ព្រះសង្ឃមួយអង្គដែលបានចូលរួមធម្មយាត្រាលើកកម្ពស់សីលធម៌សង្គមជាមួយសមាគមគ្រូបង្រៀន ត្រូវបានព្រះចៅអធិការវត្តបណ្ដេញចេញពីវត្តដោយចោទប្រកាន់ថា ការចូលរួមធម្មយាត្រានេះ គឺបំផ្លាញសុខសន្តិភាព។ អ្នកនាំពាក្យក្រសួងធម្មការថា នឹងតាមដានករណីនេះ។
ព្រះតេជគុណ សយ សាត ព្រះជន្ម ៧២ព្រះវស្សា កំពុងគង់នៅក្នុងព្រៃមួយកន្លែងនៅក្នុងខេត្តកំពង់ឆ្នាំង ក្រោយពីព្រះចៅអធិការវត្តភ្នំផ្លោច ក្នុងឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ បណ្ដេញចេញពីវត្ត។ ព្រះតេជព្រះគុណ សយ សាត ពេលនេះកំពុងប្រឈមខ្វះខាតចង្ហាន់ និងគ្មានវត្តគង់នៅ។
ព្រះតេជគុណ សយ សាត ឱ្យវិទ្យុអាស៊ីសេរីដឹងនៅថ្ងៃទី១៥ ខែកុម្ភៈថា ព្រះចៅអធិការ វត្តភ្នំផ្លោច និងគណៈកម្មការវត្ត បានបណ្ដេញព្រះអង្គចេញពីវត្តកាលពីថ្ងៃទី៩ ខែកុម្ភៈ។ ព្រះតេជព្រះគុណឱ្យដឹងទៀតថា ព្រះចៅអធិការវត្ត ព្រះនាម អ៊ុំ ហម បានជេរប្រមាថ ព្រះអង្គ និងព្រមានហៅអាជ្ញាធរមកចាប់ផ្សឹកព្រះអង្គ បើព្រះអង្គមិននិមន្តចេញពីវត្ត។ ព្រះតេជគុណបន្តទៀតថា ក្រោយការបណ្ដេញចេញពីវត្តព្រះអង្គបានសុំវត្តផ្សេងៗ ទៀតចំនួន៤ វត្ត ដើម្បីគង់នៅ ប៉ុន្តែគ្មានព្រះចៅអធិការវត្តណាមួយឱ្យព្រះតេជគុណគង់នៅទេ។
ព្រះតេជព្រះគុណ សយ សាត៖«មិនគាំទ្រ មិនស្វាគមន៍ចំពោះព្រះសង្ឃអង្គណា ដែលចូលការងារសង្គមជាមួយអង្គការសង្គមស៊ីវិលទេ ចេញឱ្យឆ្ងាយពីវត្ត។ អាត្មាក៏រើអីវ៉ាន់ពីកុដិខាងលើ មកនៅខាងក្រោម ព្រលឹមឡើងអាត្មាទៅនៅក្នុងខ្ទមតូចមួយនៅក្បែរហ្នឹងដែរ។ ព្រលឹមឡើងមកដេញអាត្មាជាលើកទី២ ទី៣ ដេញអាត្មាឱ្យចេញ បើមិនចេញទេ នឹងហៅក្រសួងមានសមត្ថកិច្ចនឹងចាប់យកទៅផ្ដន្ទាទោស ព្រោះអាត្មាជាអ្នកបំផុសបំផុលបំផ្លាញនូវសុខសន្តិភាព»។
បើទោះជាត្រូវបានព្រះចៅអធិការបណ្ដេញចេញពីវត្ត ព្រោះតែការចូលរួមធម្មយាត្រាលើកកម្ពស់សីលធម៌សង្គមក្ដី ក៏ព្រះតេជព្រះគុណ សយ សាត នៅតែរក្សាព្រះទ័យចូលរួមសកម្មភាពសង្គមនេះ មិនខុសច្បាប់សង្ឃ ឬការបំផ្លាញសន្តិភាពដូចការចោទប្រកាន់ឡើយ។ ព្រះតេជគុណ សយ សាត នឹងបន្តព្យាយាមសុំវត្តផ្សេងទៀត ដើម្បីគង់នៅ។
ព្រះតេជព្រះគុណ សយ សាត៖«ករុណាសុំទៅនៅវត្តណា សូមឱ្យព្រះគុណម្ចាស់ចៅអធិការមេត្តាឱ្យអាត្មាគង់នៅផងគ្មានទោសកំហុសអ្វីទេ គ្រាន់តែជាការចូលរួមនេះ សូមឱ្យព្រះគុណម្ចាស់គ្រប់ព្រះអង្គមេត្តាឱ្យអារាមអាត្មាគង់ផង»។
ព្រះតេជព្រះគុណ សយ សាត បានចូលរួមធម្មយាត្រាជាមួយសមាគមគ្រូបង្រៀន សកម្មជនការពារសិទ្ធិមនុស្ស ក្រុមស្ត្រីថ្ងៃសុក្រ និងជាមួយលោក រ៉ុង ឈុន កាលពីដើមខែកុម្ភៈ ដោយធ្វើដំណើរដោយថ្មើរជើង ពីរាជធានីភ្នំពេញឆ្ពោះទៅខេត្តពោធិ៍សាត់ ដើម្បីលើកកម្ពស់សីលធម៌សង្គម។ ក្បួនធម្មយាត្រានេះ ទទួលបានយល់ព្រមពីក្រសួងមហាផ្ទៃ។
ទាក់ទងករណីនេះវិទ្យុអាស៊ីសេរីមិនទាន់អាចទាក់ទងព្រះចៅអធិការវត្តភ្នំផ្លោច ព្រះតេជព្រះគុណ អ៊ុំ ហម ដើម្បីសុំការបំភ្លឺជុំវិញបញ្ហានេះបានទេ នៅថ្ងៃទី១៥ ខែកុម្ភៈ។
ចំណែកអ្នកនាំពាក្យក្រសួងធម្មការ និងកិច្ចការសាសនា លោក សេង សុមុនី សុំមិនទាន់ធ្វើអត្ថាធិប្បាយបែបណាលើរឿងនេះនៅឡើយទេ ដោយលោកថា លោកមិនទាន់ដឹងរឿងនេះនៅឡើយ។ ទោះបែបណាក្ដីលោកថា ក្រសួងនឹងតាមដានករណីនេះ។
លោក សេង សុមុនី៖«ព្រះអង្គលោកទាក់ទងរឿងច្បាប់ព្រះសង្ឃឬក៏ច្បាប់ការងាររបស់រដ្ឋ ឬក៏បុគ្គលឬក៏អង្គការ ដល់អ៊ីចឹង អត់ទាន់ហ៊ានឆ្លើយជូនមិនដឹងថា ឆ្លើយខាងណា ចាំមើលទទួលបានព័ត៌មានចាំជម្រាបជូនណា»។
អនុប្រធានគណបក្សភ្លើងទៀនលោក រ៉ុង ឈុន ដែលធ្លាប់ដឹកនាំការចូលរួមក្បួនធម្មយាត្រានេះ កាលពីលោកមិនទាន់ធ្វើនយោបាយ លើកឡើងថា ករណីបណ្ដេញព្រះសង្ឃចេញពីវត្ត បែបនេះជារឿងគួរឱ្យសោកស្ដាយ និងជារូបភាពគំរាមកំហែងលើព្រះសង្ឃ ដែលហ៊ានចូលរួមធ្វើការងារសង្គម។ លោក រ៉ុង ឈុន ឱ្យដឹងទៀតថា ពេលនេះលោកកំពុងជជែកជាមួយក្រុមការងាររបស់លោក ដើម្បីរកវត្ត ឬកន្លែងគង់នៅជូនព្រះតេជគុណ សយ សាត។
លោក រ៉ុង ឈុន៖«សូម្បីតែព្រះសង្ឃជានិមិត្តរូបសម្រាប់ជាតិ បែរជាមានការប្រទឹងប្រទះគ្នាបែបនេះគឺជារឿងមួយមិនល្អ ព្រោះយើងដឹងហើយ ព្រះសង្ឃដើរតួនាទីប្រសសត្វទាំងសត្វលោក ទាំងសត្វព្រៃអី»។
នេះមិនមែនជាលើកទី១ ដែលព្រះសង្ឃចូលរួមបំពេញការងារសង្គមត្រូវបានអ្នកគ្រប់គ្រងវត្ត ឬព្រះចៅអធិការ បណ្ដេញចេញពីវត្ត ឬចាប់ផ្សឹក។ ព្រះតេជគុណ សយ សាត អំពាវនាវដល់ព្រះអង្គផ្សេងទៀត ដែលទទួលចង្ហាន់ពីពុទ្ធបរិស័ទ ត្រូវមានព្រះទ័យក្លាហានធ្វើសកម្មភាពជួយសង្គម លើកកម្ពស់សីលធម៌សង្គម និងជួយកែប្រែសង្គម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។