អ្នកវិភាគលើកឡើងថា គណបក្សភ្លើងទៀនអាចពិបាករកគណបក្សនយោបាយធ្វើជាដៃគូនយោបាយ ដើម្បីអាចឱ្យគណបក្សនេះបានចូលរួមការបោះឆ្នោតខាងមុខ។ ការលើកឡើងរបស់អ្នកវិភាគដូច្នេះ ក្រោយពេលគណបក្សភ្លើងទៀន ដែលប្រឈមមិនអាចចូលរួមការបោះឆ្នោតអសកលឆ្នាំ២០២៤ ខាងមុខ ប្រកាសចេតនាចងសម្ព័ន្ធភាពជាមួយគណបក្សនយោបាយណា ដែលមានទស្សន: និងជំហរនយោបាយដូចគ្នា។
គណបក្សភ្លើងទៀន កំពុងបោះជំហានថ្មីទៀតក្នុងការរកច្រកចេញ ដើម្បីអាចចូលរួមការបោះឆ្នោត អសកលនៅឆ្នាំ២០២៤ ខាងមុខ និងការបោះឆ្នោតផ្សេងៗទៀត ដោយគណបក្សនៅតែស្នើទៅលោកនាយករដ្ឋមន្ត្រី ហ៊ុន ម៉ាណែត ជួយធ្វើអន្តរាគមន៍ដើម្បីឱ្យក្រសួងមហាផ្ទៃផ្ដល់លិខិតចុះបញ្ជីគណបក្សច្បាប់ដើម។ ក្រៅពីនេះ គណបក្សភ្លើងទៀន ក៏ប្រកាសចងសម្ពន្ធភាពជាមួយគណបក្សដែលមានទស្សន:និងជំហរនយោបាយដូចគ្នាផងដែរ។
អ្នកសិក្សាការអភិវឌ្ឍសង្គម លោកបណ្ឌិត សេង សារី យល់ថា ការប្រកាសរបស់គណបក្សភ្លើងទៀន នៅពេលនេះ ហាក់យឹតពេលបន្តិចហើយ ព្រោះបើតាមយោបល់របស់លោក គណបក្សភ្លើងទៀនគឺធ្វើបែបនេះ តាំងពីមុនពេលបោះឆ្នោតកាលពីថ្ងៃទី២៣ ខែកក្កដា មកម៉្លេះ។ លោកបន្តទៀតថា ការរួមគ្នាជាសម្ព័ន្ធភាពរវាងគណបក្សភ្លើងទៀន ជាមួយគណបក្សនយោបាយផ្សេងទៀត គឺជារឿងល្អ ប៉ុន្តែអ្នកវិភាគរូបនេះ បារម្ភថា គណបក្សភ្លើងទៀនអាចពិបាករកដៃគូដែលមានទស្សនៈ និងជំហរដូចគ្នាមកដើរលើផ្លូវនយោបាយពេលនេះព្រោះគណបក្សដែលចាប់ដៃជាមួយគណបក្សភ្លើងទៀន អាចប្រឈមនឹងជួបគ្រោះច្រើនជាង លាភ។
បណ្ឌិត សេង សារី៖«អ្វីដែលសំខាន់យើងមិនទាន់ដឹងថា តើមានគណបក្សណាហ៊ានឱ្យគណបក្សភ្លើងទៀន ឬក៏អ្នកនយោបាយមកពីគណបក្សភ្លើងទៀនហ្នឹងទៅជ្រកក្រោមស្លាករបស់ខ្លួនព្រោះភាពភ័យខ្លាចនៃការគំរាមកំហែងនយោបាយនៅមាននៅឡើយ គណបក្សមួយចំនួនមិនហ៊ាននៅក្នុងទទួលយកភ្លើងទៀនទេ ដោយសារមានភាពភ័យខ្លាចនៅក្នុងការរំលាយគណបក្សឬក៏អាចមានទោសពៃអីជាដើម»។
គណបក្សភ្លើងទៀន ដែលមានសមាជិកក្រុមប្រឹក្សាឃុំសង្កាត់ជាង ២.០០០ (ពីរពាន់) អាសនៈទូទាំងប្រទេស ប្រកាសចងសម្ពន្ធភាពជាមួយគណបក្សដែលមានទស្សន:និងជំហរនយោបាយដូចគ្នានៅពេលខាងមុខ។ សេចក្ដីប្រកាសព័ត៌មានចុះកាលពីថ្ងៃទី២៥ ខែកញ្ញា លើកឡើងថា គណបក្សនេះ ស្នើសុំទៅលោកនាយករដ្ឋមន្ត្រី ហ៊ុន ម៉ាណែត ជួយធ្វើអន្តរាគមន៍ទៅក្រសួងមហាផ្ទៃ ដែលជាស្ថាប័នមានសមត្ថកិច្ចក្នុងការចេញប្រកាសស្ដីពី ការចុះឈ្មោះក្នុងបញ្ជីគណបក្សនយោបាយ ឱ្យជួយផ្ដល់ដំណោះស្រាយពាក់ព័ន្ធឯកសារ លិខិត បញ្ជាក់ការចុះបញ្ជីគណបក្សនយោបាយរបស់គណបក្សភ្លើងទៀនសម្រាប់ យកមកប្រើប្រាស់ក្នុងការចុះបញ្ជីគណបក្សដើម្បីអាចឈរឈ្មោះបោះឆ្នោត។
អ្នកនាំពាក្យគណបក្សភ្លើងទៀន លោក គីមសួរ ភីរិទ្ធ ឱ្យវិទ្យុអាស៊ីសេរីដឹង នៅថ្ងៃទី២៦ ខែកញ្ញា ថា ដោយសារស្ថានការណ៍នយោបាយប្រែប្រួលដូចសព្វថ្ងៃនេះ គឺមិនអនុគ្រោះដល់អ្នកប្រជាធិបតេយ្យដែលនៅបែកបាក់គ្នានោះទេ។ លោកអះអាងទៀតថា មុនពេលគណបក្សភ្លើងទៀនចេញសេចក្ដីប្រកាសព័ត៌មាននេះ គណបក្សនេះក៏បានជួបជជែកគ្នាខ្លះៗ ជាមួយមេដឹកនាំគណបក្សនយោបាយមួយចំនួនដែរ ប៉ុន្តែលោកសុំមិនបង្ហាញឈ្មោះគណបក្សនយោបាយទាំងនោះទេ។ ទោះបែបនេះក្ដី លោក គីមសួរ ភីរិទ្ធ ប្រាប់ថា គណបក្សឆន្ទៈខ្មែរ ដែលធ្លាប់មានទំនាក់ទំនងល្អជាមួយគណបក្សភ្លើងទៀន តាំងពីមុនការបោះឆ្នោតថ្នាក់ជាតិកន្លងទៅ ហើយមកដល់ពេលនេះគណបក្សទាំងពីរនៅតែមានទំនាក់ទំនងល្អនឹងគ្នាដដែល។
លោក គីមសួរ ភីរិទ្ធ៖«បោះដៃមុនយើងប្រកាសហ្នឹងទៅទៀត ប៉ុន្តែគ្រាន់តែថា យើងមិនអាចនិយាយមុនបានទេណាដោយសារយើងមិនទាន់បានសុំភ្លើងខៀវពីថ្នាក់ដឹកនាំដល់យើងបានភ្លើងខៀវអ៊ីចឹងទៅ បានយើងអាចទៅជជែកជាមួយថ្នាក់ដឹកនាំទ្វេភាគីហើយយើងអាចជជែកជាមួយពហុភាគីដើម្បីឱ្យគាត់យល់គ្នាទៅវិញទៅមកហើយចាំពេលហ្នឹងសឹមយើងប្រកាសហ្មង»។
កាលពីក្រោយការបោះឆ្នោតឃុំសង្កាត់ ឆ្នាំ២០២២ គណបក្សក្រៅរដ្ឋាភិបាលចំនួន៤ រួមមានគណបក្សភ្លើងទៀន គណបក្សកែទម្រង់កម្ពុជា គណបក្សឆន្ទៈខ្មែរ និងគណបក្សប្រជាធិបតេយ្យមូលដ្ឋាន បានជជែកគ្នាជាញឹកញាប់ពីការចងសម្ពន្ធភាពនយោបាយជាមួយគ្នា តែគម្រោងនេះមិនទទួលបានជោគជ័យទាំងស្រុងនោះទេ ហើយទីបំផុតគឺគណបក្សឆន្ទៈខ្មែរតែមួយប៉ុណ្ណោះ បានប្រកាសរស់ក្រោមដំបូលជាមួយគណបក្សភ្លើងទៀន ដោយគណបក្សនេះមិនចូលរួមការបោះឆ្នោតថ្នាក់ជាតិ ឆ្នាំ២០២៣ ទេ ហើយអតីតប្រធានគណបក្សនេះ គឺលោក គង់ ម៉ូលីកា បានមកចូលរួមជីវភាពនយោបាយជាមួយគណបក្សភ្លើងទៀន តែគណបក្សឆន្ទៈខ្មែរមិនបានរំលាយខ្លួនឯងចោលនោះឡើយ បើទោះជាខ្លួនមិនបានចូលរួមការបោះឆ្នោតក្ដី។
ទាក់ទងគម្រោងរបស់គណបក្សភ្លើងទៀន ចង់ចងសម្ពន្ធភាពជាមួយគណបក្សផ្សេងទៀតនេះដែរ អ្នកនាំពាក្យគណបក្សប្រជាជនកម្ពុជា លោក សុខ ឥសាន ចំអកថា គម្រោងនេះគ្រាន់តែដំណើររបស់គណបក្សអនាធិបតេយ្យរត់រកអនាធិបតេយ្យដូចគ្នា។
លោក សុខ ឥសាន៖«រំលាយ ឬមិនរំលាយមិនអាស្រ័យទៅលើគណបក្សប្រជាជនកម្ពុជាទេ អាស្រ័យទៅលើអំពើប្រព្រឹត្តរបស់សាមីគណបក្សបាទ បើសាមីគណបក្សអនុវត្តមិនត្រឹមត្រូវតាមគោលការណ៍ច្បាប់ទេហើយពិរុទ្ធភាពត្រូវទទួលខុសត្រូវចំពោះមុខច្បាប់ហើយដូច្នេះកុំបន្ទោសគណបក្សដទៃថា ខ្លួនឯងត្រឹមត្រូវហើយខ្លួនឯងត្រូវរំលាយដោយសារខ្លួនឯងមិនបានប្រព្រឹត្តអ្វីខុសឆ្គងលើផ្លូវច្បាប់»។
បើទោះជាលោក សុខ ឥសាន អះអាងបែបនេះ ប៉ុន្តែ នៅពេលមន្ត្រីគណបក្សភ្លើងទៀនមួយចំនួន ដើរប្រមូលស្នាមមេដៃពីពលរដ្ឋដើម្បីបង្កើតគណបក្សថ្មី គឺត្រូវបានសមត្ថកិច្ចនៃរដ្ឋាភិបាលបក្សកាន់អំណាចចាប់ខ្លួនដាក់ពន្ធនាគារជាបន្តបន្ទាប់។ ចំណែកលោក ហ៊ុន សែន ប្រធានគណបក្សប្រជាជនកម្ពុជា តែងតែប្រកាសគំរាមរំលាយគណបក្សភ្លើងទៀនចោលជាញឹកញាប់ដោយលោកចោទប្រកាន់ថា គណបក្សនេះមានទំនាក់ទំនងជាមួយលោក សម រង្ស៊ី។ គណបក្សភ្លើងទៀន ដែលមានពលរដ្ឋបោះឆ្នោតគាំទ្រជិត២លាននាក់ កាលពីឆ្នាំ២០២២ ត្រូវបាន គ.ជ.ប ហាមមិនឱ្យចូលរួមការបោះឆ្នោតទាំងថ្នាក់ជាតិកាលពីថ្ងៃទី២៣ ខែកក្កដា ដោយសារគ្មានឯកសារច្បាប់ដើមនៃការចុះបញ្ជីគណបក្សនេះ។ អនុប្រធានគណបក្សភ្លើងទៀន លោក រ៉ុង ឈុន អះអាងថា គណបក្សនេះនឹងមានយុទ្ធសាស្ត្រជាបន្តបន្ទាប់ ដែលអាចចូលរួមការបោះឆ្នោតនាពេលខាងមុខ ដើម្បីផ្ដល់ជម្រើសដល់ពលរដ្ឋម្ចាស់ឆ្នោត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។