​តុលាការ​ខេត្ត​បាត់ដំបង​បន្ត​សាកសួរ​សកម្មជន​បក្ស​ភ្លើងទៀន ខណៈ​ដើម​ចោទ​បាន​ដក​ពាក្យ​បណ្ដឹង

0:00 / 0:00

តុលាការ​ខេត្ត​បាត់ដំបង នៅតែ​បន្ត​ចោទប្រកាន់​និង​សាកសួរ​សកម្មជន​បក្ស​ភ្លើងទៀន​ម្នាក់ ពាក់ព័ន្ធ​នឹង​ករណី​ថត​វីដេអូ​មន្ត្រី​បក្ស​កាន់អំណាច​ដែល​អង្គុយ​កត់​ឈ្មោះ​ពលរដ្ឋ​នៅក្នុង​ថ្ងៃ​បោះឆ្នោត ទោះបី​ដើម​ចោទ បាន​ដក​ពាក្យបណ្ដឹង​វិញ​ក៏ដោយ​។ មន្ត្រី​សង្គម​ស៊ីវិល និង​មន្ត្រី​បក្ស​ភ្លើងទៀន ចាត់ទុកថា​នីតិវិធី​របស់​តុលាការ​ក្នុង​ករណី​នេះ​ពាក់ព័ន្ធ​នឹង​រឿង​នយោបាយ​ជាជាង​បណ្ដឹង​ឯកជន។

ប៉ូលិស​ខេត្ត​បាត់ដំបង នៅ​ថ្ងៃទី​៩ ខែ​មិថុនា បាន​បញ្ចូន​សមាជិក​ក្រុម​ការងារ​គណបក្ស​ភ្លើងទៀន​ខេត្ត​បាត់ដំបង លោក ឡី សុខុន ទៅ​សាកសួរ​នៅ​តុលាការ​ខេត្ត​នេះ ហើយ​បន្ទាប់​មក ព្រះរាជ​អាជ្ញា​រង​អម​សា​ដំបូង​ខេត្ត​បាត់ដំបង​បាន​បញ្ជូន​សកម្មជន​នយោបាយ​រូប​នេះ​ទៅ​ឃុំខ្លួន​បណ្ដោះអាសន្ន​នៅ​ស្នងការដ្ឋាន​នគរបាល​ខេត្ត​វិញ ដើម្បី​រង់ចាំ​បន្ត​នីតិវិធី​សាកសួរ​នៅ​ថ្ងៃទី​១០ ខែ​មិថុនា។ ទោះជា​យ៉ាងណា មន្ត្រី​បក្ស​ភ្លើងទៀន​ដែល​តាម​ឃ្លាំមើល​ករណី​នេះ ឲ្យ​ដឹង​ថា តុលាការ​បាន​ចោទប្រកាន់​លោក ឡី សុខុន រួច​ហើយ ចំនួន​ពីរ​បទ​ចោទ គឺ​ពី​បទ​រំលោភ​លើ​សិទ្ធិ​លំនៅឋាន និង​ក្លែង​ព័ត៌មាន​មិន​ពិត​នៅ​ក្នុង​ថ្ងៃ​បោះឆ្នោត។

​ប្រពន្ធ​របស់​លោក ឡី សុខុន គឺ​លោកស្រី លីន លីដា ប្រាប់​វិទ្យុ​អាស៊ីសេរី​ថា ព្រះរាជអាជ្ញា​រង​បាន​បន្ត​ការសាកសួរ​ប្ដី​លោកស្រី​នៅ​ម៉ោង​២​រសៀល​ថ្ងៃទី ៩​មិថុនា ប៉ុន្តែ​មិន​ទាន់​មាន​ការសម្រេច​ណាមួយ​នោះ​ទេ​។ អ្នកស្រី​បន្ត​ថា ករណីនេះ​មានការ​ជាប់​ពាក់ព័ន្ធ​ជាមួយនឹង​រឿង​នយោបាយ​ជាជាង​បណ្ដឹង​ឯកជន ព្រោះ​ដើមចោទ​បាន​ដក​ពាក្យបណ្ដឹង​តាំងពី​ល្ងាច​ថ្ងៃ​ចាប់ខ្លួន​ប្ដី​លោកស្រី​មក​ម្ល៉េះ៖ « ខ្ញុំ​មាន​អារម្មណ៍​ថា​វា​អយុត្តិធម៌​មែនទែន​។ តាមពិត​សាច់រឿង​អ្នក​ដែល​ជា​ដើមចោទ​ហ្នឹង​គឺ​គេ​បាន​ដក​ពាក្យ ( បណ្ដឹង ) ហើយ​អស់​ហើយ ប៉ុន្តែ​ខាង​រាជអាជ្ញា​គេ​អត់​ទាន់​បញ្ចប់​សាច់រឿង គេ​ឲ្យ​នៅ​បន្ត​ទៀត​។ ខ្ញុំ​ក៏​មិនដឹង​ថា​មានរឿង​អី​ដែរ ប៉ុន្តែ​អាច​សន្និដ្ឋាន​បាន​ថា​ពាក់ព័ន្ធ​នឹង​រឿង​នយោបាយ»។

ទាក់ទិន​ករណី​នេះ អនុប្រធាន​គណបក្ស​ភ្លើងទៀន​ខេត្តបាត់ដំបង លោក ភូ សុវណ្ណថា ឲ្យ​ដឹង​ថា ព្រះរាជអាជ្ញា​រង​ខេត្ត​បាត់ដំបង នៅ​បន្ត​ការ​សាកសួរ និង​ឃុំខ្លួន​លោក ឡី សុខុន នៅ​ស្នងការដ្ឋាន​នគរបាល​ខេត្ត​ដដែល ទោះបី​ដើម​បណ្តឹង​បាន​ដក​បណ្តឹង​វិញ និង​មានការ​សម្របសម្រួល​គ្នា​ហើយក៏​ដោយ​។ លោក​បន្ថែម​ថា តុលាការ​ហាក់​មាន​ភាព​លាក់លៀម​ចំពោះ​ករណីនេះ ដោយ​លោក​សង្ស័យ​ថា វា​ជា​ករណី​ពាក់ព័ន្ធ​នឹង​រឿង​នយោបាយ៖ «យើង​និយាយ​ជាមួយ​តុលាការ​ដូច​មាន​ភាព​លាក់លៀម ដូច​ចាំតែ​បញ្ជា​ថ្នាក់លើ​មក​ដើម្បី​ធ្វើការ​សម្រេចចិត្ត វា​មិនមែន​ជា​ការសម្រេចចិត្ត​ទៅតាម​សំណុំរឿង​ដែល​មាន​ដើមបណ្ដឹង​ប្ដឹង​។ រឿង​បើ​មើល​តាម​ដើមបណ្ដឹង​ប្ដឹង​ហើយនឹង​ការ​ចោទ​ហ្នឹង​វា​អត់​ធ្ងន់ធ្ងរ​ទេ តែ​មក​ដល់ដៃ​តុល​ការ​បង្ក​សំណុំរឿង​ហ្នឹង​ទៅជា​សំណុំរឿង​ធំ​វិញ មិន​ដឹង​ថា គេ​ទាក់ទង​នឹង​រឿង​នយោបាយ​តែ​គេ​យក​លេស​រឿង​ឯកជន តែបើ​នីតិវិធី​ទាក់ទង​នឹង​បណ្ដឹង​ហ្នឹង​វា​អត់​មានអី​សាំញ៉ាំ​ដល់​ម្ល៉ឹង​ទេ»។

កាលពី​ព្រឹក​ថ្ងៃទី​៩ មិថុនា ដើម​បណ្ដឹង​គឺ​លោក ឡាញ់ ជុន បាន​សរសេរ​លិខិត​ដក​ពាក្យបណ្ដឹង​វិញ ដោយ​នៅក្នុង​លិខិត​នោះ​បញ្ជាក់​ថា លោក ឡី សុខុន នឹង​ថត​វី​អូ​សុំទោស​ជា​សាធារណៈ នៅពេល​លោក​បាន​នៅក្រៅ​ឃុំ​។ លោក ឡាញ់ ជុន បញ្ជាក់ថា មូលហេតុ​ដែល​លោក​ដក​ពាក្យ​បណ្តឹង​វិញ ព្រោះ​លោក​យល់​ថា វា​ជា​កំហុស​តិចតួច និង​មិន​ចង់​ឲ្យ​មានរឿង​វែងឆ្ងាយ​តទៅទៀត​។ ប៉ុន្តែ​ប៉ូលិស​មិន​ព្រម ដោយ​អះអាង​ថា សំណុំរឿង​បាន​បញ្ជូន​ដល់ដៃ​តុលាការ និង​ត្រូវ​ដោះស្រាយ​នៅមុខ​តុលាការ​ដោយ​ខ្លួន​ឯង។

អាស៊ីសេរី​មិន​អាច​ទាក់ទង​ព្រះរាជអាជ្ញា​អម​សាលាដំបូង​ខេត្ត​បាត់ដំបង​លោក កែវ សុជាតិ និង​ស្នងការ​ខេត្ត​បាត់ដំបង​លោក សាត គឹមសាន ដើម្បី​សាកសួរ​រឿង​នេះ​បាន​នោះ​ទេ ដោយ​ទូរស័ព្ទ​ចូល​គ្មាន​អ្នក​ទទួល។

ជុំវិញ​ករណី​នេះ អ្នក​សម្របសម្រួល​ផ្នែក​ឃ្លាំមើល​ការរំលោភ​សិទ្ធិមនុស្ស​នៃ​អង្គការ​លីកាដូ (Licadho) ប្រចាំ​នៅ​ខេត្តបាត់ដំបង លោក អ៊ិន គង់ជិត មាន​ប្រសាសន៍​ថា ករណីនេះ​គ្រាន់តែ​ជា​ករណី​វិវាទ​នៅក្នុង​សហគមន៍​តែប៉ុណ្ណោះ ហើយ​ភាគី​ទាំងពីរ​ក៏បាន​សម្របសម្រួល​គ្នា​រួចហើយ​ដែរ ដូចនេះ​តុលាការ​គួរតែ​បិទ​បញ្ចប់​រឿងក្ដី ព្រោះ​បើ​ផ្អែក​តាម​អង្គហេតុ ករណីនេះ​មិន​មាន​អ្វី​ដែល​គួរ​ស្រាវជ្រាវ​ឬ​សាកសួរ​បន្ត​នោះ​ឡើយ។ លោក​ជំរុញ​ឲ្យ​តុលាការ​ដោះលែង លោក​ឡី សុខុន និង​ឲ្យ​ស្ថាប័ន​មួយ​នេះ​គួរ​ធ្វើ​តែ​កិច្ចការ​របស់​ខ្លួន​ទៅតាម​អង្គហេតុ​ដែល​មាន​នៅក្នុង​ពាក្យបណ្ដឹង៖ «​អំពើ​នេះ​វា​មិនមែន​បទល្មើស​ប្រឆាំង​នឹង​រដ្ឋ​ទេ វា​ជា​វិវាទ​រវាង​គូភាគី​នៅក្នុង​សហគមន៍ ហើយ​បើ​គាត់​បាន​ផ្សះផ្សា​គ្នា​ហើយ គួរតែ​លើកលែង​ឲ្យ​គាត់​។ តុលាការ​គួរ​ធ្វើ​អ្វី​ទៅតាម​តែ​ពាក្យបណ្ដឹង​និង​កម្រិត​តាម​របាយការណ៍​ដែល​មន្ត្រី​យុត្តិធម៌​បាន​បញ្ជូន​ទៅ មិន​គួរ​ពន្លាត​សមត្ថកិច្ច​ស្រាវជ្រាវ​បទល្មើស​អី​ទៀត ព្រោះ​អង្គហេតុ​វា​មានតែ​ប៉ុណ្ណឹង»។

លោក ឡី សុខុន ជា​សមាជិក​ក្រុមការងារ​គណបក្ស​ភ្លើងទៀន​ខេត្តបាត់ដំបង ត្រូវ​បាន​សមត្ថកិច្ច​ចាប់ខ្លួន​កាលពី​ព្រឹក​ថ្ងៃទី​៨ មិថុនា នៅ​ហាង​កាហ្វេ​មួយ​កន្លែង​ក្នុង​ក្រុង​បាត់ដំបង ដោយ​ចោទ​ពី​បទ​រំលោភសិទ្ធិ​លំនៅឋាន បន្ទាប់ពី​លោក​ថត​វីដេអូ​ក្រុម​អាជ្ញាធរ​មូលដ្ឋាន​ដូចជា​មេភូមិ​ជាដើម ដែល​ជា​អ្នកគាំទ្រ​បក្ស​កាន់អំណាច ដាក់​តុ​អង្គុយ​កត់​ឈ្មោះ​ពលរដ្ឋ នៅ​ក្បែរ​ការិយាល័យ​បោះឆ្នោត នៅ​ថ្ងៃ​បោះឆ្នោត​ក្រុម​ប្រឹក្សាឃុំ​-​សង្កាត់ ស្ថិតនៅ​ភូមិ​កំពង់​សំបួរ ឃុំ​សំរោងក្នុង ស្រុក​ឯកភ្នំ ខេត្ត​បាត់ដំបង។

គណបក្ស​ប្រឆាំង និង​សង្គម​ស៊ីវិល យល់​ថា នេះ​ជា​រឿង​មិន​ត្រឹមត្រូវ​នោះ​ទេ ដែល​អាជ្ញាធរ ចាប់ខ្លួន​លោក ឡី សុខុន ដែល​ជា​សាក្សី ឬ​ជា​អ្នក​បង្ហាញ​នូវ​ភស្តុតាង​នៃ​ភាព​មិន​ប្រក្រតី​នៅ​ក្នុង​ដំណើរការ​បោះឆ្នោត។ ពួកគាត់​យល់​ថា អាជ្ញាធរ គួរតែ​ដើរ​តួនាទី​ឯករាជ្យ ហើយ​ស៊ើបអង្កេត​និង​ផ្តល់​ដំណោះស្រាយ​ចំពោះ​ភាព​មិនប្រក្រតី​នៃ​ការបោះឆ្នោត​នោះ​វិញ ទើប​ជា​រឿង​ត្រឹមត្រូវ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។