អ្នក​វិភាគថា​ លោក ហ៊ុន សែន ​​ប្រឈម​​ការ​បាត់បង់​​ការ​គាំទ្រ​​ពី​​យុវជន ​​បើ​​យុទ្ធនាការ​​ចាក់​វ៉ាក់សាំង​​បរាជ័យ

ដោយ មាន ឫទ្ធិ
2021-07-28
Share
អ្នក​វិភាគថា​ លោក ហ៊ុន សែន ​​ប្រឈម​​ការ​បាត់បង់​​ការ​គាំទ្រ​​ពី​​យុវជន ​​បើ​​យុទ្ធនាការ​​ចាក់​វ៉ាក់សាំង​​បរាជ័យ លោក ហ៊ុន សែន និងភរិយាទទួលការចាក់វ៉ាក់សាំង​អាស្ត្រាហ្សេណេកា (AstraZeneca) ក្រោមជំនួយរបស់អង្គការសុខភាពពិភពលោកកាលពីដើមខែមីនា ឆ្នាំ២០២១។
រូប៖ ហ្វេសប៊ុក SPM

ក្រុម​អ្នកវិភាគ​លើកឡើង​ថា លោក ហ៊ុន សែន និង​បក្ស​កាន់អំណាច អាច​ប្រឈម​នឹង​ការ​បាត់បង់​ការគាំទ្រ​ពី​ក្រុមយុវជន និង​ពលរដ្ឋ ប្រសិនបើ​យុទ្ធនាការ​ចាក់វ៉ាក់សាំង​កូវីដ​បរាជ័យ។ ការលើកឡើង​នេះ កើតមានឡើង​ស្របពេល​ដែល​រដ្ឋាភិបាល​លោក​នាយករដ្ឋមន្ត្រី ហ៊ុន សែន កំពុង​សម្រុក​យុទ្ធនាការ​ចាក់​វ៉ាក់សាំង​កូវីដ១៩​​ដល់​ពលរដ្ឋ ហើយ​ត្រៀម​ចាក់​វ៉ាក់សាំងកូវីដ១៩​ដល់​កុមារ និង​យុវវ័យ​អាយុ​ចន្លោះ​ពី​១២ ដល់ ១៧ឆ្នាំ។

«សូម​មាតា​បិតា ឬ​អាណាព្យាបាល​នាំកុមារ និង​ក្មេងជំទង់​ដែល​មាន​អាយុ​ចាប់ពី ១២ឆ្នាំ ដល់ ១៧ឆ្នាំ ទៅ​ចាក់​វ៉ាក់សាំង​ឱ្យ​បាន​គ្រប់ៗ​គ្នា និង​សូម​ចូលរួម​អនុវត្ត​ឱ្យ​បាន​ខ្ជាប់ខ្ជួន​នូវ​វិធានការ ៣កុំ និង ៣ការពារ»។ នេះ​ជា​សារ​រោទ៍​ជា​សំឡេង​ដែល​គេឯង​តែង​ឮ​តាម​ទូរស័ព្ទ ខណៈ​រដ្ឋាភិបាល​លោក ហ៊ុន សែន ត្រៀម​បើក​យុទ្ធនាការ​ចាក់​វ៉ាក់សាំង​ជំងឺកូវីដ១៩ ក្នុង​ចំណោម​ស្រទាប់​កុមារ និង​យុវវ័យ​អាយុ​ចន្លោះ​ពី ១២ ដល់ ១៧ឆ្នាំ ចាប់​ពី​ថ្ងៃទី១ ខែសីហា នេះតទៅ ក្រោម​យុទ្ធសាស្ត្រ «ផ្ការីក»។

វ៉ាក់សាំង​ដែល​កម្ពុជា​សម្រេច​យកទៅ​ចាក់​លើ​កុមារ​ក្នុង​វ័យ​នេះ គឺជា​វ៉ាក់សាំង​ស៊ីណូវ៉ាក់ (Sinovac) របស់​ចិន បើទោះបី​ជា​អង្គការ​សុខភាព​ពិភពលោក WHO នៅ​មិនទាន់​ឯកភាព​នៅឡើយ លើកលែង​តែ​សម្រាប់​មនុស្ស​ចាស់​អាយុ​លើស​ពី ១៨ឆ្នាំ​ឡើងទៅ។ យុទ្ធនាការ​ចាក់​វ៉ាក់សាំង​ចុងក្រោយ​នេះ ធ្វើឡើង​ស្របពេល​ដែល​រដ្ឋាភិបាល​អះអាង​ថា ខ្លួន​បាន​ចាក់​វ៉ាក់សាំង​ដល់​ពលរដ្ឋ​នៅ​ទូទាំង​ប្រទេស បាន​ជិត ៧លាន​នាក់ គិតត្រឹម​ថ្ងៃទី២៧ ខែកក្កដា និង​ខណៈ​លោក ហ៊ុន សែន ឈាន​ចូល​វ័យ ៧១ឆ្នាំ។

អ្នកវិភាគ​នយោបាយ​លោក ឯម សុវណ្ណារ៉ា មើលឃើញ​ថា លទ្ធផល​នៃ​យុទ្ធនាការ​ចាក់វ៉ាក់សាំង​របស់​រដ្ឋាភិបាល​នេះ នៅ​មិនទាន់​ច្បាស់លាស់​នៅឡើយទេ ដោយសារ​តែ​គេ​នៅ​មិនទាន់​ដឹង​ពិតប្រាកដ​ពី​ប្រសិទ្ធភាព​របស់​វ៉ាក់សាំង​ចិន។ លោកថា លោក ហ៊ុន សែន និង​បក្ស​កាន់​អំណាច​អាចនឹង​ប្រឈម​នូវ​​មរតក​នយោបាយ​អវិជ្ជមាន​ជាពិសេស​ក្នុង​ចំណោម​យុវជន​ស្រករ​ក្រោយ​ប្រសិន​បើ​យុទ្ធនាការ​ចាក់​វ៉ាក់សាំង​នេះ​បរាជ័យ៖ «ដោយសារតែ​ប្រសិទ្ធភាព​វ៉ាក់សាំង​នេះ យើង​អត់​ទាន់​ដឹងថា​ មាន​កម្រិតណា ឬ​ក៏​មាន​ការស្រាវជ្រាវ​កម្រិត​ណាមួយ​ថា អាច​ទប់ស្កាត់​បាន​ប៉ុណ្ណា ឬក៏​អ្នកស្លាប់​ទាំងអស់​ហ្នុង​មាន​បាន​ចាក់​វ៉ាក់សាំង យើង​អត់​បាន​បកស្រាយ​បង្ហាញ​ឱ្យ​ពលរដ្ឋ​បាន​ដឹងឮ​ទាំងអស់​គ្នា​ទេ។ គឺ​អត់​ទាន់​ច្បាស់លាស់​ទេ។ ប៉ុន្តែ សម្រាប់​យុវជន សម្រាប់​ក្មេងៗ​ដែល​គាត់​ពេញវ័យ​ថ្ងៃក្រោយ ហើយ​ទទួល​វ៉ាក់សាំង ប្រសិនបើ​មាន​ប្រសិទ្ធភាព អាហ្នុង​គាត់អាច​ទទួល​បាន​មរតក។ ប៉ុន្តែ​ប្រសិនបើ​វ៉ាក់សាំង​ហ្នុង​អត់​មាន​ប្រសិទ្ធភាព​ទេ ខ្ញុំ​គិតថា មរតកហ្នុង វា​មិន​បាន​ផល​វិជ្ជមាន​ទេ វាទៅ​ជា​មាន​ផល​អវិជ្ជមាន​វិញ... ខ្ញុំ​គិតថា ការ​រំពឹង​ទុក​ទៅលើ​ការគាំទ្រ​ពី​ស្រទាប់​យុវជន​អាច​ធ្លាក់​ចុះ ឬក៏​បាត់បង់»

រីឯ អ្នកវិភាគ​នយោបាយលោក គឹម សុខ ដែល​កំពុង​រស់នៅ​ភៀសខ្លួន​នៅ​ប្រទេស​ហ្វាំងឡង់ (Finland) លោក​មើលឃើញ​ថា នយោបាយ​ប្រយុទ្ធប្រឆាំង​នឹង​ជំងឺ​កូវីដ​១៩របស់​លោក ហ៊ុន សែន កំពុង​ប្រឈម​នឹង​បរាជ័យ​ស្របពេល​ដែល​ករណី​ឆ្លងរាលដាល​នៃ​ជំងឺកូវីដ១៩​នៅ​កម្ពុជា​ កំពុងតែ​កើនឡើង​យ៉ាង​ពេញ​បន្ទុក​ទៅហើយ​ ដោយសារ​លោក ហ៊ុន សែន មើលស្រាល​ជំងឺនេះ​តាំងពី​ពេល​ដំបូង៖ «បរាជ័យ​ហ្នុង​ហើយ គឺជា​កេរដំណែល​ដ៏​អាក្រក់​របស់​លោក ហ៊ុន សែន ដែល​បន្សល់​ទុក​នូវការ​ស្អប់ខ្ពើម​ពី​សំណាក់​ប្រជាពលរដ្ឋ​ក្នុងការ​ដឹកនាំ​របស់​គាត់ ហើយ​ក៏​បន្សល់​ទុក​នូវ​ការភ័យខ្លាច​របស់​ប្រជាពលរដ្ឋ​ខ្មែរ​នៅ​ទូទាំង​ប្រទេស។ ម៉្លោះហើយ​អត់​មាន​កេរដំណែល​ល្អទេ។ ដោយសារ​តែ​គ្មាន​កេរដំណែល​ល្អ​ហ្នុង​ហើយ​ទើប​លោក ហ៊ុន សែន និយាយ​ថា គាត់​មិន​យក​ករណី​វ៉ាក់សាំង​ទៅជា​កេរដំណែល​ហ្នុង គឺ​មក​ពី​គាត់​ដឹង​ថា​​បរាជ័យ​រួចជាស្រេច​ទៅហើយ។ គាត់​ដឹង​លទ្ធផល​ជាមុន​ពីព្រោះ​គាត់​នៅ​កាន់​ការហ្នុង»

វិទ្យុ​អាស៊ីសេរី មិន​អាច​ទាក់ទង​អ្នកនាំពាក្យ​គណបក្ស​ប្រជាជន​កម្ពុជាលោក សុខ ឥសាន ដើម្បី​សុំ​ប្រតិកម្ម​តប​ជុំវិញ​ការលើកឡើង​របស់​ក្រុម​អ្នកវិភាគ​ទាំងនេះ​បាន​ទេ ដោយសារ​លោក​ពុំ​លើក​ទូរស័ព្ទ​កាល​ពី​យប់​ថ្ងៃទី២៧ ខែកក្កដា។ ទោះយ៉ាងណា កាលពី​ថ្ងៃទី២៤ ខែកក្កដា លោក ហ៊ុន សែន ធ្លាប់​ប្រកាស​ថា កម្ពុជា​ត្រូវតែ​រក​​វ៉ាក់សាំង​បង្ការ​ជំងឺកូវីដ១៩ ចាក់​ជូន​ពលរដ្ឋ​ឱ្យ​បាន​ជោគជ័យ​ទោះ​ក្នុង «តម្លៃ​ណា​ក៏ដោយ»

រដ្ឋាភិបាល​របស់​លោក ហ៊ុន សែន គ្រោង​សម្រេច​ចាក់​វ៉ាក់សាំង​បង្ការ​ជំងឺកូវីដ១៩ ដល់​ប្រជាពលរដ្ឋ​កម្ពុជា​ឱ្យ​បាន ១៣លាន​នាក់ ស្មើនឹង ៨០ភាគរយ នៃ​ប្រជាជន​សរុប ១៦លាន​នាក់ ក្នុង​គោលដៅ​បង្កើត​ឱ្យ​បាន​នូវ​ភាពស៊ាំ​ក្នុង​សហគមន៍។ កម្ពុជា​ទទួល​បាន​វ៉ាក់សាំង​សរុប​ជិត ១៨លាន​ដូស ក្នុងនោះ​មាន​វ៉ាក់សាំង​ចិន​ស៊ីណូវ៉ាក់ (Sinovac) និង​ស៊ីណូហ្វាម (Sinopharm) ជាង ១៦លាន​ដូស​ ដែល​ភាគច្រើន​កម្ពុជា​បាន​ទិញ​ពី​ចិន និង​វ៉ាក់សាំង​ជាង ៦សែន ៥ម៉ឺន​ដូស​ទៀត ជា​វ៉ាក់សាំង​អាស្ត្រាហ្សេណេកា (AstraZeneca) ជា​ជំនួយ​ក្រោម​គម្រោងកូវ៉ាក់ របស់​អង្គការ​សុខភាព​ពិភពលោក (WHO)។ មិត្ត​ដែកថែប​ចិន​របស់​លោក ហ៊ុន សែន បាន​បូម​យក​លុយ​ពី​កម្ពុជា​អស់ ប្រមាណជិត ២០០លាន​ដុល្លារ តាមរយៈ​ការលក់​វ៉ាក់សាំង​ទាំងពីរ​ប្រភេទ​របស់ ខ្លួននេះ​មក​ឱ្យ​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល