រដ្ឋាភិបាល​មិនទាន់​ឆ្លើយ​តប ការ​ដាក់​ញត្តិ​របស់​សមាគម​គ្រូ​បង្រៀន​កម្ពុជា​ឯករាជ្យ ស្នើ​សុំ​ឱ្យ​ដោះលែង​អ្នក​ទោស​មនសិការ​ទាំងអស់

ដោយ មាន ឫទ្ធិ
2023.01.01
រដ្ឋាភិបាល​មិនទាន់​ឆ្លើយ​តប ការ​ដាក់​ញត្តិ​របស់​សមាគម​គ្រូ​បង្រៀន​កម្ពុជា​ឯករាជ្យ ស្នើ​សុំ​ឱ្យ​ដោះលែង​អ្នក​ទោស​មនសិការ​ទាំងអស់ លោក រ៉ុង ឈុន ប្រធាន​សហភាព​សហជីព​កម្ពុជា​។
រូប៖ ពលរដ្ឋ​ផ្ដល់​ឲ្យ

រដ្ឋាភិបាល​មិនទាន់​ឆ្លើយ​តប សំណើ​របស់​សមាគម​គ្រូ​បង្រៀន​កម្ពុជា​ឯករាជ្យ ដែល​ស្នើ​សុំ​ឱ្យ​រដ្ឋាភិបាល​ដោះលែង​អ្នក​ទោស​មនសិការ​ឡើយ​ទេ។ កាល​ពី​ថ្ងៃ​ទី៣០ ខែធ្នូ សមាគម​គ្រូ​បង្រៀន​កម្ពុជា​ឯករាជ្យ អតីត​អ្នក​ទោស​មនសិការ ក្រុម​ស្ត្រី​ថ្ងៃសុក្រ និង​បុគ្គលិក​ក្រុមហ៊ុន​ណាហ្គាវើលដ៍ (Naga World) ប្រមាណ​១០០នាក់ បាន​ដើរ​ហែ​ក្បួន ពី​ទីលាន​ប្រជាធិបតេយ្យ ទៅ​សាលា​ដំបូង​រាជធានី​ភ្នំពេញ និង​ទៅ​ខុទ្ទកាល័យ​នាយករដ្ឋមន្ត្រី ហ៊ុន សែន ដើម្បី​ដាក់​ញត្តិ​ទាមទារ​ដោះលែង​គ្រូបង្រៀន និង​អ្នក​ទោស​មនសិការ​ដែល​កំពុង​ជាប់​ឃុំ​នៅ​ក្នុង​ពន្ធនាគារ។ 

អ្នក​នាំ​ពាក្យ​រដ្ឋាភិបាល លោក ផៃ ស៊ីផាន ប្រាប់​វិទ្យុអាស៊ីសេរី​ថា ការ​ស្នើ​ឱ្យ​មាន​ការ​ដោះលែង​អ្នក​ទោស គឺ​អាច​ធ្វើ​ទៅ​បាន​លុះ​ត្រា​តែ​អ្នក​ជាប់​ឃុំ​បាន​គោរព​ទៅ​តាម​លក្ខខ័ណ្ឌ​របស់​តុលាការ​តាម​រយៈពេល​ដែល​ច្បាប់​បាន​ចែង ទើប​នាយករដ្ឋមន្ត្រី​អាច​ធ្វើការ​ស្នើ​សុំ​ទៅ​អង្គ​ព្រះមហាក្សត្រ​សុំ​ឱ្យ​ដោះលែង​នៅ​ក្រៅ​ឃុំ​បាន៖

«ការងារ​ហ្នឹង​វា​ស្ថិត​នៅ​ដែន​សមត្ថកិច្ច​របស់​តុលាការ ទាល់តែ​អ្នក​ទទួល​បន្ទុក​របស់​តុលាការ​ហ្នឹង​រយៈពេល​ប៉ុន្មាន​រួច​ហើយ​នៅ​ក្នុង​ពន្ធនាគារ ដើម្បី​ស្នើ​សុំ​ទៅ​នាយករដ្ឋមន្ត្រី ដើម្បី​លោក​ស្នើ​សុំ​ទៅ​ព្រះ​មហាក្សត្រ​ឱ្យ​គាត់​សម្រួល​ទោស ឬ​ក៏​សុំ​នៅ​ក្រៅ​ឃុំ»

រដ្ឋាភិបាល​លោក ហ៊ុន សែន​មិន​ត្រឹម​តែ​មិន​ឆ្លើយ​តប​នឹង​សំណើ​របស់​សមាគម​គ្រូបង្រៀន​កម្ពុជា​ឯករាជ្យ​ប៉ុន្តែ​បែរ​ជា​ព្រមាន​ពួកគេ​ទៅ​វិញ

រដ្ឋបាល​រាជធានី​ភ្នំពេញ​បាន​ចេញ​លិខិត​ព្រមាន​មួយ​ដល់​សមាគម​គ្រូបង្រៀន​កម្ពុជា​ឯករាជ្យ ហើយ​បាន​យក​ទៅ​ឱ្យ​ដល់​ផ្ទះ ប្រធាន​សមាគម អ្នកស្រី អ៊ុក ឆាយ៉ាវី តែ​ម្ដង​ក្រោយ​ពី​ការ​ធ្វើ​បាតុកម្ម​បញ្ចប់ កាល​ពី​ពេល​ល្ងាច​ថ្ងៃទី៣០ ខែធ្នូ។ លិខិត​នេះ​ចាត់​ទុក​ការ​ធ្វើ​បាតុកម្ម​របស់​សមាគម​គ្រូ​បង្រៀន​កម្ពុជា​ឯករាជ្យ ធ្វើ​ឡើង​ដោយ​ខុស​ពី​ច្បាប់​ស្ដី​ពី​ការ​ធ្វើ​បាតុកម្ម​ដោយ​សន្តិវិធី ត្រង់​មាត្រា៥ និង​មាត្រា១៦រដ្ឋបាល​រាជធានី​ភ្នំពេញ​ព្រមាន​ថា នឹង​ចាត់​វិធាន​ការ​តាម​ផ្លូវ​ច្បាប់​ផង​ដែរ ក្នុង​ករណី​នៅ​តែ​មាន​សកម្មភាព​បាតុកម្ម​បែបនេះ​ម្ដង​ទៀត។

របាយការណ៍​របស់​អង្គការ​លីកាដូ (Licadho) ឱ្យ​ដឹងថា រដ្ឋាភិបាល លោក ហ៊ុន សែន បាន​ចាប់​ខ្លួន​សកម្មជន​សិទ្ធិមនុស្ស សកម្មជន​ដីធ្លី សកម្មជន​នយោបាយ និង​តស៊ូ​មតិ​ចំនួន ៤៩នាក់​ដាក់​ពន្ធនាគារ ដោយសារ​អ្នក​ទាំង​នោះ​ប្រើប្រាស់​សិទ្ធិ​សេរីភាព​របស់​ខ្លួន ក្នុង​ការ​រិះគន់​បញ្ហា​ដែល​កើត​ឡើង​ក្នុង​សង្គម។ ក្រៅ​ពី​នេះ​សកម្មជន​គណបក្ស​ប្រឆាំង រាប់​សិប​នាក់ និង​អ្នក​តស៊ូ​មតិ​ជា​ច្រើន​នាក់​ទៀត បាន​ភៀស​ខ្លួន​ចេញ​ពី​ប្រទេស​កម្ពុជា ដើម្បី​គេច​ពី​ការ​ធ្វើ​ទុក្ខ​បុក​ម្នេញ​ពី​រដ្ឋាភិបាល។ សមាគម​គ្រូបង្រៀន​កម្ពុជា​ឯករាជ្យ នៅ​តែ​បញ្ជាក់​ជំហ​ថា​នឹង​ធ្វើ​ការ​ទាមទារ​ឱ្យ​រដ្ឋាភិបាល​ដោះលែង​សកម្មជន​មនសិការ​ទាំង​អស់​ជា​បន្ត​ទៀត លុះ​ត្រា​តែ​ពួកគេ​ត្រូវ​បាន​ដោះលែង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។