រាប់​កូន​ក្តី​របស់​លោក។ មេធាវី​រូប​នេះ​ឱ្យ​ដឹង​ថា លោក​នឹង​ទៅ​ជួប​លោក គង់ ម៉ាស់ ក្នុង​ពន្ធនាគារ​ប៉ុន្មាន​ថ្ងៃ​ទៀត​នេះ ដើម្បី​ពិភាក្សា​ផ្លូវច្បាប់ និង​ប្រាប់​អំពី​សិទ្ធិ ដែល​លោក​ត្រូវ​មាន ដូចជា ការ​ធ្វើ​បណ្ដឹង​ជំទាស់​ទៅ​សាលា​ឧទ្ធរណ៍៖ «ខ្ញុំ​សំអាង​ថា ទី​១​កូន​ក្តី​របស់ខ្ញុំ​មិនបាន​ប្រព្រឹត្ត​ដូច​ការចោទប្រកាន់ ហើយ​ទី​២ ការដែល​កូន​ក្តី​របស់ខ្ញុំ​បាន​បង្ហោះ​ព័ត៌មាន​ឬ​សារ​ផ្សេងៗ​ក្នុង​ហ្វេសប៊ុក​របស់​គាត់​គឺជា ការប្រើប្រាស់​សិទ្ធិ​បញ្ចេញមតិ​ស្រប​តាមច្បាប់»

ការចោទប្រកាន់ និង​ផ្ដន្ទាទោស​នេះ ដោយ​តុលាការ​សំអាង​លើ​ភស្តុតាង​ដែល​ប្រមូល​បាន​ពី​កំព្យូទ័រ របស់​លោក គង់ ម៉ាស់ ក្នុង​ថ្ងៃ​ចាប់ខ្លួន។ តុលាការ​ចោទ​ថា លោក គង់ ម៉ាស់ បាន​បង្ហោះ​សារ​លើ​ហ្វេសប៊ុក​ដែល​មាន​ខ្លឹមសារ​ប្រមាថ​ថ្នាក់ដឹកនាំ​រដ្ឋាភិបាល ចាប់ពី​ខែ​មេសា ដល់​ខែ​តុលា ឆ្នាំ​២០១៨។ សារ​ទាំងនោះ មាន​ដូចជា រិះគន់​រឿង​ព្រៃឈើ រឿង​បោះឆ្នោត រឿង​រំលាយ​គណបក្ស​សង្គ្រោះ​ជាតិ រឿង​ព្រំដែន និង​សារ​ចុងក្រោយ​រិះគន់​រឿង​តម្លៃ​ស្រូវ​ចុះថោក​ជាដើម​។ តុលាការ ក៏​ចោទ លោក គង់ ម៉ាស់ ថា​ទទួល​ផែនការ​ពី​លោក សម រង្ស៊ី តាមរយៈ​លោក ហូ វ៉ាន់ ក្នុង​ការ​ត្រៀម​បោះពុម្ភ​ខិត្តប័ណ្ណ ១០​ម៉ឺន​សន្លឹក ដើម្បី​យក​ទៅ​បាច​នៅ​ខេត្ត​ស្វាយរៀង​កុំ​ឱ្យ​ពលរដ្ឋ​ចេញទៅ​បោះឆ្នោត កាលពី​ខែ​កក្កដា​ឆ្នាំ​២០១៨​។ ទោះ​យ៉ាង​ណា​ក្តី លោក គង់ ម៉ាស ឆ្លើយតប​ថា លោក គ្រាន់តែ​រិះគន់​ក្នុង​ន័យ​ស្ថាបនា​ប៉ុណ្ណោះ ហើយ​លោក មិន​បាន​ទទួល​បញ្ជា​ពី​ថ្នាក់ដឹកនាំ គណបក្ស​សង្គ្រោះ​ជាតិ ក្នុង​ការ​សរសេរ​រិះគន់​ឬ​ប្រមាថ​រដ្ឋាភិបាល​ឡើយ។ ចំណែក​រឿង​ខិត្តប័ណ្ណ​នោះ លោក មិន​បាន​បោះពុម្ព​នោះ​ទេ ដោយសារ​កាលណោះ​គ្មាន​ថវិកា​ផង និង​ដឹង​ថា វា​ជា​រឿង ខុសច្បាប់​ផង ទើប​លោក​រំសាយ​គម្រោង​នេះ​ចោល​វិញ​។ លោក​បញ្ជាក់​ថា លោក​គ្រាន់តែ​ចង់​ឱ្យ​ប្រជាពលរដ្ឋ​ផ្លាស់ប្ដូរ​រាជរដ្ឋាភិបាល​តាមរយៈ​ការបោះឆ្នោត មិនមែន​តាមរយៈ​រដ្ឋ​ប្រហារ ឬ​មធ្យោបាយ​ហិង្សា​ទេ។

អ្នកវិភាគ​នយោបាយ លោក ហ៊ាង គឹមស្រឿន យល់ថា សេចក្តី​សម្រេច​របស់​តុលាការ​នេះ នរណា​ក៏​ដឹង​ថា ជា​រឿង​នយោបាយ​ដែរ ព្រោះ​តុលាការ​បច្ចុប្បន្ន​ឋិត​ក្រោម​ឥទ្ធិពល​របស់​គណបក្ស​កាន់ អំណាច​។ លោក​បន្ត​ថា សាលក្រម​ផ្ដន្ទាទោស​នេះ ក៏​នឹង​ធ្វើ​ឱ្យ​គណបក្ស​កាន់អំណាច និង​ស្ថាប័ន តុលាការ កាន់​តែ​មាន​កេរ្តិ៍​អាក្រក់​បន្ថែម​ទៀត៖ «ការ​ធ្វើ​កន្លង​មក​រហូត​ដល់​បច្ចុប្បន្ន​នេះ ខ្ញុំ​ឃើញ​ថា នេះ​គឺជា​កា​រឹតត្បិត​សិទ្ធិ​សេរីភាព​បញ្ចេញមតិ​របស់​អ្នកនយោបាយ​ក៏ដូចជា​មហាជន​ផ្សេងៗ​ដែល មានការ​រិះគន់​ទៅលើ​គណបក្ស​កាន់អំណាច គឺ​តែងតែ​មាន​ទទួលរង​ភាព​អយុត្តិធម៌​តាម​ប្រពន្ធ​តុលាការ​នៅ​ក្រោម​អំណាច​បញ្ជា​របស់​គណបក្ស​កាន់អំណាច»

របប​ក្រុងភ្នំពេញ បាន​ចាប់ខ្លួន​លោក គង់ ម៉ាស់ ដែល​ជា​អនុ​ប្រធាន​នាយកដ្ឋាន​កិច្ចការ​បោះឆ្នោត និង​នីតិកម្ម និង​ជា​សមាជិក​ក្រុមការងារ​គណបក្ស​សង្គ្រោះ​ជាតិ​ខេត្ត​ស្វាយរៀង កាលពី​ថ្ងៃ​ទី​១៦ ខែ​មករា ឆ្នាំ​២០១៩ ដែល​មកដល់ពេលនេះ​មាន​រយៈពេល​១០ ខែ​ហើយ​។ ក្រៅពី​លោក គង់ ម៉ាស់ មាន​សកម្មជន​បក្ស​ប្រឆាំង​ចំនួន ៤៨​នាក់​ផ្សេងទៀត​កំពុង​ជាប់ឃុំ និង ១៨៤​នាក់​ផ្សេងទៀត ត្រូវ​បាន​តុលាការ និង​សមត្ថកិច្ច​កោះហៅ​ទៅ​សាកសួរ​ពាក់ព័ន្ធ​នឹង​ការ​ចោទប្រកាន់​ថា ធ្វើ​សកម្មភាព​ប្រឆាំង និង​ប៉ុនប៉ង​ផ្តួល​រំលំ​រដ្ឋាភិបាល ស្រប​ពេល​មន្ត្រី និង​សកម្មជន​សង្គ្រោះ​ជាតិ​ជាច្រើន​នាក់​ផ្សេងទៀត​រត់​ភៀសខ្លួន​ទៅ​កន្លែង​មាន​សុវត្ថិភាព គេច​ចេញពី​ការ​តាម​ធ្វើទុក្ខបុកម្នេញ​របស់​អាជ្ញាធរ​របប​ក្រុងភ្នំពេញ​។ រីឯ​សកម្មជន​បក្ស​ប្រឆាំង​ចំនួន ១២​នាក់​ទៀត បាន​រង​ការវាយប្រហារ​ធ្ងន់ធ្ងរ​លើ​រាងកាយ ដោយ​ជនបិទមុខ។

ចំណែក​មេដឹកនាំ​បក្ស​ប្រឆាំង​លោក សម រង្ស៊ី វិញ កំពុង​ជាប់​បណ្ដឹង​នៅ​តុលាការ​ចំនួន ១៥​ករណី​ហើយ ដោយ​ក្នុង​នោះ ៩​ករណី មាន​សាលក្រម​ស្ថាពរ​។ ទោះជា​យ៉ាងណា លោក សម រង្ស៊ី ធ្លាប់​បញ្ជាក់​រួចហើយ​ថា លោក​មិន​ខ្វល់​នឹង​ការ​ប្ដឹង​ផ្ដល់​ទាំង​នេះ​ឡើយ ព្រោះ​លោក​អះអាង​ថា តុលាការ​កម្ពុជា​បច្ចុប្បន្ន​ជា​តុលាការ​អាយ៉ង ដែល​រង់ចាំ​ស្ដាប់​តាមតែ​បញ្ជា​លោក ហ៊ុន សែន ប៉ុណ្ណោះ ហើយ លោក​នៅតែ​រក្សា​ជំហរ​វិល​ចូល​កម្ពុជា​វិញ​នៅ​ថ្ងៃ​ទី​៩ ខែ​វិច្ឆិកា។

អ្នកឃ្លាំមើល​បញ្ហា​នយោបាយ​យល់ថា ចំណាត់​ការ​របស់​តុលាការ​របប​ក្រុងភ្នំពេញ​លើ​ក្រុម​មេដឹកនាំ និង​សកម្មជន​បក្ស​ប្រឆាំង​នា​ពេល​ថ្មីៗ នេះ គឺជា​ការ​បន្ថែម​សម្ពាធ​កុំ​ឱ្យ​លោក សម រង្ស៊ី វិល​ចូល​ស្រុក​វិញ នៅ​ថ្ងៃ​ទី​៩ ខែ​វិច្ឆិកា ខាងមុខ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល