មន្ត្រី​បក្ស​ប្រឆាំងបាត់ដំបង៖ អាជ្ញាធរ​ដាក់​កម្លាំង​តាម​ដាន​សកម្មជន​បក្ស​ខ្លួន​ក្នុង​មូលដ្ឋាន​យ៉ាង​តឹងរ៉ឹង

2019-03-08
អ៊ីម៉ែល
មតិ
Share
បោះពុម្ព
សកម្មភាព​សកម្មជន​បក្ស​ប្រឆាំង​បន្ត​ជួបជុំគ្នា​ពង្រឹង​សាមគ្គីភាព នៅ​ឃុំ​ខ្នាចរមាស ស្រុក​បវេល ខេត្ត​បាត់ដំបង កាល​ពី​ថ្ងៃ​ទី៦ ខែ​មករា ឆ្នាំ​២០១៩។
សកម្មភាព​សកម្មជន​បក្ស​ប្រឆាំង​បន្ត​ជួបជុំគ្នា​ពង្រឹង​សាមគ្គីភាព នៅ​ឃុំ​ខ្នាចរមាស ស្រុក​បវេល ខេត្ត​បាត់ដំបង កាល​ពី​ថ្ងៃ​ទី៦ ខែ​មករា ឆ្នាំ​២០១៩។
Photo Provided

មន្ត្រី​គណបក្ស​ប្រឆាំង​នៅ​ខេត្ត​បាត់ដំបង​ អះអាង​ថា​ មួយ​រយៈ​ចុងក្រោយ​នេះ​អាជ្ញាធរ​​បាន​​ដាក់​កម្លាំង​សមត្ថកិច្ច​ជា​ច្រើន​នាក់​តាម​ដាន​សកម្មជន​របស់​គណបក្ស​ខ្លួន​នៅ​តាម​មូលដ្ឋាន​គ្រប់​ស្រុក​យ៉ាង​តឹងរ៉ឹង ជា​ពិសេស​នៅ​តាម​ព្រំដែន​ ហើយ​បាន​​ប៉ះពាល់​ដល់​សិទ្ធិ​សេរីភាព​ក្នុង​ការ​ដើរហើរ​របស់​ពួកគាត់​។

ប្រធាន​គណបក្ស​សង្គ្រោះ​ជាតិ​ខេត្ត​បាត់ដំបង​លោក ជា ជីវ មាន​ប្រសាសន៍​ប្រាប់​អាស៊ី​សេរី​នៅ​រសៀល​ថ្ងៃ​ទី​៨​ មីនា​ថា សមត្ថកិច្ច​ដែល​តាម​ដាន​សកម្មជន​នៅ​តាម​មូលដ្ឋាន​មាន​ប៉ូលិស​ មន្ត្រី​កងរាជអាវុធហត្ថ​ និង​ប្រជា​ការពារ​ភូមិ បាន​ដាក់​ពង្រាយ​ឃ្លាំមើល​សកម្មជន​ដែល​មាន​ប្រជាប្រិយ។លោក​អះអាង​ទៀត​ថា កន្លែង​ខ្លះ​មាន​ប៉ូលិស ២ទៅ ៣នាក់​ឆ្វែល​ផ្ទះ​មន្ត្រី​គណបក្ស​លោក​ជា​ប្រចាំ​ដែល​ធ្វើ​ឲ្យ​ពិបាក​ក្នុង​ការ​រស់​នៅ​ ជា​ពិសេស​ ស្រុក​នៅ​ជាប់​ព្រំដែន​ប្រទេស​ថៃ ដូច​ជា​ស្រុក​សំឡូត សំពៅ​លូន​ និង​ស្រុក​បវេល​ជា​ដើម​។ លោក​បន្ត​ថា​ ចំពោះ​រូប​លោក​ផ្ទាល់​ដែល​មាន​ឈ្មោះ​ក្នុង​បញ្ជី​ខ្មៅ​ក្នុង​ចំណោម​ជាង​ ១១០​នាក់​ដែល​ហាម​ឃាត់​ធ្វើ​នយោបាយ​នោះ​​ ក៏​មាន​ប៉ូលិស​​មាន​ទាំង​ស្លៀកពាក់​ស៊ីវិល​និង​ឯ​សណ្ឋាន​តាម​ដាន​លោក​ជា​រៀង​រាល់​ដែរ៖ «ហើយ​ប្រៀប​ដូច​ជា​គុក​គ្មាន​ជញ្ជាំង​ ដែល​​ធ្វើ​ឲ្យ​ធុញ​ទ្រាន់​ ក្នុង​នោះ​មាន​ពេល​ខ្លះ​សមត្ថកិច្ច​មក​ដល់​ផ្ទះ​ខ្ញុំ​បណ្ដោយ​ មក​ថា​ខ្ញុំ​នៅ​អត់​ ហើយ​ថ្ងៃ​មុន​ខ្ញុំ​ទៅ​ស្រុក​សំឡូត​ នៅ​ក្នុង​ហាង​កាហ្វេ​មួយ​ក្នុង​សំឡូត​ ស្រាប់​តែ​មាន​ប្រជា​ការពារ​​ មាន​អធិការ​រង​ស្រុក​ផង​ មាន​មន្ត្រី​នគរបាល​ឃុំ​ និង​មាន​ប៉ូលិស​ពីរ​បី​នាក់​នៅ​ទី​នោះ​តែ​ម្ដង»

ចំណែក​អតីត​សមាជិក​ក្រុម​ប្រឹក្សា​ឃុំ​ខ្នាច​រមាស​ ស្រុក​បវេល​ លោក នឹម ឡុង អះអាង​ថា​ ប្រមាណ​១សប្ដារហ៍​នេះ​សមត្ថកិច្ច​តាម​ឃ្លាំង​មើល​សកម្មភាព​របស់​លោក​យ៉ាង​តឹងរ៉ឹង ដោយ​មិន​ដឹង​មូលហេតុ​អ្វី​បាន​ជា​សមត្ថកិច្ច​តាម​ដាន​ដូច្នេះ​ឡើយ​។លោក​បន្ត​ថា សិទ្ធិ​រស់​នៅ​របស់​ពួកគាត់​ជា​សកម្មជន​គណបក្ស​ប្រឆាំង​តាម​មូលដ្ឋាន​កាន់​តែ​រួញ​តូច ប្រៀប​បាន​សម័យ​អាវ​ខ្មៅ ៣ឆ្នាំ​ ៨ខែ និង​សម័យ​កងទ័ព​វៀតណាម​ឃ្លាន​ទឹកដី​កម្ពុជា​កាល​ពី​ទសវត្ស​ឆ្នាំ​១៩៨០ ព្រោះ​ក្នុង​ការ​ធ្វើ​ដំណើរ​ទៅ​ណា​មក​ណា គឺ​អាជ្ញាធរ​តាម​គ្រប់​ជំហាន៖ «និយាយ​ឲ្យ​ចំ​ទៅ​យើង​ចង់​ជួប​គ្នា​កន្លែង​ផ្សេង​ក្រៅ​ពី​ហាង​កាហ្វេ​ និង​ហាង​គុយទាវ​ គឺ​មាន​ការ​លំបាក​ណាស់។ ពួក​ខ្ញុំ​ចង់​បាន​ការ​រស់​នៅ​ការ​និយាយ​ស្ដី​មាន​សេរីភាព​ ព្រោះ​បើ​យើង​អត់​មាន​សេរី​ភាព​ទោះ​ខំទ្រាំ​ទៀត​ ក៏​កាន់​តែ​លំបាក​ដែរ។ ដូច្នេះ​យើង​ត្រូវ​ការ​ផ្លាស់​ប្ដូរ​ដោយ​សន្តិវិធី​មួយ​ ហើយ​បើ​សិន​ជា​គេ​បាញ់​ស្លាប់​ ក៏​មិន​ដឹង​ធ្វើ​យ៉ាង​មិច​ដែរ​ ព្រោះ​យើង​ត្រូវ​តែ​ផ្លាស់​ប្ដូរ»

ស្នងការ​រង​ទទួល​បន្ទុក​ផ្នែក​ព្រហ្មទណ្ឌ​លោក ជេត វណ្ណនី មិន​មាន​ប្រតិកម្ម​ជុំ​វិញ​បញ្ហា​នេះ​នៅ​ឡើយ​ទេ ដោយ​ឆ្លើយ​ថា​ជាប់រវល់​នៅ​ភ្នំពេញ៖ «ខ្ញុំ​ស្ដាប់​អត់​លឺ​សោះ! សូម​បង​សួរ​ទៅ​លោក មាន ឡាយ ទៅ ព្រោះ​ខ្ញុំ​មក​ដល់​ភ្នំពេញ​ហើយ។ សូម​សួរ​ទៅ​គាត់​ទៅ»

ចំណែក​ស្នងការ​រង​នគរបាល​ខេត្ត​បាត់ដំបង​ទទួល​បន្ទុក​ផ្នែក​សន្តិសុខ​ លោក មាន ឡាយ ក៏​មិន​អាច​សុំ​អត្ថាធិប្បាយ​ជុំ​វិញ​បញ្ហា​នេះ​បាន​ទេ​នៅ​ថ្ងៃ​ទី​៨​មីនា ដោយ​ទទួល​ទូរស័ព្ទ​ហើយ​ប្រាប់​ថា​ស្ដាប់​មិន​លឺ ហើយ​ក៏​បិទ​ទូរស័ព្ទ​ទៅ​វិញ៖ «អាឡូ! បាទ! បាទ​ជម្រាប​សួរ! អាឡូ! អាឡូ​បាទ!»

ទោះ​ជា​យ៉ាង​នេះ​ក្ដី​ប្រធាន​គ្រប់គ្រង​ផ្នែក​ឃ្លាំមើល​ការ​​សិទ្ធិមនុស្ស អង្គការ លីកាដូ (Licadho) លោក អំ សំអាត លើក​ឡើង​ថា អាជ្ញាធរ​ដាក់​កម្លាំង​តាមដាន​​ប្រជាពលរដ្ឋ គឺ​ជា​ការរំលោភ​សិទ្ធិ​រស់​នៅ និង​សិទ្ធិ​ធ្វើ​នយោបាយ​​របស់​ពលរដ្ឋ​ដោយ​ខុស​ច្បាប់​ ព្រោះ​សិទ្ធិ​នេះ​​មាន​កំណត់​នៅ​ក្នុង​រដ្ឋធម្មនុញ្ញ និង​កត្តិក​អន្តជាតិ​។ ទោះ​ជា​យ៉ាង​នេះ​ណា​ក្ដី ​មន្ត្រី​សង្គម​ស៊ីវិល​រូប​នេះ​ កត់សម្គាល់​ថា បញ្ហា​នេះ​កើត​ឡើង​​ដោយសារ​មួយ​រយៈ​ចុង​ក្រោយ​នេះ មន្ត្រី​គណបក្ស​ប្រឆាំង​នៅ​ក្នុង​ស្រុក​ហាក់​ផុលផុស​ក្នុង​ការ​រួម​កម្លាំង​​​ពង្រឹង​សាមគ្គី​គណបក្ស​ ដោយ​ការ​ជួប​ជុំ​គ្នា​សម្ដែង​មតិ​គាំទ្រ​ និង​រង់​ចាំ​ទទួល​លោក សម រង្ស៊ី វិល​ចូល​ស្រុក​វិញ៖ «អ្វី​ដូច​ការ​លើក​នេះ វា​ធ្វើ​ប៉ះពាល់​ធ្ងន់ធ្ងរ​ដល់​ជីវភាព​រស់​នៅ​របស់​ពលរដ្ឋ ព្រោះ​ធ្វើ​ឲ្យ​ពួក​គាត់​មាន​ការ​ភ័យ​ខ្លាច​មិន​ហ៊ាន​ចេញ​ទៅ​ប្រកប​មុខ​របរ​ផ្សេងៗ ហើយ​មិន​ហ៊ាន​ចេញ​ទៅ​ក្រៅ ដើម្បី​រក​របរ​ចិញ្ចឹម​ជីវិត ឬ​ក៏​ធ្វើ​ការងារ​ទ្រទ្រង់​ជីវភាព​គ្រួសារ គឺ​វា​ប៉ះពាល់​ធ្ងន់ធ្ងរ​ទៅ​ដល់​ជីវភាព​របស់​ពួក​គាត់​ដោយសារ​ការ​ភ័យ​ខ្លាច»

មន្ត្រី​គណបក្ស​សង្គ្រោះ​ជាតិ​ខេត្ត​បាត់ដំបង​ទាំង ​២រូប​នេះ​​អះអាង​ថា បើ​ទោះ​បី​ជា​មាន​សមត្ថកិច្ច​តាម​ដាន​ពួកគាត់​យ៉ាង​នេះ​ក្ដី​ ក៏​សកម្មជន​នៅ​តាម​មូលដ្ឋាន​ក្នុង​ខេត្ត​នេះ​នៅ​តែ​ប្រកាន់​ជំហរ​គាំទ្រ​​ប្រធាន​ស្ដីទី​គណបក្ស​នេះ​វិល​ចូល​ស្រុក​ និង​ត្រៀម​កម្លាំង​រង់ចាំ​ទទួល​លោក សម រង្ស៊ី នៅ​គ្រប់​ទីកន្លែង ដោយ​មិន​ខ្លាច​ស្លាប់ និង​ត្រូវ​អាជ្ញាធរ​ចាប់​ដាក់​គុក​នោះ​ឡើយ​ ព្រោះ​ពួកគាត់​យល់​ថា ស្ថានការណ៍​នយោបាយ​​នៅ​កម្ពុជា​សព្វ​ថ្ងៃ​កាន់​តែ​ដុនដាប​ ដូច្នេះ​មាន​​តែ​លោក សម រង្ស៊ី និង​ លោក កឹម សុខា ទេ ដែល​អាច​ស្ដារ​ប្រជាធិបតេយ្យ​ឲ្យ​រស់​នៅ​ឡើង​វិញ​ និង​ជួយ​ឲ្យ​ប្រទេស​មាន​ការ​អភិវឌ្ឍន៍​រីក​ចំរើន​បាន​ឆាប់​រហ័ស៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល