គណៈកម្មការទី២នៃរដ្ឋសភា សាកសួរអគ្គលេខាធិការរដ្ឋសភាពីការចាយវាយថវិការដ្ឋសភា ដែលត្រូវគេសង្ស័យថា អាចមានភាពមិនប្រក្រតី ឬពុករលួយ។ នោះជាការសាកសួរបឋម ហើយគណៈកម្មការសភា អាចនឹងចាប់ផ្ដើមស៊ើបអង្កេតបន្ទាប់ពីប្រមូលឯកសារគ្រប់គ្រាន់ ទាក់ទងនឹងការចំណាយមិនប្រក្រតីក្នុងទំហំទឹកប្រាក់ជាង ១១លានដុល្លារ និងការគ្រប់គ្រងមិនត្រឹមត្រូវ។
គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម ឬគណៈកម្មការទី២នៃរដ្ឋសភា ទាមទារឲ្យ លោក ឡេង ប៉េងឡុង អគ្គលេខាធិការរដ្ឋសភាផ្ដល់ឯកសារពាក់ព័ន្ធនឹងការចំណាយថវិកាឲ្យបានឆាប់ ដើម្បីស្រាវជ្រាវរកការពិត។
អនុប្រធានគណៈកម្មការទី២នៃរដ្ឋសភា លោក សុន ឆ័យ ដែលដឹកនាំកិច្ចប្រជុំសាកសួរនៅព្រឹកថ្ងៃទី១០ ខែមីនា នោះមានប្រសាសន៍ថា ការកោះអញ្ជើញអគ្គលេខាធិការរដ្ឋសភាមកសាកសួរនេះ បន្ទាប់ពីមានការសង្ស័យពីភាពមិនប្រក្រតី ចំពោះការដេញថ្លៃគម្រោងសាងសង់ដងទង់ជាតិនៅសភា ដែលមានតម្លៃជាង ៣ម៉ឺនដុល្លារ។ លើសពីនេះ ការចំណាយក្នុងឆ្នាំ២០១៤ មានបញ្ហាសង្ស័យក្នុងទំហំចំណាយជាង ១១លានដុល្លារ៖ «ប៉ុន្មានសប្ដាហ៍មុននេះ សមាជិកគណៈកម្មការទី២ បានទៅអង្កេតការដេញថ្លៃគម្រោងទង់ជាតិកំណត់ក្នុងសំណើចំណាយថវិកាក្នុងតម្លៃ ៣ម៉ឺន ៥ពាន់ដុល្លារក្នុងដងទង់ជាតិមួយ ហើយយើងទៅឃើញមានភាពមិនប្រក្រតី។ គណៈកម្មការទី២រដ្ឋសភាហ្នឹងមានភារកិច្ចសវនកម្មដែរ ប៉ុន្តែខាងអគ្គលេខាធិការគាត់លាក់ឯកសារ។ យើងក៏បានប្រាប់ឲ្យអគ្គលេខាធិការដ្ឋានហ្នឹងយល់ឲ្យបានច្បាស់ថា មានភាពមិនប្រក្រតីច្រើនណាស់តាំងពីការដាក់ក្រុមគ្រួសារក្នុងតួនាទី ការចាយវាយពាក់ព័ន្ធនឹងការទទួលភ្ញៀវ និងបេសកកម្មដែលមានទំហំទឹកប្រាក់ ១១លានដុល្លារកន្លះក្នុងមួយឆ្នាំ ក្នុងនោះមានការទិញរថយន្ត ការទិញម៉ាស៊ីនថតចម្លងអីហូរហែហ្នឹង គឺសុំឲ្យគាត់ផ្តល់ឯកសារ»។
លោក សុន ឆ័យ បញ្ជាក់ថា បញ្ហាដែលសង្ស័យនៅមិនទាន់អាចដោះស្រាយបាននៅឡើយ ត្បិតក្នុងកិច្ចប្រជុំនោះ អគ្គលេខាធិការរដ្ឋសភា លោក ឡេង ប៉េងឡុង បានបដិសេធសំណើសុំផ្ដល់ឯកសារពាក់ព័ន្ធនានា ដោយសំអាងថា រាល់ឯកសារចំណាយត្រូវឆ្លងកាត់ការអនុញ្ញាតពីប្រធានរដ្ឋសភា។
អនុប្រធានគណៈកម្មការទី២ និងជាអ្នកតំណាងរាស្ត្រគណបក្សសង្គ្រោះជាតិ ធ្លាប់បានដាក់លិខិតទៅអគ្គលេខាធិការរដ្ឋសភា លោក ឡេង ប៉េងឡុង អគ្គលេខាធិការរដ្ឋសភា ដោយស្នើពិនិត្យបញ្ជីបុគ្គលិកសភាទាំងអស់ ព្រមទាំងពន្យល់ពីការគ្រប់គ្រងមិនត្រឹមត្រូវ។ លិខិតនោះ បានចុចឈ្មោះចំៗទៅលើអគ្គលេខាធិការរងរដ្ឋសភាឈ្មោះ មិត្ត ការ៉េន ដែលមានសាច់ញាតិជាច្រើននាក់បំពេញការងារនៅនាយកដ្ឋានសំខាន់ៗនៃរដ្ឋសភា។
យ៉ាងណាក៏ដោយ លោក ឡេង ប៉េងឡុង និងលោក មិត្ត ការ៉េន មិនបានផ្ដល់ការសម្ភាសដល់អ្នកសារព័ត៌មានឡើយ នៅពេលដើរចេញពីបន្ទប់ប្រជុំនៅព្រឹកថ្ងៃទី១០ ខែមីនា។
នាយកប្រតិបត្តិគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ខុមហ្វ្រែល (Comfrel) លោក គល់ បញ្ញា មានប្រសាសន៍ថា ស្ថាប័នរដ្ឋសភា គឺជាគំរូដល់ស្ថាប័នផ្សេងទៀត ជាពិសេសគឺជាគំរូដល់រដ្ឋាភិបាលដែលត្រូវធានាថា ការងារដែលពាក់ព័ន្ធដល់ថវិកាជាតិត្រូវតែមានតម្លាភាព៖ «រចនាសម្ព័ន្ឋរបស់រដ្ឋសភា ហើយអ្នកតំណាងរាស្ត្រក្នុងហ្នឹងកាន់គណៈកម្មការហិរញ្ញវត្ថុទៀត មិនអាចបើកឲ្យគេ ហើយធ្វើម៉េចទៅ? ដែលអាចឲ្យរដ្ឋសភាទៅធ្វើការតាមដានរដ្ឋាភិបាលបាន បើក្នុងរចនាសម្ព័ន្ធខ្លួនឯងធ្វើមិនបានផង។ ធ្ងន់ណាស់ បើយើងអត់ធ្វើរឿងហ្នឹងបានទេ យើងសង្ឃឹមអីទៅ ពិនិត្យការងារ ទៅដេញដោលឲ្យរដ្ឋាភិបាលបើកចំហឯកសារ ដើម្បីពិនិត្យមើលការចាយវាយអីឲ្យបានត្រឹមត្រូវ»។
អនុប្រធានគណៈកម្មការទី២រដ្ឋសភា លោក ស៊ុន ឆ័យ បញ្ជាក់ថា គណៈកម្មការនេះបានបង្កើតក្រុមការងារមួយ ដែលនឹងតាមដានសំណើសុំឯកសារពីអគ្គលេខាធិការដ្ឋានរដ្ឋសភា ដែលនឹងឈានទៅកិច្ចការសវនកម្ម។ ក្រុមការងារនោះ ដឹកនាំដោយអ្នកតំណាងរាស្ត្រពីររូប គឺលោក ឈឹម ម៉ា និងលោក ឡុង ប៊ុន្នី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។