អ្នកវិភាគនិងសកម្មជនគណបក្សសង្គ្រោះជាតិលើកឡើងថា រដ្ឋាភិបាលក្រុងភ្នំពេញនឹងរងសំពាធពីសហភាពអឺរ៉ុប និងសហរដ្ឋអាមេរិកនៅឆ្នាំ២០២០នេះ ដោយសារតែលទ្ធិប្រជាធិបតេយ្យនៅមិនទាន់ត្រូវរបបនេះធ្វើឱ្យល្អឡើងវិញនៅឡើយទេ។ ប៉ុន្តែអ្នកនាំពាក្យគណបក្សកាន់អំណាចថា ការព្យាយាមនិយាយពីបញ្ហាបាត់បង់ EBA ជាការនិយាយបំភិតបំភ័យកម្មករ និយោជិក និងពលរដ្ឋឱ្យភ័យខ្លាច។
អ្នកវិភាគនិងសកម្មជនគណបក្សសង្គ្រោះជាតិចាត់ទុកថា ឆ្នាំ ២០២០ ជាពេល ដែលសហភាពអឺរ៉ុប និងសហរដ្ឋអាមេរិកមិនអាចនៅស្ងៀមបានទៀតទេ ព្រោះសហគមន៍អន្តរជាតិបានទុកពេលឱ្យរបបក្រុងភ្នំពេញកែខ្លួនជាច្រើនដងមកហើយ ប៉ុន្តែរដ្ឋាភិបាលហាក់មិនបានធ្វើតាមសំណើនោះនៅឡើយ ប៉ុន្តែថែមទាំងបន្តរំលោភសិទ្ធិមនុស្ស និងប្រជាធិបតេយ្យថែមទៀតផង។
សកម្មជនគណបក្សសង្គ្រោះជាតិលោកស្រី មាស លក្ខិណា ដែលកំពុងភៀសខ្លួននៅក្រៅប្រទេស គេចពីការធ្វើទុក្ខបុកម្នេញពីសំណាក់រដ្ឋាភិបាលលោក ហ៊ុន សែន យល់ថា គណៈកម្មការអឺរ៉ុបនឹងព្យួរប្រព័ន្ធអនុគ្រោះពន្ធ (EBA) ព្រមទាំងត្រូវប្រទេសមហាអំណាចមួយចំនួនបង្កកទ្រព្យសម្បត្តិមន្ត្រីលោក ហ៊ុន សែន ដែលចូលរួមរំលោភសិទ្ធិមនុស្ស។ លោកស្រីបន្តថា សំពាធសហគមន៍អឺរ៉ុប នឹងបណ្ដាលឱ្យរដ្ឋាភិបាលលោក ហ៊ុន សែន ប្រឈមនឹងគ្រោះថ្នាក់មួយចំនួនដូចជា សេដ្ឋកិច្ចធ្លាក់ចុះ ការបែកបាក់ផ្ទៃក្នុង ហើយពលរដ្ឋអាចងើបឡើងប្រឆាំងនឹងរដ្ឋាភិបាល៖ «យើងទាំងអស់គ្នា មិនព្រមឲ្យរបបនេះនៅតែធ្វើអ្វីៗ តាមចិត្ត។ យើងជាសកម្មជននឹងសង្ឃឹមថា យើងនឹងបានចូលទៅក្នុងប្រទេសកម្ពុជាខាងមុខនេះ បន្ទាប់ពីនីតិវិធីបង្កកទ្រព្យសម្បតិ្ត និងកាត់ EBA»។
ចំណែក សកម្មជនគណបក្សសង្គ្រោះជាតិម្នាក់ទៀត លោក តោ និមល ដែលកំពុងភៀសខ្លួននៅក្រៅប្រទេសដែរ សង្កេតឃើញថា កម្ពុជាកំពុងជួបវិបត្តិសេដ្ឋកិច្ច ជាបណ្តើរៗហើយ រួមមានការបិទសណ្ឋាគារ និងរោងចក្រកាត់ដេរជាដើម។ សកម្មជនគណបក្សប្រឆាំងរូបនេះ ស្នើទៅលោក ហ៊ុន សែន អនុញ្ញាតឱ្យគណបក្សសង្គ្រោះជាតិធ្វើឡើងនយោបាយឡើងវិញ និងផ្ដល់អាសនៈក្រុមប្រឹក្សាឃុំសង្កាត់ របស់គណបក្សនេះមកវិញ ដើម្បីស្តារស្ថានការណ៍ពីអាក្រក់មកល្អ៖ «ខ្ញុំថាមិនយូរ មួយខែ ឬពីរខែទៀត ផ្ទុះឡើងនៅពេលកម្មករគ្មានថវិកាទ្រទ្រង់គ្រួសារ។ ពេលនោះកំហឹងកម្មករនឹងកើតឡើង » ។
ទោះបីជាយ៉ាងក៏ដោយ របបលោក ហ៊ុន សែន និងគណបក្សប្រជាជនកម្ពុជាហាក់មិនចាប់អារម្មណ៍ស្ដារលទ្ធិប្រជាធិបតេយ្យឡើងវិញនោះទេ។ លោក ហ៊ុន សែន ធ្លាប់ថា កម្ពុជាកំពុងរីករាយនឹងលទ្ធិប្រជាធិបតេយ្យបែកស្រុក ខ្មែរ ដែលកំពុងគ្មានវត្តមានគណបក្សប្រឆាំងពិតប្រាកដ។
អ្នកនាំពាក្យគណបក្សប្រជាជនកម្ពុជា និងជាសមាជិកព្រឹទ្ធសភាគណបក្សកាន់អំណាច លោក សុខ ឥសាន បានសរសេរលើប្រព័ន្ធតេឡេក្រាមដោយចោទប្រកាន់ គណបក្សប្រឆាំងថា កំពុងដើរបំភ័យពលរដ្ឋ និងម្ចាស់រោងចក្រ ខណៈឱសានវាទ របស់គណៈកម្មការអឺរ៉ុបស្ដីពី EBA នឹងឈានមកដល់នាពេលខាងមុខ។
អ្នកវិភាគនយោបាយលោក គឹម សុខ ដែលកំពុងភៀសខ្លួននៅក្រៅប្រទេសពីការធ្វើទុក្ខបុកម្នេញពីរបបលោក ហ៊ុន សែន យល់ថា សហភាពអឺរ៉ុបមិនចង់ដកប្រព័ន្ធអនុគ្រោះពន្ធពីកម្ពុជាទេ ប៉ុន្តែដោយសារតែ រដ្ឋាភិបាលមិនព្រមកែប្រែឥរិយាបថដូចសព្វថ្ងៃនេះទើបអឺរ៉ុបចាត់ វិធានការប្រឆាំងរបបលោក ហ៊ុន សែន ។ លោកបន្តថា ការសម្រេចចិត្តរបស់សហភាពអឺរ៉ុបក្នុងការរក្សាអនុគ្រោះពន្ធ EBA ឬព្យួរការអនុគ្រោះពន្ធដល់កម្ពុជានៅឆ្នាំ២០២០នេះនឹងធ្វើឱ្យពលរដ្ឋព្រួយបារម្ភ ហើយអ្នករងគ្រោះធំជាងគេគឺរដ្ឋាភិបាលលោក ហ៊ុន សែន តែម្ដង៖ «នៅកាលៈទេសៈដែល លោក ហ៊ុន សែន នៅតែរឹងមិនវិលទៅកាន់លទ្ធិប្រជាធិបតេយ្យឡើងវិញ ដូច្នោះសហភាពអឺរ៉ុបនឹងរកមិនឃើញហេតុផល ដើម្បីរក្សា EBA ឲ្យកម្ពុជាដែរ » ។
គណៈកម្មការអឺរ៉ុបនឹងធ្វើសេចក្ដីសម្រេចស្ដីពី ប្រព័ន្ធអនុគ្រោះពន្ធ (EBA) នៅខែកុម្ភៈ ខាងមុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។