សាលាឧទ្ធរណ៍រាជធានីភ្នំពេញ បដិសេធបណ្ដឹងសុំនៅក្រៅឃុំរបស់អ្នកជំនាញកសិកម្ម និងអ្នករិះគន់បញ្ហាសង្គម លោក នី ណាក់។ មេធាវីការពារក្ដីឱ្យលោក នី ណាក់ សោកស្ដាយ ដែលសាលាឧទ្ធរណ៍បដិសេធបណ្ដឹងនៅក្រៅឃុំ ដោយលោកថា នេះ គឺជាការដើរផ្ទុយនឹងស្មារតីច្បាប់ ដែលធានាថា ជនត្រូវចោទមានសិទ្ធិនៅក្រៅឃុំ។
ប្រធានក្រុមប្រឹក្សាជំនុំជម្រះសាលាឧទ្ធរណ៍ លោក គី ឫទ្ធី នៅថ្ងៃទី៦ ខែសីហា បានប្រកាសសាលដីកាបដិសេធបណ្ដឹងសុំនៅក្រៅឃុំរបស់លោក នី ណាក់ ភ្លាមៗ ក្រោយពីបញ្ចប់សវនាការក្នុងពេលជាមួយគ្នា ដោយអះអាងថា សំណុំរឿងនេះ ទុកឱ្យតុលាការចាត់វិធានការតាមនីតិវិធី។ សវនាការនេះ ពុំមានវត្តមានលោក នី ណាក់ នោះទេ គឺមានតែមេធាវីការពារក្ដីប៉ុណ្ណោះ។
មេធាវីការពារក្ដីលោក នី ណាក់ គឺលោក ជូង ជូងី ប្រាប់វិទ្យុអាស៊ីសេរី នៅថ្ងៃទី៦ ខែសីហា ថា សាលាឧទ្ធរណ៍បើកសវនាការលើបណ្ដឹងសុំនៅក្រៅឃុំរបស់កូនក្ដីលោក គឺលោក នី ណាក់ ក្រោយពី លោកបានដាក់បណ្ដឹងសុំនៅក្រៅឃុំ កាលពីចុងខែកក្កដា។ តែទោះជាយ៉ាងណាក្ដី លោកថា ការសម្រេចរបស់ប្រធានក្រុមប្រឹក្សាជំនុំជម្រះបដិសេធបណ្ដឹងនៅក្រៅឃុំនេះ គឺជាការដើរផ្ទុយទៅនឹង មាត្រា២០៣ នៃក្រមនីតិវិធីព្រហ្មទណ្ឌ។
លោក ជូង ជូងី៖«សាលាឧទ្ធរណ៍មិនបានពិចារណា មាត្រា ២០៣ នៃក្រមនីតិវិធីព្រហ្មទណ្ឌដែលនិយាយជាគោលការណ៍ថា ជនត្រូវចោទ ត្រូវតែមានសេរីភាព ហើយសាលាឧទ្ធរណ៍គេនិយាយថា រក្សាលោក នី ណាក់ ទុកជូនតុលាការចាត់ការតាមនីតិវិធី ដូច្នេះហើយ ទើបមិនដោះលែង»។
វិទ្យុអាស៊ីសេរីមិនអាចទាក់ទងអ្នកនាំពាក្យសាលាឧទ្ធរណ៍ភ្នំពេញ លោក ឃុន លាងម៉េង ដើម្បីសាកសួរជុំវិញរឿងនេះបានទេ នៅថ្ងៃទី៦ ខែសីហា។
ទាក់ទិនរឿងនេះ មន្ត្រីជាន់ខ្ពស់សមាគមការពារសិទ្ធិមនុស្សអាដហុក (Adhoc) លោក យី សុខសាន្ត ដែលចូលស្ដាប់សវនាការដែរនោះ សង្កេតឃើញថា សវនាការមកលើលោក នី ណាក់ នេះ ពុំមានការជជែកដេញដោលអ្វីនោះទេ ដោយគ្រាន់តែប្រធានក្រុមប្រឹក្សាជំនុំជម្រះសាលាឧទ្ធរណ៍ បានប្រកាសឈ្មោះ និងលើកឡើងអំពីសំណុំរឿងមួយចំនួន ពាក់ព័ន្ធបទចោទ «បរិហារកេរ្តិ៍ជាសាធារណៈ និងញុះញង់ឱ្យមានការរើសអើង» ហើយក្រោយមក ក៏ប្រកាសសម្រេចបដិសេធបណ្ដឹងសុំនៅក្រៅឃុំតែម្ដង។
តែទោះជាយ៉ាងណាក្ដី លោកសង្កេតឃើញថា កន្លងទៅតុលាការឃុំខ្លួនលោក នី ណាក់ ដើម្បីស៊ើបអង្កេត និងបើកសវនាការ ក៏ប៉ុន្តែ សវនាការនៅថ្ងៃទី៦ ខែសីហា នេះ បែរជាមន្ត្រីពន្ធនាគារពុំដឹកលោក នី ណាក់ មកចូលរួម។ បន្ថែមពីនោះ លោកថា ចំពោះការរកភស្តុតាងរបស់តុលាការ ដាក់បន្ទុកលើលោក នី ណាក់ កន្លងទៅ ក៏មានភាពមិនច្បាស់លាស់ផងដែរ ដោយយកសារបញ្ចេញមតិរបស់អ្នកដទៃ នៅលើហ្វេសប៊ុក លោក នី ណាក់ មកដាក់បន្ទុក ដែលការណ៍នេះ ហាក់ពុំសមទំនងទាល់តែសោះ។ លោកបន្តថា តុលាការគួរតែពិចារណា ហើយដោះលែងលោក នី ណាក់ ឱ្យមានសេរីភាពឡើងវិញ។
លោក យី សុខសាន្ត៖«ភាគច្រើនគាត់យកខម្មិន(Comments)គេជេរ គេថាឱ្យ ដែលមិនមែនជាសម្ដីលោក នី ណាក់ ទេ។ លោក នី ណាក់ គាត់និយាយពាក់ព័ន្ធតែដីធ្លី ប៉ុន្តែ ព្រះរាជអាជ្ញា គាត់យកខម្មិន(Comments)ជាច្រើន ឬ ក៏ប្រធានក្រុមប្រឹក្សាជំនុំជម្រះហ្នឹង គាត់យកខម្មិនជាច្រើន នៅលើហ្វេសប៊ុក លោក នី ណាក់ នឹងយកមកចោទលោក នី ណាក់ ទៅវិញ។ តាមពិតមិនមែនជាសម្ដីលោក នី ណាក់ ទេ។ នេះជាអ្វី ដែលយើងកត់សម្គាល់មើលឃើញ»។
កាលពីថ្ងៃទី៥ ខែមករា ចៅក្រមស៊ើបសួរសាលាដំបូងរាជធានីភ្នំពេញ លោក ញឹម ពិសាល បានឃុំខ្លួនអ្នកជំនាញកសិកម្ម និងជាអ្នកអត្ថាធិប្បាយបញ្ហាសង្គម លោក នីណាក់ នៅពន្ធនាគារព្រៃស ហើយក្រោយមក បញ្ជូនទៅឃុំខ្លួននៅពន្ធនាគារ ត្រពាំងផ្លុង ក្នុងខេត្តត្បូងឃ្មុំ ក្បែរព្រំដែនវៀតណាម រហូតមកដល់ពេលបច្ចុប្បន្ន ពីបទ «បរិហារកេរ្តិ៍ជាសាធារណៈ និងញុះញង់ឱ្យមាន ការរើសអើង» ក្រោមបណ្ដឹងរបស់រដ្ឋមន្ត្រីក្រសួងការងារ លោក ហេង សួរ ពាក់ព័ន្ធនឹងការបញ្ចេញមតិរឿងកាត់ដី ៩១ហិកតា នៅខេត្តកំពត ឱ្យទៅបុគ្គលឈ្មោះ ហេង សួរ។
កាលពីថ្ងៃទី២៩ ខែកក្កដា លោកក៏ត្រូវបានសហមេធាវីការពារក្ដីរបស់រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ ទារសំណងជំងឺចិត្តចំនួន ២ពាន់លានរៀល ឬជិត ៥០ម៉ឺនដុល្លារសហរដ្ឋអាមេរិកពីលោក នី ណាក់ ក្នុងសំណុំរឿង ពាក់ព័ន្ធនឹងបទញុះញង់ និងបរិហារកេរ្តិ៍ជាសាធារណៈ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។