កម្ពុជា ការពារចំណាត់ការរបស់សមត្ថកិច្ច ទាក់ទងនឹងលំហសិទ្ធិនយោបាយ និងប្រជាធិបតេយ្យ
លោក លុយ ដាវីត រដ្ឋលេខាធិការក្រសួងការបរទេសកម្ពុជា តំណាងឲ្យលោក ប្រាក់ សុខុន រដ្ឋមន្ត្រីការបរទេស ជួបជាមួយលោកសាស្រ្ដាចារ្យ វិទិត មុនតាប៊ន (Vitit Muntabhorn) អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា កាលពីថ្ងៃទី២៥ ខែមីនា កន្លងទៅ។
រូប៖ ក្រសួងការបរទេសកម្ពុជា
រដ្ឋាភិបាលកម្ពុជា ការពារចំណាត់ការរបស់សមត្ថកិច្ចទាក់ទងនឹងលំហសិទ្ធិនយោបាយ និងប្រជាធិបតេយ្យ របស់ពលរដ្ឋនិងមន្ត្រីសង្គមស៊ីវិល។
ការបញ្ជាក់នេះ បានធ្វើឡើងក្នុងជំនួបពិភាក្សាការងារតាមប្រព័ន្ធវីដេអូ រវាងរដ្ឋលេខាធិការក្រសួងការបរទេសលោក លុយ ដាវីត តំណាងឲ្យលោក ប្រាក់ សុខុន រដ្ឋមន្ត្រីការបរទេស ជាមួយលោកសាស្រ្ដាចារ្យ វិទិត មុនតាប៊ន (Vitit Muntabhorn) អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា កាលពីថ្ងៃទី២៥ ខែមីនា កន្លងទៅ។
តំណាងរដ្ឋមន្ត្រីក្រសួងការបរទេសរូបនេះផ្តល់អំណះអំណាងថា រាល់ការវាយតម្លៃចំពោះស្ថានការណ៍នៅកម្ពុជា គួរផ្តោតការយកចិត្តទុកដាក់លើការវាយតម្លៃពីគ្រប់មជ្ឈដ្ឋានទាំងអស់។ លោកអះអាងថា កម្ពុជាប្រកាន់ខ្ជាប់នូវលទ្ធិប្រជាធិបតេយ្យសេរីពហុបក្ស ដែលបច្ចុប្បន្នមាន គណបក្សនយោបាយចំនួន៤៧ ក្នុងនោះមានគណបក្សនយោបាយចំនួន១៧ បានចុះឈ្មោះដើម្បីធ្វើការប្រកួតប្រជែង នៅក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅដើមខែមិថុនា។ បន្ថែមពីនេះ អតីតសមាជិកគណបក្សប្រឆាំងចំនួន៣២រូប បានទទួលសិទ្ធិធ្វើនយោបាយឡើងវិញ។
ក៏ប៉ុន្តែការបញ្ជាក់របស់ភាគីកម្ពុជានេះ គឺផ្ទុយស្រឡះពីការលើកឡើងរបស់លោកសាស្រ្ដាចារ្យ វិទិត មុនតាប៊ន (Vitit Muntabhorn)ដែលបានរាយការណ៍ប្រាប់ក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីថ្ងៃទី២៨ ខែមីនាថា លំហសិទ្ធិមនុស្ស និងសិទ្ធិនយោបាយនៅកម្ពុជា កាន់តែរួមតូច និងដើរថយក្រោយ ដោយសារតែការគ្រប់គ្រងប្រទេសបែបឯកបក្ស។ លោក វិទិត មុនតាប៊ន (Vitit Muntarbhorn) អះអាងថា ទិដ្ឋភាពសិទ្ធិមនុស្ស និងលទ្ធិប្រជាធិបតេយ្យនៅក្នុងប្រទេស នៅតែបង្កការព្រួយបារម្ភលើវិស័យជាច្រើន ជាពិសេស ការបោះឆ្នោតក្រុមប្រឹក្សាឃុំ-សង្កាត់ នៅដើមខែមិថុនា ខាងមុខ។
ទោះបីជាលោកទទួលស្គាល់ថា កម្ពុជាបានកែលម្អទាក់ទងនឹងសេចក្តីព្រាងច្បាប់ថ្មីៗដើម្បីការពារជនងាយរងគ្រោះ កិច្ចខិតខំប្រឹងប្រែងក្នុងការដោះស្រាយសំណុំរឿងកកស្ទះនៅតុលាការ និងវឌ្ឍនៈភាពឆ្ពោះទៅរកការបង្កើតគណៈកម្មាធិការជាតិសិទ្ធិមនុស្សកម្ពុជាជាដើមក៏ដោយ ក៏លោកថា នៅមានក្តីកង្វល់មួយចំនួន ទាក់ទងនឹងការបិទលំហសិទ្ធិពលរដ្ឋ និងសិទ្ធិនយោបាយ បញ្ហាសវនាការលើសំណុំរឿងនយោបាយ និងការចាប់ខ្លួនអ្នកនយោបាយប្រឆាំងដាក់ពន្ធនាគារ និងការបោះឆ្នោតនាពេលខាងមុខ។
អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជារូបនេះ ក៏បានអំពាវនាវឲ្យអាជ្ញាធរទាំងអស់នៅកម្ពុជា គោរពសិទ្ធិមនុស្សជាមូលដ្ឋាន និងច្បាប់សិទ្ធិមនុស្សអន្តរជាតិ ដែលកម្ពុជាជារដ្ឋភាគី រួមទាំងសេរីភាពជាមូលដ្ឋានក្នុងការបញ្ចេញមតិ និងការជួបប្រជុំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រឿងដែលគេអានច្រើនបំផុត
RFA
- ធនាគារABA មិនព្រមបើកប្រាក់ជាង១ម៉ឺន ៥ពាន់ដុល្លារ ដែលឧបត្ថម្ភដល់បុគ្គលិកណាហ្គាវើលដ៍
- លោក គា សុគន្ធ អ្នកនិពន្ធគំរូក្នុងការឆ្លុះបញ្ចាំងការពិត និងបណ្ដុះស្មារតីស្នេហាជាតិ
- ថៃយល់ព្រមឱ្យកម្ពុជាប្រើពាក្យ «គុនខ្មែរ» ក្នុងព្រឹត្តិការណ៍ស៊ីហ្គេម២០២៣
- «ករណីឧកញ៉ា សៀង ចាន់ហេង ប្រគល់ដីឲ្យប្អូនស្រីនាយករដ្ឋមន្ត្រីបង្ហាញថា អ្នកធំតែងឈ្នះ»
- ក្រុមមន្ត្រីជាន់ខ្ពស់គណបក្សកាន់អំណាចប្រតិកម្មនឹងពលរដ្ឋខ្មែររស់នៅក្រៅប្រទេស ជេរប្រមាថលោក ហ៊ុន ម៉ាណែត តាមបណ្ដាញសង្គម
រឿងដែលគេអានច្រើនបំផុត
នយោបាយ
- លោក ហ៊ុន សែន បន្តប្រកាសថា នឹងការពារមិនឱ្យមានរដ្ឋប្រហារ ដើម្បីអភិវឌ្ឍប្រទេសឱ្យរីកចំរើន
- លោកខាងលិចចង់ឃើញការបោះឆ្នោតជាតិប្រព្រឹត្តទៅដោយសេរី និងយុត្តិធម៌ ក្រោយការចាប់ខ្លួនលោក ថាច់ សេដ្ឋា
- គណបក្សចំនួន៣ ចូលរួមប្រកួតដណ្ដើមកៅអីក្រុមប្រឹក្សាស្រុកក្រុងទើបបំបែកថ្មី
- លោក រ៉ុង ឈុន នឹងដឹកនាំធ្វើធម្មយាត្រាលើកកម្ពស់សីលធម៌សង្គមនៅសប្តាហ៍ក្រោយ
- គណបក្សភ្លើងទៀនប្រជុំថ្នាក់ដឹកនាំតាមរាជធានីខេត្ត ក្រោយបក្សកាន់អំណាចធ្វើទុក្ខបុកម្នេញ