ក្រសួងការពារជាតិកម្ពុជា បង្ហាញជាសាធារណៈនូវសៀវភៅណែនាំស្តីពីក្បួនយុទ្ធសាស្ត្រផ្នែកយោធាដើម្បីជួយដល់យោធាកម្ពុជា ក្នុងការបង្កើតផែនការឲ្យមានស្តង់ដារ និងប្រសិទ្ធភាពក្នុងការការពារជាតិ ដែលត្រូវបានជួយគាំទ្រដោយវិទ្យាស្ថានកំណែទម្រង់ផ្នែកការពារជាតិរបស់សហរដ្ឋអាមេរិក។ មន្ត្រីសិទ្ធិមនុស្សសំដែងក្តីបារម្ភថា ជំនួយផ្នែកយោធារបស់អាមេរិក នឹងអាចជួយដល់យោធាកម្ពុជា បង្កើនការរំលោភសិទ្ធិមនុស្ស និងការបង្ក្រាបក្រុមបាតុករគណបក្សប្រឆាំង។
ប្រធាននាយកដ្ឋាននយោបាយ និងទំនាក់ទំនងការបរទេស លោកឧត្ដមសេនីយ៍ឯក នឹម សុវត្ថិ បញ្ជាក់ថា សៀវភៅណែនាំដែលមានកម្រាស់ ១៧ទំព័រ ដែលប្រើប្រាស់រយៈពេល ២២ខែ ដើម្បីកងចក្រ នឹងជួយយោធាកម្ពុជា ឲ្យចេះគិតបង្កើតផែនការជាយុទ្ធសាស្ត្រការពារជាតិ៖ «ការគិតគូរនិងការរៀបចំផែនការ ការវិភាគទៅលើស្ថានការណ៍នានា។ ការគិតពីការតាក់តែងផែនការ និយាយរួមគឺការគិតទៅវិញទេ»។
សៀវភៅណែនាំត្រូវបានចងក្រងឡើងដោយក្រុមជំនាញយោធាខ្មែរមួយក្រុមសហការនឹងអ្នកជំនាញផ្នែកយោធាអាមេរិក នៃវិទ្យាស្ថានផ្ដួចផ្ដើមកំណែទម្រង់ផ្នែកការពារជាតិ ដែលមានមូលដ្ឋាននៅរដ្ឋធានីវ៉ាស៊ីនតុន។ សៀវភៅនេះនឹងមានសារប្រយោជន៍សម្រាប់មេបញ្ជាការផ្នែកជើងគោក នាវា និងជើងអាកាស ដើម្បីបង្កើតជាស្តង់ដារយុទ្ធសាស្ត្រការពារជាតិឲ្យមានប្រសិទ្ធភាព។ សៀវភៅណែនាំនេះ រួមបញ្ចូលទាំងផែនការនៃវិធី និងប្រតិបត្តិការប្រយុទ្ធ ហើយនឹងត្រូវអនុញ្ញាតឲ្យប្រើប្រាស់ក្នុងវិទ្យាស្ថានអប់រំនៃកងយោធពលខេមរភូមិន្ទ។
អង្គការឃ្លាំមើលសិទ្ធិមនុស្សអន្តរជាតិ សំដែងក្តីបារម្ភថា ជំនួយផ្នែកយោធាសហរដ្ឋអាមេរិកនៅកម្ពុជា អាចនឹងផ្តល់សមត្ថភាពឲ្យយោធាកម្ពុជា បន្ថែមទៀត ក្នុងការរំលោភសិទ្ធិមនុស្ស បង្ក្រាបបាតុករគាំទ្រគណបក្សប្រឆាំង និងបាតុករស្លូតត្រង់។
នាយករងប្រចាំតំបន់អាស៊ី នៃអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ហ្វីល រ៉ូប៊ើតសុន (Phil Robertson) កាលពីថ្ងៃពុធ ទី៤ មិថុនា ស្នើឲ្យសហរដ្ឋអាមេរិក ពិចារណាកុំផ្ដល់វគ្គបណ្ដុះបណ្ដាលណាមួយដល់អង្គភាពយោធា និងមន្ត្រីយោធាទាំងឡាយដែលជាប់ពាក់ព័ន្ធនឹងការរំលោភសិទ្ធិមនុស្ស។
លោកក៏ស្នើឲ្យមានការបណ្ដុះបណ្ដាលផ្នែកសិទ្ធិមនុស្សដល់មន្ត្រីយោធាកម្ពុជា ផងដែរ៖ «វាមានសារសំខាន់ណាស់ ដើម្បីធានាឲ្យប្រាកដថា វគ្គបណ្ដុះបណ្ដាលត្រូវផ្ដោតលើបញ្ហាសិទ្ធិមនុស្ស។ ត្រូវជំរុញទស្សនៈសិទ្ធិមនុស្សទៅលើមន្ត្រីយោធាកម្ពុជា ឲ្យដឹងថា តួនាទីរបស់ពួកគេត្រូវមានភារកិច្ចការពារសិទ្ធិមនុស្ស»។
លោក ហ្វីល រ៉ូប៊ើតសុន បន្ថែមទៀតថា អំពើនិទណ្ឌភាពបង្កឡើងដោយមន្ត្រីយោធានៅកម្ពុជា មិនទាន់បានកាត់បន្ថយឡើយ ហើយក៏មិនបានជួយលើកតម្កើងវិស័យសិទ្ធិមនុស្សដែរ។
អង្គការ យូមែន រ៉ៃត៍ វ៉ច្ឆ ធ្លាប់រិះគន់ រដ្ឋាភិបាលកម្ពុជា ពីការដំឡើងឋានន្តរសក្ដិដល់យោធា និងប៉ូលិសជាន់ខ្ពស់ជាង ២០នាក់ ពីឧត្ដមសេនីយ៍ឯក ទៅជានាយឧត្ដមសេនីយ៍ ក្រោយពីមានព្រឹត្តិការណ៍បង្ក្រាបហិង្សាបណ្ដាលឲ្យមនុស្សយ៉ាងហោចណាស់ ៧នាក់ស្លាប់ និងរងរបួសជិត ១០០នាក់។ ការដំឡើងឋានន្តរសក្ដិ គាប់ជួនពេលដែលកម្ពុជា កំពុងជួបប្រទះវិបត្តិនយោបាយនេះ ធ្វើឲ្យសង្គមស៊ីវិលមួយចំនួនរិះគន់ថា ជាទង្វើដើម្បីលើកទឹកចិត្តយោធា និងប៉ូលិស ដែលភាគច្រើនជាសមាជិកគណបក្សប្រជាជនកម្ពុជា ដោយមិនខ្វល់ខ្វាយពីជោគវាសនាអនាគតរបស់ពលរដ្ឋខ្មែរ។
កាលពីឆ្នាំ២០១២ ក្រសួងការពារជាតិ បានតែងតាំងលោក ហ៊ុន មានិត កូនប្រុសទី២ របស់លោកនាយករដ្ឋមន្ត្រី ហ៊ុន សែន ជាអនុប្រធាននាយកដ្ឋានចារកិច្ចនៃក្រសួងការពារជាតិកម្ពុជា និងដំឡើងឋានន្តរសក្ដិពីស័ក្ដិបួនកន្លះ ទៅស័ក្ដិប្រាំ។ ការតែងតាំងលោក ហ៊ុន មានិត ជាការតែងតាំងកូនប្រុសលោក ហ៊ុន សែន លើកទី២ ឲ្យមានតួនាទីសំខាន់ក្នុងការគ្រប់គ្រងកងទ័ព។ កាលពីឆ្នាំ២០១១ ក្រសួងការពារបានតែងតាំងលោក ហ៊ុន ម៉ាណែត ជាកូនប្រុសច្បងលោកនាយករដ្ឋមន្ត្រី ឲ្យក្លាយជាមេបញ្ជាការរងកងទ័ពជើងគោកបន្ថែមលើតួនាទីជាប្រធាននាយកដ្ឋានប្រឆាំងភេរវកម្ម និងជាមេបញ្ជាការរងកងអង្គរក្សលោក ហ៊ុន សែន។
ឆ្លើយតបទៅនឹងការលើកឡើងរបស់មន្ត្រីសិទ្ធិមនុស្ស លោកឧត្ដមសេនីយ៍ឯក នឹម សុវត្ថិ បដិសេធថា មន្ត្រីយោធាកម្ពុជា មិនបានចូលរួមក្នុងការរំលោភសិទ្ធិមនុស្សឡើយ។ ទោះបីជាយ៉ាងក៏ដោយ លោកសារភាពថា យោធាបានប្រើប្រាស់កងកម្លាំងបង្ក្រាបបាតុករ កាលពីពេលកន្លងទៅ ដើម្បីស្តារស្ថានភាពសង្គម៖ «ទេអាហ្នឹងមានបញ្ហាអ្វី ធ្វើខុសច្បាប់គេដាក់ហើយ។ ប្រជាធិបតេយ្យ និងសណ្ដាប់ធ្នាប់សង្គមត្រូវជជែកគ្នាឲ្យច្បាស់ រវាងអ្វីការធ្វើបាតុកម្មមិនត្រឹមត្រូវតាមច្បាប់ និងការគោរពច្បាប់»។
កាលពីខែមេសា ឆ្នាំ២០១៤ ក្រសួងការពារជាតិ សហរដ្ឋអាមេរិក ក៏បានផ្ដល់ការបណ្ដុះបណ្ដាលលើវិស័យយោធាដល់ទាហានកម្ពុជា ក្នុងលំហាត់សមយុទ្ធយោធាមួយឈ្មោះថា "ឆ្មាំអង្គរឆ្នាំ២០១៤" (Angkor Sentinel)។ សេចក្ដីថ្លែងការណ៍របស់ យូមែន រ៉ៃត៍ វ៉ច្ឆ ផ្សាយកាលពីថ្ងៃទី២០ ឧសភា សរសេរថា ទាហានអាមេរិក បានបង្រៀនយោធាកម្ពុជា ពីវិធីសាស្ត្រប្រយុទ្ធ ដែលអាចឲ្យទាហានកម្ពុជា ប្រើប្រាស់ក្នុងការបង្ក្រាបអ្នកប្រឆាំង និងសកម្មជនសិទ្ធិមនុស្ស។ មិនមានការបកស្រាយឆ្លើយតបណាមួយពីមន្ត្រីក្រសួងការពារជាតិរបស់សហរដ្ឋអាមេរិក ចំពោះសេចក្ដីថ្លែងនេះទេ។
អង្គការ យូមែន រ៉ៃត៍ វ៉ច្ឆ បន្តទៀតថា សមយុទ្ធយោធាកម្ពុជា និងអាមេរិក អាចរំលោភលក្ខខណ្ឌមួយចំនួនរបស់រដ្ឋសភាសហរដ្ឋអាមេរិក ដែលកំណត់ថា ជំនួយយោធាសហរដ្ឋអាមេរិក ត្រូវបានហាមឃាត់លើកលែងតែជំនួយមនុស្សធម៌ និងបណ្ដុះបណ្ដាលផ្នែកសិទ្ធិមនុស្សឲ្យមន្ត្រីយោធាកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។