អ្នកជំនាងខាងវិទ្យាសាស្រ្តនយោបាយនិងទំនាក់ទំនងអន្តរជាតិលោក ឯម សុវណ្ណារ៉ា លើកឡើងថាជារឿងល្អដែលកម្ពុជាជាប្រធានប្ដូរវេណអាស៊ានងាកមករកជំហររបស់អាស៊ានវិ។ លោកបញ្ជាក់ថាកិច្ចប្រជុំថ្នាក់រដ្ឋមន្រ្តីការបរទេសអាស៊ាននេះជាកិច្ចប្រជុំសំខាន់មួយដើម្បីកំណត់ពីរបៀបវារៈសំខាន់ៗដើម្បីឈានទៅរៀបចំកិច្ចប្រជុំផ្សេងៗទៀតនៅពេលមុខ។
លោក ឯម សុវណ្ណារ៉ា ឲ្យដឹងថាកិច្ចប្រជុំចង្អៀតថ្នាក់រដ្ឋមន្រ្តីការបរទេសអាស៊ាននេះគេអាចលើករបៀបវារៈពីរសំខាន់ គឺរឿងវិបត្តិនយោបាយនៅមីយ៉ាន់ម៉ា(Myanmar) ឬភូមានិងរឿងជម្លោះសមុទ្រចិនខាងត្បូង៖ «កិច្ចប្រជុំចង្អៀតនេះ ជាកិច្ចប្រជុំដំបូងក្នុងការកំណត់ពីរបៀបវារៈប្រចាំឆ្នាំនៃកិច្ចប្រជុំអាស៊ានផ្សេងៗទៀតរបស់អាស៊ាន។ ប៉ុន្តែកិច្ចប្រជុំដំបូងឆ្នាំ២០២២នេះ គេអាចលើករបៀបវារៈពីរសំខាន់ គឺជម្លោះនៅមីយ៉ាន់ម៉ា និងបញ្ហាជម្លោះសមុទ្រចិនខាងត្បូង ។ រីឯបញ្ហាជម្លោះឧបទ្វីបកូរ៉េវានៅឆ្ងាយប្រហែលជាគេមិនលើកមកនិយាយទេ » ។
នៅមុនកិច្ចប្រជុំនេះមកដល់ដ្ឋមន្រ្តីការទេសកម្ពុជា លោក ប្រាក់ សុខុន បានជួប្រជុំតាមប្រព័ន្ធវីឌីអូជាមួយអគ្គលេខាធិការអាស៊ាននិងរដ្ឋមន្រ្តីការបរទេសន័រវេស (Norway)និយាយអំពីវិត្តិនៅមីយ៉ាន់ម៉ានេះដែរ។ សេចក្តីប្រកាសព័ត៌មានរបស់ក្រសួងការបរទេសកម្ពុជានិងអគ្គលេខាធិការអស៊ានកាលពីថ្ងៃទី១៤ ខែកុម្ភៈបានសង្កត់ធ្ងន់ទៅលើអំពីការបញ្ចប់អំពើហិង្សានៅភូមានិងការកសាងទំនុកចិត្តនិងភាពជឿជាក់ដើម្បីឲ្យភាគីពាក់ព័ន្ធទាំងអស់អាចចូលរួមក្នុងកិច្ចសន្ទនាមួយប្រកបដោយបរិយាបន្នសំដៅសម្រេចបាននូវសន្តិភាពយូរអង្វែង។
នៅក្រោយពីកិច្ចប្រជុំចង្អៀតថ្នាក់រដ្ឋមន្រ្តីការបរទេសអាស៊ាននេះលោក ប្រាក់ សុខុន ដែលជាប្រេសិតពិសេសរបស់អាស៊ាននឹងដឹកនាំប្រតិភូទៅធ្វើទស្សនកិច្ចនៅប្រទេសមីយ៉ាន់ម៉ានៅពេលខាងមុខ។ រដ្ឋមន្ត្រីប្រតិភូអមនាយករដ្ឋមន្ត្រី លោកបណ្ឌិត កៅ គឹមហួន បានប្រាប់សារព័ត៌មានក្នុងស្រុកកាលពីថ្ងៃយប់ថ្ងៃទី១៥ ខែកុម្ភៈថាមេដឹកនាំរបបសឹក លោក មីន អ៊ុងលាំង (Min Aung Hlaing)បានយល់ព្រមឲ្យប្រេសិតពិសេសជួបសមាជិករដ្ឋាភិបាលស្របច្បាប់របស់អ្នកស្រី អ៊ុង សានសូជី (Aung San Sukyi) នៅក្នុងឱកាសប្រេសិតពិសេសទៅធ្វើទស្សនកិច្ចនៅប្រទេសភូមាក្នុងពេលឆាប់ៗនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។