ពលរដ្ឋ​ខ្មែរ​នៅ​ជប៉ុន តវ៉ា​ប្រឆាំង​រដ្ឋាភិបាល លោក ហ៊ុន សែន

ដោយ អាស៊ីសេរី
2021-05-09
Share
ពលរដ្ឋ​ខ្មែរ​នៅ​ជប៉ុន តវ៉ា​ប្រឆាំង​រដ្ឋាភិបាល លោក ហ៊ុន សែន ទិដ្ឋភាព​ពលរដ្ឋខ្មែរ​នៅ​ប្រទេសជប៉ុនតវ៉ា​​ ប្រឆាំង​នឹង​រដ្ឋាភិបាល​ក្រុង​​ភ្នំពេញ នៅ​ថ្ងៃទី៩ ខែ​ឧសភា​ ឆ្នាំ​២០២១។
រូប​ពី​ហ្វេសប៊ុក

ប្រជាពលរដ្ឋ​ខ្មែរ​ដែល​រស់នៅ​ប្រទេស​ជប៉ុន ចូលរួម​ធ្វើបាតុកម្ម​ជាមួយ​ប្រជាពលរដ្ឋ​នៃ​បណ្តា​ប្រទេស​ផ្សេងទៀត នៅក្នុង​ទីក្រុង​តូក្យូ (Tokyo) នៅ​ថ្ងៃទី​៩ ខែឧសភា​។ សម្រាប់​បាតុករ​ខ្មែរ គឺ​ពួកគេ ទាមទារ​ឱ្យ​លោក​លោក ហ៊ុន សែន ចុះ​ចេញពី​អំណាច​ព្រោះ​ពលរដ្ឋ​ខ្មែរ​ស្រេកឃ្លាន​ប្រជាធិបតេយ្យ​និង​ការ គោរព​សិទ្ធិមនុស្ស​ពិតប្រាកដ​។ អ្នកនាំពាក្យ​គណបក្ស​កាន់អំណាច ឆ្លើយតប​ថា ការ​តវ៉ា​ទាមទារ​នេះ​ជា​រឿង​អត់​ប្រយោជន៍។

ប្រជាពលរដ្ឋ​ខ្មែរ និង​ប្រជាពលរដ្ឋ​មកពី​ជិត​១០​ប្រទេស​ផ្សេងទៀត រួមមាន​ពលរដ្ឋ​ហុងកុង និង​ពលរដ្ឋ​ភូមា ឬ​មីយ៉ាន់ម៉ា (Myanmar)​ជាដើម នាំគ្នា​លើក​បដា​និង​ដើរ​ដង្ហែ​ក្បួន​ស្រែក​តវ៉ា​ទ្រង់ទ្រាយ​ធំ​តាម​ដងផ្លូវ​សំខាន់ៗ​នៅ​កណ្តាល​ទីក្រុង​តូក្យូ ប្រទេស​ជប៉ុន ផ្ញើ​សារ​ឱ្យ​រដ្ឋាភិបាល​ចិន​ឈប់​លូកដៃ​ចូល​ប្រទេស​របស់​ពួកគេ​ដែល​នាំ​ឱ្យ​មានការ​រំលោភ​សិទ្ធិមនុស្ស និង​ប្រជាធិបតេយ្យ​ធ្ងន់ធ្ងរ​។ ពលរដ្ឋ​ខ្មែរ​ដែល​ចូលរួម​តវ៉ា​នេះ មាន​ប្រមាណ​ជាង​៤០​នាក់ ដោយ​ពួកគាត់​លើក​ទង់ជាតិ និង​បដា​ដែល​សរសេរ​ថា ពួកគាត់​មិន​ទទួលស្គាល់​រដ្ឋាភិបាល​លោក ហ៊ុន សែន ជាដាច់ខាត ព្រោះ​ជា​រដ្ឋាភិបាល​កើត​ចេញ​ពី​ការបោះឆ្នោត​ក្លែងក្លាយ។

ប្រជាពលរដ្ឋ​ដែល​ចូលរួម​តវ៉ា​មួយ​រូប គឺ​លោកស្រី មាស ភារ៉ា ថ្លែង​ថា អ្នក​តវ៉ា​ទាំងអស់ ទាមទារ​ឱ្យ​ប្រទេស​ចិន​ឈប់​គាំទ្រ​របប​លោក ហ៊ុន សែន តទៅទៀត និង​ទាមទារ ឱ្យ​លោក ហ៊ុន សែន ស្តារ​លទ្ធិប្រជាធិបតេយ្យ និង​ការគោរព​សិទ្ធិមនុស្ស​ឡើងវិញ៖ «រដ្ឋាភិបាល​មិនមែន​កើត​ចេញ​ពី​ឆន្ទៈ​ពលរដ្ឋ​ផង ដូច្នេះ​យើង​មិន​ទទួលស្គាល់​រដ្ឋាភិបាល​ឥឡូវនេះ​ថា​ជា​រដ្ឋាភិបាល​បានទេ។ ពួក​យើង​ត្រូវតែ តស៊ូ​មតិ​ប្តូរផ្តាច់​ទាមទារ​លទ្ធិប្រជាធិបតេយ្យ​មកវិញ ដោយសារ​លទ្ធិប្រជាធិបតេយ្យ​យើង​កាន់តែ​ធ្លាក់ចុះ ដោយ​អត់​មាន​សិទ្ធិ​បញ្ចេញមតិ សូម្បីតែ​អ្នកសារព័ត៌មាន ក៏​មិន​ហ៊ាន​ផ្សាយ​ការពិត ហើយ​ចាប់​ចង់​សកម្មជន​ដាក់គុក ហើយ​ធ្វើ​អី​ដោយ​ឯក​បក្ស​ជាដើម​។ យើង​មិនអាច​ទទួលយក​បានទេ យើង​នឹង​ធ្វើ​ចលនា​ជាមួយ​ប្រទេស ផ្សេងៗ ទាមទារ​លទ្ធិ​ប្រជាធិបតេយ្យ​មក​វិញ ទោះបី​បាន​តិច​ក្តី​ច្រើន​ក្តី ក៏​នៅតែ​បន្ត​ចលនា»

អ្នក​តវ៉ា​មួយ​រូប​ទៀត និង​ជា​អនុប្រធាន​គណៈកម្មការ​ចលនា​សង្គ្រោះ​ជាតិ​នៅ​ប្រទេស​ជប៉ុន គឺ​អ្នកស្រី ណិប ប៉ូរ៉ា លើកឡើង​ថា ក្រៅពី​ការ​ទាមទារ​ឱ្យ​រដ្ឋាភិបាល​ចិន ឈប់​លូកដៃ​ចូល​ប្រទេស​កម្ពុជា​នោះ ពួកគាត់ ក៏​ចង់​បង្ហាញ​ឱ្យ​រដ្ឋាភិបាល​ជប៉ុន និង​ពិភពលោក បាន​ដឹង​អំពី​ទុក្ខវេទនា​របស់​ពលរដ្ឋ​ខ្មែរ​ដែល​រស់នៅ​ក្រោម​អំណាច​ផ្ដាច់ការ​របស់​លោក ហ៊ុន សែន​ដែរ​។ អ្នកស្រី ស្នើសុំ​ឱ្យ​រដ្ឋាភិបាល​ជប៉ុន ពិនិត្យមើល​ការ​ផ្តល់​ជំនួយ​របស់​ខ្លួន​ឡើងវិញ ព្រោះ​ជំនួយ​មួយចំនួន​មិន​បាន​ផ្តល់​ផលប្រយោជន៍​ជាក់ស្តែង​ដល់​ពលរដ្ឋ​ខ្មែរ​នោះ​ទេ ផ្ទុយទៅវិញ បាន​ជួយ​គាំទ្រ​អំណាច​ផ្ដាច់ការ​របស់​លោក ហ៊ុន សែន ដែល​កំពុង​ធ្វើ​ឱ្យ​ទុក្ខ​បុក​ម្នេញ​និង​បំបិទ​សេរី​ភាពជា​មូលដ្ឋាន​របស់​ពលរដ្ឋ៖ «បញ្ហា​ដែល​យើង​ចង់​ឱ្យ​គេ​ជួយ​នោះ គឺ​ចង់​ឱ្យ​គេ​ជួយ​រឿង​ការគោរព​សិទ្ធិមនុស្ស និង​ជំនួយ​របស់​ជប៉ុន​ដែល​ជួយ​ទៅនោះ សូម​ជួយ​ឱ្យ​មើល​ថា រដ្ឋាភិបាល​ណា​ដែល​ជា​រដ្ឋាភិបាល​ស្របច្បាប់ កុំ​ជួយ​ទៅ​រដ្ឋាភិបាល​ដែល​ឯក​បក្ស​អ៊ីចឹង»

ប្រជា​ពលរដ្ឋ​ខ្មែរ​រស់នៅ​ប្រទេស​ជប៉ុន និង​រស់នៅ​ក្នុង​បណ្តា​ប្រទេស​ផ្សេងៗ​ទៀត តែងតែ​ចេញ​តវ៉ា​ប្រឆាំង​នឹង​រដ្ឋាភិបាល លោក ហ៊ុន សែន ជា​បន្តបន្ទាប់ ប៉ុន្តែ​ដោយសារ​វិបត្តិ​ជំងឺ​កូវីដ​នេះ បាន​ធ្វើ​ឱ្យ​ការ​តវ៉ា​របស់​​ត្រូវ​បាន​អាក់ខាន​ខ្លះ។

ទាក់ទង​ករណីនេះ អ្នកនាំពាក្យ​គណបក្ស​ប្រជាជន​កម្ពុជា​លោក សុខ ឥសាន ឆ្លើយតប​ថា ការ​តវ៉ា​ទាមទារ​កុំ​ឱ្យ​ចិន​លូកដៃ​ចូល​កម្ពុជា​និង​បណ្តា​ប្រទេស​ផ្សេងៗ​នេះ គ្មាន​ប្រសិទ្ធភាព​អ្វី​ឡើយ គ្រាន់តែ​ជា​ការ​ស្រែក​តាម​គ្នា​ប៉ុណ្ណោះ​។ លោក បន្ត​ថា ចំពោះ​ការ​មិន​ទទួល​ស្គាល់​រដ្ឋាភិបាល​ស្របច្បាប់​បច្ចុប្បន្ន​នេះ​គឺ​ហួស​សម័យ​ទៅ​ហើយ។ លោក​ថា ពួកគេ​បាន​ស្រែក​តវ៉ា​ប្រឆាំង​តាំង​ពី​ការ​បោះឆ្នោត​ឆ្នាំ​២០១៨ មក​ម្ល៉េះ ប៉ុន្តែ​ប្រទេស​ជាច្រើន​រួម​ទាំង​ប្រទេស​ដែល​ធ្លាប់​ប្រកាស​មិន​ទទួលស្គាល់​លទ្ធផល​បោះឆ្នោត​នៅ​ពេល​នោះ​ផង នៅតែ​បន្ត​ដាក់​ស្ថានទូត​ហើយ​ធ្វើការ​ជាមួយ​រដ្ឋាភិបាល​ដឹកនាំ​ដោយ​គណបក្ស​ប្រជាជន​កម្ពុជា​ដដែល៖ «ឥឡូវនេះ​និយាយ​ឱ្យ​អាក្រក់​ស្តាប់​បន្តិច​ទៅ គាត់​ស្រែក​ទាល់តែ​ងាប់​ខ្លួន​គាត់ ងាប់​ដល់​កូន​គាត់ ងាប់​ដល់​ចៅ​គាត់ ក៏​វា​អត់​បានការ​អី​ដែរ ។ ឥឡូវនេះ នៅ​សល់​តែ​ពីរ​ឆ្នាំ​ទៀត​ដល់​ថ្ងៃ​បោះឆ្នោត​ទៀតហើយ​ចូល​ដល់​អាណត្តិ​ទី​៧​ហើយ ដូច្នេះ​គាត់​ស្រែក​នោះ​បាន​ប្រយោជន៍​អី ដែល​គាត់​ស្រែក​តាម​មេក្រូ​ដាក់​ហ្វេសប៊ុក ស្រែក​តាម​វិទ្យុ​បរទេស​និយាយ​ជា​ភាសា​ខ្មែរ​បាន​ប្រយោជន៍​អី​ទៅ​? រាជរដ្ឋាភិបាល​នៅតែ​ធ្វើការ​ទៅមុខ ដូច្នេះ​បានជា​គណបក្ស​ប្រជាជន​កម្ពុជា ឱ្យ​តម្លៃ​ត្រឹម​ថា ឆ្កែ​ចេះតែ​ព្រុស​មនុស្ស​ចេះតែ​ដើរ​។ អាហ្នឹង​រឿង​តែ​ប៉ុណ្ណឹង»

ឆ្លើយតប​ចំពោះ​ការ​លើកឡើង​នេះ អ្នក​តវ៉ា​មួយ​រូប គឺ​អ្នកស្រី ណិប ប៉ូរ៉ា យល់​ថា វា​មិនមែន​ជា​រឿង​ចម្លែក​នោះ​ទេ ដែល​ក្រុម​មេដឹកនាំ​ផ្ដាច់ការ តែង​ឆ្លើយ​ការពារ​ទង្វើ​របស់​ខ្លួន ហើយ​មិន​យកចិត្តទុកដាក់​ចំពោះ​សំឡេង​ស្រែក​តវ៉ា​របស់​ពលរដ្ឋ​នោះ៖ «សម្រាប់​របប​មួយ​ដែល​គេ​រំលោភ​អំណាច ដែល​គេចង់​ដឹកនាំ​ផ្ដាច់ការ គេ​មិនដែល​ទទួលស្គាល់​អ្វី​ដែល​ជា​គុណធម៌​និង​ការ​ទាមទារ​និង​សំឡេង ពលរដ្ឋ​ដែល​ចង់​បានទេ គេ​មិនដែល​បម្រើ​ឱ្យ​ប្រជាពលរដ្ឋ​ដោយ​ក្រមសីលធម៌​និង​គុណធម៌​ទេ គេ​តែងតែ​និយាយ​ពាក្យ​ដដែល​ថា ពួក​យើង​នេះ​ជា​មនុស្ស​ក្រៅច្បាប់ ឬ​ពួក​ឧទ្ទាម​ជាដើម គេ​ប្រើ​ពាក្យ​មិនល្អៗ​សម្រាប់​ពួកយើង តែ​ការពិត​គឺ​ពួក​យើង​ជា​មនុស្ស​ដែល​ចង់បាន​សេរីភាព ចង់​ជួយ​ពលរដ្ឋ​ដែល​ជួប​ទុក្ខ​លំបាក ដូច្នេះ យើង​មិន​ត្រូវ​ចាញ់​ឬ​តាម​អ្វី​ដែល​គេ​និយាយ​ទេ»

ដោយឡែក ប្រធាន​ផ្នែក​សិទ្ធិមនុស្ស​នៃ​សមាគម​ការពារ​សិទ្ធិមនុស្ស​អាដហុក (Adhoc) លោក នី សុខា មាន​ប្រសាសន៍​ថា ការ​តវ៉ា​របស់​ប្រជាពលរដ្ឋ​ខ្មែរ​ទាំង​នៅក្នុង​ប្រទេស និង​នៅ​ក្រៅ​ប្រទេស ដើម្បី​ទាមទារ​ឱ្យ​មានការ​លើកកម្ពស់​លទ្ធិ​ប្រជាធិបតេយ្យ និង​ការ​សិទ្ធិមនុស្ស​ជាស​កល​បែបនេះ គឺជា​រឿង​ត្រឹមត្រូវ ហើយ​រដ្ឋាភិបាល គួរតែ​ទទួលយក​ទៅ​ពិនិត្យ​កែ​លម្អ​ឡើងវិញ៖ «យើង​តែងតែ​ធ្លាប់​បាន​ទទូច​ទៅដល់​រដ្ឋាភិបាល ធ្វើ​ម៉េច​ដើម្បី​ដោះស្រាយ​បញ្ហា​លើកកម្ពស់​ស្ថានភាព​សិទ្ធិមនុស្ស​ក្នុង​ប្រទេស​យើង​នេះ ឱ្យ​បាន​នូវ​គោលការណ៍​ប្រជាធិបតេយ្យ គោរព​នូវ​សិទ្ធិ​ជា​មូលដ្ឋាន​របស់​ពលរដ្ឋ​ហូរហែ​ហ្នឹង ហើយ​ធ្វើការ​បង្រួបបង្រួម​ជាតិ​ដើម្បី​ដោះស្រាយ​បញ្ហា​ជាតិ​ទាំងអស់​នេះ ដើម្បី ឈាន​ទៅ​រក​ការ​អភិវឌ្ឍ​ជាតិ»

ប្រជាពលរដ្ឋ និង​អង្គការ​សង្គម​ស៊ីវិល​ជាតិ​-​អន្តរជាតិ លើកឡើង​ថា ការណ៍​ដែល​រដ្ឋាភិបាល នៅតែ​មិន​ព្រម​កែប្រែ​ឥរិយាបថ​បែបនេះ គឺ​គ្មាន​ផល​ចំណេញ​សម្រាប់​ប្រជាជាតិ​កម្ពុជា​ឡើយ ព្រោះ​កន្លងមក​បញ្ហា​ចម្រូងចម្រាស​រឿង​សិទ្ធិមនុស្ស​និង​លទ្ធិ​ប្រជាធិបតេយ្យ​នេះ បាន​ធ្វើ​ឱ្យ​សហភាព​អឺរ៉ុប ដក​ប្រព័ន្ធ​អនុគ្រោះ​ពន្ធ EBA ចំនួន​២០​ភាគរយ​ពី​កម្ពុជា​រួច​ទៅ​ហើយ​។ ពួកគេ​ជឿ​ថា ក្រុម​ប្រទេស​ប្រជាធិបតេយ្យ​ធំៗ នឹង​ពង្រីក​ទណ្ឌកម្ម​បន្ថែម​ទៀត​ក្នុង​នោះ​ក៏​រួម​ទាំង​ទណ្ឌកម្ម​លើ​មន្ត្រី​គ្រាក់ៗ​នៃ​របប​ក្រុងភ្នំពេញ​ជា​លក្ខណៈ​បុគ្គល​ផង​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល