គណបក្ស​ភ្លើងទៀន​ធ្វើ​សមាជ​ដាក់​ចេញ​យុទ្ធសាស្ត្រ​ផ្សះផ្សា​ជាតិ និង​បញ្ចូល​អតីត​អ្នក​ជាប់ឃុំ​នយោបាយ​ជា​សមាជិក

ដោយ យន់ សាមៀន
2021.11.27
Share on WhatsApp
Share on WhatsApp
គណបក្ស​ភ្លើងទៀន​ធ្វើ​សមាជ​ដាក់​ចេញ​យុទ្ធសាស្ត្រ​ផ្សះផ្សា​ជាតិ និង​បញ្ចូល​អតីត​អ្នក​ជាប់ឃុំ​នយោបាយ​ជា​សមាជិក (កណ្ដាល) លោក ថាច់ សេដ្ឋា អនុប្រធាន​ទី​១ និង​ជា​អ្នកនាំពាក្យ​គណបក្ស​ភ្លើងទៀន ក្នុង​ពិធីសមាជ​គណបក្ស នៅ​សណ្ឋាគារ សាន់វ៉េ (Sunway) រាជធានី​ភ្នំពេញ ​ថ្ងៃទី២៧ ខែ​​​វិច្ឆិកា ឆ្នាំ​២០២១។
រូបភាព​៖ សកម្មជនគណបក្ស​ភ្លើងទៀន

គណបក្ស​ភ្លើងទៀន​នៅ​ថ្ងៃ​ទី២៧ វិច្ឆិកា នេះ បាន​ធ្វើ​សមាជ​ដាក់ចេញ​យុទ្ធសាស្ត្រ​ក្នុង​គោល​ដៅ​ផ្សះផ្សា​ជាតិ និង​បញ្ចូល​អតីត​អ្នក​ជាប់ឃុំ​នយោបាយ​ឱ្យ​ក្លាយជា​សមាជិក​គណៈកម្មការ​នាយក។ អ្នកឃ្លាំមើល​ថា គណបក្ស​នេះ​អាច​នឹង​ទទួល​បាន​ការ​គាំទ្រ​ច្រើន ហើយ​ឈ្នះ​អាសនៈ​ខ្លះ ប៉ុន្តែ​មិនមែន​ជា​ដៃគូ​ប្រកួត​ជាមួយ​បក្ស​កាន់អំណាច​ទេ។

គណបក្ស​ភ្លើងទៀន ​បាន​កែប្រែ​សមាសភាព​ថ្នាក់ដឹកនាំ​បក្ស​ឲ្យ​មាន​អាណត្តិ​ដឹកនាំ​រយៈពេល ​៥​ឆ្នាំ ​ដាក់​ចេញ​យុទ្ធសាស្ត្រ​​ ដើម្បី​ធ្វើ​ការងារ​ផ្សះផ្សា​ជាតិ និង​ស្ដារ​លទ្ធិប្រជាធិបតេយ្យ​ឡើង​វិញ។ ​គណបក្ស​នេះ​ជឿជាក់​ថា តាមរយៈ​សមាជ​លើក​នេះ​ ពលរដ្ឋ​នឹ​ងចូលរួម​ជាមួយ​គណបក្ស​ភ្លើងទៀន​កាន់តែ​ច្រើន​ថែមទៀត។

អនុប្រធាន​ទី​១ និង​ជា​អ្នកនាំពាក្យ​គណបក្ស​ភ្លើងទៀន​លោក ថាច់ សេដ្ឋា ឲ្យ​ដឹង​ថា អង្គ​សមាជ​បាន​បញ្ចូល​អតីត​អ្នក​ជាប់ឃុំ​នយោបាយ​ឲ្យ​ក្លាយជា​សមាជិក​គណៈកម្មការ​នាយក​របស់​គណបក្ស​ ដូចជា អតីត​សមាជិក​ព្រឹទ្ធសភា លោក ហុង សុខហួរ សកម្មជន​បក្ស​ប្រឆាំង លោក ម៉ៃ ហុងស្រៀង លោក គា វិសាល លោក លី សុធារ៉ាយុត្តិ និង​យុវជន គង់ រ៉ៃយ៉ា ជាដើម។ លោក ថាច់ សេដ្ឋា បន្ត​ថា សមាជិក​ថ្មី​ទាំងនេះ សុទ្ធសឹងតែ​ជា​អ្នកតស៊ូ​មតិ​ទាមទារ​ឲ្យ​កម្ពុជា​មាន​លទ្ធិប្រជាធិបតេយ្យ និង​ការ​គោរព​សិទ្ធិមនុស្ស៖ «គាត់​ (សមាជិកដឹង​ច្បាស់​ពី​ជំហរ​របស់​គណបក្ស​ភ្លើងទៀន​ថា គឺជា​គណបក្ស​មួយ​ដែល​មិន​ផ្លាស់ប្ដូរ​ជំហរ រក្សា​ជំហរ​ដើម​តាំងពី​ការ​បង្កើត​គណបក្ស​មក​ឆ្នាំ​១៩៩៥​ រហូត​មក​។ អ៊ីចឹង​គាត់​ឃើញ​អ៊ីចឹង គាត់​មាន​ក្ដី​សង្ឃឹម​ជឿជាក់​ថា នឹង​អាច​ជួយ​ដល់​ប្រទេស​កម្ពុជា​បាន ជួយ​ដល់​ប្រជា​ពលរដ្ឋ​ខ្មែរ​បាន»

សមាជ​របស់​គណបក្ស​ភ្លើងទៀន ធ្វើ​នៅ​សណ្ឋាគារ​សាន់វ៉េ (Sunway) នៅ​ថ្ងៃទី​២៧ វិច្ឆិកា ដោយមាន​ការ​ចូលរួម​ពី​សមាជិក​ជាង​ ៦០នាក់ ដែល​ជា​អ្នកតំណាង​ប្រចាំ​ខេត្ត រាជធានី អ្នកតំណាង​បក្ស​នៅ​ក្រៅ​ប្រទេស តំណាង​ចលនា​ស្ត្រី និង​យុវជន​ជាដើម។ អង្គ​សមាជ​នោះ​ក៏​មាន​តំណាង​ស្ថានទូត​សហភាព​អឺរ៉ុប​ចូលរួម​ឃ្លាំមើល​ដែរ។ ថ្លែង​ក្នុង​អង្គ​សមាជ លោក ថាច់ សេដ្ឋា ប្ដេជ្ញា​ថា ​គណបក្ស​ភ្លើងទៀន​នឹង​ចាប់ផ្ដើម​ធ្វើ​សកម្មភាព​នយោបាយ​ឲ្យ​ខ្លាំងក្លា​វិញ ​ដើម្បី​ឆ្ពោះ​ទៅ​រក​ការ​បោះឆ្នោត​ខាងមុខ​។ លោក​អះអាង​ថា គណបក្ស​ភ្លើង​ទៀន ​គឺ​ជា​ក្ដី​សង្ឃឹម​ចុងក្រោយ​តែមួយគត់​របស់​ពលរដ្ឋ​ដែល​មាន​បំណង​ចង់​បាន​ការផ្លាស់ប្ដូរ​ជា​វិជ្ជមាន​តាម​គោលការណ៍​លទ្ធិប្រជាធិបតេយ្យ​សេរី ស្រប​តាម​រដ្ឋធម្មនុញ្ញ។

បន្ថែម​ពី​នេះ តំណាង​ចលនា​យុវជន​គណបក្ស​ភ្លើងទៀន និង​ជា​អតីត​អ្នក​ជាប់ឃុំ​ចំនួន ២​លើក​ដោយសារ​ការ​បញ្ចេញ​មតិ លោក គង់ រ៉ៃយ៉ា អំពាវនាវ​ដល់​យុវជន​គ្រប់​និន្នាការ​នយោបាយ​ចូលរួម​ជាមួយ​គណបក្ស​ភ្លើងទៀន ដើម្បី​រួមគ្នា​ស្ដារ​លទ្ធិ​ប្រជាធិបតេយ្យ​នៅ​កម្ពុជា​។ លោក​សន្យា​ថា គណបក្ស​ភ្លើងទៀន​នឹង​ជួយ​ពង្រឹង​សមត្ថភាព​ដល់​យុវជន និង​ផ្ដល់​ឱកាស​ដល់​យុវជន​ទាំងអស់​ឲ្យ​បាន​បញ្ចេញ​សមត្ថភាព​គ្រប់ៗ​ គ្នា៖ «គណបក្ស​ភ្លើងទៀន​ថ្ងៃ​នេះ​អំពាវនាវ​ឲ្យ​យុវជន​ដែល​មាន​សមត្ថភាព​ទាំងអស់​ចូលរួម​ជាមួយនឹង​គណ​បក្ស​ភ្លើងទៀន​ដើម្បី​រុញ​នាវា​កម្ពុជា​ឲ្យ​ទៅមុខ​។ ជា​ពិសេស​គឺ​ស្ដារ​លទ្ធិ​ប្រជាធិបតេយ្យ​នៅ​កម្ពុជា»

Party_Congress_Kong_Raya_2021-11-27_Treetop_៣.jpg
លោក គង់ រ៉ៃយ៉ា តំណាង​ចលនា​យុវជន​គណបក្ស​ភ្លើងទៀន និង​ជា​អតីត​អ្នក​ជាប់ឃុំ​ចំនួន ២​លើក​ដោយសារ​ការ​បញ្ចេញ​មតិ។ រូប៖ សកម្មជនគណបក្ស​ភ្លើងទៀន

ទាក់ទង​នឹង​រឿង​នេះ វិទ្យុ​អាស៊ីសេរី​មិន​អាច​សុំ​ការ​បញ្ជាក់​ពី​អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥសាន បាន​ទេ​នៅ​ថ្ងៃទី២៧ វិច្ឆិកា​។ តែ​យ៉ាងណា លោក​ធ្លាប់​បញ្ជាក់​ថា គណបក្ស​ដែល​មាន​ឈ្មោះ​ក្នុង​បញ្ជី​ក្រសួង​មហាផ្ទៃ​អាច​ធ្វើ​សកម្មភាព​ស្របច្បាប់​ដោយ​សេរី​នៅ​កម្ពុជា​បាន ហើយ​បក្ស​កាន់អំណាច​មិន​បារម្ភ​ពី​គណបក្ស​ផ្សេង​ទេ។

ជុំវិញ​ការ​ប្រកាស​ធ្វើ​សកម្មភាព​ខ្លាំងក្លា​ឡើងវិញ​នេះ អ្នក​សង្កេតការណ៍​យល់​ថា គណបក្ស​ភ្លើងទៀន​បាន​បង្ហាញ​ភាព​លេច​ត្រដែត​ឡើង និង​ទទួល​បាន​សន្ទុះ​គាំទ្រ​យ៉ាង​លឿន​ពី​អតីត​សកម្មជន​បក្ស​ប្រឆាំង និង​ពលរដ្ឋ ដោយសារ​ប្រជាប្រិយភាព​របស់​មេដឹកនាំ​បក្ស​ប្រឆាំង លោក សម រង្ស៊ី។

អ្នក​សិក្សា​ផ្នែក​ច្បាប់ លោក វ៉ន ចាន់ឡូត យល់​ថា ទោះបីជា​លោក សម រង្ស៊ី មិន​ហ៊ាន​ប្រកាស​ជា​ចំហ​ក្នុង​ការ​ជួយ​គាំទ្រ​គណបក្ស​ភ្លើងទៀន​ជា​ផ្លូវការ​ក៏ដោយ ក៏​ពលរដ្ឋ​អាច​ដឹង និង​ជឿជាក់​ទៅលើ​មន្ត្រី​មួយចំនួន​ដែល​ស្និទ្ធ​នឹង​លោក សម រង្ស៊ី បាន​ដែរ​។ លោក វ៉ន ចាន់ឡូត បន្ត​ថា វត្តមាន​របស់​អតីត​អ្នក​នយោបាយ​ជាប់ឃុំ​ក្នុង​គណបក្ស​ភ្លើងទៀន​នេះ នឹង​ជួយ​សម្រួល​ដល់​ស្ថានការណ៍​កម្ពុជា​ឲ្យ​មាន​ភាព​ប្រសើរ​ឡើងវិញ​ខ្លះ ហើយ​បក្ស​នេះ​នឹង​ក្លាយជា​លំនឹង និង​ជា​កន្លែង​ប្រមូលផ្ដុំ​ស្របច្បាប់​សម្រាប់​អតីត​អ្នក​ស្មោះស្ម័គ្រ​នឹង​បក្ស​ប្រឆាំង៖ «ការបោះឆ្នោត​ក្រុម​ប្រឹក្សាឃុំ​សង្កាត់ ២០២២​ នេះ ២០២៣​ ជ្រើសរើស​សភា​វា​ដូចជា​ការ​លេង​អុក​សាជាថ្មី​អ៊ីចឹង ដោយសារតែ​គណបក្ស​ប្រជាជន​បាន​យកដៃ​គ្រវាស​នូវ​អុក​គូ​ប្រជែង​របស់​ខ្លួន​នោះ ដែល​អ្នកលេង​ជាមួយ​ខ្លួន​គឺ​លោក សម រង្ស៊ី និង​លោក កឹម សុខា គឺ​បិទ​មិន​ឲ្យ​ចូល​លេង​តែម្ដង ហើយ​យក​អ្នកថ្មី​មកលេង​ជំនួស​ក្នុង​រង្វង់​នៃ​ក្ដារ​ចាស់»

គណបក្ស​ភ្លើងទៀន មាន​ឈ្មោះ​ដើម​មកពី​គណបក្ស​ជាតិខ្មែរ​ត្រូវ​បាន​បង្កើត​ដោយ​លោក សម រង្ស៊ី នៅ​ឆ្នាំ​១៩៩៥។ ក្រោយ​មក​រដ្ឋាភិបាល​បាន​កែប្រែ​ច្បាប់​ចាប់បង្ខំ​ឲ្យ​បក្ស​នេះ​ប្ដូរ​ឈ្មោះ​ជា​គណបក្ស សម រង្ស៊ី នៅ​ឆ្នាំ​១៩៩៨។ នៅ​ឆ្នាំ​២០១៧ ​រដ្ឋាភិបាល​បាន​កែប្រែ​ច្បាប់​នយោបាយ​ម្ដងទៀត ដែល​បង្ខំ​ឲ្យ​គណបក្ស​នេះ​សម្រេច​ប្ដូរ​ឈ្មោះ​ទៅតាម​រូប​សញ្ញា​គឺ​គណបក្ស​ភ្លើងទៀន​រហូតដល់​សព្វ​ថ្ងៃ​។ គណបក្ស​នេះ ក៏​កំពុង​ត្រូវ​បង្ខំចិត្ត​ម្ដងទៀត​ក្នុង​ការ​រើ​ទីស្នាក់ការ​ខ្លួន​ចេញពី​អគារ​គណបក្ស​សង្គ្រោះ​ជាតិ​នៅ​សង្កាត់​ចាក់អង្រែលើ ខណ្ឌមានជ័យ​ដែរ ព្រោះ​តុលា​ការដែល​ស្ថិត​ក្រោម​ឥទ្ធិពល​របស់​បក្ស​កាន់​អំណាច​បាន​រឹបអូស​ទីស្នាក់ការ​បក្ស​សង្គ្រោះ​ជាតិ​ដើម្បី​លក់​ឡាយឡុង យក​លុយ​ឱ្យ​ក្រុម​មេដឹកនាំ​បក្ស​កាន់​អំណាច។ លោក ថាច់ សេដ្ឋា ប្រាប់​ថា ទីស្នាក់ការ​បក្ស​ភ្លើងទៀន​បណ្ដោះអាសន្ន គឺ​នៅផ្ទះ​របស់​ប្រធាន​គណបក្ស លោក ទាវ វណ្ណុល ដែល​ស្ថិត​ក្នុង​ខណ្ឌ​ច្បារអំពៅ៕

Party_Congress_2021_11_27_Treetop.jpg
សមាជ​របស់​គណបក្ស​ភ្លើងទៀន ធ្វើ​នៅ​សណ្ឋាគារ​សាន់វ៉េ (Sunway) នៅ​ថ្ងៃទី​២៧ វិច្ឆិកា ដោយមាន​ការ​ចូលរួម​ពី​សមាជិក​ជាង​ ៦០នាក់ ដែល​ជា​អ្នកតំណាង​ប្រចាំ​ខេត្ត រាជធានី អ្នកតំណាង​បក្ស​នៅ​ក្រៅ​ប្រទេស តំណាង​ចលនា​ស្ត្រី និង​យុវជន​។ រូប៖ សកម្មជនភ្លើងទៀន

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ពលរដ្ឋ​ខ្មែរ​អាមេរិក​កាំង​ម្នាក់​​យក​ស្បែក​ជើង​គប់​លោក ​ហ៊ុន សែន​ ក្នុង​ពេល​ជួប​អ្នក​គាំទ្រ​នៅ​សហរដ្ឋអាមេរិក
រឿង​ដែល​គេ​អាន​​ច្រើន​បំផុត
នយោបាយ
ពលរដ្ឋ​ខ្មែរ​អាមេរិក​កាំង​ម្នាក់​​យក​ស្បែក​ជើង​គប់​លោក ​ហ៊ុន សែន​ ក្នុង​ពេល​ជួប​អ្នក​គាំទ្រ​នៅ​សហរដ្ឋអាមេរិក
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល