អ្នកវិភាគថា រដ្ឋាភិបាលគួរតែកាត់បន្ថយមន្ត្រីនយោបាយ និងបន្ថែមមន្ត្រីបច្ចេកទេស
2024.11.28
រដ្ឋមន្ត្រីក្រសួងមុខងារសាធារណៈ លោក ហ៊ុន ម៉ានី ថ្លែងនៅខេត្តព្រះសីហនុ កាលពីថ្ងៃទី២៥ ខែវិច្ឆិកា ឆ្នាំ២០២៤។
រូប៖ ហ្វេសប៊ុកលោក ហ៊ុន ម៉ានី
អ្នកវិភាគលើកឡើងថា ដើម្បីពង្រឹងរចនាសម្ព័ន្ធតាមក្រសួងស្ថាប័ននានា រដ្ឋាភិបាលគួរតែកាត់បន្ថយចំនួនមន្ត្រីនយោបាយ ក្នុងជួររដ្ឋាភិបាល និងបន្ថែមមកវិញ នូវមន្ត្រីបច្ចេកទេស នៅតាមមូលដ្ឋាន។ ការលើកឡើងនេះ ធ្វើឡើងបន្ទាប់ពីរដ្ឋមន្ត្រីក្រសួងមុខងារសាធារណៈ លោក ហ៊ុន ម៉ានី បានប្រកាសមិនផ្ដល់គោលការណ៍ជ្រើសរើសមន្ត្រីក្របខណ្ឌថ្មី សម្រាប់ឆ្នាំ២០២៤-២០២៥។
អ្នកឃ្លាំមើលសង្គម និងនយោបាយ សង្កេតឃើញថា រដ្ឋាភិបាលនីតិកាលទី៧ ដឹកនាំដោយគ្រួសារត្រកូល «ហ៊ុន» ជារដ្ឋាភិបាលក្បាលធំសំពីងសំពោង ដែលមានសមាជិកគណៈរដ្ឋមន្ត្រី រាប់ពាន់នាក់ និងជាបន្ទុកធ្ងន់មួយ នៃការបង់ពន្ធរបស់រាស្ត្រ ខណៈមន្ត្រីមួយចំនួន មានតែតំណែង តែពុំដែលបានបម្រើពលរដ្ឋ។
អ្នកអត្ថាធិប្បាយនយោបាយលោក គឹម សុខ ប្រាប់អាស៊ីសេរីនៅថ្ងៃទី២៧ ខែវិច្ឆិកាថា ការធ្វើកំណែទម្រង់ ដើម្បីសម្រួចការងាររបស់ក្រសួងស្ថាប័នរដ្ឋនានា គឺជាការកាត់បន្ថយចំនួនមន្ត្រី ដែលពុំសូវមានសមត្ថភាព និងជំនួសមកវិញ ដោយមន្ត្រីមានសមត្ថភាព ជាពិសេសមន្ត្រីបច្ចេកទេសនៅមូលដ្ឋាន។ លោកថា ការមិនជ្រើសរើសមន្ត្រីបន្ថែមក្នុងឆ្នាំ២០២៤-២០២៥នេះ គឺមានហេតុផលពីរយ៉ាង ដូចជា កៅអី ដែលរៀបចំសម្រាប់បក្ខពួកមន្ត្រីក្នុងជួររដ្ឋាភិបាល ពុំមានកន្លែងទំនេរ និងរដ្ឋាភិបាលកំពុងជួបវិបត្តិសេដ្ឋកិច្ច។
លោក គឹម សុខ៖ «ពាក្យថា កំណែទម្រង់ប្រព័ន្ធសាធារណៈរបស់ជាតិ គេសំដៅលើបីចំណុចជាសំខាន់ ចំណុចទី១ គឺកាត់បន្ថយមនុស្សឲ្យនៅតិចបំផុត ក្នុងក្បាលម៉ាស៊ីនដឹកនាំរដ្ឋ ទី២ ដាក់មនុស្សដែលមានគុណភាព ដើម្បីធ្វើការងារហ្នឹងឲ្យមានប្រសិទ្ធភាព ទី៣ ដើម្បីធានាថា ការអនុវត្តយន្តការនានារបស់រដ្ឋក្នុងការការពារជាតិក្ដី ហើយបម្រើប្រជាពលរដ្ឋក្ដី ឲ្យមានលក្ខខណ្ឌឆ្លើយតបទៅនឹងតម្រូវការរបស់ប្រជាពលរដ្ឋ»។
ការលើកឡើងនេះ ធ្វើឡើងបន្ទាប់ពីរដ្ឋមន្ត្រីក្រសួងមុខងារសាធារណៈ លោក ហ៊ុន ម៉ានី កាលពីថ្ងៃទី២៦ ខែវិច្ឆិកា បានប្រកាសថា នៅមិនទាន់មានការអនុញ្ញាតឲ្យជ្រើសរើសមន្ត្រីក្របខណ្ឌថ្មី សម្រាប់ឆ្នាំ២០២៤-២០២៥នៅឡើយ ដោយការប្រឡងមួយចំនួន នាពេលកន្លង គឺជាការអនុញ្ញាត ផ្អែកតាមគោលការណ៍ចាស់នៅក្នុងឆ្នាំ២០២៣ ។ លោក ហ៊ុន ម៉ានី បន្ថែមថា គោលបំណងនៃការវិភាគមុខងារ គឺជាការពិនិត្យលើសុខភាពរបស់ក្រសួងស្ថាប័ន ដើម្បីទទួលបានលទ្ធផលល្អប្រសើរ និងការប្រើប្រាស់ចំណាយមានប្រសិទ្ធភាព។
គណៈរដ្ឋមន្ត្រីនីតិកាលទី៧ ដឹកនាំដោយគ្រួសារត្រកូល «ហ៊ុន» មានសមាជិកមន្ត្រីជាន់ខ្ពស់ជាង ១ពាន់ ៥រយនាក់ (១.៥១២) និងមានទីប្រឹក្សារដ្ឋាភិបាល និងជំនួយការនាយករដ្ឋមន្ត្រីសរុបជាង ៥រយនាក់។
អ្នកអត្ថាធិប្បាយនយោបាយ ថា រដ្ឋាភិបាល មានក្បាលម៉ាស៊ីនដឹកនាំប្រទេសធំបែបនេះ គឺគ្រាន់តែសម្រាប់ការពារអំណាចគ្រួសារត្រកូល «ហ៊ុន» ប៉ុណ្ណោះ ប៉ុន្តែក្បាលម៉ាស៊ីន ដែលសំពីងសំពោងបែបនេះ ជាការចំណាយខ្ជះខ្ជាយថវិកាជាតិ ខណៈកម្ពុជា កំពុងមានវិបត្តិសេដ្ឋកិច្ច។
ជាក់ស្ដែង កាលពីពេលថ្មីៗនេះ រដ្ឋាភិបាល លោក ហ៊ុន ម៉ាណែត ក៏បានបោះពុម្ពលុយក្នុងទំហំទឹកប្រាក់ប្រមាណ ១ពាន់លានដុល្លារ ដើម្បីចាក់បញ្ចូលក្នុងសេដ្ឋកិច្ចជាតិ ហើយបានប្រកាសខ្ចីលុយពីបរទេសចំនួនជាង ២ពាន់លានដុល្លារ ដើម្បីយកមកបែងចែកឱ្យរដ្ឋ នឹងផ្ដល់កម្ចីឱ្យអគ្គិសនីកម្ពុជា រដ្ឋាករទឹកស្វយ័តភ្នំពេញ និងធនាគារអភិវឌ្ឍន៍ជនបទ និងកសិកម្មខ្ចីបន្ត។
អ្នកវិភាគលើកឡើងថា ដើម្បីធ្វើកំណែទម្រង់រដ្ឋបាលសាធារណៈ លុះត្រាតែរដ្ឋាភិបាលត្រកូល «ហ៊ុន» កាត់បន្ថយចំនួនក្បាលម៉ាស៊ីនដឹកនាំក្នុងក្រសួងស្ថាប័នរដ្ឋនានា និងទីប្រឹក្សា រួមទាំងជំនួយការ ហើយជំនួសមកវិញ នូវមន្ត្រីបច្ចេកទេសនៅមូលដ្ឋាន ដូចជាមន្ត្រីកសិកម្មឃុំ ជាដើម ឲ្យទៅបម្រើតម្រូវការចាំបាច់របស់ប្រជាពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- UNHCR អំពាវនាវដល់កម្ពុជា និងថៃ ឱ្យគោរពតាមច្បាប់ស្ដីពីការមិនចាប់បញ្ជូនជនភៀសខ្លួនត្រឡប់ទៅឱ្យរងទុក្ខបុកម្នេញនៅប្រទេសកំណើត
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- ពលរដ្ឋខ្មែរនៅកូរ៉េគ្រោងធ្វើបាតុកម្មជំរុញឱ្យរដ្ឋាភិបាលប្ដឹងទាមទារកោះគជ់ទៅតុលាការអន្តរជាតិ
- លោក ហ៊ុន សែន ប្ដេជ្ញាបន្តប្រកាន់ជំហរគោលនយោបាយចិនតែមួយ និងថា ប្រទេសចិនបានជួយនយោបាយកម្ពុជាឱ្យមានឯករាជ្យ
អត្ថបទពេញនិយម
នយោបាយ
- អ្នកឃ្លាំមើលចាត់ទុកដំណើរទស្សនកិច្ចលោក ហ៊ុន សែន ទៅចិន គឺជាការពង្រឹងអំណាច និងស្វែងរកកម្ចីពីចិនបន្ថែម
- បទសម្ភាសន៍លោក សុខ ឥសាន ស្ដីពីគម្រោងរដ្ឋាភិបាលបង្កើតច្បាប់ប្រឆាំងភេរវកម្ម ដើម្បីទប់ទល់លោក សម រង្ស៊ី
- កម្ពុជា និងចិនប្ដេជ្ញាបន្តរឹតចំណងមិត្តភាពដើម្បីកសាងជោគវាសនាប្រទេសជាតិរួមគ្នា
- ពលរដ្ឋ និងឥស្សរជននយោបាយថៃទាមទារឱ្យរដ្ឋាភិបាលរបស់ខ្លួនលុបចោល «MOU44» លើតំបន់ត្រួតស៊ីគ្នាជាមួយកម្ពុជា
- ពលរដ្ឋខ្មែរក្រោមស្នើដល់ព្រះមហាក្សត្រឲ្យលើកយកបញ្ហាខ្មែរក្រោមទៅជជែកជាមួយរដ្ឋាភិបាលវៀតណាម