សមត្ថកិច្ច​ខេត្ត​បន្ទាយមានជ័យ​បន្ត​រឹតត្បិត​សិទ្ធ​សេរីភាព​សកម្មជន​បក្ស​ប្រឆាំង

ដោយ អាស៊ីសេរី
2019-11-27
អ៊ីម៉ែល
មតិ
Share
បោះពុម្ព
សកម្មជន​គណបក្ស សង្គ្រោះ​ជាតិ ខេត្ត​បន្ទាយមានជ័យ ជួប​ជុំ​គ្នា​ពង្រឹង​សាមគ្គីភាព​នៅ​ភូមិ​ចាន់គិរី សង្កាត់​ប៉ោយប៉ែត ខេត្ត​បន្ទាយមានជ័យ កាល​ពី​ព្រឹក​ថ្ងៃ​ទី១ ខែ​មករា ឆ្នាំ២០១៩។
សកម្មជន​គណបក្ស សង្គ្រោះ​ជាតិ ខេត្ត​បន្ទាយមានជ័យ ជួប​ជុំ​គ្នា​ពង្រឹង​សាមគ្គីភាព​នៅ​ភូមិ​ចាន់គិរី សង្កាត់​ប៉ោយប៉ែត ខេត្ត​បន្ទាយមានជ័យ កាល​ពី​ព្រឹក​ថ្ងៃ​ទី១ ខែ​មករា ឆ្នាំ២០១៩។
រូបថត៖ ដោយ​ប្រជាពលរដ្ឋ

អាជ្ញាធរ​ខេត្ត​បន្ទាយមានជ័យ​បន្ត​បញ្ជូន​មនុស្ស​តាម​ឃ្លាំមើល​សកម្មជន​គណបក្ស​ប្រឆាំង​ជាពិសេស​អ្នក​រស់នៅ​តំបន់​ព្រំដែន​កម្ពុជា​-​ថៃ។ មន្ត្រី​សង្គម​ស៊ីវិល​ចាត់​ទុក​ទង្វើ​របស់​សមត្ថកិច្ច​នេះ​ថា ជា​ការ​រឹតត្បិត​សិទ្ធ​សេរី​របស់​ប្រជាពលរដ្ឋ​ដោយ​ខុសច្បាប់។

សកម្មជន​គណបក្ស​សង្គ្រោះជាតិ នៅ​ក្រុង​ប៉ោយប៉ែត ដែល​កំពុង​ភៀសខ្លួន​នៅ​ក្រៅ​ប្រទេស លោក ឆាំ សុភាន់ ឱ្យ​ដឹង​នៅ​ថ្ងៃ​ទី​២៧ វិច្ឆិកា ថា អាជ្ញាធរ​ក្រុង​ប៉ោយប៉ែត​បន្ត​ពង្រាយ​មនុស្ស​ជាច្រើន​នាក់​តាម​ឃ្លាំមើល​សកម្មជន​គណបក្សប្រឆាំង​ដល់​ផ្ទះ​ជា​រៀងរាល់ថ្ងៃ ធ្វើ​ឱ្យ​ពួកគាត់​មិន​ហ៊ាន​ចូល​ផ្ទះ ព្រោះ​ខ្លាច​អាជ្ញាធរ​ចាប់​ដាក់គុក​ដូច​ពេល​មុនៗ​ទៀត​។ លោក​បន្ត​ថា ប្រពន្ធ​របស់​លោក និង​សកម្មជន​មួយ​ចំនួន​ទៀត បាន​ទៅដល់​ផ្ទះ​នៅ​ស្រុក​ខ្មែរ​ហើយ ប៉ុន្តែ​មិន​ហ៊ាន​ចេញ​ដើរ​នៅ​ទី​សាធារណៈ​ដូច​គេឯង​ឡើយ ដោយសារ​មាន​មនុស្ស​ប្លែក​មុខ​តាមដាន​ពួកគាត់​គ្រប់​ពេល។

លោក​បន្ថែម​ថា សកម្មជន​គណបក្ស​ប្រឆាំង​ប្រមាណ ១០​នាក់ កំពុង​ភៀសខ្លួន​នៅ​ប្រទេស​ថៃ​មិន​ហ៊ាន​វិល​ចូល​ស្រុក​វិញ​ទេ ព្រោះ​នៅ​តំបន់​ព្រំដែន អាជ្ញាធរ​បន្ត​តាម​ចាប់ខ្លួន​ពួកគេ​មិន​ឈប់​ឡើយ​។​

អាស៊ីសេរី​មិនទាន់​អាច​សុំ​អត្ថាធិប្បាយ​ពី​រឿង​ធ្វើទុក្ខបុកម្នេញ​សកម្មជន​បក្ស​ប្រឆាំង​នេះ​ពី​អភិបាលក្រុង​ប៉ោយប៉ែត លោក គាត ហុ​ល បានទេ​នៅ​ថ្ងៃ​ទី​២៧ វិច្ឆិកា ដោយ​លោក​ប្រាប់​ថា​ជាប់​រវល់​ប្រជុំ។ «»

កាល​ពី​ពេល​ថ្មីៗ​នេះ មេដឹកនាំ​របប​ក្រុងភ្នំពេញ លោក ហ៊ុន សែន បាន​បញ្ជា​ឱ្យ​តុលាការ និង​ក្រសួង​យុត្តិធម៌​ដោះលែង​អ្នក​ទោស​នយោបាយ​ទាំងឡាយ ដែល​ពាក់ព័ន្ធ​នឹង​គម្រោង​ធ្វើ​មាតុភូមិនិវត្តន៍​របស់​ប្រធាន​ស្ដីទី​គណបក្ស​សង្គ្រោះជាតិ លោក សម រង្ស៊ី កាលពី​ថ្ងៃ​ទី​៩ វិច្ឆិកា​កន្លង​ទៅ​។ ប៉ុន្តែ​ប៉ុន្មាន​ថ្ងៃ​ក្រោយ​មក លោក​បាន​ព្រមាន​ចាប់ខ្លួន​មន្ត្រី​គណបក្ស​ប្រឆាំង​ជាច្រើន​នាក់​ដាក់គុក​វិញ ប្រសិនបើ​ពួកគេ​ហ៊ាន​និយាយ​ថា ការ​ដោះលែង​នេះ​ដោយសារ​សម្ពាធ​ពី​អន្តរជាតិ ឬ​ប្រសិនបើ​ពួកគេ​នៅតែ​បន្ត​សកម្មភាព​គាំទ្រ​បក្ស​ប្រឆាំង។

ផ្ទុយ​ពី​ការ​លើកឡើង​របស់​លោក​ហ៊ុន សែន នេះ អ្នកនាំពាក្យ​សមាគម​ការពារ​សិទ្ធិមនុស្ស​អាដហុក (Adhoc) លោក សឹង សែន ករុណា មានប្រសាសន៍ថា ថ្វីត្បិតតែ​ថ្មីៗ​នេះ តុលាការ​បាន​ដោះលែង និង​បន្ធូរបន្ថយ​លក្ខខណ្ឌ​ត្រួតពិនិត្យ​ដល់​មន្ត្រី​គណបក្ស​ប្រឆាំង​ក៏ដោយ ក៏​ស្ថានការណ៍​នយោបាយ​នៅ​កម្ពុជា​មិន​ទាន់​បាន​ធូរស្រាល​នៅ​ឡើយ​ទេ ពីព្រោះ​ពួកគេ​មិន​ទាន់​មាន​សិទ្ធិ​ពេញលេញ ក្នុង​ការ​ដើរហើរ​និង សិទ្ធិ​ធ្វើ​នយោបាយ​ដូច​ប្រជាពលរដ្ឋ​ដទៃ​នៅឡើយ។ លោក​បន្ត​ថា អាជ្ញាធរ​ដាក់​កម្លាំង​តាមដាន​សកម្មជន​បក្ស​ប្រឆាំង​គឺ ជា​ការ​បំភិតបំភ័យ​ផ្នែក​នយោបាយ​ដើម្បី​បំបាក់​ស្មារតី​ដល់​សកម្មជន​ធ្វើ​ឱ្យ​ពួកគេ​ភ័យខ្លាច។ ទោះជា​យ៉ាងណា លោក​ហៅ​ទង្វើ​របស់​អាជ្ញាធរ​ពាក់​ព័ន្ធ​នេះ​ថា​ជា​អំពើ​ខុសច្បាប់ ព្រោះ​រដ្ឋធម្មនុញ្ញ​បាន​កំណត់​ឱ្យ​ប្រជាពលរដ្ឋ​គ្រប់រូប​មាន​សិទ្ធិ​សេរីភាព​ពេញលេញ​ក្នុង​ការ​ចូលរួម​ជីវភាព​នយោបាយ​ដោយ​សេរី។ «»

មន្ត្រី​អង្គការ​សង្គម​ស៊ីវិល​រូប​នេះ​បន្ត​ថា សង្គម​ប្រជាធិបតេយ្យ​ដែល​ល្អ ត្រូវ​មាន​គណបក្សប្រឆាំង និង​គណបក្ស​កាន់អំណាច ដែល​មាន​អាសនៈ​នៅ​ក្នុង​រដ្ឋសភា​ប្រហាក់ប្រហែល​គ្នា ដើម្បី​មាន​អំណាច​តាមដាន​ការ​អនុវត្ត​ច្បាប់​របស់​រដ្ឋាភិបាល​មាន​ប្រសិទ្ធភាព ដែល​ធ្វើ​ឱ្យ​ប្រទេស​អភិវឌ្ឍ​ឆាប់​រហ័ស។ ផ្ទុយទៅវិញ​លោក​បញ្ជាក់​ថា ប្រទេស​ដែល​គ្រប់គ្រង​ដោយ​របប​ឯក​បក្ស​នឹង​ធ្វើ​ឱ្យ​ប្រទេស​នោះ​អភិវឌ្ឍ​មាន​ចំណុច​ចន្លោះប្រហោង​ច្រើនជាង​សង្គម​ប្រជាធិបតេយ្យ។

បច្ចុប្បន្ន​មាន​សកម្មជន​គណបក្ស​ប្រឆាំង​ជិត ១០០​នាក់ កំពុង​រស់នៅ​ភៀសខ្លួន​នៅ​ប្រទេស​ថៃ ហើយ​ពួកគេ​នៅតែ​ប្រកាន់​ជំហរ​រង់ចាំ​ទទួល​ថ្នាក់ដឹកនាំ​គណបក្ស​សង្គ្រោះ​ជាតិ​វិល​ចូល​ស្រុក​វិញ​ដដែល ដោយ​ពួកគាត់​ជឿ​ថា នៅ​ពេល លោក សម រង្ស៊ី ធ្វើ​មាតុភូមិនិវត្តន៍​នឹង​អាច​ជួយ​ដោះស្រាយ​វិបត្តិ​នយោបាយ​នៅ​កម្ពុជា​បាន​ធូរស្រាល​ឡើយ​វិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល