មន្ត្រីគណបក្សភ្លើងទៀនចោទប្រកាន់អភិបាលស្រុកសាលាក្រៅខេត្តប៉ៃលិនថា បានបញ្ជាឲ្យអាជ្ញាធរមូលដ្ឋាន និងកម្លាំងទៅដកស្លាកគណបក្សភ្លើងទៀន ដែលទើបបានលើកនៅមុខផ្ទះសកម្មជនគណបក្សនេះកាលពីព្រឹក ថ្ងៃទី២៦ ខែមករា។ ទោះយ៉ាងណា អភិបាលស្រុកដែលរងចោទប្រកាន់ឆ្លើយតបថា លោកមិនបានដឹងរឿងនេះទេ និងព្រមានប្ដឹងចំពោះការចោទប្រកាន់នេះ។
គណបក្សភ្លើងទៀន ខេត្តប៉ៃលិនឲ្យដឹងថា អភិបាលស្រុក សាលាក្រៅ ខេត្តប៉ៃលិន លោក សំ សារ៉េត បានបញ្ហាអាជ្ញាធរឲ្យទៅដកស្លាកគណបក្សភ្លើងទៀន ដែលទើបបានលើកនៅមុខផ្ទះសកម្មជនគណបក្សនេះនៅភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន។ ប្រភពដដែលឲ្យដឹងទៀតថា លោកអភិបាលក៏បញ្ជាមេភូមិ មេឃុំ ឲ្យទៅដកស្លាកគណបក្សភ្លើងទៀនមួយកន្លែងទៀត នៅភូមិភ្នំកុយ ក្នុងឃុំ ស្រុកដដែល ប៉ុន្តែត្រូវសកម្មជនគណបក្សភ្លើងទៀនបញ្ឈប់ទាន់ពេល។
ប្រធានបក្សភ្លើងទៀន ខេត្តប៉ៃលិន លោក ខឹម មុនីកុសល ឲ្យវិទ្យុអាស៊ីសេរីដឹងថា ក្រុមអាជ្ញាធរចោទប្រកាន់ថា ការលើកស្លាកនេះ ព្រោះគណបក្សមិនបានជូនដំណឹងទៅអាជ្ញាធរ ប៉ុន្តែ លោកអះអាងថា លោកដាក់លិខិតជូនដំណឹងអាជ្ញាខេត្ត ស្រុក ឃុំ និងភូមិ តាំងពីថ្ងៃទី១៨ ខែមករាមកម៉្លេះ។ លោកយល់ថា ទង្វើរបស់អាជ្ញាធរស្រុកសាលាក្រៅបែបនេះ ជាការរំខាន និងរារាំងការធ្វើសកម្មភាពរបស់គណបក្សភ្លើងទៀន៖ « មេឃុំ និងមេភូមិដែលមកហ្នឹងគាត់ ក៏បានបញ្ជាក់ថា គាត់បានទទួលជូនដំណឹងរបស់ខ្លួនហើយ ប៉ុន្តែអត់មានលិខិតអនុញ្ញាតពីថ្នាក់លើ គាត់និយាយអញ្ចឹង។ ខ្ញុំគិតថា គាត់មានចេតនារារាំងរំខានអញ្ចឹងតែម្ដងដោយគាត់មិនគោរពច្បាប់ និងការណែនាំអនុញ្ញាតពីថ្នាក់លើ » ។
ទោះបីជាយ៉ាងណា លោក ខឹម មុនីកុសល បានឲ្យដឹងថា ក្រុមការងារគណបក្សនេះ បាននាំគ្នាទៅលើកស្លាកគណបក្សភ្លើងទៀន ដែលមានទីតាំង ភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិនវិញហើយ ក្រោយពីអាជ្ញាធរអាជ្ញាធរបានដកកាលពីព្រឹកមិញនេះ។
អាជ្ញាធរដកស្លាកគណបក្សភ្លើងទៀននេះ គឺធ្វើឡើងបន្ទាប់ពីរដ្ឋមន្ត្រីក្រសួងមហាផ្ទៃលោក ស ខេង រំលឹកទៅអាជ្ញាធរថា ត្រូវប្រកាន់នូវជំហរអព្យាក្រឹត្យគ្រប់គណបក្សនយោបាយ និងមានភារកិច្ចការពារគណបក្សនយោបាយ ដោយមិនបែងចែក មិនប្រកាន់ក្នុងការចូលរួមការប្រកួតប្រជែងក្នុងការបោះឆ្នោតឃុំសង្កាត់នាពេលខាងមុខ។
ឆ្លើយតបការចោទប្រកាន់នេះ អភិបាលស្រុកសាលាក្រៅ ខេត្តប៉ៃលិន លោក សំ សារ៉េត ឆ្លើយតបថា លោកមិនបានដឹកនាំ និងមិនបានដឹងថា ក្រុមណាដែលទៅដកស្លាកនេះទេ។ ទោះយ៉ាងណា លោកចោទប្រកាន់ថា ក្រុមគណបក្សភ្លើងទៀន មិនបានជូនដំណឹងឲ្យលោកបានដឹង ពីការលើកស្លាកនេះឡើយ។ លោកអះអាងថា តាមគោលការណ៍មុនពេលស្លាកគណបក្សនយោបាយណាមួយត្រូវរង់ចាំអាជ្ញាធរឆ្លើយតបថា បានទទួលលិខិតជាមុនសិនទើបអាចលើកស្លាកបាន៖ «អត់ផង គាត់ឲ្យដឹងភូមិឃុំតែខ្ញុំគាត់ឲ្យអត់ដឹងផង គាត់ដាក់លិខិតសួរថា ខ្ញុំបានទទួលហើយនៅ ? បើខ្ញុំមិនដឹងលិខិតនៅណាផង បងឯងជាអ្នករដ្ឋបាលមួយដែរ បងឯងត្រូវយល់ ដាក់លិខិតទៅគេគេមកវិញគេបានទទួលថ្ងៃណា ? ខែណា ? បានទទួលនៅ ?»។
ផ្ទុយពីការលើកឡើងនេះ នាយកប្រតិបត្តិអង្គការឃ្លាំមើលការបោះឆ្នោតនៅកម្ពុជា ហៅកាត់ ថា និចហ្វិច (NICFEC) លោក សំ គន្ធាមី មានប្រសាសន៍ថា គ្រប់គណបក្សដែលបានចុះបញ្ជីនៅក្រសួងមហាផ្ទៃរួចហើយការលើកស្លាករបស់គណបក្សនយោបាយណាមួយគឺ គ្រាន់តែជូនដំណឹងទៅអាជ្ញាធរ គឺគ្រប់គ្រាន់ហើយ។ លោកយល់ថា ក្រសួងមហាផ្ទៃ គួរមានវិធានការលើសមត្ថកិច្ច ដែលបំពេញការងារមិនត្រឹមត្រូវច្បាប់ និងការណែនាំរបស់រដ្ឋមន្ត្រីក្រសួងមហាផ្ទៃ៖ «គេ (គណបក្សនយោបាយ ) គ្រាន់ជូនដំណឹងទៅហើយគេរៀបចំលើកស្លាកទៅបានហើយ។ ខ្ញុំក៏ចង់ឃើញសម្ដេច ស ខេង គាត់អនុវត្តដែរ គាត់ណែនាំអ៊ីចឹង ហើយគាត់ (មន្ត្រីថ្នាក់ក្រោម ) មិនព្រមស្ដាប់ ចាត់វិធានការតាមផ្លូវច្បាប់ទៅការងាររដ្ឋបាលមានបាទជាមេរៀនទៅបណ្ដាឃុំផ្សេងៗទៀត ឬក៏ខេត្តផ្សេងៗ ទៀតបាទ »។
ពត៌មានបន្ទាន់ ប៉ៃលិនថ្ងៃទី២៦ មករា ២០២២ វេលាម៉ោង ១១ ថ្ងៃត្រង់ កំលាំងរបស់រដ្ឋបាលស្រុកសាលាក្រៅ បញ្ជាដោយលោក...
Posted by Sophea Sun on Tuesday, January 25, 2022
គណបក្សភ្លើងទៀន មានឈ្មោះដើមមកពីគណបក្សជាតិខ្មែរ បន្ទាប់មកប្ដូរឈ្មោះមកជាគណបក្ស សម រង្ស៊ី ដែលត្រូវបង្កើតដោយលោក សម រង្ស៊ី កាលពីនៅឆ្នាំ១៩៩៥។ គណបក្សនេះទើបចាប់ផ្ដើមធ្វើសកម្មភាពនយោបាយឡើងវិញកាលពីចុងឆ្នាំ២០២១ ក្រោយរដ្ឋាភិបាល រំលាយគណបក្សសង្គ្រោះជាតិកាលពីឆ្នាំ២០១៧។
ចាប់តាំងពីគណបក្សភ្លើងទៀន នេះធ្វើសកម្មភាពនយោបាយ និងលើកស្លាករបស់ខ្លួនមក សកម្មជនគណបក្សនេះ ត្រូវអាជ្ញាធរចាប់ខ្លួន និងសកម្មជនមួយចំនួនទៀតរងការព្រមានពីគណបក្សកាន់អំណាច។ ក្រៅពីនេះអាជ្ញាធរ និងជនមិនស្គាល់មុខ នៅខេត្តសៀមរាប កំពង់ចាម ខេត្តកំពត និងចុងក្រោយខេត្តប៉ៃលិនបានរំខានការលើកស្លាកគណបក្ស និងបំផ្លាញស្លាកគណបក្ស។
ប្រធានស្ដីទីគណបក្សភ្លើងទៀនលោក ថាច់ សេដ្ឋា ឲ្យដឹងថា ប្រសិនគណបក្សភ្លើងទៀន បន្តជួបបញ្ហាបែបនេះតទៀត គណបក្សភ្លើងទៀន នឹងដាក់លិខិតទៅក្រសួងមហាផ្ទៃ ដើម្បីស្នើអន្តរាគមន៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។