«គណបក្ស​សង្គ្រោះ​ជាតិ​នៅ​តែ​ខ្លាំង​ និង​ទទួល​បាន​​ទំនុក​ចិត្ត​ពី​ពលរដ្ឋ​ដដែល ក្រោយ​ការ​រំលាយ ២ឆ្នាំ»

ដោយ ខែ សុណង
2019.11.16
យឹម ស៊ីណន លោក យឹម ស៊ីណន ប្រធាន​ចលនា​យុវជន​គណបក្ស​សង្គ្រោះ​ជាតិ​នៅ​ប្រទេស​កូរ៉េ​ខាង​ត្បូង។
រូប៖ ហ្វេសប៊ុក Yim Sinorn

គិត​ត្រឹម​ថ្ងៃ​ទី១៦ វិច្ឆិកា ឆ្នាំ២០១៩ គឺ​ជា​ខួប ២ឆ្នាំ​គត់ នៃ​ការ​​រំលាយ​គណបក្ស​សង្គ្រោះ​ជាតិ ដោយ​តុលាការ​កំពូល​នៃ​របប​ក្រុង​ភ្នំពេញ។ ប៉ុន្តែ​ក្រុម​អ្នក​គាំទ្រ​ និង​អ្នក​វិភាគ យល់​ថា ២ឆ្នាំ​មក​នេះ គណបក្ស​​សង្គ្រោះ​ជាតិ កាន់​តែ​បាន​ដើរ​តួនាទី​ខ្លាំង និង​​​នៅ​តែ​រក្សា​បាន​ការ​គាំទ្រ​ពី​ពលរដ្ឋ។

ប្រធាន​ចលនា​យុវជន​គណបក្ស​សង្គ្រោះ​ជាតិ​នៅ​ប្រទេស​កូរ៉េ​ខាង​ត្បូង លោក យឹម ស៊ីណន ​ចាត់​ទុក​ការ​រំលាយ​បក្ស​ប្រឆាំង ២ឆ្នាំ​មក​នេះ​ថា ជា​ការ​បង្កើត​ភាព​អយុត្តិធម៌ ​សម្រាប់​អ្នក​ប្រជាធិបតេយ្យ​ ហើយ​រយៈ​ពេល ​២​ឆ្នាំ​មក​នេះ ​ក្រុម​អ្នក​ប្រជាធិបតេយ្យ ​ធ្វើ​សកម្មភាព​​តស៊ូ​​គ្រប់​ទី​កន្លែង ដើម្បី​ទាមទារ​យក​លទ្ធិ​ប្រជាធិបតេយ្យ​មក​វិញ។ លោក​ថា វិបត្តិ​​នយោបាយ​ស្ថិត​ក្នុង​ភាព​ផុយ​ស្រួយ បណ្ដាល​ឲ្យ​ពលរដ្ឋ​ទូទាំង​ប្រទេស ជា​អ្នក​រង​គ្រោះ​​នៅ​ក្នុង​រយៈ​ពេល ២ឆ្នាំ​មក​នេះ។

លោក យឹម ស៊ីណន បន្ត​ថា នៅ​ថ្ងៃ​ទី២៤ វិច្ឆិកា គឺ​នៅ​សប្ដាហ៍​ក្រោយ ចលនា​យុវជន​បក្ស​ប្រឆាំង​នឹង​​បន្ត​សកម្មភាព​តស៊ូ ដោយ​ធ្វើ​បាតុកម្ម​ប្រឆាំង​វត្តមាន​ មេដឹកនាំ​របប​ក្រុង​ភ្នំពេញ លោក ហ៊ុន សែន នៅ​ប្រទេស​កូរ៉េ​ខាង​ត្បូង ក្នុង​ព្រឹត្តិការណ៍​កិច្ច​ប្រជុំ​អាស៊ាន​ កូរ៉េ៖ «កម្លាំង​សង្គ្រោះ​ជាតិ ក្រោយ​ពេល​រំលាយ​ក្ដី ប៉ុន្តែ​រចនា​សម្ព័ន្ធ​គឺ​នៅ​ដដែល ទោះ​បី​មាន​អាជ្ញាធរ​ ចាប់​ឃុំ​ខ្លួន និទ្ទេស​ខ្លួន យក​កាត់​ទោស​យ៉ាង​ណា​ក្ដី ប៉ុន្តែ​កម្លាំង​ស្មារតី​នៃ​ការ​គាំទ្រ​គណបក្ស​សង្គ្រោះ​ជាតិ​នៅ​ខ្លាំង​ដូច​ដើម។ មិន​ត្រឹម​តែ​ដូច​ដើម​ទេ គឺ​ខ្លាំង​លើស​ដើម​តែ​ម្ដង មក​ដល់​បច្ចុប្បន្ន​នេះ។ អ៊ីចឹង ខ្ញុំ​យល់​ឃើញ​ថា បើ​សិន​ណា លោក ហ៊ុន សែន បាន​ប្រគល់​ នូវ​នីតិសម្បទា​គណបក្ស​សង្គ្រោះ​ជាតិ​មក​វិញ ផ្ដល់​នូវ​រចនា​សម្ព័ន្ធ ផ្ដល់​នូវ​​រចនា​សម្ពន្ធ ផ្ដល់​នូវ​​ក្រុម​ប្រឹក្សា​ឃុំ​សង្កាត់​ ៥០០៧​នាក់​ឡើង​វិញ ឲ្យ​មាន​ដំណើរ​ការ​បោះ​ឆ្នោត​ឡើងវិញ ឬ​ក៏​បោះ​ឆ្នោត​ក្រុម​ប្រឹក្សា​ឃុំ សង្កាត់​ នៅ​ឆ្នាំ២០២២ ខ្ញុំ​គិត​ថា គណបក្ស​សង្គ្រោះ​ជាតិ នឹង​ឈ្នះ​ដាច់​ ១០០​% តែ​ម្ដង»

តុលាការ​កំពូល​នៃ​របប​ក្រុង​ភ្នំពេញ បាន​ប្រកាស​រំលាយ​គណបក្ស​សង្គ្រោះ​ជាតិ កាល​ពី​ថ្ងៃ​ទី១៦ ខែ​វិច្ឆិកា ឆ្នាំ​២០១៧ តាម​បំណង​របស់​ លោក ហ៊ុន សែន ដែល​បាន​ប្រកាស​ឲ្យ​រំលាយ​បក្ស​ប្រឆាំង ដោយ​ចោទ​ប្រធាន​គណបក្ស​ប្រឆាំង លោក គឹម សុខា ថា ក្បត់​ជាតិ។ ជាមួយ​នឹង​ការ​រំលាយ​គណបក្ស​ប្រឆាំង​នោះ តុលាការ​កំពូល ​បាន​ហាម​ឃាត់​សិទ្ធិ​​ថ្នាក់​ដឹកនាំ​គណបក្ស​សង្គ្រោះ​ជាតិ ចំនួន​ ១១៨​នាក់ មិន​ឱ្យ​ធ្វើ​នយោបាយ ខណៈ​​ដែល​អាជ្ញាធរ​បន្ត​ឃុំ​ខ្លួន លោក កឹម សុខា ក្នុង​ពន្ធនាគារ​ត្រពាំង​ផ្លុង ហើយ​បន្ត​តាម​ចាប់​ខ្លួន លោក សម រង្ស៊ី នៅ​ក្រៅ​ប្រទេស។

ក្រោយ​ព្រឹត្តិការណ៍​បិទ​សិទ្ធិ​នយោបាយ​គណបក្ស​ប្រឆាំង​ ២​ឆ្នាំ​មក​នេះ ក្រុម​មេដឹកនាំ​ និង​សកម្មជន​បក្ស​ប្រឆាំង​មួយ​ចំនួន​ បាន​ភៀស​ខ្លួន​ គេច​ចេញ​ពី​ការ​ធ្វើ​ទុក្ខ​បុក​ម្នេញ ​ទៅ​​ក្រៅ​ប្រទេស និង​មាន​សកម្មជន​ខ្លះ បន្ត​សម្ងំ​រស់​នៅ​ក្នុង​ប្រទេស។ អ្នក​ដែល​ភៀស​ខ្លួន​នៅ​ក្រៅ​ប្រទេស និង​ពលរដ្ឋ​ខ្មែរ​រស់​នៅ​តាម​បណ្ដា​ប្រទេស​លោក​សេរី តែង​នាំ​គ្នា​ធ្វើ​បាតុកម្ម​ ប្រឆាំង​វត្តមាន លោក ហ៊ុន សែន និង​​បាតុកម្ម​ទាមទារ​ឲ្យ​របប​ក្រុង​ភ្នំពេញ ស្ដារ​លទ្ធិ​ប្រជាធិបតេយ្យ​ឡើង​វិញ​ជា​និច្ច។

សហគមន៍​អន្តរជាតិ​នៅ​តែ​បន្ត​ឲ្យ​តម្លៃ មេ​ដឹក​នាំ​គណបក្ស​ប្រឆាំង និង​មិន​ទទួល​ស្គាល់​ដីកា​រំលាយ​គណបក្ស​ប្រឆាំង​របស់​តុលាការ​របប​ក្រុង​ភ្នំពេញ។ ប៉ុន្តែ​សម្រាប់​របប​ក្រុង​ភ្នំពេញ​វិញ បាន​ព្រមាន​​ពលរដ្ឋ​នៅ​ក្នុង​ប្រទេស​ថា បើ​មិន​ទទួល​ស្គាល់​ការ​រំលាយ​បក្ស​ប្រឆាំង​ទេ ត្រូវ​មាន​ទោស​ជាប់​ពន្ធនាគារ ពី​បទ​ប្រឆាំង​សាលដីកា​តុលាការ។

សមាជិក​ក្រុម​អ្នក​វិភាគ​វ័យ​ក្មេង លោក បុង ដែត សង្កេត​ឃើញ​ថា រយៈ​ពេល​ ២​ឆ្នាំ ដែល​គ្មាន​វត្តមាន​បក្ស​ប្រឆាំង គណបក្ស​កាន់​អំណាច​ បាន​សម្រេច​កិច្ច​ការ​ជាតិ និង​ធ្វើ​សកម្មភាព​តាម​តែ​អំពើ​ចិត្ត។ ពលរដ្ឋ​បាត់​បង់​ផល​ប្រយោជន៍​តាម​រយៈ​គ្មាន​តំណាង​ហ៊ាន​ជំទាស់ តំណាង​ឲ្យ​ពលរដ្ឋ ទាំង​ក្នុង​រដ្ឋសភា និង​នៅ​មូលដ្ឋាន​ឃុំ​សង្កាត់។ លោក​លើក​ឧទាហរណ៍​ដូចជា ការ​អនុម័ត​សន្ធិសញ្ញា​ព្រំដែន​​បំពេញ​បន្ថែម ជាមួយ​ប្រទេស​វៀតណាម​ជា​ដើម គឺ​ពលរដ្ឋ​មិន​អាច​ទទួល​បាន​ព័ត៌មាន ​ឬ​ជំទាស់​ការ​សម្រេច​នោះ​ឡើយ។

លោក បុង ដែត បន្ត​ទៀត​ថា ២​ឆ្នាំ​នេះ គណបក្ស​​ប្រជាជន​កម្ពុជា បាន​ធ្វើ​ទុក្ខ​បុក​ម្នេញ​អ្នក​គាំទ្រ​គណ​​បក្ស​ប្រឆាំង​កាន់​តែ​ខ្លាំង តែ​ផ្ទុយ​មក​វិញ គណបក្ស​កាន់​អំណាច​ ត្រូវ​ទទួល​រង​ការ​ព្រមាន​ពី​សហគមន៍​អន្តរជាតិ។ លោក​បន្ត​ទៀត​ថា ក្រៅពី​ការ​បាត់​បង់​ផល​ប្រយោជន៍​នៅ​ក្នុង​រដ្ឋសភា និង​នៅ​មូលដ្ឋាន ពលរដ្ឋ​អាច​នឹង​បន្ត​បាត់​បង់​ផល​ប្រយោជន៍​បន្ត​ទៀត ដោយសារ​គ្មាន​វត្តមាន​បក្ស​ប្រឆាំង គឺ​សហគមន៍​​អឺរ៉ុប នឹង​ផ្ដាច់​ប្រព័ន្ធ​អនុគ្រោះ​ពន្ធ (EBA) ជាដើម។ រី​ឯ​រចនាសម្ព័ន្ធ​គណបក្ស​សង្គ្រោះ​ជាតិ​វិញ អ្នក​វិភាគ​វ័យ​ក្មេង​រូប​នេះ យល់​ថា ដរាប​ណា មេដឹកនាំ​បក្ស​ប្រឆាំង​ទាំង ២រូប គឺ​លោក សម រង្ស៊ី និង​លោក កឹម សុខា មិន​បែកបាក់​គ្នា រចនា​សម្ព័ន្ធ​គណបក្ស​នេះ នៅ​តែ​ខ្លាំង និង​​នៅ​តែ​ទទួល​បាន​ការ​គាំទ្រ​ពី​ប្រជាពលរដ្ឋ៖ «សរុប​មក​វិញ គឺ កឹម សុខា និង​លោក សម រង្ស៊ី គឺ​បើ​មិន​បែក​បាក់​គ្នា​ទេ រចនា​សម្ព័ន្ធ​នៅ​ដដែល វា​គ្រាន់​តែ​ថា រកាំរកូស​ខាង​ក្រោម​ទេ ឲ្យ​តែ​មេ​ទាំង​ពីរ​ត្រូវ​គ្នា។ ខ្ញុំ​គិត​ថា ​ពួកគាត់​អត់​មាន​អ្វី​បែក​បាក់​គ្នា​ទេ ពួកគាត់​នៅ​តែ​ជាមួយ​គ្នា​នៅ​ឡើយ​ទេ គឺ​ខាង​ក្រោម​នៅ​តែ​ដដែល​ទេ គ្រាន់​តែ​ថា មនុស្ស​វា​ត្រូវ​ការ​សេចក្ដី​សុខ វា​គ្រាន់​ថា រកាំរកូស​បន្តិចបន្តួច ហើយ​ប្រជាពលរដ្ឋ​នៅ​តែ​គាំទ្រ​ដដែល រចនា​សម្ព័ន្ធ​នៅ​តែ​​ដដែល​​ដែរ។ ពេល​នេះ ខ្ញុំ​អាច​ស្មាន​ទុក គឺ​អ៊ីចឹង ពីព្រោះ​ថា ប្រជាពលរដ្ឋ​នៅ​តែ​គាំទ្រ ថ្នាក់ដឹកនាំ​​ទាំង​២​ហ្នឹង​ ដែល​ម្នាក់​ជំនាញ​ខាង​ការ​ទូត​ខាង​ក្រៅ ម្នាក់​ជំនាញ​ខាង​អហិង្សា ​​ខាង​ក្នុង តស៊ូ​មតិ​ខាង​ក្នុង។ អ៊ីចឹង​​ ពួកគាត់​ទាំង​ពីរ គឺ​សុទ្ធ​តែ​មាន​វិជ្ជាជីវៈ​ខ្លាំងៗ​រៀងៗ​ខ្លួន អ៊ីចឹង​ណា អត់​មាន​អ្នក​ណា​ អត់​អ្នក​ណា​បាន​ទេ។ អ្នក​ទាំង​ពីរ គឺ​ប្រជាពលរដ្ឋ​សង្ឃឹម​យ៉ាង​មុត​មាំ​​ថា អាច​ការ​ពារ​ផល​ប្រយោជន៍​របស់​ពួក​គាត់ អាច​ធ្វើ​ឲ្យ​ប្រជាធិបតេយ្យ​រស់​ឡើង​វិញ​អ៊ីចឹង​ណា»

ទោះ​យ៉ាង​ណា​ក្ដី ប្រធាន​​ចលនា​យុវជន​គណបក្ស​សង្គ្រោះ​ជាតិ​នៅ​ប្រទេស​កូរ៉េ​ខាង​ត្បូង លោក យឹម ស៊ីណន អះអាង​ថា អ្នក​ប្រជាធិបតេយ្យ​និយម នឹង​មិន​បញ្ឈប់​ការ​​តស៊ូ​ទាមទារ​​​ឡើយ​ ដរាប​ណា​​​របប​ក្រុង​ភ្នំពេញ ​មិន​ទាន់​ប្រគល់​សិទ្ធិ​ធ្វើ​នយោបាយ ​សង​តំណែង​ឲ្យ​ក្រុម​ប្រឹក្សា​ជាប់​ឆ្នោត និង​​ស្ដារ​លទ្ធិ​ប្រជាធិបតេយ្យ​ នៅ​កម្ពុជា​ឡើង​វិញ​នោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
នយោបាយ
សង្គម​ស៊ីវិល​រំពឹង​ថា​ ឯកអគ្គរដ្ឋទូត​អាមេរិក​ប្រចាំ​កម្ពុជា​ថ្មី​នឹង​បន្ត​ចូល​រួម​លើក​ស្ទួយ​ប្រជាធិបតេយ្យ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។