ពលរដ្ឋខ្មែរនៅក្រៅប្រទេសគាំទ្រចលនាជាតិតស៊ូ និងរដ្ឋាភិបាលបណ្ដោះអាសន្ន
2024.11.11
(រូបឯកសារ) លោក សម រង្ស៊ី ប្រធានស្ដីទីគណបក្សសង្គ្រោះជាតិ ក្នុងកិច្ចសម្ភាសន៍ជាមួយវិទ្យុអាស៊ីសេរី កាលពីថ្ងៃទី១៣ ខែមេសា ឆ្នាំ២០២២។
RFA
ពលករ និងសកម្មជនគណបក្សប្រឆាំងគាំទ្រការបង្កើតចលនាជាតិតស៊ូ និងរដ្ឋាភិបាលបណ្ដោះអាសន្ន ដែលប្រកាសឡើងដោយលោក សម រង្ស៊ី។ ពួកគាត់ជំរុញឱ្យលោក សម រង្ស៊ី ពន្លឿនការបង្កើតឱ្យបានឆាប់ ដោយពួកគាត់ចាត់ទុកថា ជាចលនារបស់ប្រជាពលរដ្ឋ ដើម្បីសង្គ្រោះប្រជាធិបតេយ្យ និងការពារជាតិ។
ក្រោយពីប្រធានស្ដីទី នៃគណបក្សសង្គ្រោះជាតិលោក សម រង្ស៊ី បានប្រកាស អំពីការបង្កើតចលនាជាតិតស៊ូ និងទិសដៅបង្កើតរដ្ឋាភិបាលបណ្ដោះអាសន្នមួយពលរដ្ឋខ្មែរនៅក្រៅប្រទេស បង្ហាញការគាំទ្រ និងចង់ឃើញចលនា និងរដ្ឋាភិបាលបណ្ដោះអាសន្ននេះ កើតឡើងឱ្យបានឆាប់។
លោក សម រង្ស៊ី៖ «ថ្ងៃនេះខ្ញុំព្រះករុណាខ្ញុំ សម រង្ស៊ី មានកិត្តិយសប្រកាសការបង្កើតចលនាជាតិតស៊ូ ដើម្បីការពារទឹកដីប្រទេសកម្ពុជា និងទាមទារសេរីភាពនិងយុត្តិធម៌សម្រាប់ប្រជារាស្ត្រខ្មែរ»។
ទោះបីជាអ្នកនាំពាក្យគណបក្សប្រជាជនកម្ពុជាលោក សុខ ឥសាន ហៅចលនាជាតិតស៊ូ និងរដ្ឋាភិបាលបណ្ដោះអាសន្នថា ជារូបភាពបដិវត្តន៍ចង់ផ្ដួលរំលំរដ្ឋាភិបាលក្រុងភ្នំពេញក៏ដោយ ក៏ប្រជាពលរដ្ឋខ្មែរនៅក្រៅប្រទេសហៅការបង្កើតចលនាជាតិតស៊ូថ្មីនេះថាជារឿងល្អ និងជាកម្លាំងជំរុញការស្ដារលទ្ធិប្រជាធិបតេយ្យនៅកម្ពុជា និងការពារបូរណភាពទឹកដីជាតិ ដោយការចូលរួមសកម្មរបស់ប្រជាពលរដ្ឋខ្មែរ។
ពលរដ្ឋខ្មែរនៅក្រៅប្រទេសថា ចលនាជាតិតស៊ូ គឺជាចលនារបស់ប្រជាពលរដ្ឋខ្មែរទូទៅ ដើម្បីបញ្ចប់អំណាចផ្ដាច់ការសព្វថ្ងៃ ដែលគ្រួសារត្រកូលហ៊ុនយកប្រទេសកម្ពុជាជាកម្មសិទ្ធិផ្ដាច់មុខ ព្រមទាំងធ្វើបាបប្រជាពលរដ្ឋសកម្មជនសិទ្ធិមនុស្ស និងនយោបាយទៀត។
អតីតសកម្មជនបក្សប្រឆាំងលោក វឿន វាសនា ដែលភៀសខ្លួននយោបាយនៅប្រទេសអូស្ត្រាលីគាំទ្រចលនាជាតិតស៊ូ និងរដ្ឋាភិបាលបណ្ដោះអាសន្ន ពីព្រោះលោកលែងសង្ឃឹមលើការបោះឆ្នោតបែបប្លន់អំណាចនៅប្រទេសកម្ពុជា ដែលត្រួតត្រាដោយគ្រួសារត្រកូល ហ៊ុន ហើយ។ លើសពីនេះទៀត លោកថា រដ្ឋាភិបាលត្រកូល ហ៊ុន ធ្វើទុក្ខបុកម្នេញលើពលរដ្ឋគ្រប់រូបភាព តាំងពីការឆបោកការគំរាមកំហែង និងការចាប់ដាក់គុក គឺលែងចាត់ទុកប្រជាពលរដ្ឋខ្មែរជាម្ចាស់ប្រទេសទៅហើយ ដូច្នេះ ត្រូវមានចលនាតស៊ូ ឬរដ្ឋាភិបាលក្រៅប្រទេសមួយ ដើម្បីជួយស្ដារស្ថានភាពកម្ពុជា។
លោក វឿន វាសនា៖ «ពីព្រោះ ៣០ ទៅ៤០ ឆ្នាំហើយ ដែលយើងផ្លាស់ប្ដូរតាមការបោះឆ្នោតប៉ុន្តែរបបត្រកូលហ៊ុនតែងតែលួច តែងតែបន្លំ តែងតែប្លន់យកកៅអីរបស់គណបក្សប្រឆាំងជានិរន្ត។ ប្រសិនជារដ្ឋាភិបាលក្រៅប្រទេសកើតឡើង គឺខ្ញុំសង្ឃឹមថា ប្រទេសកម្ពុជានឹងដណ្ដើមពីត្រកូល ហ៊ុន មកវិញ»។
ចំណែកឯពលករខ្មែរនៅប្រទេសកូរ៉េខាងត្បូងលោក នាង លីសារ ក៏គាំទ្រចលនាជាតិតស៊ូ និងរដ្ឋាភិបាលបណ្ដោះអាសន្ននេះដែរ។
លោក នាង លីសារ ប្រាប់វិទ្យុអាស៊ីសេរីនៅថ្ងៃទី១០ ខែវិច្ឆិកា ថា មូលហេតុសំខាន់ គឺមេដឹកនាំរដ្ឋាភិបាលត្រកូលហ៊ុនបច្ចុប្បន្ន លែងស្ដាប់យោបល់របស់ប្រជាពលរដ្ឋទៅហើយ ខណៈពលរដ្ឋកំពុងជួបវិបត្តិសេដ្ឋកិច្ច អត់ការងារធ្វើក្រីក្រ និងវ័ណ្ឌក ដោយបំណុលដោះស្រាយមិនរួច។ លោកយល់ថា ចលនាជាតិតស៊ូ និងរដ្ឋាភិបាលបណ្ដោះអាសន្ន នឹងក្លាយជាកម្លាំងសំឡេងអ្នកប្រជាធិបតេយ្យដ៏រឹងមាំ ដើម្បីជំរុញរដ្ឋាភិបាលលោក ហ៊ុន ម៉ាណែត ឱ្យងាកមកស្ដាប់សំឡេងប្រជាពលរដ្ឋ។
លោក នាង លីសារ៖ «ខ្ញុំគាំទ្រ ដោយសារអីរាល់ថ្ងៃបើគ្មានរដ្ឋាភិបាលប្រឆាំងទេ គឺប្រទេសកម្ពុជាកាន់តែយ៉ាប់យឺនទៅជាបន្តបន្ទាប់ ដោយសាររាល់ថ្ងៃវិបត្តិសេដ្ឋកិច្ចកាន់តែមានបញ្ហាធ្ងន់ធ្ងរទៅលើប្រទេសកម្ពុជា បាត់បង់ប្រាក់ចំណូលកាន់តែខ្លាំង ពលករចំណាកស្រុកច្រើន ប្រជាពលរដ្ឋនៅក្នុងប្រទេសអត់មានការអភិវឌ្ឍ សូមតែលុយសព្វថ្ងៃរកអត់បានទេ លទ្ធផលដែលប្រជាពលរដ្ឋខំប្រឹងធ្វើកសិករ គឺនាំចេញគឺគ្មានតម្លៃច្បាស់លាស់»។
ពលរដ្ឋរស់នៅប្រទេសជប៉ុន លោកស្រី ណិប បូរ៉ា ប្រាប់វិទ្យុអាស៊ីសេរី នៅថ្ងៃទី១០ ខែវិច្ឆិកា ថា លោកស្រីគាំទ្រ ការបង្កើតចលនាជាតិតស៊ូ និងរដ្ឋាភិបាលបណ្ដោះអាសន្ន ពីព្រោះលោកស្រីចង់ឱ្យមានស្ថាប័នតំណាងសំឡេងប្រជាពលរដ្ឋនៅក្រៅប្រទេស ដើម្បីធ្វើការជាមួយសហគមន៍អន្តរជាតិ ក្នុងការរកដំណោះស្រាយគ្រប់បញ្ហារបស់ប្រជាពលរដ្ឋខ្មែរ និងប្រទេសកម្ពុជា ដោយលោកស្រីថា រដ្ឋាភិបាលលោក ហ៊ុន ម៉ាណែត លែងខ្វល់អំពីប្រជាពលរដ្ឋខ្មែរទៅហើយ។
លោកស្រី ណិប បូរ៉ា៖ «គេអត់ដែលស្ដាប់សំឡេងយើងទេ អ៊ីចឹងយើងចង់ឱ្យមានសំឡេងនៅក្រៅស្រុកមួយ ដើម្បីទៅនិយាយទៅស្នើសុំ ធ្វើកិច្ចការងារជាមួយរដ្ឋាភិបាល ក៏ដូចជាធ្វើការជាមួយអន្តរជាតិ គឺយើងត្រូវការឱ្យមានសំឡេងគាំទ្រ ហើយឱ្យមានចលនាមួយធ្វើដើម្បីជួយទៅកម្ពុជាយើង។ បើសិនជាយើងអត់មានតំណាងទេ ពលរដ្ឋចង់បានអី ពលរដ្ឋរងគ្រោះយ៉ាងម៉េចៗ បានតែស្រែកទួញយំ»។
រីឯមន្ត្រីជាន់ខ្ពស់គណបក្សប្រឆាំងលោក ម៉ន ផល្លា វិញ អះអាងថា លោកនឹងចូលរួមក្នុងចលនាជាតិតស៊ូ ដោយគ្មានការរារែក។ លោកពន្យល់ថា ចលនាតស៊ូនេះ ធ្វើសកម្មភាពអហិង្សា ឆ្ពោះទៅកាន់គោលដៅនៃការជំរុញឱ្យរដ្ឋាភិបាលត្រកូលហ៊ុន គោរពកិច្ចព្រមព្រៀងសន្តិភាពទីក្រុងប៉ារីស៍ ដោយត្រូវស្ដារប្រជាធិបតេយ្យ គោរពសិទ្ធិមនុស្ស និងការពារទឹកដីជាតិឱ្យមានប្រសិទ្ធភាព។
លោក ម៉ន ផល្លា ប្រាប់វិទ្យុអាស៊ីសេរីនៅថ្ងៃទី១០ ខែវិច្ឆិកា ថា លោកចង់ឱ្យមានការពន្លឿន និងការរៀបចំរចនាសម្ព័ន្ធដឹកនាំចលនាជាតិតស៊ូឱ្យបានឆាប់ និងធានាឱ្យបាននិរន្តរភាពការងារ រួមទាំងការបើកឱ្យមានការចូលរួមទូលំទូលាយពីប្រជាពលរដ្ឋគ្រប់មជ្ឈដ្ឋាន។
លោក ម៉ន ផល្លា៖ «ចលនាជាតិតស៊ូ ដើម្បីផ្លាស់ប្ដូរ ដើម្បីកម្ពុជានេះ គឺជាចលនាមួយ សម្រាប់បងប្អូនប្រជាពលរដ្ឋខ្មែរទាំងមូល ដើម្បីចូលរួមសកម្មភាពការពារជាតិ ការពារបូរណភាពទឹកដី ជាពិសេស ជាងនេះ ស្ដារលទ្ធិប្រជាធិបតេយ្យពេញលេញឡើងវិញ»។
អ្នកឃ្លាំមើលលើកឡើងថា ចលនាតស៊ូមួយ សមនឹងត្រូវបង្កើតឡើងនៅពេលនេះ។ យ៉ាងណាក្ដី ការបង្កើតរដ្ឋាភិបាលបណ្ដោះអាសន្នមួយ នៅក្រៅប្រទេស ទាមទារឱ្យមានការពិនិត្យស្ថានការណ៍ជាតិ និងអន្តរជាតិឱ្យហ្មត់ចត់សិន។
អ្នកឃ្លាំមើលថា ដើម្បីប្រសិទ្ធភាពការងារ ចំណុចសំខាន់គឺ គួរតែធ្វើការស្ទង់មើលអំពីចរន្តរបស់ប្រជាពលរដ្ឋខ្មែរទាំងក្នុង និងក្រៅប្រទេស ព្រមទាំងជំហររបស់សហគមន៍អន្តរជាតិ ជាពិសេស ប្រទេសជាមិត្តរបស់កម្ពុជាជាមុនសិនថា តើមានការចាប់អារម្មណ៍កម្រិតណា មុននឹងសម្រេចបង្កើតរដ្ឋាភិបាលបណ្ដោះអាសន្នមួយ ដែលជាតំណាងសំឡេងប្រជាពលរដ្ឋខ្មែរទាំងមូល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- លោក ហ៊ុន សែន តែងតាំងលោក ហៃ វណ្ណា និងសកម្មជន ១៨នាក់ទៀតជាទីប្រឹក្សា និងជំនួយការ
- យុវជនរិះគន់ការផ្ដល់គ្រឿងឥស្សរិយយសឱ្យចៅប្រុសលោក ហ៊ុន សែន ដែលធ្លាប់ប្រកាសលក់កាំភ្លើងលើបណ្ដាញសង្គម
- លោក ហ៊ុន សែន ទៅមជ្ឈិមបូព៌ា «ទំនងចង់ទៅដើរទាក់ទាញវិនិយោគទុន ខណៈរដ្ឋាភិបាលកូន កំពុងជួបបញ្ហាសេដ្ឋកិច្ច»
អត្ថបទពេញនិយម
នយោបាយ
- អ្នកវិភាគថា របបផ្ដាច់ការត្រកូលហ៊ុន នឹងដួលរលំដូចរបបផ្ដាច់ការនៅស៊ីរីដែរ
- ពលរដ្ឋខ្មែរនៅជប៉ុនធ្វើបាតុកម្មជំរុញឱ្យលោក ហ៊ុន ម៉ាណែត ស្ដារលទ្ធិប្រជាធិបតេយ្យឡើងវិញ
- ពលរដ្ឋខ្មែរនៅអាមេរិកធ្វើសមាជទាមទារឲ្យរដ្ឋាភិបាលកម្ពុជា ប្ដឹងករណីកោះគជ់ទៅតុលាការអន្តរជាតិ
- អ្នកឃ្លាំមើលនិងបក្សប្រឆាំងថា គម្រោងធ្វើច្បាប់ដាក់មនុស្សមួយក្រុមជាភេរវកម្មនឹងឡងទៅក្រុមលោក ហ៊ុន សែន វិញ
- អ្នកវិភាគថា ការឱ្យនាវាចម្បាំងអាមេរិកចូលកម្ពុជា គឺជាការសម្របនឹងនយោបាយ ប្រធានាធិបតីថ្មីរបស់អាមេរិក