ជនមិនស្គាល់មុខលួចកាប់បំផ្លាញស្លាកគណបក្សភ្លើងទៀន នៅខេត្តកំពង់ចាមស្របពេលដែលគណបក្សនេះកំពុងមានអ្នកនយោបាយជើងចាស់ និងមេធាវីមួយចំនួនបានចូលរួមជីវភាពនយោបាយជាមួយ។ មន្ត្រីជាន់ខ្ពស់គណបក្សនេះថា កាប់បំផ្លាញស្លាកគណបក្សនេះ ជាសញ្ញាគំរាមកំហែង និងជំរុញទៅរដ្ឋាភិបាលគួរចាត់វិធានការម៉ឺងម៉ាត់លើជនប្រព្រឹត្តិ។
មន្ត្រីគណបក្សភ្លើងទៀននៅខេត្តកំពង់ចាមបានប្ដឹងទៅសមត្ថកិច្ចមូលដ្ឋានឲ្យជួយស្រាវជ្រាវចាប់ជនសង្ស័យមកផ្ដន្ទាទោសតាមច្បាប់។ ទោះយ៉ាងណាពួកគេមិនសូវមានសង្ឃឹមថា សមត្ថកិច្ចអាចរកជនដៃដល់ឃើញនោះឡើយ។ ប្រធានគណបក្សភ្លើងទៀនប្រចាំ ឃុំអូរម្លូ ស្រុកស្ទឹងត្រង់ ខេត្តកំពង់ចាម អ្នកស្រី សាត់ ភារម្យ ឲ្យវិទ្យុអាស៊ីសេរីដឹងថ្ងៃទី១ ខែមីនាថា ជនមិនស្គាល់មុខបានកាប់ស្លាកគណបក្សភ្លើងទៀន ដែលស្លាកនោះត្រូវបានក្រុមការងារអ្នកស្រីលើកឡើង កាលពីពេលថ្មីៗ នេះ។អ្នកស្រីថា នេះជាលើកទី១ និងជាស្លាកទី១ ដែលត្រូវជនដៃដល់កាប់បំផ្លាញនៅក្នុងមូលដ្ឋានលោកស្រី៖ «ចាស៎ ! វាចោះម៉ាខ្លាំង ឡើងធ្លាយដល់ដែកក្នុងហ្មង។ ចោះឡើងរហែកអស់ស្លាកខាងក្រៅ។ គេ (សមត្ថកិច្ច ) ឆ្លើយតបថា គេនឹងស្រាវជ្រាវរកឲ្យគ្មានជំនឿថា រកឃើញទេ ដោយមូលហេតុ សួរអ្នកនេះក៏មិនដឹង សួរអ្នកនោះក៏មិនដឹង »។
សកម្មជនគណបក្សភ្លើងទៀនរូបនេះឲ្យដឹងទៀតថា ក្រោយកើតហេតុការណ៍នេះលោកស្រីបានទៅដាក់ពាក្យប្ដឹងអាជ្ញាធរភូមិ ឃុំ និងប៉ូលិសប៉ុស្តិ៍ ប៉ុន្តែលោកស្រីមិនសូវមានសង្ឃឹមថាសមត្ថកិច្ចរកឃើញជនប្រព្រឹត្តិនោះទេ។
ទាក់ទងបញ្ហានេះវិទ្យុអាស៊ីសេរីមិនអាចសុំការអត្ថាធិប្បាយពីស្នងការនគរបាល ខេត្តកំពង់ចាមលោក ឯម កុសល បានទេ នៅថ្ងៃទី១ ខែមីនា។ ការកាប់បំផ្លាញស្លាកគណបក្សនេះ ធ្វើឡើងប៉ុន្មានថ្ងៃក្រោយពេលលោកនាយករដ្ឋមន្រ្តី ហ៊ុន សែន ប្រកាសឲ្យអាជ្ញាធរមូលដ្ឋានអនុញ្ញាតឲ្យគ្រប់គណបក្សចុះឈ្មោះប្រកួតប្រជែងការបោះឆ្នោតនៅពេលខាងមុខ ធ្វើសកម្មភាពនយោបាយដោយសេរី និងគ្មានការរំខាន។
មន្ត្រីសម្របសម្រួលសមាគមអាដហុកខេត្តកំពង់ចាម និងត្បូងឃ្មុំ អ្នកស្រី ធីម ណារីន សង្កេតឃើញថា នៅរយៈពេលចុងក្រោយនេះ ជនអនាមិកបានធ្វើសកម្មភាពបំភិតបំភ័យលើការធ្វើសកម្មភាពរបស់គណបក្សភ្លើងទៀន និងគណបក្សនយោបាយផ្សេងទៀតក្នុងនោះមាន ការហែកស្លាក កាប់ស្លាក និងរារាំងមិនឲ្យលើកស្លាក។ អ្នកស្រីបន្តថា សកម្មភាពទាំងនេះតែងកើតមានរាល់ពេលជិតបោះឆ្នោត។ មន្ត្រីសង្គមស៊ីវិលរូបនេះ ជំរុញទៅអាជ្ញាធរចាត់វិធានការលើករណីនេះឲ្យមានប្រសិទ្ធភាព៖ «ដើម្បីឲ្យការបោះឆ្នោតមានតម្លាភាព មានយុត្តិធម៌ត្រឹមត្រូវ អាជ្ញាធរមូលដ្ឋានគួរតែជួយពង្រឹងសុវត្ថិភាព ដល់គណបក្សដទៃទៀត ដើម្បីឲ្យគាត់មានសកម្មភាពស្មើភាពគ្នាដូចគណបក្សដទៃ កុំឲ្យមានការគំរាមកំហែង មានការបំភិតបំភ័យ ឬការផ្ដួលស្លាកប្ដូរអី ឬក៏ការមិនអនុញ្ញាតឲ្យលើកស្លាកទាំងអស់ហ្នឹង »។
ជុំវិញករណីនេះ អនុប្រធាននិងជាអ្នកនាំពាក្យគណបក្សភ្លើងទៀន លោក ថាច់ សេដ្ឋា ឲ្យប្រាប់វិទ្យុអាស៊ីសេរីថា គណបក្សលោកគ្រោងធ្វើសេចក្ដីថ្លែងការណ៍ស្នើទៅរដ្ឋាភិបាលចាត់វិធានការលើជនខិលខូចទាំងនោះឲ្យមានប្រសិទ្ធភាព។ លោក ថាច់ សេដ្ឋា ចាត់ទុកទង្វើទាំងនេះជាការគំរាមកំហែងនិងការបង្កភាពអាប់អួមុនពេលបោះឆ្នោត៖ «អំពាវនាវ ឲ្យរដ្ឋាភិបាល ចាត់វិធានការឲ្យបានម៉ឺងមាត់និងមានប្រសិទ្ធភាព ដើម្បីធានាឲ្យបរិយាកាសនយោបាយល្អប្រសើរមុនការបោះឆ្នោត ដើម្បីជៀសវាង កុំឲ្យមានការគំរាមកំហែងបំភិតបំភ័យ ការអូសទាញ ឬក៏ធ្វើឲ្យអាប់អួបរិយាកាសនយោបាយមុនការបោះឆ្នោត »។
លោក ថាច់ សេដ្ឋា បន្តថា លោកមិនទាន់មានតួលេខរួមនៃការគំរាមកំហែង ឬការបំផ្លាញស្លាកគណបក្សភ្លើងទៀននៅឡើយទេ ប៉ុន្តែកន្លងមកករណីទាំងនោះ បានកើតឡើងនៅខេត្តសៀមរាប កណ្ដាល ត្បូងឃុំ និងខេត្តកំពង់ចាម។
កំណើននៃការធ្វើទុក្ខបុកម្នេញលើគណបក្សភ្លើងទៀនបែបនេះ ស្របពេលដែលគណបក្សនេះទទួលបានកម្លាំងមូលដ្ឋានស្ទើរពេញប្រទេស និងមានការចូលរួមពីឥស្សរជនល្បីឈ្មោះមួយចំនួន រួមមាន មេធាវី និងអ្នកនយោបាយជើងចាស់ មកពីគណបក្សសង្គ្រោះជាតិ ហើយចុងក្រោយនេះ អតីតមន្រ្តីជាន់ខ្ពស់គណបក្សសង្គ្រោះជាតិ លោក សុន ឆ័យ បានធ្វើលិខិតសុំចូលជាសមាជិកគណបក្សភ្លើងទៀន។ លិខិតចុះថ្ងៃទី១ ខែមីនា ក៏អំពាវនាវទៅពលរដ្ឋខ្មែរចូលរួមគាំទ្រគណបក្សភ្លើងទៀនឲ្យបានគ្រប់ៗ គ្នា។
ទាក់ទងលិខិតរបស់លោក សុន ឆ័យ នេះ អនុប្រធានគណបក្សភ្លើងទៀន លោក ថាច់ សេដ្ឋា ឲ្យដឹងថា លោកបានទទួលលិខិតនេះហើយ ហើយលោកស្វាគមន៍នូវវត្តមានលោក សុន ឆ័យ ផងដែរ។ លោកថា គណបក្សមិនទាន់បានគិតគូរថា នឹងរៀបចំឲ្យលោក សុន ឆ័យ កាន់តួនាទីអ្វីក្នុងបក្សនៅឡើយទេ។ លោក ថាច់ សេដ្ឋា និយាយថា គណបក្សភ្លើងទៀនពេលនេះ ប្រៀបដូចជាផ្ទះចាស់របស់លោកក្នុងការប្រមែប្រមូលអ្នកប្រជាធិបតេយ្យមកវិញ។ គណបក្សភ្លើងទៀនមានដើមកំណើតកើតចេញពីលោក សម រង្ស៊ី បានប្ដូរឈ្មោះជាបន្តបន្ទាប់តាមបរិបទនយោបាយ។ គណបក្សនេះបានប្ដូរឈ្មោះពីគណបក្ស សម រង្ស៊ី ទៅជាគណបក្សភ្លើងទៀនវិញ កាលពីខែកញ្ញា ឆ្នាំ២០១៧ ដោយសាររដ្ឋាភិបាល លោក ហ៊ុន សែន បានកែប្រែច្បាប់គណបក្សនយោបាយមិនឱ្យប្រើឈ្មោះបុគ្គលជាឈ្មោះបក្ស។ មកទល់ពេលនេះ មិនទាន់សញ្ញាណាមួយ បង្ហាញថា គណបក្សនឹងចូលរួមក្នុងការបោះឆ្នោតឆ្នាំ២០២២ និងឆ្នាំ២០២៣ខាងមុខនៅឡើយទេ ដោយសារតែគណបក្សនេះអះអាងថា បរិយាកាសនយោបាយមិនទាន់មានអំណោយផលដល់ការបោះឆ្នោតដោយសេរី យុត្តិធម៌ និងអាចទទួលយកបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។