អាជ្ញាធរបង្កើនការរឹតបន្តឹង និងធ្វើទុក្ខបុកម្នេញសកម្មជនបក្សប្រឆាំងនៅពេលគម្រោងវិលចូលស្រុករបស់ថ្នាក់ដឹកនាំបក្សខិតជិតមកដល់

ដោយ៖ អាស៊ីសេរី
2020.12.31

អាជ្ញាធរបង្កើនការរឹតបន្តឹង និងធ្វើទុក្ខបុកម្នេញសកម្មជនបក្សប្រឆាំងនៅពេលគម្រោងវិលចូលស្រុករបស់ថ្នាក់ដឹកនាំបក្សខិតជិតមកដល់

មន្ត្រីជាន់ខ្ពស់គណបក្សសង្គ្រោះជាតិ។

អាស៊ីសេរី

ស្ដាប់ ឬទាញយកសំឡេង

សកម្មជនគណបក្សសង្គ្រោះជាតិស្រុកពញាក្រែក ខេត្តត្បូងឃ្មុំ លោកស្រី ខន ទន់ ប្រាប់អាស៊ីសេរីនៅព្រឹកថ្ងៃទី៣១ ខែធ្នូ ថា ប៉ូលិសមូលដ្ឋានជាច្រើននាក់ តាមសួររកលោកស្រីដល់ផ្ទះម្ដងហើយម្ដងទៀត ដោយសារតែលោកស្រីបានចូលរួមតវ៉ាជាមួយក្រុមស្ត្រីថ្ងៃសុក្រទាមទារឱ្យមានយុត្តិធម៌សង្គមនៅក្រុងភ្នំពេញ។ លោកស្រីប្រាប់ថា នៅពេលនេះលោកស្រី និងសកម្មជនបក្សប្រឆាំង២នាក់ទៀតនៅខេត្តត្បូងឃ្មុំ កំពុងគេចខ្លួននៅកន្លែងមានសុវត្ថិភាព៖ «ខ្ញុំនៅតែប្រកាន់ជំហរដដែលពីព្រោះអ្វី ដែលពួកខ្ញុំធ្វើគឺទាមទាររកយុត្តិធម៌ និងឱ្យគោរពសិទ្ធិ និងប្រជាធិបតេយ្យ ពួកខ្ញុំអត់មានធ្វើអីខុសទេ។ អ្វីដែលធ្វើមកលើប្រជាពលរដ្ឋសាមញ្ញធម្មតាៗដូចជាពួកខ្ញុំនេះ វាធ្វើឱ្យពួកខ្ញុំមានការឈឺចាប់ ហើយពួកខ្ញុំជាម្ចាស់ប្រទេស ជាប្រជាពលរដ្ឋសាមញ្ញអត់មានសិទ្ធិនិយាយស្ដី អត់មានសិទ្ធិតវ៉ា។ ចំណុចទាំងអស់នេះហើយដែលធ្វើឱ្យខ្ញុំមានការឈឺចាប់ និងមានជំហរកាន់តែរឹងមាំថែមទៀត។»

ស្រដៀងគ្នានេះ សមាជិកក្រុមប្រឹក្សាខេត្តបាត់ដំបងជាប់ឆ្នោតគណបក្សសង្គ្រោះជាតិ លោក ឌឹម សារឿន ឱ្យដឹងថា ប៉ូលិសឃុំកំពង់ព្រះ ស្រុកសង្កែ បានទូរស័ព្ទបង្ខំឱ្យលោកបង្ហាញខ្លួននៅប៉ុស្តិ៍ប៉ូលិសនៅព្រឹកថ្ងៃទី៣១ ខែធ្នូ ក៏ប៉ុន្តែលោកបានបដិសេធ។ មន្ត្រីបក្សប្រឆាំងរូបនេះបញ្ជាក់ថា នេះជាលើកទី១ហើយដែលប៉ូលិសប្រាប់ឱ្យគាត់ទៅបង្ហាញខ្លួន បន្ទាប់ពីដោះលែងលោកពីពន្ធនាគារព្រៃសកាលពីចុងឆ្នាំ២០១៩។ លោក ឌិម សារឿន ចាត់ទុករឿងនេះថាជាការបំភិតបំភ័យផ្នែកនយោបាយ ដើម្បីរារាំងកុំឱ្យលោកចូលរួមសកម្មភាពនយោបាយជាមួយថ្នាក់ដឹកនាំគណបក្សសង្គ្រោះជាតិ ដែលគ្រោងវិលចូលស្រុកវិញ នៅថ្ងៃទី០៤ មករា ខាងមុខ៖ « រាល់ដងអត់មានទូរស័ព្ទប្រាប់ទេ ព្រោះខ្ញុំបំពេញកាតព្វកិច្ចខ្ញុំដែរ ឱ្យតែដល់ម៉ោងដល់ខែខ្ញុំបង្ហាញខ្ញុំទៅហើយ។ ប្លែកត្រង់ថា គាត់ទូរស័ព្ទមកឱ្យទៅបង្ហាញខ្លួននៅប៉ុស្តិ៍ប៉ូលិសអីចឹង។ខ្ញុំអត់ព្រួយអត់ភ័យអត់តក់ស្លុតអីទេព្រោះដោយសារកន្លងមក និងបច្ចុប្បន្ននេះខ្ញុំអត់មានធ្វើអីខុស ហើយខ្ញុំទៅជាប្រជាពលរដ្ឋធម្មតាហើយហ្នឹង។»

លោក ឌឹម សារឿន ធ្លាប់ជាប់ពន្ធនាគាររយៈពេលជាង១ខែ ម្ដងរួចមកហើយ កាលពីចុងឆ្នាំ២០១៩ ពីបទរួមគំនិតក្បត់ និងបទញុះញង់ឱ្យបង្កភាពវឹកវរធ្ងន់ធ្ងរដល់សន្តិសុខសង្គម។ ប៉ុន្តែក្រោយមកអាជ្ញាធរបានដោះលែងលោកវិញ ក្រោយពីលោក ហ៊ុន សែន ប្រកាសឱ្យដោះលែងសកម្មជនបក្សប្រឆាំងទាំងឡាយណា ដែលមានពាក់ព័ន្ធនឹងគម្រោងមាតុភូមិនិវត្តន៍របស់ លោក សម រង្ស៊ី។

ឆ្លើយតបនឹងបញ្ហានេះ អនុប្រធានប៉ុស្តិ៍នគរបាលរដ្ឋបាលឃុំកំពង់ព្រះ លោក សំ អុល ប្រាប់អាស៊ីសេរីថា រឿងនេះពុំមែនជាការគំរាមកំហែងអ្វីនោះទេ គឺលោកមានបំណងល្អដោយសារលោក ឌឹម សារឿន មិនបានមកបង្ហាញខ្លួននៅប៉ុស្តិ៍ដូចពេលមុនៗ៖ « គាត់មកបង្ហាញខ្លួនរៀងរាល់ថ្ងៃ អីចឹងព្រឹកម៉ិញថ្ងៃទី៣១វាមិនដាច់ខែ ជិតដាច់ឆ្នាំទូរស័ព្ទសួរគាត់នៅណា គាត់ថា គាត់នៅផ្ទះអីចឹងអត់មកប៉ុស្តិ៍បង្ហាញទេអី។ អីចឹងដល់នេះគាត់ឆ្លើយថាខាងមេធាវីគាត់ហ្នឹងគេឈប់ឱ្យបង្ហាញខ្លួនហើយ ខ្ញុំថាមិនដឹងទេចាំខ្ញុំជម្រាបជូនអធិការសិនអីចឹង។»

អាជ្ញាធរមូលដ្ឋាននៅខេត្តមួយចំនួនទៀតក៏រឹតបន្តឹងសកម្មភាពនយោបាយរបស់សកម្មជនបក្សប្រឆាំងដូចគ្នានេះដែរ។

កាលពីរសៀល ថ្ងៃទី២៩ ខែធ្នូ ប្រធាន និងអនុប្រធានភូមិព្រៃពោធិ៍ និងសមាជិកក្រុមប្រឹក្សាឃុំធ្មារ ស្រុករំដួល ខេត្តស្វាយរៀង បានព្រមានអនុប្រធានគណបក្សង្គ្រោះជាតិស្រុករំដួល គឺលោក ព្រុំ សុធី មិនឲ្យទៅទទួលថ្នាក់ដឹកនាំគណបក្សប្រឆាំងធ្វើមាតុភូមិនិវត្តន៍នៅពេលខាងមុខឡើយ។

ចំណែកទីបញ្ជាការតំបន់ប្រតិបត្តិការសឹករងខេត្តបន្ទាយមានជ័យ ដែលនៅជាប់ព្រំដែនប្រទេសថៃវិញបានចេញបទបញ្ជាឱ្យកងកម្លាំងទាំងអស់ចូលបន្ទាយជាបន្ទាន់ និងមិនអនុញ្ញាតច្បាប់ឱ្យកងកម្លាំងណាម្នាក់ឈប់សម្រាកអំឡុងពេលនេះឡើយ។ មេបញ្ជាការសឹករងខេត្តបន្ទាយមានជ័យ លោក ជឹម ប៊ុនអាន បានបញ្ជាក់នៅក្នុងលិខិតចុះថ្ងៃទី២៩ ខែធ្នូថា វិធានការនេះអនុវត្តតាមបទបញ្ជារបស់រដ្ឋាភិបាល ដើម្បីទប់ស្កាត់ពលរដ្ឋឆ្លងដែនមកពីប្រទេសថៃ កុំឱ្យមានការរាតត្បាតជំងឺកូវីដ-១៩ចូលមកកម្ពុជា។

អាជ្ញាធររបបក្រុងភ្នំពេញដាក់ចេញវិធានការទាំងនេះ ស្របពេលគម្រោងវិលចូលស្រុករបស់ក្រុមមេដឹកនាំគណបក្សសង្គ្រោះជាតិដឹកនាំដោយអ្នកស្រី មូរ សុខហួរ កាន់តែខិតជិតមកដល់គឺនៅថ្ងៃច័ន្ទ ទី០៤ ខែមករា ដើមសប្តាហ៍ក្រោយនេះ។

ប្រធានផ្នែកសិទ្ធិមនុស្សនៃសមាគមការពារសិទ្ធិមនុស្សអាដហុក(Adhoc)លោក នី សុខា យល់ថា រឿងនេះជាការគំរាមកំហែងផ្នែកនយោបាយ ដើម្បីរារាំងកុំឱ្យសកម្មជនគណបក្សប្រឆាំងទៅគាំទ្រថ្នាក់ដឹកនាំគណបក្សនេះវិលចូលស្រុកនៅថ្ងៃទី៤ ខែមករា។ លោកថាវិធានការរបស់អាជ្ញាធរនេះជាទង្វើខុសច្បាប់ជាការរឹតត្បិតសិទ្ធិសេរីភាពជួបប្រជុំរបស់ពលរដ្ឋ ហើយជាការដើរចាកឆ្ងាយពីគន្លងប្រជាធិបតេយ្យ៖ «យើងកុំឱ្យមានការភាន់ច្រឡំអំពីការគ្រាន់តែជួបជុំគ្នាទាល់តែសុំច្បាប់ ត្រូវតែមានការអនុញ្ញាតអីហ្នឹង ខ្ញុំគិតថា អាហ្នឹងមិនមែនជាប្រទេសប្រកាន់ប្រជាធិបតេយ្យទេ។ ប្រទេសប្រជាធិបតេយ្យគេមិននិយាយអីចឹងទេ គេនិយាយពីសេរីភាពការជួបជុំកុំឱ្យតែការជួបជុំហ្នឹងវាទៅប្រព្រឹត្តអំពើឧក្រិដ្ឋ ឬក៏អំពើអី ដែលធ្វើឱ្យអំពើហិង្សា ធ្វើឱ្យប៉ះពាល់ទៅដល់អាយុជីវិតអ្នកដទៃ និងទ្រព្យសម្បត្តិអ្នកដទៃបានខុស។»

មន្ត្រីសង្គមស៊ីវិលរូបនេះបន្ថែមថា ប្រជាពលរដ្ឋចូលរួមគាំទ្រថ្នាក់ដឹកនាំមន្ត្រីបក្សប្រឆាំងវិលចូលស្រុកវិញ ដើម្បីតតាំងក្តីក្នុងតុលាការពុំមែនជាអំពើខុសច្បាប់ឡើយ ព្រោះជាសិទ្ធិសេរីភាពរបស់ពលរដ្ឋដោយស្របតាមរដ្ឋធម្មនុញ្ញ។ លោកអំពាវនាវដល់អាជ្ញាធរអោយបញ្ឈប់ការចាប់ចងពលរដ្ឋ ដែលមានទស្សនៈនយោបាយផ្ទុយ និងបើកលំហសិទ្ធិសេរីភាពដល់ពលរដ្ឋឡើងវិញ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទពេញនិយម

RFA

ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ

អត្ថបទពេញនិយម

នយោបាយ

អង្គការសិទ្ធិមនុស្សថ្កោលទោសរដ្ឋាភិបាលម៉ាឡេស៊ីបញ្ជូនពលករខ្មែរម្នាក់ ឱ្យអាជ្ញាធរកម្ពុជា ដោយសារតែរិះគន់លោក ហ៊ុន សែន