ក្រសួង​ការពារ​ជាតិ​ ទាត់ចោល​របាយការណ៍​ភ្នាក់ងារ​សម្ងាត់​អាមេរិកាំង​ រឿង​កម្ពុជា​អាច​ឈាន​ទៅ​កែ​ប្រែ​រដ្ឋធម្មនុញ្ញ​បើក​ផ្លូវ​ឲ្យ​មាន​មូលដ្ឋាន​យោធា​ចិន

លោក មាន ឫទ្ធិ
2019-02-01
អ៊ីម៉ែល
មតិ
Share
បោះពុម្ព
ទំព័រ​មុខ​របាយការណ៍​ប្រចាំ​ឆ្នាំ ​របស់​សហព័ន្ធ​ភ្នាក់ងារ​កិច្ចការ​សម្ងាត់​អាមេរិកាំង ។
ទំព័រ​មុខ​របាយការណ៍​ប្រចាំ​ឆ្នាំ ​របស់​សហព័ន្ធ​ភ្នាក់ងារ​កិច្ចការ​សម្ងាត់​អាមេរិកាំង ។
Photo: RFA

អ្នកនាំពាក្យ​ក្រសួង​ការពារ​ជាតិ​ បដិសេធ​អំពី​លទ្ធភាព​ដែល​កម្ពុជា​ ​បើក​ផ្លូវ​ឲ្យ​មាន​មូលដ្ឋាន​យោធា​ចិន​នៅលើ​ទឹកដី​កម្ពុជា​ ​តាមរយៈ​ការធ្វើ​វិសោធនកម្ម​រដ្ឋធម្មនុញ្ញ​របស់​ខ្លួន​។ ​សហព័ន្ធ​ភ្នាក់ងារ​កិច្ចការ​សម្ងាត់​អាមេរិកាំង​ ​បាន​ចេញ​របាយការណ៍​ប្រចាំ​ឆ្នាំ​មួយ​របស់​ខ្លួន​ កាលពី​ថ្ងៃ​ទី ២៩ មក​រា ​វាយតម្លៃ​អំពី​ស្ថានភាព​គំរាមកំហែង​នៅលើ​សាកលលោក​។​

អ្នកនាំពាក្យ​ក្រសួង​ការពារ​ជាតិ​ ​លោក​ ​ឈុំ​ ​សុជាតិ​ ​ហៅ​របាយការណ៍​របស់​សហព័ន្ធ​ភ្នាក់ងារ​កិច្ចការ​សម្ងាត់​អាមេរិកាំង​ ថា​ជា​ឧបាយកល​ញុះញង់​របស់​សហរដ្ឋ​អាមេរិក​ ​ដើម្បី​បំផ្លាញ​សេចក្តីសុខសាន​របស់​ប្រជាពលរដ្ឋ​កម្ពុជា​។ «​និយាយ​រួម​ ការចោទប្រកាន់​ដែល​គ្មាន​មូលហេតុ​អី​ច្បាស់លាស់​ ​គាត់​ចង់​និយាយ​ផ្អែក​លើ​គំនិត​របស់​គាត់​ ​មិន​ឆ្លុះ​ពី​សត្យានុម័ត​របស់​សភាពការណ៍​ជាក់ស្តែង​ របស់​ប្រជាជន​កម្ពុជា​ ​របស់​រដ្ឋាភិបាល​កម្ពុជា​ ​ដែល​យើង​កំពុង​រស់​នៅក្នុង​សុខ​សន្តិភាព​ជាមួយ​ប្រទេស​ជិតខាង​ភូមិ​ផង​របង​ជាមួយ​ក្នុង​សហគមន៍​អាស៊ាន​។ ​ដូច្នេះ​ ​យើង​មិន​ចាំបាច់​ធ្វើ​នូវ​ទង្វើ​អី​ដែល​គាត់​លើកឡើង​នេះ​ទេ​។ ​នេះ​ជា​ទង្វើ​មួយ​ដែល​យើង​សូមថ្កោល​ទោស​ ​ច្រានចោល​ទាំងស្រុង​នូវ​អំពើ​ដែល​លើកឡើង​ដែល​គ្មាន​ហេតុផល​ គ្មាន​មនសិការ​នេះ​បាទ​។​»
ប្រតិកម្ម​របស់​អ្នកនាំពាក្យ​ក្រសួង​ការពារ​ជាតិ​រូប​នេះ​ ​ធ្វើឡើង​ក្រោយពេល​ដែល​ការិយាល័យ​របស់​ប្រធាន​កិច្ចការ​សម្ងាត់​អាមេរិកាំង​ ​(Office of the Director of National Intelligence)នៃ​ ​ដែល​ជា​បណ្តុំ​ភ្នាក់ងារ​កិច្ចការ​សម្ងាត់​អាមេរិកាំង​ចំនួន​ ១៧ ​ស្ថាប័ន​ ក្នុង​នោះ​រួមទាំង​ភ្នាក់ងារ​ ស៊ី​.​អាយ​.​អេ ​(CIA)ផង​ បាន​ចេញ​របាយការណ៍​វាយតម្លៃ​ការគំរាមកំហែង​ជា​សាកល​ប្រចាំឆ្នាំ ២០១៩ ​ដោយ​វាយតម្លៃ​ថា​ ​ការរអិល​ធ្លាក់​របស់​កម្ពុជា​ចូល​ទៅក្នុង​របប​គ្រប់គ្រង​បែប​ផ្តាច់ការនិយម ​ដែល​បណ្តាល​ឲ្យ​គណបក្ស​ប្រជាជន​កម្ពុជា​ ​គ្រប់គ្រង​បាន​ទាំងស្រុង​នូវ​អំណាច​នីតិប្បញ្ញត្តិ​របស់​ប្រទេស​នេះ​ ​បើក​ផ្លូវ​ឲ្យ​មាន​ការធ្វើ​វិសោធនកម្ម​រដ្ឋធម្មនុញ្ញ ​ដែល​អាច​បណ្តាល​ឲ្យ​មាន​វត្តមាន​យោធា​ចិន​នៅក្នុង​ប្រទេស​នេះ​បាន​។​


លោក​ ​ឈុំ​ ​សុជាតិ​ ​បញ្ជាក់​ថា​ ​អ្វី​ដែល​កម្ពុជា​បាន​ធ្វើ​នា​ពេល​កន្លង​មក​ តាមរយៈ​ការបញ្ជាក់​ជំហរ​ជាច្រើន​លើក​ច្រើន​សារ ​ដោយ​ផ្ទាល់​មាត់​ក្តី​ ​និង​ជាលាយលក្ខណ៍អក្សរ​ក្តី​របស់​នាយករដ្ឋមន្ត្រី​ ​និង​ក្រសួង​ការពារ​ជាតិ​ ​ជា​ការគ្រប់គ្រាន់​ហើយ​សម្រាប់​គ្រប់​ប្រទេស​ទាំងអស់ ​ឲ្យ​យល់​ពី​ជំហរ​កម្ពុជា​ជុំវិញ​បញ្ហា​នេះ​។ «​ដូចជា​គ្រប់គ្រាន់​ហើយ​។ ​កន្លង​មក​យើង​បាន​ប្រកាស​ហើយ​តាមរយៈ​ការចេញ​សេចក្តីថ្លែងការណ៍​ហើយ​។ ​វា​គ្រប់គ្រាន់​ហើយ​ ​មិន​ចាំបាច់​ធ្វើ​អី​ទៀត​ទេ​។ ​គ្រាន់តែ​ជម្រាប​ទៅ​គាត់​វិញ​ ​ផ្នែក​ចារកម្ម​ហ្នឹង​ ​សូមឲ្យ​បញ្ឈប់​ការលាប​ពណ៌​ដាក់​មក​លើ​ប្រជាពលរដ្ឋ​ខ្មែរ​ទៀត​ ​ព្រោះ​យើង​ស្រលាញ់​សន្តិភាព​ ​អព្យាក្រឹត្យភាព​ ​យើង​មិន​អាច​ធ្វើ​ដូច្នេះ​បាន​ទេ​។ ​ចេះតែ​លាប​ពណ៌​គេ​អញ្ចឹង​ ​បង្ក​អសន្តិសុខ​គ្រប់​កន្លែង​ ​គាត់​អាង​គាត់​មហា​អំណាច​ចឹង​ ​ធ្វើ​ចឹង​អត់​កើត​ទេ​។ ​យើង​មិន​ទទួលយកបាន​ទេ​។​»

ផ្ទុយពី​ការលើកឡើង​របស់​លោក​ ​ឈុំ​ ​សុជាតិ​ ​អ្នកវិភាគ​នយោបាយ​លោក​ ​គឺ​ម ​សុខ​ ​យល់​ថា​ ​សហរដ្ឋ​អាមេរិក​មាន​ការសិក្សា​ស្រាវជ្រាវ​ច្បាស់លាស់​តាម​បណ្តាញ​សម្ងាត់​របស់​ខ្លួន​ត្រឹមត្រូវ​ ​មុននឹង​ឈាន​ទៅ​​វាយតម្លៃ​ដូច្នេះ​។ ​លោក​ថា ​ផ្អែក​តាម​ដំណើរ​វិវត្ត​ចុងក្រោយ​ ​លោក​ ហ៊ុន ​សែន ​មាន​ផែនការ​មិន​ត្រឹមតែ​កែ​រដ្ឋធម្មនុញ្ញ​របស់​កម្ពុជា​អនុញ្ញាតឲ្យ​មាន​មូលដ្ឋាន​កងទ័ព​បរទេស ​ជាពិសេស​ចិន​នៅលើ​ទឹកដី​ខ្លួន​ប៉ុណ្ណោះ​ទេ ​តែ​ថែមទាំង​មាន​គម្រោង​ចង់​រម្លាយ​រាជ​បល្ល័ង​ ​ហើយ​ដាក់​ជំនួស​មកវិញ​នូវ​ប្រព័ន្ធ​សាធារណៈ​រដ្ឋ ​ដើម្បីឲ្យ​លោក​អាចផ្ទេរ​អំណាច​ត​ដល់​កូនប្រុស​ច្បង​របស់​លោក​ទៀតផង​។ «​ការសង្ស័យ​របស់​អាមេរិក​ ​មាន​មូលដ្ឋាន​ច្បាស់លាស់​។ ​ខ្ញុំ​គិត​ថា​ ​ជា​ការស្រាវជ្រាវ​ដែល​មាន​ការស៊ើបអង្កេត​ ​និង​វិនិច្ឆ័យ​ ​ព្រមទាំង​វិភាគ​ត្រឹមត្រូវ​ ពីព្រោះ​ដំណើរ​ហ្នឹង​វា​មាន​ច្រើន​មក​ហើយ​អំពី​បំណង​នៃ​ការកែប្រែ​រដ្ឋធម្មនុញ្ញ​ដើម្បី​លោក​ ហ៊ុន ​សែន​ ក្តោប​អំណាច​។ ​អ្វី​ដែល​ខ្ញុំ​ដឹង​នោះ​ ​លោក​ ហ៊ុន ​សែន​ ​កំពុងតែ​បង្ខំ​ព្រះមហាក្សត្រ​ឲ្យ​លាលែង​ពី​រាជ​បល្ល័ង​។ ​គោលដៅ​របស់​គាត់​គឺ​ថា​ ​កែ​រដ្ឋធម្មនុញ្ញ​ឲ្យ​ទៅ​ជា​សាធារណៈ​រដ្ឋ ​ដើម្បីឲ្យ​គាត់​ធ្វើ​ស្តេច​សាធារណៈ​រដ្ឋ​។​ ស្តេច​សាធារណៈ​រដ្ឋ​គឺ​ប្រធានាធិបតី​ ​ដែល​មាន​តួនាទី​ទាំង​ជា​ប្រមុខរដ្ឋ​ ​និង​ជា​ប្រមុខ​រដ្ឋាភិបាល​។ ​អំណាច​នៅលើ​គាត់​ទាំងស្រុង​!​»​

លោក​ ​គឹម​ ​សុខ ​មើល​ឃើញ​ពី​ហានិភ័យ​ជាច្រើន​ដែល​ប៉ះពាល់​ដល់​សន្តិសុខ​ប្រទេស​កម្ពុជា​ទាំងមូល ​ប្រសិនបើ​លោក​ ហ៊ុន ​សែន ​និង​គណបក្ស​ប្រជាជន​កម្ពុជា​ ​ឈាន​ទៅ​សម្រេច​មហិច្ឆិតា​បែបនេះ​មែន​។
នេះ​មិន​មែន​ជា​លើក​ទី​មួយ​ទេ ​ដែល​សហរដ្ឋ​អាមេរិក​ ​ដាក់​ការសង្ស័យ​លើ​លទ្ធភាព​ដែល​កម្ពុជា​អាច​អនុញ្ញាតឲ្យ​មាន​មូលដ្ឋាន​យោធា​ចិន​នៅលើ​ទឹកដី​ខ្លួន​នេះ​ ​ជាពិសេស​ ក្រោយពេល​របប​ក្រុង​ភ្នំពេញ​រត់​ទៅ​ពឹង​ចិន​កាន់តែ​ខ្លាំង​ឡើង​ៗ​ ​ដើម្បី​ជួយ​កាង​អំណាច​របស់​ខ្លួន​ ក្រោយពី​បាន​រៀបចំ​ ​ព្រឹត្តិការណ៍​បោះឆ្នោត​ ​និង​រដ្ឋាភិបាល​ខុស​ច្បាប់​មួយ​ ​ដែល​រង​ការថ្កោលទោស​ជុំ​ទិស​ពី​សហគមន៍​អន្តរជាតិ​។ ​កាលពី​ចុង​ឆ្នាំ ២០១៨ ​អនុ​ប្រធានាធិបតី​អាមេរិក​ លោក ម៉ៃឃ៍ ផេនស៍ (Mike Pence) ​បាន​សរសេរ​លិខិត​ផ្លូវការ​មួយ​ច្បាប់​ទៅ​លោក​ ហ៊ុន ​សែន ​ព្រមាន​ថា​ ​ប្រសិនបើ​មាន​ហេតុការណ៍​ដូច្នេះ​ ​កើត​មាន​ឡើង​មែន​នោះ​ ​នោះ​ទំនាក់ទំនង​រវាង​កម្ពុជា​ ​និង​អាមេរិក​ ​នឹងប៉ះពាល់​យ៉ាង​ធ្ងន់ធ្ងរ៕

ព័ត៌មាន (2)
Share

dictator HS last political resort suicide mission VS world economic sanctions VS military men and pple of power

Dictator Hun Sen's cronies radical group can't say "NO"it doesn't matter say YES or say NO,but tmil Hun Sen's fascist govm't can't hid anything in this world.So,evil dictator HS has to know who were the top superpower of technology in this new millennium.The secret of world technology can scanning in deep ground in hundred miles away from the sky+your secret bunker that is very hard to hiding too.They can design a small smart bomb for any bad guy like u"fascist dictators"with save millions lives innocent pple.

Feb 02, 2019 10:44 AM

Sam

ឆ្ងល់អើយសែនឆ្ងល់​​​​​ អាគាំងវាថ្លន់ទេដឹង​ប្រាប់វាប៉ុន្មានដងហើយថាកម្ពុជាឥតមានអោយទ័ពចិនសុីក្តាមប្រៃមកបោះទីតាំងនៅស្រុកខ្មែរទេ មើលមានឯណាសូមអពើា្ជញមើលឥតមានទេបាទ៕
ហើយកុំនិយាយថា​ ១០ ឆ្នាំទៀត​ប្រហែលជាមាន​​ កម្ពុជានិយាយតែពេលនេះ ចាប់១០ ឆ្នាំសុំមកនិយាយទៀត បើមានគង់តែដឹងទេ។

Feb 01, 2019 09:25 AM

គេហទំព័រ​ទាំងមូល