មន្ត្រីជាន់ខ្ពស់ក្រសួងការពារជាតិកម្ពុជា និងសហរដ្ឋអាមេរិក (US) បានលើកឡើងអំពីកង្វល់មួយចំនួនជាពិសេសលើវិស័យការពារជាតិ និងបន្តជជែកពិភាក្សាគ្នាដើម្បីស្វែងរកឱកាសស្ដារទំនាក់ទំនងវិស័យការពារជាតិ និងហ្វឹកហ្វឺនកងទ័ពរួមគ្នាឡើងវិញ។ អ្នកឃ្លាំមើលចាត់ទុកជំហរអាមេរិកស្វែងរកឱកាស ដើម្បីពង្រឹងទំនាក់ទំនងផ្នែកយោធាជាមួយកម្ពុជាឡើងវិញនេះ គឺដើម្បីទប់ទល់នឹងឥទ្ធិពលចិន (China) និងការកើតមានបញ្ហាអសន្តិសុខក្នុងតំបន់។
សហរដ្ឋអាមេរិកកំពុងព្យាយាមស្វែងរកឱកាស ដើម្បីស្ដារទំនាក់ទំនងវិស័យការពារជាតិ និងការបន្តហ្វឹកហ្វឺនយោធារួមគ្នាឡើងវិញជាមួយកម្ពុជា ស្របពេលដែលរដ្ឋាភិបាលលោក ហ៊ុន ម៉ាណែត កំពុងបង្កើនទំនាក់ទំនងយ៉ាងស្អិតល្មួតផ្នែកយោធាជាមួយប្រទេសចិនកុម្មុយនិស្ត។
កម្ពុជាចាត់ទុកដំណើរទស្សនកិច្ចរបស់រដ្ឋមន្ត្រីក្រសួងការពារជាតិអាមេរិក លោក ឡយ អូស្ទីន (Lloyd Austin) កាលពីអំឡុងខែមិថុនា និងដំណើរទស្សនកិច្ចរបស់មន្ត្រីកំពូលៗអាមេរិកមកបំពេញទស្សនកិច្ចនៅកម្ពុជាជាបន្តបន្ទាប់ គឺមានសារៈសំខាន់ សម្រាប់ក្រសួងការពារជាតិនៃប្រទេសទាំងពីរ។ រដ្ឋមន្ត្រីក្រសួងការពារជាតិកម្ពុជា លោក ទៀ សីហា លើកឡើងថា កម្ពុជាបានត្រៀមខ្លួនរួចជាស្រេច ដើម្បីធ្វើកិច្ចការងារជាមួយអាមេរិកលើការស្ដារឡើងវិញនូវទំនាក់ទំនងយោធារវាងប្រទេសទាំងពីរ ការបង្កើតកិច្ចសន្ទនា និងការរៀបចំនូវវេទិកាកិច្ចប្រជុំប្រចាំរៀងរាល់ឆ្នាំ ដើម្បីរិះរកមធ្យោបាយក្នុងការរៀបចំ និងបង្កើតកិច្ចសហប្រតិបត្តិការវិស័យការពារជាតិទ្វេភាគីឱ្យកាន់តែល្អប្រសើរ។
លោក ទៀ សីហា លើកឡើងបែបនេះនៅក្នុងជំនួបរវាងឧបការីរងរដ្ឋមន្ត្រីក្រសួងការពារជាតិទទួលបន្ទុកតំបន់អាស៊ីខាងត្បូង និងអាស៊ីអាគ្នេយ៍ (DASD) អ្នកស្រី ឡូរ៉ា អាប់ដេហ្គោវី (Laura Updegrove) កាលពីថ្ងៃទី១៤ ខែតុលា ក្នុងពេលដែលអ្នកស្រីមកបំពេញទស្សនកិច្ចនៅកម្ពុជា។ អ្នកស្រីឧបការីរងរដ្ឋមន្ត្រីក្រសួងការពារជាតិបញ្ជាក់ប្រាប់លោក ទៀ សីហា ថា ការមកបំពេញទស្សនកិច្ចនៅកម្ពុជានេះ គឺដើម្បីចូលរួមកិច្ចសន្ទនា និងធ្វើជាសហប្រធាន លើគោលនយោបាយការពារជាតិនៃប្រទេសទាំងពីរដែលបានខកខានចាប់តាំងឆ្នាំ២០១៩ មក។ អ្នកស្រីបញ្ជាក់ថា ការចាប់ផ្ដើមលើកិច្ចសន្ទនានៃគោលនយោបាយឡើងវិញនេះ គឺស្របតាមគំនិតផ្ដួចផ្ដើមរបស់រដ្ឋមន្ត្រីការពារជាតិសហរដ្ឋអាមេរិកលោក អូស្ទីន (Austin) ដែលមកបំពេញទស្សនកិច្ចនៅកម្ពុជាកន្លងមក ដើម្បីស្វែងរកឱកាសស្ដារទំនាក់ទំនងនៃប្រទេសទាំងពីរឡើងវិញ។
សេចក្ដីប្រកាសព័ត៌មានរបស់ក្រសួងការពារជាតិអាមេរិកកាលពីថ្ងៃទី១៥ ខែតុលាឱ្យដឹងថា រដ្ឋមន្ត្រីក្រសួងការពារជាតិកម្ពុជាលោក ទៀ សីហា និងឧបការីរងរដ្ឋមន្ត្រីក្រសួងការពារជាតិអាមេរិក អ្នកស្រី ឡូរ៉ា អាប់ដេហ្គោវី (Laura Updegrove) បានពិភាក្សាផ្ដោតសំខាន់លើការស្វែងរកឱកាស ដើម្បីពង្រឹងទំនាក់ទំនងវិស័យការពារជាតិនៃប្រទេសទាំងពីរ ជាពិសេសការស្វែងរកឱកាសបន្តហ្វឹកហ្វឺនយោធារួមគ្នាឡើងវិញ។ ក្រៅពីនេះ ភាគីទាំងពីរ ក៏បានលើកឡើងអំពីការផ្លាស់ប្ដូរស្ដីពីជំនួយគ្រោះមហន្តរាយ ការរក្សាសន្តិភាពរបស់អង្គការសហប្រជាជាតិ (US) កិច្ចការបោសសម្អាតមីន និងការបោសសម្អាតយុទ្ធភណ្ឌមិនទាន់ផ្ទុះ និងការចូលរួមរបស់កម្ពុជាក្នុងការអប់រំផ្នែកយោធា វិជ្ជាជីវៈ របស់សហរដ្ឋអាមេរិក (PME) ជាដើម។
ជុំវិញរឿងនេះ អ្នកអត្ថាធិប្បាយនយោបាយ លោក គឹម សុខ លើកឡើងថា ជំហរនយោបាយអាមេរិកនៅពេលនេះ គឺផ្ដោតសំខាន់លើបញ្ហាអសន្តិសុខក្នុងតំបន់ ខណៈកម្ពុជាកំពុងទទួលរងឥទ្ធិពលចិនកាន់តែខ្លាំង ហើយបញ្ហាអសន្តិសុខនៅលើពិភពលោកកំពុងរីករាលដាល។ លោកយល់ថា អាមេរិកអាចកំពុងស្វែងរកឱកាសរឹតចំណងផ្នែកយោធានាំមុខជំរុញបញ្ហាប្រជាធិបតេយ្យ និងសិទ្ធិមនុស្សនៅកម្ពុជា។
លោក គឹម សុខ៖«បើទោះបីជាអាមេរិកយកនយោបាយសន្តិសុខតំបន់ និងកិច្ចសហប្រតិបត្តិការយោធាជាអាទិភាពទីមួយ នៅលើរបៀបវារៈនយោបាយស្ដារប្រជាធិបតេយ្យនៅកម្ពុជាក៏ដោយ ឱ្យតែធ្វើឱ្យសហប្រតិបត្តិការយោធាកម្ពុជា និងអាមេរិកក្លាយជាការបង្កើតទំនាក់ទំនងល្អ និងអាចនិយាយគ្នាកាន់តែស៊ីជម្រៅ និងត្រង់ជាងមុន ជាមួយរាជរដ្ឋាភិបាលត្រកូល ហ៊ុន ក្នុងមុខនយោបាយការទូតចង្អៀតវានៅតែជាគន្លឹះក្នុងសេចក្ដីសង្ឃឹមធ្វើឱ្យមានការប្រែប្រួលនៅកម្ពុជាទៅកាន់ប្រជាធិបតេយ្យ គ្រាន់តែត្រូវការពេលវេលាបន្តិច ព្រោះនេះជានយោបាយផ្លូវវៀង»។
ចំណែក អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី យល់ថា ការពង្រីកកិច្ចសហប្រតិបត្តិការលើវិស័យការពារជាតិរវាងកម្ពុជា និងចិន ក្នុងក្របខ័ណ្ឌការធ្វើសមយុទ្ធ និងជំនួយយោធាជាដើម កំពុងធ្វើឱ្យបណ្ដាប្រទេសក្នុងតំបន់អាស៊ាន និងជាហេតុធ្វើឱ្យអាមេរិកបារម្ភខ្លាំង និងស្វែងរកឱកាសសម្រាប់ពង្រឹងកិច្ចសហប្រតិបត្តិការយោធាជាមួយកម្ពុជាឡើងវិញ។
លោក សេង វណ្ណលី៖«ជាមួយប្រទេសសមាជិកអាស៊ានដូចជាប្រទេសវៀតណាម និងហ្វីលីពីនជាដើម។ ប្រសិនបើកម្ពុជានៅតែបន្តទទួលបានជំនួយ និងពង្រឹងពង្រីកកិច្ចសហប្រតិបត្តិការបន្ថែមលើវិស័យសន្តិសុខ និងយោធាជាមួយចិនទៀតវានឹងកាន់តែធ្វើឱ្យកម្ពុជាមានផលលំបាកក្នុងការពង្រឹងពង្រីកកិច្ចសហប្រតិបត្តិការផ្នែកការទូតរវាងប្រទេសនៅក្នុងតំបន់សមាជិកអាស៊ានគ្នាឯងផង ហើយវាអាចនឹងធ្វើឱ្យរូបភាព ឬមុខមាត់ប្រទេសកម្ពុជាមានភាពអាក្រក់នៅឆាកអន្តរជាតិ ដោយសារយើងបានដឹងហើយថា ឥឡូវរបត់នយោបាយ ការប្រកួតប្រជែងភូមិសាស្ត្រនយោបាយរវាងចិន ជាមួយអាមេរិក និងសម្ព័ន្ធមិត្តអាមេរិកហ្នឹងមានការកើនឡើង។ ដូច្នេះ ប្រសិនបើកម្ពុជាត្រូវគេបានជឿជាក់ថា ផ្ដល់មូលដ្ឋានទ័ពផ្ដាច់មុខមួយផ្នែកនៃកំពង់ផែរាមឱ្យចិននោះ កម្ពុជានឹងអាចទទួលរងហានិភ័យ និងរងគ្រោះដល់ប្រជាធិបតេយ្យ និងសិទ្ធិស្វ័យសម្រេចរបស់ខ្លួននាពេលអនាគត»។
ទាក់ទងជំហរអាមេរិកកំពុងស្វែងរកឱកាសពង្រឹងទំនាក់ទំនងយោធាជាមួយកម្ពុជានេះ កម្ពុជា និងចិនក៏បានប្ដេជ្ញារក្សាទំនាក់ទំនងមិត្តដែកថែប និងបន្តលើកិច្ចសហប្រតិបត្តិការយោធាដោយឥតងាករេ។ ក្នុងជំនួបរវាងលោកនាយករដ្ឋមន្ត្រី ហ៊ុន ម៉ាណែត និងនាយករដ្ឋមន្ត្រីចិនលោក លី ឈាង (Li Qiang) ក្នុងពេលចូលរួមកិច្ចប្រជុំកំពូលអាស៊ាន លើកទី៤៤ និង ៤៥ នៅក្រុងវៀងចន្ទន៍ (Vientiane) ប្រទេសឡាវ (Laos) កាលពីសប្ដាហ៍មុនភាគីទាំងពីរក៏បានសង្កត់ធ្ងន់ថា កិច្ចសហប្រតិបត្តិការវិស័យសន្តិសុខ និងការពារជាតិ គឺជារឿងដ៏សំខាន់ដែលកម្ពុជា និងចិនតែងតែជជែកពិភាក្សាជាប្រចាំ ជាពិសេសលើការធ្វើសមយុទ្ធយោធារួមគ្នា។
ចាប់តាំងពីឆ្នាំ២០១៦ កម្ពុជាបានធ្វើសមយុទ្ធយោធាជាមួយចិនចំនួន ៧ដងហើយ ហើយកម្ពុជាក៏បានលុបចោលដោយឯកតោភាគីលើការធ្វើសមយុទ្ធយោធាជាមួយអាមេរិក និងអូស្ត្រាលី (Australia) ចាប់តាំងពីឆ្នាំ២០១៧ មក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។