ពលរដ្ឋខ្មែរនៅកូរ៉េគ្រោងធ្វើបាតុកម្មជំរុញឱ្យរដ្ឋាភិបាលប្ដឹងទាមទារកោះគជ់ទៅតុលាការអន្តរជាតិ
2024.11.29
ពលរដ្ឋខ្មែរនៅប្រទេសកូរ៉េខាងត្បូង (South Korea) តវ៉ាកាលពីថ្ងៃទី២៧ ខែតុលា ឆ្នាំ២០២៤។
រូប៖ ផ្ដល់ឱ្យ
ពលរដ្ឋខ្មែរនៅប្រទេសកូរ៉េខាងត្បូង (South Korea) គ្រោងនាំគ្នាធ្វើបាតុកម្មនៅទីក្រុងសេអ៊ូល (Seoul) នៅសប្ដាហ៍ក្រោយនេះ ដើម្បីជំរុញឱ្យរដ្ឋាភិបាលកម្ពុជាទាមទារអធិបតេយ្យរបស់ខ្លួនលើកោះគជ់ត្រឡប់មកវិញ តាមរយៈការដាក់ពាក្យបណ្ដឹងទៅតុលាការអន្តរជាតិ។ ពលរដ្ឋទាំងនោះបញ្ជាក់ថា ការធ្វើបាតុកម្មនេះ គឺកើតចេញពីឆន្ទៈនៃការខ្វល់ខ្វាយ និងការការពារបូរណភាពទឹកដី ហើយទាមទារឱ្យរដ្ឋាភិបាលត្រូវបញ្ឈប់ការចោទប្រកាន់លាបពណ៌ពួកគេថាជាក្រុមបដិវត្ត ឬភេរវករ តទៅទៀត។
ខណៈប្រជាពលរដ្ឋថៃនៅក្នុងស្រុក គំរាមធ្វើបាតុកម្មទាមទារឱ្យរដ្ឋាភិបាលខ្លួនបង្ហាញគោលជំហរការពារកោះគជ់ឱ្យបានដាច់ខាត ចំណែកនៅកម្ពុជាឯណោះវិញ មានតែពលរដ្ឋដែលរស់នៅក្រៅប្រទេសដូចជា កូរ៉េខាងត្បូង (South Korea) ប៉ុណ្ណោះ ដែលធ្វើបាតុកម្មជំរុញឱ្យរដ្ឋាភិបាលទាមទារកោះគជ់ត្រឡប់មកវិញ ដោយផ្អែកលើតុលាការយុត្តិធម៌អន្តរជាតិ។
តំណាងយុវជនគណបក្សសង្គ្រោះជាតិ នៅប្រទេសកូរ៉េខាងត្បូង លោក ម៉ាត់ វណ្ណនី ប្រាប់វិទ្យុអាស៊ីសេរីនៅថ្ងៃទី២៩ ខែវិច្ឆិកា ថា គម្រោងធ្វើបាតុកម្មនេះ ធ្វើឡើងដោយសាររដ្ឋាភិបាលកម្ពុជាបង្ហាញពីគោលជំហរមិនច្បាស់លាស់ ជុំវិញករណីកោះគជ់ ដែលនឹងអាចធ្វើឱ្យរបូតសិទ្ធិគ្រប់គ្រងទាំងស្រុង ទៅប្រទេសថៃ។ លោក ម៉ាត់ វណ្ណនី ស្នើឱ្យពលរដ្ឋកម្ពុជាមិនត្រូវរក្សាភាពស្ងៀមស្ងាត់ជុំវិញបញ្ហាអធិបតេយ្យនៅតំបន់កោះគជ់តទៅទៀតនោះទេ ព្រោះចលនាជាតិនិយមរបស់ប្រជាពលរដ្ឋថៃ កំពុងមានសន្ទុះកាន់តែខ្លាំងឡើង ក្នុងការទាមទារឱ្យរដ្ឋាភិបាលរបស់ពួកគេ យកកោះនេះធ្វើជាកម្មសិទ្ធិផ្ដាច់មុខ។
លោក ម៉ាត់ វណ្ណនី៖ «ដោយសារតែយើងជឿជាក់លើច្បាប់នៃយន្តការអន្តរជាតិ ព្រោះមានតែច្បាប់នេះទេ ទើបអាចរកយុត្តិធម៌ជូនភាគីទាំងសងខាង។ បើមិនអ៊ីចឹងទេទំនាស់ហ្នឹង កាន់តែរាលដាល។ ពូជសាសន៍នីមួយៗប្រកាន់យកថាកោះហ្នឹងរបស់ខ្លួនរៀងៗខ្លួន។ ប៉ុន្តែមានតែតុលាការអន្តរជាតិទេ ដែលចេញសេចក្ដីសម្រេចហើយ បិទផ្លូវតវ៉ា ទាំងសងខាងត្រូវតែទទួលយក បើពុំនោះទេ វានឹងបង្ករឿងទៅមនុស្សជំនាន់ក្រោយទៀត ប្រសិនបើយើងមិនដោះស្រាយទៅតាមនីតិវិធីច្បាប់អន្តរជាតិនេះ»។
បាតុកម្មរបស់ពលករ និងនិស្សិតខ្មែរនៅប្រទេសកូរ៉េខាងត្បូង ដឹកនាំដោយចលនាប្រជាធិបតេយ្យរួបរួមជាតិ នឹងធ្វើឡើងនៅថ្ងៃទី៨ ខែធ្នូ ខាងមុខនេះ នៅក្នុងតំបន់ អ៊ីតេវ៉ុន(Itaewon) នៃទីក្រុង សេអ៊ូល (Seoul) ដើម្បីទាមទាររដ្ឋាភិបាលបំពេញតួនាទីរបស់ខ្លួនក្នុងការការពារបូរណភាពទឹកដី តាមរយៈការស្វែងរកអន្តរាគមន៍ពីស្ថាប័នតុលាការអន្តរជាតិដែលមានភាពអព្យាក្រឹត្យ។
ទោះជាយ៉ាងណា មកទល់ពេលនេះ មេដឹកនាំកម្ពុជានៃគ្រួសារត្រកូល«ហ៊ុន» មិនចោលគំនិតក្នុងការគំរាមប្រជាពលរដ្ឋមិនឱ្យនិយាយរឿងកោះគជ់នេះឡើយ។ ថ្លែងក្នុងសម្ពោធសមិទ្ធផលនានានៅតំបន់អភិវឌ្ឍន៍បឹងជង្រុក នៅខេត្តបន្ទាយមានជ័យ នៅថ្ងៃទី២៩ ខែវិច្ឆិកា លោកនាយករដ្ឋមន្ត្រី ហ៊ុន ម៉ាណែត បានចោទអ្នកដែលលើកឡើងពីបញ្ហាកោះគជ់ថា ជាក្រុមប្រឆាំងជ្រុលនិយម និងយករឿងនេះមកដុតកំហឹងពលរដ្ឋ ឱ្យប្រឆាំងនឹងរដ្ឋាភិបាលទៅវិញ។
លោក ហ៊ុន ម៉ាណែត៖ «តែគេយកក្នុងន័យអ្វី? គេមិនឈឺក្បាលទេរឿងពិតមិនពិត។ អ្វីដែលគេចង់បានគឺធ្វើឱ្យប្រជាពលរដ្ឋ អត់ទុកចិត្តរដ្ឋាភិបាល រកប្រធានបទដែលប៉ះពាល់ជាមួយផលប្រយោជន៍ជាតិរបស់យើង បំភ្លៃការពិតហើយដុតកម្ដៅឱ្យប្រជាជនយើងមានជម្លោះផ្ទៃក្នុង។ តើសន្តិភាពនៅក្នុងប្រទេសយើង មួយចម្អិនកំពឹសឬយ៉ាងណា»។
ទន្ទឹមនឹងការគំរាមកំហែង និងវាយប្រហារលើអ្នកនយោបាយបក្សប្រឆាំងនោះ មកទល់ពេលនេះ រដ្ឋាភិបាលត្រកូលហ៊ុន មិនទាន់បានបកស្រាយពន្យល់ពលរដ្ឋឱ្យបានច្បាស់លាស់ និងមានហេតុផលសមរម្យនៅឡើយទេជុំវិញបញ្ហាកោះគជ់នេះ។
ផ្ទុយពីបុរសខ្លាំងកម្ពុជា ដែលចេះតែគំរាមពលរដ្ឋខ្លួនឯង និងមានគោលជំហរទន់ជ្រាយរឿងគោះគជ់នោះ នាយករដ្ឋមន្ត្រីថៃ អ្នកស្រី ផេថងថាន ស៊ីណាវ៉ាត់ (Paetongtarn Shinawatra) នៅថ្ងៃទី២៩ ខែវិច្ឆិកា បានចេញមកអះអាងនៅចំពោះមុខប្រជាពលរដ្ឋខ្លួនថា «ក្នុងនាមជានាយករដ្ឋមន្ត្រី នៃប្រទេសថៃ អ្នកស្រីគ្មានផ្លូវនឹងមើលប្រទេសដទៃ សំខាន់ជាងប្រទេសថៃខ្លួនឯងនោះឡើយ»។ អ្នកស្រីស្នើឱ្យប្រជាពលរដ្ឋថៃ ជឿជាក់មកលើអ្នកស្រី ក្នុងការចរចាអនុស្សរណៈយោគយល់គ្នាឆ្នាំ២០០១ ជាមួយកម្ពុជា។
ទោះជាបែបនេះក្ដី ប្រជាពលរដ្ឋ និងឥស្សរជននយោបាយថៃបារម្ភថា កម្ពុជាអាចនឹងលើកយកសំណុំរឿងកោះគជ់នេះ ប្ដឹងទៅតុលាការអន្តរជាតិ ដែលពួកគេចោទថា ជាស្ថាប័នមិនយុត្តិធម៌ និងជាតុលាការនយោបាយ កាត់ក្ដីទៅតាមសម្ពាធរបស់ប្រទេសមហាអំណាចមួយចំនួន ខណៈប្រទេសដែលជាដើមបណ្ដឹង មានអតីតមហាអំណាចអាណានិគមធ្វើជាខ្នងបង្អែក។
ជុំវិញរឿងនេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត គាំទ្រឱ្យមានការប្ដឹងទាមទារកោះគជ់ ទៅតុលាការអន្តរជាតិ ព្រោះមានតែវិធីនេះមួយប៉ុណ្ណោះ ដែលអាចរក្សាបាននូវចំណងទំនាក់ទំនងការទូត និងបង្ការជម្លោះប្រដាប់អាវុធ និងភាពសម្អប់រវាងពលរដ្ឋខ្មែរ និងពលរដ្ឋថៃ។ លោក ម៉ែន ណាត លើកឡើងថា ប្រសិនបើកម្ពុជា លើកយកសំណុំរឿងកោះគជ់ ប្ដឹងទៅតុលាការអន្តរជាតិ គឺមានសង្ឃឹមឈ្នះច្រើន ប៉ុន្តែប្រសិនបើកម្ពុជា បោះបង់ឱកាសនេះចោល គឺស្មើនឹងមេដឹកនាំកម្ពុជារបស់ត្រកូលហ៊ុន បានប្រគល់កោះគជ់ទៅឱ្យថៃ របស់មេដឹកនាំត្រកូលលោកថាក់ស៊ីន ជាថ្នូរនឹងការជួយជ្រោមជ្រែងអំណាច និងកម្ចាត់អ្នកប្រឆាំងដែលរស់នៅលើទឹកដីថៃ។
លោក ម៉ែន ណាត៖ «ករណីដែលលោក ហ៊ុន សែន មិនដោះស្រាយករណីហ្នឹង នៅតុលាការអន្តរជាតិហ្នឹង វាពាក់ព័ន្ធទីមួយយូរ វាប្រើពេលយូរ។ ចង់ដោះស្រាយរឿងហ្នឹងឱ្យបានឆាប់ ដើម្បីរករ៉ែរកប្រេងនៅបាតសមុទ្រឱ្យបានលឿនទៅ មិនចាំបាច់កំណត់ព្រំដែនអ្វីផ្លូវការនោះទេ គឺចង់បានលុយដើម្បីយកមកបំប៉នអំណាច។ ទីពីរគឺចង់បើកកិច្ចសហប្រតិបត្តិការជាមួយរដ្ឋាភិបាលថៃ ចាប់មនុស្សពីថៃមកដាក់គុកនៅស្រុកខ្មែរ»។
យ៉ាងណាក៏ដោយចុះ មន្ត្រីជាន់ខ្ពស់យោធាជើងទឹករបស់ថៃ បានប្រកាសឱ្យកងនាវិកថៃ ត្រៀមចល័តសព្វាវុធ នាវាមុជទឹក និងនាវាចម្បាំងជាដើម ទៅកាន់កោះគជ់ ដើម្បីត្រៀមធ្វើសមយុទ្ធជាលក្ខណៈទ្រង់ទ្រាយធំ នៅក្បែរកោះនេះ រយៈពេល ៣ថ្ងៃ នៅពាក់កណ្ដាលខែធ្នូ ខាងមុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- UNHCR អំពាវនាវដល់កម្ពុជា និងថៃ ឱ្យគោរពតាមច្បាប់ស្ដីពីការមិនចាប់បញ្ជូនជនភៀសខ្លួនត្រឡប់ទៅឱ្យរងទុក្ខបុកម្នេញនៅប្រទេសកំណើត
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- ពលរដ្ឋខ្មែរនៅកូរ៉េគ្រោងធ្វើបាតុកម្មជំរុញឱ្យរដ្ឋាភិបាលប្ដឹងទាមទារកោះគជ់ទៅតុលាការអន្តរជាតិ
- លោក ហ៊ុន សែន ប្ដេជ្ញាបន្តប្រកាន់ជំហរគោលនយោបាយចិនតែមួយ និងថា ប្រទេសចិនបានជួយនយោបាយកម្ពុជាឱ្យមានឯករាជ្យ
អត្ថបទពេញនិយម
នយោបាយ
- អ្នកឃ្លាំមើលចាត់ទុកដំណើរទស្សនកិច្ចលោក ហ៊ុន សែន ទៅចិន គឺជាការពង្រឹងអំណាច និងស្វែងរកកម្ចីពីចិនបន្ថែម
- បទសម្ភាសន៍លោក សុខ ឥសាន ស្ដីពីគម្រោងរដ្ឋាភិបាលបង្កើតច្បាប់ប្រឆាំងភេរវកម្ម ដើម្បីទប់ទល់លោក សម រង្ស៊ី
- កម្ពុជា និងចិនប្ដេជ្ញាបន្តរឹតចំណងមិត្តភាពដើម្បីកសាងជោគវាសនាប្រទេសជាតិរួមគ្នា
- ពលរដ្ឋ និងឥស្សរជននយោបាយថៃទាមទារឱ្យរដ្ឋាភិបាលរបស់ខ្លួនលុបចោល «MOU44» លើតំបន់ត្រួតស៊ីគ្នាជាមួយកម្ពុជា
- ពលរដ្ឋខ្មែរក្រោមស្នើដល់ព្រះមហាក្សត្រឲ្យលើកយកបញ្ហាខ្មែរក្រោមទៅជជែកជាមួយរដ្ឋាភិបាលវៀតណាម