យុវជនគណបក្សសង្គ្រោះជាតិ ម្នាក់ទៀត គឺលោក ទេព ណារិន ត្រូវតុលាការចាប់ឃុំខ្លួននៅរសៀលថ្ងៃទី១៣ វិច្ឆិកា ពាក់ព័ន្ធពីបទធ្វើកុបកម្មប្រឆាំងនឹងអ្នករាជការសាធារណៈមានស្ថានទម្ងន់ទោស និងហិង្សាដោយចេតនាមានស្ថានទម្ងន់ទោស ដែលប្រព្រឹត្តទៅនាទីលានប្រជាធិបតេយ្យកាលពីថ្ងៃទី១៥ កក្កដា។
ការឃុំខ្លួន លោក ទេព ណារិន ធ្វើឡើងប៉ុន្មានថ្ងៃក្រោយពេលតុលាការចាប់ និងឃុំខ្លួន លោក មាជ សុវណ្ណារ៉ា ប្រធាននាយកដ្ឋានព័ត៌មាន និងប្រព័ន្ធផ្សព្វផ្សាយនៃគណបក្សសង្គ្រោះជាតិ ក្រោមបទចោទប្រកាន់ដូចគ្នានេះ។
សាលាដំបូងរាជធានីភ្នំពេញ បានចេញដីកាចាប់ខ្លួន និងឃុំខ្លួនយុវជនគណបក្សសង្គ្រោះជាតិ ម្នាក់ទៀត គឺលោក ទេព ណារិន បន្ទាប់ពីដាក់ឲ្យស្ថិតក្រោមការត្រួតពិនិត្យរបស់តុលាការជិត ៣ខែកន្លងមក។
ចៅក្រមស៊ើបសួរសាលាដំបូងរាជធានីភ្នំពេញ លោក កែវ មុនី បានចេញដីកាឲ្យចាប់ និងឲ្យឃុំខ្លួន លោក ទេព ណារិន នៅពន្ធនាគារព្រៃស នៅរសៀលថ្ងៃទី១៣ វិច្ឆិកា។ ប្រភពពីមន្ត្រីតុលាការបានទម្លាយថា មូលហេតុដែលនាំឲ្យមានការចាប់ និងឃុំខ្លួននេះ ដោយសារតែ លោក ទេព ណារិន ខកខានមិនបានចូលបង្ហាញខ្លួនតាមដីការបស់តុលាការកន្លងមក។
ប្រធានគណៈកម្មការប្រតិបត្តិគណបក្សសង្គ្រោះជាតិ រាជធានីភ្នំពេញ លោក ម៉ន ផល្លា ឲ្យដឹងថា នៅព្រឹកថ្ងៃទី១៣ វិច្ឆិកា លោក ទេព ណារិន បានចូលទៅបង្ហាញខ្លួននៅស្នងការនគរបាលរាជធានីភ្នំពេញ តាមទម្លាប់ពីរសប្ដាហ៍ម្ដង តាមដីការបស់តុលាការដែលដាក់ឲ្យស្ថិតក្រោមការត្រួតពិនិត្យ។ ប៉ុន្តែ ពេលចូលទៅបង្ហាញខ្លួននោះ ក៏ស្រាប់តែសមត្ថកិច្ចចាប់ខ្លួន។ លោកបញ្ជាក់ថា លោក ទេព ណារិន ពិតជាបានខកខានបង្ហាញខ្លួនម្តងមែនកាលពីខែមុន ប៉ុន្តែលោកបានទៅស្នងការនគរបាលរាជធានីភ្នំពេញ បង្ហាញខ្លួនជំនួសវិញនៅព្រឹកថ្ងៃទី១៣ វិច្ឆិកា ប៉ុន្តែត្រូវសមត្ថកិច្ចចាប់ខ្លួនតែម្តង៖ «ឥឡូវនេះក្រោយតែចាប់ខ្លួនយុវជនម្នាក់ហើយ គឺនៅសល់ ២នាក់ផ្សេងទៀតដែរ គិតថានឹងអាចត្រូវបានអាជ្ញាធរនគរបាលស្នងការរាជធានីភ្នំពេញ នឹងត្រូវចាប់ខ្លួននាពេលខាងមុខដូចគ្នា»។
លោក ទេព ណារិន គឺជាយុវជនមួយរូបក្នុងចំណោមយុវជន ៣រូបរបស់គណបក្សសង្គ្រោះជាតិ រួមមាន លោក សាន សីហៈ និងលោក អាន បឋម ដែលត្រូវបានតុលាការចោទប្រកាន់ដូចគ្នា ពាក់ព័ន្ធនឹងការប្រើហិង្សានៅទីលានប្រជាធិបតេយ្យកាលពីថ្ងៃទី១៥ កក្កដា។ ទាំង លោក សាន សីហៈ និងលោក អាន បឋម ត្រូវចូលទៅស្នងការនគរបាលរាជធានីភ្នំពេញ តាមទម្លាប់ដូចគ្នានៅថ្ងៃទី១៥ វិច្ឆិកា ខាងមុខ។
លោក សាន សីហៈ បញ្ជាក់ថា ពួកគេនឹងមិនគេចវេសពីការចូលបំភ្លឺនៅស្នងការនោះទេ។ ប៉ុន្តែ ប្រសិនបើមានការចាប់ខ្លួនដូចករណី លោក ទេព ណារិន នោះ លោកគិតថាវាគឺជារឿងនយោបាយ ព្រោះកន្លងមក ពួកលោកមិនដែលខកខានបង្ហាញខ្លួននៅចំពោះមុខសមត្ថកិច្ច តាមដីការបស់តុលាការឡើយ។
មន្ត្រីឃ្លាំមើលសិទ្ធិមនុស្សលីកាដូ (Licadho) លោក អំ សំអាត ពន្យល់ផ្នែកច្បាប់ថា តុលាការមិនអាចឈានទៅដល់ការចេញដីកាចាប់ខ្លួន លោក ទេព ណារិន បានទេ នៅពេលដែលលោកបានចូលបំភ្លឺនៅព្រះរាជអាជ្ញា ហើយបានដាក់លោកឲ្យស្ថិតនៅក្រោមការត្រួតពិនិត្យរបស់ប្រព័ន្ធតុលាការ។ លោកបន្តថា លោក ទេព ណារិន ក៏បានចូលបំភ្លឺនៅប៉ុស្តិ៍ប៉ូលិសដោយមិនមានចេតនាណាមួយគេចវេស មិនសហការជាមួយអាជ្ញាធរ និងតុលាការទេ។ តែហេតុផលតែមួយគត់ក្នុងរឿងចាប់ខ្លួននេះ គឺពាក់ព័ន្ធនឹងបញ្ហានយោបាយ៖ «បើយើងនិយាយទៅ គឺស្ថានភាពនយោបាយទេដែលបង្ខំឲ្យតុលាការចេញដីកាចាប់ខ្លួនពួកគាត់ ការចាប់ខ្លួនសមាជិកគណបក្សសង្គ្រោះជាតិ ទាំង លោក មាជ សុវណ្ណារ៉ា ទាំង លោក ទេព ណារិន គឺជាការដាក់សម្ពាធផ្នែកនយោបាយមួយទៀត ទាក់ទងនឹងសេចក្តីព្រាងច្បាប់ស្ដីពីគណៈកម្មការរៀបចំការបោះឆ្នោត ដែលនៅបញ្ហាចម្រូងចម្រាសគ្នានៅឡើយទាក់ទង ១០ចំណុច»។
រីឯករណី លោក មាជ សុវណ្ណារ៉ា ប្រធាននាយកដ្ឋានព័ត៌មាន និងប្រព័ន្ធផ្សព្វផ្សាយនៃគណបក្សសង្គ្រោះជាតិ ដែលកំពុងជាប់ឃុំនៅពន្ធនាគារព្រៃសវិញ ប្រធានគណបក្សសង្គ្រោះជាតិ លោក សម រង្ស៊ី បានជួបចរចាជាមួយ លោក ស ខេង រដ្ឋមន្ត្រីក្រសួងមហាផ្ទៃ កាលពីថ្ងៃទី១២ វិច្ឆិកា ដើម្បីស្វែងរកវិធីដោះលែងមន្ត្រីគណបក្សរូបនេះចេញពន្ធនាគារ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បញ្ជាក់ថា មិនទាន់មានសញ្ញាវិជ្ជមានទេពីរឿងនេះ៖ «ខ្ញុំមិនទាន់ទទួលព័ត៌មានលម្អិតនៅឡើយទេ»។
មន្ត្រីគណបក្សប្រឆាំងបញ្ជាក់ថា គណបក្សប្រជាជនកម្ពុជា កំពុងបំពានលើកិច្ចព្រមព្រៀងនយោបាយ ដែលបានសន្យាកាលពីថ្ងៃទី២២ កក្កដា ឲ្យមានភាពស្ងប់ស្ងៀម និងបញ្ចប់រាល់ជម្លោះ ហើយអង្គុយទល់មុខគ្នាជជែកអំពីកំណែតម្រង់ផ្សេងៗ។ ការចាប់ខ្លួនសកម្មជន និងយុវជនគណបក្សប្រឆាំងជាបន្តបន្ទាប់នេះ គឺជាការគំរាមកំហែងផ្នែកនយោបាយ និងជាចេតនាមួយបំភិតបំភ័យបំបាក់ស្មារតីដល់សកម្មជន និងយុវជនគណបក្សសង្គ្រោះជាតិ ឯទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។