សមត្ថកិច្ចរាជធានីភ្នំពេញ បានចាប់ខ្លួនមន្ត្រីជាន់ខ្ពស់គណបក្សភ្លើងទៀនពីរនាក់ កាលពីយប់ថ្ងៃទី១៤ កក្កដា។
អ្នកនាំពាក្យគណបក្សភ្លើងទៀន លោក គីម សួរភីរិទ្ធិ ឲ្យដឹងថា សមត្ថកិច្ចរាជធានីភ្នំពេញ បានឃាត់ខ្លួនប្រធានប្រតិបត្តិគណបក្សភ្លើងទៀន លោក ប៊ុន ខេត និងប្រធានក្រុមការងារគណបក្សរាជធានីភ្នំពេញ លោក លី រី ទាំងមិនដឹងមូលហេតុហេតុ។
ភរិយាលោក ប៊ុន ខេត ឲ្យដឹងថា សមត្ថកិច្ចមានគ្នាប្រមាណ២០នាក់ បានឡោមព័ន្ធផ្ទះអ្នកស្រី នៅសង្កាត់អូរបែកក្អម ខណ្ឌសែនសុខ វេលាម៉ោង ៨យប់ ថ្ងៃទី១៤ កក្កដា។ ភ្លាមៗនេះ ប៉ូលិសប្រមាណបីនាក់បានសម្រុកចូលទៅក្នុងផ្ទះអ្នកស្រី ហើយចាប់ខ្លួនប្ដីអ្នកស្រី គឺលោក ប៊ុន ខេត តែម្ដង។ អ្នកស្រីអះអាងថា ប៉ូលិសមិនបានបង្ហាញដីកាចាប់ខ្លួនពីតុលាការឡើយ។
ភរិយាលោក ប៊ុន ខេត៖ «ខ្ញុំអត់ដឹងអីទេបង។ ប៉ូលិសបីនាក់ចូលមកសួរខ្ញុំ ថា ប្ដីខ្ញុំនៅឯណា?ស្រាប់តែចៅខ្ញុំឆ្លើយប្រាប់ថា តានៅខាងក្នុង។ ស្រាប់តែប៉ូលិសនៅចូលទៅចាប់ទាំងគ្មានដីកាអីទាំងអស់។ ហើយប្ដីខ្ញុំថា មិនបាច់ដាក់ខ្នោះខ្ញុំទេ ចាប់ខ្ញុំយកទៅទីណាក៏បានដែរ ទុកឲ្យខ្ញុំដើរទៅដោយខ្លួនឯង។ ប៉ូលិសក៏បណ្ដើរប្ដីខ្ញុំចេញពីផ្ទះ។ ប៉ូលិសច្រើនណាស់ឡើងខ្មៅជុំវិញផ្ទះ ប្រហែលជា២០ទៅ៣០នាក់ឯណោះ»។
វិទ្យុអាស៊ីសេរី មិនអាចទាក់ទងអធិការខណ្ឌសែនសុខ លោក ហួរ ម៉េងវ៉ាង ដើម្បីសួរអំពីបញ្ហានេះបានទេ កាលពីយប់ថ្ងៃទី១៤ កក្កដា។
លោក ប៊ុន ខេត ប្រធានប្រតិបត្តិគណបក្សភ្លើងទៀនប្រចាំនៅរាជធានីភ្នំពេញ និងជាចៅសង្កាត់រង សង្កាត់អូរបែកក្អម។ តុលាការធ្លាប់ចាប់ខ្លួនម្ដងរួចមកហើយ កាលពីឆ្នាំ២០១៩ ទាក់ទងនឹងផែនការ ធ្វើមាតុភូមិនិវត្តន៍របស់លោក សម រង្ស៊ី។ លោកបានជាប់ពន្ធនាគារជាង ២ឆ្នាំទើបតុលាការដោះលែងវិញ កាលណោះ។
មកទល់ម៉ោង១២យប់នេះ ក្រុមគ្រួសារមិនទាន់ដឹងថា សមត្ថកិច្ចបញ្ជូនលោក ប៊ុន ខេត និង លោក លី រី ទៅឃុំខ្លួននៅទីណានៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។