សកម្មជនគណបក្សសង្គ្រោះជាតិដែលកំពុងភៀសខ្លួនក្នុងប្រទេសថៃ បន្តព្រួយបារម្ភពីការចាប់បញ្ជូនត្រឡប់ទៅកម្ពុជាវិញ ដោយសារមន្ត្រីរដ្ឋាភិបាលកំពុងធ្វើការយ៉ាងជិតស្និទ្ធជាមួយភាគីថៃ។ សង្គមស៊ីវិល ស្នើសុំរដ្ឋាភិបាលទាំង២ប្រទេស គោរពសិទ្ធិជនភៀសខ្លួន បើពុំដូច្នេះទេរដ្ឋាភិបាលទាំង២នឹងជាប់ឈ្មោះអាក្រក់ខាងរំលោភសិទ្ធិមនុស្សក្នុងរបាយការណ៍ប្រចាំឆ្នាំរបស់អង្គការសហប្រជាជាតិ។
សកម្មជនបក្សប្រឆាំងកំពុងភៀសខ្លួនក្នុងប្រទេសថៃថា វត្តមានរបស់ទីប្រឹក្សាលោកនាយករដ្ឋមន្ត្រីហ៊ុន សែន គឺលោក សុខ សុក្រឹត្យា នៅតែបន្តគំរាមកំហែងសុវត្ថិភាពពួកគាត់ធ្ងន់ធ្ងរចំពោះការចាប់បញ្ជូនទៅដាក់ពន្ធនាគារនៅប្រទេសកម្ពុជាវិញ។
សកម្មជនកំពុងភៀសខ្លួនម្នាក់ ដែលតែងតែចូលទៅបញ្ចេញមតិរិះគន់ក្នុងហ្វេសប៊ុក(facebook) លោក ហ៊ុន សែន គឺលោកស្រី ឡេង សុទ្ធាវី ស្នើសុំរដ្ឋាភិបាលថៃបញ្ឈប់ការចាប់ខ្លួនជនភៀសខ្លួននយោបាយ តាមសំណើរដ្ឋាភិបាលខ្មែរតទៅទៀត។ លោកស្រី ថ្កោលទោសចំពោះសកម្មភាពចាប់ខ្លួនបញ្ជូនជនភៀសខ្លួននយោបាយត្រឡប់ទៅកម្ពុជាវិញ ថាជាអំពើចូលរួមជ្រោមជ្រែងលទ្ធិផ្ដាច់ការ និងការបំពានច្បាប់អន្តរជាតិផ្នែកសិទ្ធិជនភៀសខ្លួន៖ «នៅក្នុងប្រទេសថៃ ខ្ញុំសូមអំពាវនាវដល់លោក ប្រាយុទ្ធ ចាន់អូចារ ដោយត្រង់តែម្ដងថា បើសិនជាលោកនៅពាក់ព័ន្ធជាមួយលោក ហ៊ុន សែន ដែលជាមនុស្សសេពគប់ជាមួយនឹងមេឃាតក ចិន យួន នេះ លោក ប្រាយុទ្ធ ចាន់អូចារ នឹងមានកេរ្តិ៍ឈ្មោះមិនល្អដោយសារតែ ហ៊ុន សែន នឹងនាំកេរ្តិ៍ឈ្មោះ លោក ប្រាយុទ្ធ ចាន់អូចារ ឲ្យអន់ និងខ្សោយដូច ហ៊ុន សែន ដែលមានគេស្អប់ខ្ពើមអ៊ីចឹងដែរ»។
សកម្មភាពចាប់បញ្ជូនជនភៀសខ្លួន បានចាប់ផ្ដើមកក្រើកឡើងវិញ កាលពីខែកញ្ញា ក្រោយពេលទីប្រឹក្សារបស់លោកនាយករដ្ឋមន្ត្រីហ៊ុន សែន គឺលោក សុខ សុក្រឹត្យា បានទៅជួបមន្ត្រីរដ្ឋាភិបាលថៃ និងមន្ត្រីសភាថៃ ជាបន្តបន្ទាប់។ បច្ចុប្បន្ន លោក សុខ សុក្រឹត្យា មិនទាន់ចាកចេញពីប្រទេសថៃទេ។ សារព័ត៌មានក្នុងស្រុក (freshnew) ចុះផ្សាយថា លោកនៅបន្តសកម្មភាពជួបមន្ត្រីរដ្ឋាភិបាលថៃតាមក្រសួងពាក់ព័ន្ធដើម្បីបញ្ចុះបញ្ចូលឲ្យអាជ្ញាធរថៃចាប់បញ្ជូនជនភៀសខ្លួន និងអ្នកហ៊ានរិះគន់រដ្ឋាភិបាលកម្ពុជាតាមហ្វេសប៊ុក ទៅកម្ពុជាវិញ។
ប្រភពដដែលបង្ហាញថា ក្នុងជំនួបកាលពីថ្ងៃទី៤ ខែធ្នូ ឧបនាយករដ្ឋមន្ត្រីទទួលបន្ទុកសន្តិសុខជាតិថៃ និងជាប្រធានគណបក្សដឹកនាំរាជរដ្ឋាភិបាលថៃសព្វថ្ងៃ គឺឧត្ដមសេនីយ៍ប្រាវីដ វង្សសុវណ្ណ (Prawit Vongsovang) បានសន្យាថា អាជ្ញាធរថៃនឹងទប់ស្កាត់ឱ្យខាងតែបាន ចំពោះអ្នកដែលយកទឹកដីថៃធ្វើសកម្មភាពល្មើសច្បាប់ និងប្រឆាំងរដ្ឋាភិបាលកម្ពុជា។
សកម្មជននយោបាយកំពុងភៀសខ្លួនម្នាក់ទៀត គឺលោក អឿ ណារិទ្ធ សោកស្ដាយចំពោះការសន្យានេះ។ លោកអះអាងថា ជនភៀសខ្លួននយោបាយគ្រាន់តែប្រើប្រាស់សិទ្ធិសេរីភាពបញ្ចេញមតិដើម្បីទាមទារឲ្យមានការស្ដារលទ្ធិប្រជាធិបតេយ្យ និងការគោរពសិទ្ធិមនុស្សតែប៉ុណ្ណោះ៖ «យើងបានធ្វើកិច្ចការច្រើនដែរ ទាក់ទងនឹងបញ្ហាហ្នឹង ហើយទាំង UN (អង្គការសហប្រជាជាតិ) ទាំងអ្វីហ្នឹងកំពុងតែធ្វើដូចថា ការការពារដល់ជនភៀសខ្លួនយើងកាន់តែខ្លាំងក្លាជាងមុន ដែលពួកគេចាប់អារម្មណ៍យកចិត្តទុកដាក់ពីជនភៀសខ្លួនយើងកាន់តែខ្លាំង»។
លោក អឿ ណារិទ្ធិ បន្តថា បច្ចុប្បន្នគណបក្សសង្គ្រោះជាតិ កំពុងធ្វើការជាមួយភាគីអន្តរជាតិ និងអង្គការសហប្រជាជាតិទទួលបន្ទុកជនភៀសខ្លួន ស្នើសុំឲ្យអន្តរាគមន៍ទៅរដ្ឋាភិបាលថៃ គោរពច្បាប់អន្តរជាតិពាក់ព័ន្ធនឹងជនភៀសខ្លួន។ ជាមួយគ្នានេះ លោកថា គណបក្សសង្គ្រោះជាតិ ក៏កំពុងស្នើសុំរដ្ឋាភិបាលបញ្ឈប់ការចាប់បញ្ជូនជនភៀសខ្លួនតាមសំណើរបស់រដ្ឋាភិបាលខ្មែរតទៅទៀត។
ជុំវិញករណីនេះ វិទ្យុអាស៊ីសេរីមិនអាចសុំការបញ្ជាក់ពីអ្នកនាំពាក្យរដ្ឋាភិបាលលោក ផៃ ស៊ីផាន អ្នកនាំពាក្យអគ្គស្នងការដ្ឋាននគរបាលជាតិលោក ឆាយ គឹមខឿន និងអ្នកនាំពាក្យគណបក្សប្រជាជនកម្ពុជាលោក សុខ ឥសាន បានទេ នៅថ្ងៃទី១៣ ខែធ្នូ។ តែយ៉ាងណាលោក សុខ ឥសាន ដែលគេស្គាល់ថា ជាឪពុករបស់លោក សុខ សុក្រឹត្យា នោះ ធ្លាប់ចេញមុខការពារសកម្មភាពចាប់បញ្ជូនជនភៀសខ្លួនថា ដើម្បីយកមកអនុវត្តច្បាប់នៅកម្ពុជា។
សង្គមស៊ីវិលថា ការចាប់បញ្ជូនជនភៀសខ្លួនត្រឡប់ទៅកម្ពុជាវិញ បានបង្ហាញឲ្យឃើញថា ប្រទេសថៃមិនមែនជាទីសុវត្ថិភាពសម្រាប់ជនភៀសខ្លួននយោបាយទៀតទេ។
អ្នកនាំពាក្យសមាគមសិទ្ធិមនុស្សអាដហុកលោក ស៊ឹង សែនករុណា ជឿជាក់ថា សហគមន៍អន្តរជាតិនឹងមិនព្រមបញ្ឈប់ត្រឹមនេះទេ ព្រោះក្រុមលោកសេរីមិនពេញចិត្តទេ ចំពោះទង្វើចាប់បញ្ជូនជនភៀសខ្លួនទាំងបង្ខំនោះ។ លោកព្រួយបារម្ភថា រដ្ឋាភិបាលទាំង២ប្រទេស នឹងត្រូវជាប់ឈ្មោះអាក្រក់ក្នុងកំណត់ហេតុនៃការរំលោភសិទ្ធិជនភៀសខ្លួន ហើយត្រូវរងការរិះគន់ ព្រមទាំងសម្ពាធផ្សេងៗពីសហគមន៍អន្តរជាតិដោយសារតែទង្វើរំលោភសិទ្ធិជនភៀសខ្លួននេះ៖ «សហគមន៍អន្តរជាតិ គេនឹងធ្វើការបន្តការតាមដានឃ្លាំមើលទៅលើសកម្មភាពនៃរដ្ឋាភិបាលទាំង២ ហើយរបាយការណ៍ទាំងអស់នេះ នឹងមិនបញ្ឈប់ទេ ហើយប្រហែលជាអាចនឹងមានជាបន្តបន្ទាប់នៅក្នុងរបាយការណ៍ក្រុមប្រឹក្សាសិទ្ធិមនុស្សក្នុងឆ្នាំខាងមុខៗទៀត»។
រយៈពេល ២ ខែចុងក្រោយនេះ អាជ្ញាធរថៃបានចាប់ជនភៀសខ្លួន និងជាសកម្មជនគណបក្សសង្គ្រោះជាតិ ៤ នាក់ គឺលោក វឿង សំណាង លោក វឿន វាសនា លោកស្រី ឡាញ់ ថាវរី និង លោក ម៉ិច ហៀង បញ្ជូនទៅឲ្យអាជ្ញាធរកម្ពុជាយកទៅឃុំឃាំងក្នុងពន្ធនាគារព្រៃសរាជធានីភ្នំពេញ។
កាលយប់ពីថ្ងៃទី១ ខែធ្នូ អាជ្ញាធរថៃបានចាប់ផ្សឹកព្រះសង្ឃ បូរ បេត ហើយគ្រោងបញ្ជូនព្រះអង្គទៅឲ្យអាជ្ញាធរកម្ពុជាវិញដែរ។ ប៉ុន្តែក្រោយពីមានប្រតិកម្មខ្លាំងៗ និងការអន្តរាគមន៍ពីអង្គការអន្តរជាតិឃ្លាំមើលសិទ្ធិជនភៀសខ្លួន អង្គការសហប្រជាជាតិទទួលបន្ទុកជនភៀសខ្លួន (UNHCR) និងតំណាងរាស្ត្រប្រទេសថៃផងនោះ អាជ្ញាធរថៃបានដោះលែងព្រះអង្គវិញ នៅថ្ងៃទី៣ ខែធ្នូ ហើយបច្ចុប្បន្នព្រះអង្គ បានភៀសព្រះកាយដល់ប្រទេសស្វីស (Switzerland) ហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។